Ŵawovwirani Kuti Ŵawelere ku Mskambo Mwaluŵiro
“Tilute tiye kwa njani? ndimwe muli nagho mazgu gha Umoyo wamuyirayira.”—YOH. 6:68.
1. Kasi Petrosi wakayowoyaci apo ŵasambiri ŵanandi ŵakaleka Yesu?
PANYENGO yinyake ŵasambiri ŵanandi ŵa Yesu Khristu ŵakamuleka cifukwa cakuti ŵakakhuŵara na cisambizgo cinyake ico wakasambizga. Iyo wakafumba ŵapositole ŵake kuti: “Imwe namwe kasi mukukhumba kuluta?” Petrosi wakazgora kuti: “Fumu, tilute tiye kwa njani? ndimwe muli nagho mazgu gha umoyo wamuyirayira.” (Yoh. 6:51-69) Kukaŵavya kunyake kwakuti ŵalute. Pa nyengo yira, cisopa ca Ciyuda cikaŵavya “mazgu gha umoyo wamuyirayira” ndipo mazuŵa ghano napo Babulone Mukuru, uwo mbufumu wa pa caru cose wa cisopa cautesi, nayo walije mazgu gha umoyo wamuyirayira. Waliyose uyo wali kuleka mskambo wa Ciuta kweni wakukhumba kukondweska Yehova, ‘ora lafika kale lakuti wapamphuke mu tulo’ na kuwelera mu ciŵaya.—Rom. 13:11.
2. Kasi mupharazgi wangacita wuli para waphalirika nkhani izo zingakhumbikwira ŵalara?
2 Yehova wakalongora kuti wakufipira mtima mberere zakuzgeŵa za Israyeli. (Ŵazgani Ezekiel 34:15, 16.) Mwakuyana waka, ŵalara Ŵacikhristu ŵali na khumbo ndiposo udindo wa kovwira ŵanthu ŵa nga ni mberere awo ŵaleka mskambo. Para ŵasankha mupharazgi kuti wasambirenge na munthu wakulopwa uyo wakukhumba wovwiri, kasi nchivici ico mupharazgi wakwenera kucita para wamanya kuti munthu uyu, wali kucita kwananga kukuru? M’malo mwa kupeleka ulongozgi pa nkhani izo zingakhumbikwira ŵalara, mupharazgi wangamuphalira kuti wakayowoye ku ŵalara. Para wandacite ici, mupharazgi wakwenera kukaŵaphalira ndiyo.—Lev. 5:1; Gal. 6:1.
3. Kasi munthu uyo wakaŵa na mberere 100 wakacita wuli wakati wayisanga mberere iyo yikazgeŵa?
3 Mu nkhani iyo yajumpha, mukazunurika ntharika ya Yesu yakukhwaskana na munthu uyo wakaŵa na mberere 100. Apo yimoza yikazgeŵa, wakaleka mberere 99 na kwamba kupenja mberere yakuzgeŵa. Munthu uyu wakakondwa comene wakati wayisanga. (Luka 15:4-7) Nase ndimo tikukondwera para mberere yinyake ya Ciuta iyo yikaleka kuwungana na mpingo yawelera ku mskambo. Cifukwa ca citemwa, ŵalara ndiposo ŵabali na ŵadumbu ŵanyake mu mpingo ŵakuyendera munthu uyo walopwa. Nawo ŵakukhumba kuti wawelere mu ciŵaya mwakuti Ciuta wambe kumovwira, kumuvikilira, na kumutumbika. (Dute. 33:27; Sal. 91:14; Zinth. 10:22) Para ŵalara panji ŵabali na ŵadumbu ŵaŵa na mwaŵi wakuti ŵakawovwire munthu wakulopwa, kasi nchivici ico ŵangacita?
4. Ni fundo wuli iyo tingayisanga pa Ŵagalatiya 6:2, 5?
4 Mutepanji ŵangawovwira munthu kuwelera ku mpingo mwa kumuphalira kuti Yehova wakuzitemwa mberere zake ndipo wakukhumba kuti ticitenge vinthu ivyo tingatondeka kufiska yayi. Ivi vikusazgapo kuŵazga Malemba, kuluta ku maungano Ghacikhristu, na kupharazga makani ghawemi gha Ufumu. Cingaŵa ciwemi kuŵazga nayo lemba la Ŵagalatiya 6:2, 5 na kuyowoya kuti Ŵakhristu ŵangawovwirana kuyegha vizitu, kweni “munthu yose wati wayeghenge mphingo yake” yakukhwaskana na milimo yauzimu. Palije munthu uyo wangagomezgekera ise kwa Ciuta.
Kasi “Vyenjezgo vya Umoyo” Ndivyo Vyaŵalopweska?
5, 6. (a) Cifukwa wuli nchakuzirwa kuti titegherezgenge mwakupwelelera para Mkhristu wakulopwa wakuyowoya? (b) Kasi mungawovwira wuli ŵakulopwa kuwona uheni wa kuleka kuwungana na ŵanthu ŵa Ciuta?
5 Kuti ŵalara ndiposo ŵapharazgi ŵanyake ŵakukhwima ŵamanye umo ŵangawovwilira ŵasopi ŵanyawo awo ŵalopwa, ŵakwenera kutegherezga mwakupwelelera para ŵakulopwa ŵakulongosora ivyo vikuŵasuzga. Tiyelezgere kuti ndimwe mulara ndipo mwaluta kukacezgera ŵakutorana awo ŵakukhala ku maungano cifukwa ca “vyenjezgo vya umoyo.” (Luka 21:34) Suzgo la ndarama panji kusazgikira kwa mulimo wa kupwelelera mbumba ndivyo vingaŵa kuti vyapangiska kuti ŵaleke kucita milimo yawo Yacikhristu. Ŵangakhumba kuti ŵapumulepo cifukwa ca milimo iyi, kweni imwe mungaŵaphalira kuti kujipatura ndiko kungamazga masuzgo yayi. (Ŵazgani Zintharika 18:1.) Mwavinjeru mungaŵafumba kuti: “Kasi sono muli ŵakukondwa comene kuluska apo mukawungananga na mpingo? Kasi sono ndipo umoyo wa mbumba yinu uli makora? Kasi cimwemwe ca Yehova cicali kuŵa nkhongono zinu?”—Neh. 8:10.
6 Usange ŵakulopwa ŵangaghanaghanira mafumbo agha, ŵangawona kuti ŵalopwa nadi mwauzimu ndipo cimwemwe cawo camara cifukwa cakuti ŵaleka kuwungana na mpingo. (Mat. 5:3; Heb. 10:24, 25) Cingaŵa camacitiko kuŵawovwira kumanya kuti ŵalije cimwemwe cifukwa cakuti ŵaleka kupharazga makani ghawemi. (Mat. 28:19, 20) Ntheura, kasi nchinthu wuli camahara ico wakulopwa wangacita?
7. Kasi awo ŵali kuleka mskambo tingaŵaciska kucita vici?
7 Yesu wakati: “Mujicenjelere, mzire pakunji mitima yinu yizotope na kudindiŵara, na kuloŵera, na vyenjezgo vya umoyo uno . . . Kweni imwe ŵani maso nyengo zose, mulombenge kuti mukhwimiskike kuphokwa ku vyose vyeneivi vyaneng’enera kucitika.” (Luka 21:34-36) Awo ŵaleka mskambo ndipo ŵakukhumba kuti ŵaŵeso ŵacimwemwe nga mphakwamba, ŵangaciskika kulomba mzimu utuŵa ndiposo wovwiri wa Ciuta, na kucita mwakuyana na malurombo ghawo.—Luka 11:13.
Kasi Ŵakakhuŵara?
8, 9. Kasi mulara wangadumbiskana nayo wuli munthu uyo wakakhuŵara?
8 Pakuti ŵanthu mbambura kufikapo, nyengo zinyake ŵakwambana ndipo munyake wangakhuŵara. Panji ŵanyake ŵakakhuŵara apo munthu munyake wakucindikika mu mpingo wakacita vinthu mwakupambana na ivyo Baibolo likuyowoya. Para munthu uyo wali kulopwa wali kukhuŵara na vinthu nga ni ivi, mulara uyo wamwendera wangamuphalira kuti Yehova wakukhuŵazga munthu cara. Ntheura nchifukwa wuli munthu wangamazga ubwezi wake na Ciuta ndiposo gulu lake? M’malo mwake, asi munthu wakwenera kulutilira kuteŵetera Ciuta, pakumanya kuti “Mweruzgi wa caru cose” wazamunyolora vinthu mu nthowa yakwenelera? (Gen. 18:25; Kol. 3:23-25) Para munthu wakhuŵara pa cigodo na kuwa, wakukhala penepapo yayi, kweni wakuyezgayezga kuwuka.
9 Kuti wamovwire kuwelera ku mskambo, mulara wangayowoya kuti para nyengo yajumphapo, ŵanandi ŵakuwona kuti ico cikaŵakhuŵazga nchambura kuzirwa. Nakuti ico cikaŵapangiska kuti ŵakhuŵare cingaŵa kuti cili kumara. Usange wakulopwa wali kukhuŵara cifukwa cakuti wakacenyeka, kulomba na kulanguruka kungamovwira kuti wamanye kuti cilipo ico wakabuda ndipo wakenera kukhuŵara yayi cifukwa ca kucenyeka.—Sal. 119:165; Heb. 12:5-13.
Kasi Wakakhuŵara na Cisambizgo Cinyake?
10, 11. Ni fundo wuli izo zingaŵa zakovwira pakovwira munthu uyo wakakolerana yayi na cisambizgo cinyake cakufuma mu Baibolo?
10 Ŵanyake ŵakaleka mskambo wa Ciuta cifukwa cakuti ŵakakolerana yayi na cisambizgo cinyake cakufuma mu Malemba. Ŵaisrayeli awo ŵakawombokwa ku wuzga ku Eguputo, “ŵakaluwa luŵiro milimo” iyo Ciuta wakaŵacitira, ndipo “ŵakakana kulindizga fundo zake.” (Sal. 106:13) Cingaŵa cakovwira kukumbuska wakulopwa kuti “muzga wa magomezgeko na wa vinjeru” wakupeleka cakurya ciwemi comene cauzimu. (Mat. 24:45) Wakulopwa uyo, wakasambira unenesko cifukwa ca cakurya ici. Ntheura walekeraci kufwilirapo kuti wambeso kwenda mu unenesko?—2 Yoh. 4.
11 Para ŵalara ŵakuyezgayezga kovwira ŵanthu awo ŵaleka mskambo wa Ciuta, ŵangayowoya za ŵasambiri awo ŵakaleka Yesu cifukwa ca kuleka kukolerana na cisambizgo cinyake ico wakasambizga. (Yoh. 6:53, 66) Cifukwa ca kuleka kwenda na Khristu na ŵalondezgi ŵake ŵakugomezgeka, ŵakadumura ubwezi wawo na Ciuta ndipo ŵakaleka kuŵa na cimwemwe. Kasi awo ŵaleka kuwungana na mpingo Wacikhristu, ŵasanga kunyake kwakuti ŵangakarya cakurya cinandi cauzimu? Yayi. Kulije kunyake.
Kasi Wakacita Kwananga Kukuru?
12, 13. Usange munthu uyo waleka mskambo wazomera kuti wali kucita kwananga kukuru, kasi wangawovwirika wuli?
12 Ŵanyake ŵakuleka kupharazga na kuwungana cifukwa cakuti ŵacita kwananga kukuru. Ŵangawona kuti para ŵangakaphalira ŵalara kwananga kwawo mbwenu ŵangasezgeka. Kweni ŵangasezgeka yayi mu mpingo usange ŵalekerathu kwananga kwawo ndipo ŵalapa mwakufumira pasi pa mtima. (2 Kor. 7:10, 11) M’malo mwake ŵapokelerekenge na mawoko ghaŵiri, ndipo ŵalara ŵaŵawovwirenge mwauzimu.
13 Usange ndimwe mupharazgi wakukhwima ndipo mwapempheka kuti movwire munthu uyo walopwa mwauzimu, kasi mukwenera kucitaci usange wamuphalirani kuti wakacita kwananga kukuru? Nga umo ndime zakwambilira zayowoyera kale, m’malo mwa kumarana nayo mwekha nkhani iyo, muphalirani kuti wakaphalire ŵalara. Usange wakukhumba yayi kucita ntheura, mulongorenge kuti mukufipira mtima zina la Yehova na umoyo wauzimu wa mpingo usange mungacita mwakuyana na ulongozgi uwo tikupokera kufuma kwa Ciuta pa nkhani izi. (Ŵazgani Leviticus 5:1.) Ŵalara ŵazamumanya umo ŵangawovwilira waliyose uyo wakukhumba kuwelera ku mskambo na kucita vinthu mwakukolerana na khumbo la Ciuta. Nyengo zinyake nchenyo yacitemwa yingakhumbikwa. (Heb. 12:7-11) Usange munthu wazomera kuti wali kunangira Ciuta, walekerathu kwananga kwake, ndipo walapa nadi, ŵalara ŵamovwirenge, ndipo Yehova wangamugowokera.—Yes. 1:18; 55:7; Yak. 5:13-16.
Cikuŵa Cakukondweska Comene Para Mwana Wawelera
14. Mu mazgu ghinu na ghinu yowoyani ntharika ya Yesu ya mwana wakuzgeŵa.
14 Munthu uyo wapika mulimo wa kovwira mberere yakuzgeŵa, wangayowoya za ntharika ya Yesu iyo yili pa Luka 15:11-24. Mu ntharika iyi, musepuka munyake wakananga cuma cake pa vinthu vyawakawaka. Pamanyuma pake wakamanya kuti wakacitanga viheni. Njara yikamukoma, wakakumbuka kukwake, ndipo wakasankha kuti wawelere kukwake. Apo wakizanga patali, awiske ŵakamuwona, ŵakamucimbilira na kumuwira pa singo, ŵakamufyofyontha, ndipo ŵakaŵa na cimwemwe cikuru comene. Para uyo waleka mskambo waghanaghanirapo pa ntharika iyi, wangawelera mu ciŵaya. Pakuti caru ici ciparanyikenge sonosono, wakwenera kuwelera ‘kukaya’ mwaluŵiro.
15. Ni vifukwa wuli ivyo ŵanyake ŵakulekera kuwungana na mpingo?
15 Ŵanthu ŵanandi awo ŵakuleka kuwungana na mpingo ŵakuyana nkhanira ndendende na mwana ŵakuzgeŵa yayi. Ŵanyake mskambo ŵakuwuleka pacokopacoko nga ni umo boti ilo ŵaliyimika mumphepete mwa nyanja likwendera lekha na kunjira pacokopacoko mu nyanja. Ŵanyake ŵakufipa mtima comene na vyenjezgo vya umoyo mwakuti ŵakuluwa vinthu vyauzimu. Ŵanyakeso ŵakukhuŵara na munthu munyake mu mpingo, panji cifukwa cakuti ŵandakolerane na cisambizgo cinyake ca mu Malemba. Ŵacoko waka ŵakucita kwananga kukuru. Ndipouli, ulongozgi uwo wapelekeka wakukhwaskana na umo tingacitira na nkhani izi, ungamovwirani kuti movwire awo ŵaleka ciŵaya cifukwa ca vifukwa ivyo vyayowoyeka panji vinyake, kuti ŵawelere ku mskambo pambere nyengo yindamare.
“Wapokelereka Kukaya Kwako Mwana Wane”
16-18. (a) Kasi mulara munyake wakawovwira wuli mbali uyo wakalopwa kwa vilimika vinandi? (b) Cifukwa wuli mbali uyu wakalopwa, kasi wakawovwirika wuli, ndipo mpingo ukamupokelera wuli?
16 Mulara munyake wakuti: “Wupu withu wa ŵalara ngwakunweka comene kwendera awo ŵalopwa. Nkhaghanaghana za mbali munyake uyo nkhasambiranga nayo na kumovwira kuti wamanye unenesko. Wakalopwa kwa vilimika 25 ndipo wakaŵa mu suzgo likuru comene, ntheura nkhamulongosolera umo kulondezga fundo za mu Baibolo kungamovwilira. Pakati pajumpha nyengo, wakamba kwiza ku Nyumba ya Ufumu ndipo wakazomera kusambira nayo Baibolo mwakuti khumbo lake la kuwelera ku mskambo lileke kuzizima.”
17 Cifukwa wuli mbali uyu wakalopwa? Iyo wakuti: “Nkhamba kutangwanika comene na vinthu vya caru kuluska vinthu vyauzimu. Ndipo nkhaleka kucita sambiro la namwene, kupharazga, na kwiza ku maungano. Mbwenu nkhazakaculukira waka kuti naleka kuŵa pamoza na mpingo. Kweni nkhawovwirika cifukwa ca citemwa na lusungu ulo mulara wakanilongora.” Masuzgo gha mbali uyu, ghakamba kucepa wakati wazomera sambiro la Baibolo. Iyo wakuti: “Nkhamanya kuti citemwa na ulongozgi wa Yehova ndiposo gulu lake vikanipambanga.”
18 Kasi mpingo ukamupokelera wuli mbali uyu? Iyo wakuti: “Nkhujiwona nga ni mwana uyo Yesu Khristu wakayowoya mu ntharika. Yumoza mwa ŵadumbu ŵacekuru, uyo wakaŵa kuti wakuteŵetera kale Yehova apo nkhamumanyira, vilimika 30 kumasinda, ndipo sono wacali wakukhora, wakaniphalira kuti ‘wapokelereka kukaya kwako Mwana wane.’ Mazgu agha ghakanikhwaska comene. Nkhaŵa nadi pakaya pane. Ndipo nkhuwonga comene cifukwa ca citemwa, lusungu, kuzizipizga, na kunighanaghanira ivyo mulara uyu ndiposo mpingo wose ukanilongora. Nkhawovwirika kuti niwelere ku mskambo cifukwa cakuti iwo ŵakutemwa Yehova na mzengezgani.”
Ŵaciskani Kuti Ŵacitepo Kanthu Sono
19, 20. Kasi ŵakulopwa mungaŵawovwira wuli kuti ŵawelere ku mskambo kwambura kucedwa ndipo mungaŵalongosolera wuli kuti Ciuta wakukhumba kuti ticitenge vinthu vyekha ivyo tingafiska?
19 Tili mu mazuŵa gha kuumaliro, ndipo umaliro wa caru ici uli pafupi comene. Mwantheura, ciskani awo ŵali kulopwa kuti ŵizenge ku maungano. Ŵaciskani kuti ŵambe mwaluŵiro. Ŵaphalirani kuti Satana wakukhumba kuti wanange ubwezi wawo na Ciuta na kuŵapangiska kuti ŵaghanaghanenge kuti masuzgo ghawo ghangamara para ŵaleka kusopa kwaunenesko. Mungaŵasimikizgira kuti ŵangaŵa ŵakukondwa pekha para ŵangaŵa ŵasambiri ŵakugomezgeka ŵa Yesu.—Ŵazgani Mateyu 11:28-30.
20 Kumbuskani wakulopwa kuti Ciuta wakukhumba kuti ticitenge vinthu ivyo tingafiska. Apo ŵanthu ŵanyake ŵakasuska Mariya, mudumbu wa Lazaro, cifukwa ca kuphakazga Yesu mafuta ghakudura, apo kukakhala nyengo yicoko waka kuti wafwe, Iyo wakati: “Mulekani. . . . Ico wamanya kucita wacicita.” (Mrk. 14:6-8) Yesu wakalumba cokoro cikavu ico cikapeleka tundarama tucoko comene pa tempele. Cokoro ici naco cikacita ivyo cingafiska. (Luka 21:1-4) Taŵanandi tingafiska kwiza ku maungano gha mpingo na kupharazga makani ghawemi gha Ufumu. Na wovwiri wa Yehova, ŵanthu ŵanandi awo ŵalopwa ŵangamba kwiza ku maungano na kupharazga.
21, 22. Kasi awo ŵakuwelera kwa Yehova mungaŵasimikizgira vici?
21 Usange munthu wa nga ni mberere uyo waleka mskambo wakopa kukumanaso na ŵabali, mungamukumbuska za kukondwa uko kukaŵapo apo mwana wakuzgeŵa wakawelera kukwake. Awo ŵakuwelera ku mpingo nawo ŵakupangiska kuti mpingo ukondwe comene. Ŵaciskani kuti ŵacitepo kanthu sono kuti ŵimikane na Dyabulosi na kusendelera kwa Ciuta.—Yak. 4:7, 8.
22 Ŵanthu awo ŵawelerenge kwa Yehova ŵapokelerekenge na mawoko ghaŵiri. (Cit. 3:40) Nchakuwonekerathu kuti vinthu ivyo ŵakacitanga kale pakuteŵetera Ciuta vikaŵapanga cimwemwe cikuru comene. Munthazi muli vitumbiko vyamaseŵera yayi kwa awo ŵawelera ku mskambo mwaluŵiro.
Kasi Mungazgora Wuli?
• Kasi mungamovwira wuli Mkhristu uyo wakakhuŵara ndipo wali kulopwa?
• Ni fundo wuli izo mungawovwilira munthu uyo wali kuleka mskambo wa Ciuta cifukwa ca kuleka kukolerana na cisambizgo cinyake?
• Kasi mungawovwira wuli munthu uyo wakugongowa kuwelera ku mpingo?
[Cithuzithuzi pa peji 13]
Tegherezgani mwakupwelelera para Mkhristu wakulopwa wakuyowoya
[Cithuzithuzi pa peji 15]
Munthu uyo walopwa wangakhuŵilizgika kuti wawelere ku mskambo usange wangaghanaghanira za ntharika ya Yesu ya mwana wakuzgeŵa