Sendelerani kwa Ciuta
Mlengi Wakwenelera Kulumbika
KASI muli kujifumbapo kuti, ‘Cifukwa wuli tili kulengeka?’ Awo ŵakugomezga yayi kuti Ciuta ndiyo wali kutilenga ŵangasanga yayi zgoro la fumbo ili. Kweni nchakusuzga yayi kwa awo ŵakugomezga kuti Yehova Ciuta ndiyo ni Mlengi withu. (Salmo 36:9) Ŵakumanya kuti wali kutilenga waka yayi. Cifukwa ico wali kutilengera calongosoreka pa Civumbuzi 4:11. Tiyeni tisande ivyo mpositole Yohane wakalemba, mwakuti timanye cifukwa ico tili kulengekera.
Yohane wakalemba mazgu gha vilengiwa vyakucanya ivyo vikimbanga kulumba Ciuta, kuti: “Ŵakwenelera ndimwe, Fumu yithu na Ciuta withu, kupokera nchindi na thumbiko na nkhongono: Pakuti Imwe mukalenga vyose, ndipo cifukwa ca khumbo linu vikaŵako, ndipo vikalengeka.” Cifukwa wuli Yehova yekha ndiyo ngwakwenelera kulumbika nthena? Cifukwa nchakuti ndiyo ‘wali kulenga vyose.’ Ipo kasi vilengiwa vyake vya mahara vikwenera kucitaci?
Yehova wakuyowoyeka kuti ngwakwenelera “kupokera” nchindi, thumbiko na nkhongono. Palije uyo wangakayika kuti Ciuta ndiyo nadi ngwakwenelera comene kupika nchindi, thumbiko na nkhongono. Kweni ŵanthu ŵanandi ŵakuzomerezga yayi kuti Ciuta ndiyo ni Mlengi. Nangauli vili nthena, kweni pali ŵanthu awo ŵakuwona “kaŵiro kake ako nkhambura kuwoneka” kwizira mu vinthu ivyo wali kulenga. (Ŵaroma 1:20) Na mtima wakuzura na viwongo, ŵanthu aŵa ŵakupa Yehova nchindi na thumbiko. Ŵakupharazgira wose awo ŵangapulika, kuti Yehova ndiyo wali kulenga vinthu vyose mwakuzizwiska, antheura ndiyo pera ngwakwenelera kumopa na kumucindika.—Salmo 19:1, 2; 139:14.
Kasi awo ŵakusopa Yehova wakumupa wuli nkhongono? Mbunenesko kuti palije cilengiwa ico cingapeleka nkhongono kwa Mlengi wankhongono zose. (Yesaya 40:25, 26) Ndipouli, pakuti tili kulengeka mu cikozgo ca Ciuta, tili na mikhaliro yakukozgana na yake, ndipo umoza wa iyo ni nkhongono. (Genesis 1:27) Usange tikuwonga nadi ivyo Ciuta wali kuticitira, tigwiliskirenge nchito nkhongono zithu kuti timucindike. M’malo mwa kumalira nkhongono zithu zose pa vinthu vya taŵene, tikuwona kuti nchakwenelera kuti timuteŵetere Yehova Ciuta na nkhongono zithu zose.—Marko 12:30.
Cifukwa wuli pera tili kulengeka? Cigaŵa caumaliro ca lemba la Civumbuzi 4:11 cikuzgora kuti: “Cifukwa ca khumbo linu [vinthu vyose] vikaŵako, ndipo vikalengeka.” Tili kujilenga tekha yayi. Tili kulengeka cifukwa ca khumbo la Ciuta. Ntheura, nchambura candulo kuti ticitenge waka vinthu vyakujikondweska ise taŵene. Kuti tiŵe na mtende wa mu mtima, cimwemwe, ndiposo umoyo wakukhorweska, tikwenera kumanya khumbo la Ciuta, na kucita vinthu mwakukolerana na khumbo lake. Pekha para tikucita nthena ndipo timanyenge cifukwa ico tili kulengekera.—Salmo 40:8.
[Kulongosora Cithuzithuzi pa peji 27]
NASA, ESA, and A. Nota (STScI)