Mukucemeka Kwiza ku Nyumba ya Ufumu

MUTEPANJI mukumanya apo pali Nyumba ya Ufumu ya Ŵakaboni ŵa Yehova mu cigaŵa cinu, kweni mukumanya yayi ivyo vikucitika mu nyumba iyi. Kasi mukumanya kuti munthu waliyose ni mwanangwa kusangikapo pa maungano ghawo agho ghakucitika sabata yiliyose? Ŵalendo mbakupokelereka na mawoko ghaŵiri.

Ndipouli, mungaŵa na mafumbo ghanyake. Cifukwa wuli Ŵakaboni ŵa Yehova ŵakuwungana pamoza? Kasi nchivici cikucitika pa maungano agha? Kasi ŵalendo awo Mbakaboni ŵa Yehova yayi ŵayowoyapoci vyakukhwaskana na maungano agha?

“Wunjikani Ŵanthu”

Kwambira kale, ŵanthu ŵakuwungana pamoza kuti ŵasope Ciuta na kusambira vya iyo. Vilimika pafupifupi 3,500 ivyo vyajumpha, Ŵaisrayeli ŵakaphalirika kuti: “Wunjikani ŵanthu, ŵanalume na ŵanakazi, na ŵana, na mulendo uyo wali mu mizi yinu, kuti ŵapulike na kusambira kuopa Yehova Ciuta winu, na kupwelera kucita mazgu ghose gha dango ili.” (Duteronome 31:12) Ntheura, Ŵaisrayeli, ŵalara na ŵana wuwo ŵakasambizgikanga kusopa Yehova Ciuta na kumupulikira.

Kufuma apo mpingo wa Cikhristu ukapangikira, maungano ghalutilira kuŵa cigaŵa cakuzirwa pa kusopa kwaunenesko. Mpositole Paulosi wakalemba kuti: “Ndipo tiyeni tighanaghanirane yumoza na munyake na kuciskirana ku citemwa na milimo yiwemi, kusulako cara kuwungana kwithu pamoza, umo kaliri kaluso ka ŵanji, kweni tikhwimiskanenge yumoza na munyake.” (Ŵahebere 10:24, 25) Ubwezi wa ŵa mu mbumba ukukhora para wose ŵakucezgera lumoza. Mwakuyana waka, citemwa pakati pa awo ŵakukhumba kuteŵetera Ciuta cikukhora para ŵakuwungana pamoza kuti ŵamusope.

Mwakuyana na viyelezgero vya mu Malemba ivi, Ŵakaboni ŵa Yehova ŵakuwungana pamoza mu Nyumba zawo za Ufumu kaŵiri pa sabata. Maungano agha ghakovwira awo ŵawungana kuti ŵamanye kuzirwa kwa malango gha mu Baibolo, ŵaghapulikiske, ndiposo ŵaghalondezge. Kanandi ivyo vikusambirika pa maungano agha vikuyana pa caru cose, ndipo ungano uliwose ukuŵa na cilato cake. Awo ŵakwiza pa maungano agha ‘ŵakukhwimiskana’ mwa kucezgera lumoza pambere maungano ghandambe ndiposo para ghamara. (Ŵaroma 1:12) Kasi nchivici cikucitika pa ungano uliwose?

Nkhani ya Baibolo

Nkhani ya Baibolo ni ungano wakwamba uwo ŵanthu ŵanandi ŵakuŵapo. Cilato ca ungano uwu nkhovwira ŵanthu wose ndipo kanandi ukucitika pa Sabata. Yesu Khristu kanandi wakayowoyanga nkhani zacisanisani, yimoza mwa nkhani izi ni iyo wakayowoya pa lupiri. (Mateyu 5:1; 7:28, 29) Mpositole Paulosi nayo apo wakaŵa ku Ateni wakayowoya nkhani yacisanisani. (Milimo 17:22-34) Nga ni umo Yesu na Paulosi ŵakacitiranga, pa maungano gha Ŵakaboni ŵa Yehova pakuyowoyeka nkhani yacisanisani iyo yikovwira ŵanthu wose, kusazgapo awo nkhakwamba kusangikapo pa maungano agha.

Ungano uwu ukwamba na sumu yakufuma mu buku la Yimbirani Yehova Zitamando.a Wose awo ŵakukhumba, ŵakwimilira na kwimbira lumoza sumu. Pamanyuma pa lurombo, muyowoyi wakuyowoya nkhani kwa maminiti 30. (Wonani bokosi lakuti “Nkhani Zinyake Zakovwira izo Zikuyowoyeka.”) Nkhani iyo wakuyowoya yikujintha pa Baibolo. Kanandi muyowoyi wakupempha ŵategherezgi kuti ŵajurenge malemba na kumulondezga apo wakuŵazga mavesi. Ntheura, mungayegha Baibolo linu, panji mungapempha yumoza wa Ŵakaboni ŵa Yehova pambere maungano ghandambe.

Sambiro la Gongwe la Mulinda

Mu mipingo yinandi ya Ŵakaboni ŵa Yehova, para nkhani ya Baibolo yamara pakucitika Sambiro la Gongwe la Mulinda. Sambiro ili likucitika kwa ora limoza ndipo pakuŵa kudumbiskana nkhani ya mu Baibolo mwa mafumbo na mazgoro. Ungano uwu ukuciska wose awo ŵawungana kuti ŵalondezge ciyelezgero ca Ŵabereya ŵa mu nyengo ya Paulosi, awo “ŵakapokera mazgu na kunweka kukuru, kusanda Malemba mwakupwelelera.”—Milimo 17:11.

Sambiro la Gongwe la Mulinda likwamba na sumu. Nkhani iyo ŵakusambira yikufuma mu magazini ya kusambira pa mpingo. Mungasanga magazini iyi kwa yumoza wa Ŵakaboni ŵa Yehova. Nkhani zinyake izo zasambirika sonosono apa ni izi: “Ŵapapi Sambizgani Ŵana Mwacitemwa,” “Mungawezgeranga Munthu Uheni pa Uheni Yayi,” ndiposo “Cifukwa Ico Masuzgo Ghose Ghamalirenge Sonosono Apa.” Nangauli ungano uwu ukucitika mwa mafumbo na mazgoro, kweni munthu wakucicizgika yayi kuzgorapo. Awo ŵakuzgora ni awo ŵaŵazgirathu nkhani yose ndiposo malemba agho ghakukhozgera nkhani iyo. Ungano uwu ukumara na sumu na lurombo.—Mateyu 26:30; Ŵaefeso 5:19.

Sambiro la Baibolo la Mpingo

Zuŵa limoza pa sabata yiliyose, Ŵakaboni ŵa Yehova ŵakuwunganaso pa Nyumba ya Ufumu kwa ora limoza na maminiti 45. Pa zuŵa ili ŵakucita maungano ghatatu. Ungano wakwamba ni Sambiro la Baibolo la Mpingo, ilo likucitika kwa maminiti 25. Ungano uwu ukovwira awo ŵawungana kuti ŵalimanye makora Baibolo, ŵasinthe kaghanaghaniro kawo na nkharo yawo, ndiposo kuti ŵaŵe ŵasambiri ŵakufikapo ŵa Khristu. (2 Timote 3:16, 17) Ungano uwu ukucitika mwa mafumbo na mazgoro nga ni Sambiro la Gongwe la Mulinda. Munthu wali na wanangwa wa kuzgorapo. Pa ungano uwu ŵakusambira buku panji burosha la kupharazgika na Ŵakaboni ŵa Yehova.

Cifukwa wuli pa ungano uwu ŵakugwiliskira nchito mabuku ghakulongosora Baibolo? Mu nyengo zakale, kuŵazga waka Mazgu gha Ciuta kukaŵa kwakukwana yayi. “Ŵakapataula na kuŵamanyiska ivyo vikaŵazgikanga.” (Nehemiya 8:8) Sonosono apa, mabuku ghakulongosora vigaŵa vya mu Baibolo nga ni Yesaya, Daniyeli ndiposo Uvumbuzi ghawovwira awo ŵakwiza pa ungano uwu kuti ŵapulikiske makora vigaŵa ivi.

Sukulu ya Uteŵeti wa Ciuta

Pamanyuma pa Sambiro la Baibolo la Mpingo pakucitika Sukulu ya Uteŵeti wa Ciuta. Ungano uwu ukucitika kwa maminiti 30, ndipo ukovwira Ŵakhristu kuti ŵaŵe na “luso lwa kusambizga.” (2 Timote 4:2) Mwaciyelezgero, kasi mwana winu panji munyinu wali kumufumbanipo fumbo lakukhwaskana na Ciuta panji Baibolo, ndipo mukatondeka kuzgora makora? Sukulu ya Uteŵeti wa Ciuta yingamovwirani umo mungazgolera mwakukhorweska mafumbo ghanonono kufumira mu Baibolo. Ntheura nase tingayowoya mazgu gha nchimi Yesaya, ghakuti: “Yehova Ciuta wandipa lulimi lwa ŵakusambira, kuti nimanye kumuyowoyera lizgu la kumovwira mweneuyo wavuka.”—Yesaya 50:4.

Sukulu ya Uteŵeti wa Ciuta yikwamba na nkhani yakufuma mu cigaŵa cinyake ca Baibolo. Awo ŵawungana ŵakuphalirika mwakutendekera kuti ŵakaciŵazge. Para muyowoyi wamara kuyowoya cigaŵa cake wakupempha ŵategherezgi kuti ŵayowoye fundo zakudumura izo ŵawona kuti ni za candulo. Paumaliro wa cidumbirano ici, pakuŵa ŵasambiri awo ŵakuyowoya nkhani zawo.

Ŵasambiri ŵakupika nkhani yakuti ŵaŵazge cigaŵa ca mu Baibolo pa pulatifomu panji kuyezgelera umo ŵangasambizgira munthu nkhani yinyake ya mu Malemba. Pa umaliro wa nkhani yiliyose, wakucitiska sukulu wakuwonga ŵasambiri pa ivyo ŵacita makora mwakulondezga fundo izo zili mu buku la Sangani Candulo na Sukulu ya Uteŵeti wa Ciuta. Ndipouli, kumphepete wangapeleka masacizgo gha umo msambiri wangazakayowoyera makora nkhani munthazi.

Ungano uwu ukucitika kuti wovwire ŵasambiri pera yayi, kweni wose awo ŵawungana awo ŵakukhumba kusazgirako luso lwawo pa kuŵazga, kuyowoya na kusambizga. Para Sukulu ya Uteŵeti wa Ciuta yamara pakwimbika sumu yakujulira Ungano wa Uteŵeti.

Ungano wa Uteŵeti

Cigaŵa caumaliro ni Ungano wa Uteŵeti. Kwizira mu nkhani, viyezgelero, mafumbo ndiposo kudumbiskana, awo ŵawungana ŵakusambira umo ŵangasambizgira makora unenesko wa mu Baibolo. Pambere Yesu wandatume ŵasambiri ŵake kuti ŵakapharazge, wakaŵawunganya pamoza na kuŵapa ulongozgi wakukwana. (Luka 10:1-16) Ŵakati ŵanozgekera makora mulimo wa kupharazga, ŵakasangwa comene na ivyo vikaŵacitikira. Pamanyuma, ŵasambiri ŵa Yesu ŵakamuphalira ivyo vikaŵacitikira. (Luka 10:17) Kanandi ŵasambiri ŵakaphalirananga ivyo vikaŵacitikiranga.—Milimo 4:23; 15:4.

Ungano wa Uteŵeti ukucitika kwa maminiti 35 ndipo ukulembeka mu kalata ya mwezi na mwezi yakumanyikwa na zina lakuti Uteŵeti Withu wa Ufumu. Nkhani zinyake izo zasambirika sonosono ni izi: “Kusopera Lumoza Yehova mu Mbumba,” “Cifukwa Ico Tikuwelerako Kanandi Waka,” ndiposo “Londezgani Khristu mu Uteŵeti Winu.” Ungano uwu ukumara na sumu ndiposo lurombo.

Ivyo Ŵalendo Ŵayowoya

Ŵakaboni ŵa Yehova ŵakuyezgayezga kuti waliyose waŵe wakufwatuka para wiza ku maungano ghawo. Mwaciyelezgero, Andrew wakapulika nkhani ziheni zinandi zakukhwaskana na Ŵakaboni ŵa Yehova. Kweni apo wakaluta kakwamba ku maungano wakazizwa comene na umo ŵakamupokelera. Andrew wakati: “Agha ghakaŵa malo ghawemi comene. Nkhazizwa comene kuwona kuti ŵanthu ŵake mbaubwezi ndipo ŵakanweka nane comene.” Ashel, muwukirano wa ku Canada wakati: “Ungano ukaŵa wakukondweska comene. Nkhapulikanga makora nkhani izo ŵakayowoyanga.”

José, uyo wakukhala ku Brazil, wakamanyikwanga na nkharo yiheni. Nangauli vikaŵa nthena, wakacemeka ku Nyumba ya Ufumu kukategherezga maungano. Iyo wakati: “Awo ŵakaŵa pa Nyumba ya Ufumu ŵakanipokelera makora comene, nangauli ŵakamanyanga nkharo yane yiheni iyo nkhaŵa nayo.” Atsushi wa ku Japan wakati: “Kuyowoya unenesko apo nkhalutako kakwamba ku maungano gha Ŵakaboni ŵa Yehova nkhafwatuka viŵi yayi. Kweni nkhamanya kuti ŵanthu aŵa mbawemi. Ŵakayezgayezga comene kuti nifwatuke.”

Ndimwe Ŵakupokelereka

Nga ni umo ŵanthu ŵanyake ŵayowoyera pacanya apa, kuwungana pa Nyumba ya Ufumu nkhwacandulo comene. Mwamusambira za Ciuta, ndipo kwizira mu ulongozgi wa mu Baibolo uwo mwamupokera, Yehova Ciuta wamumusambizgani “kuti muwone candulo.”—Yesaya 48:17.

Pa maungano gha Ŵakaboni ŵa Yehova ŵanthu ŵakupeleka zithero yayi. Kasi mungatemwa kukawungana nawo pa Nyumba ya Ufumu mu cigaŵa cinu? Mukucemeka kuti mwize.

[Mazgu ghamusi]

[Bokosi pa peji 30]

Nkhani Zinyake Zakovwira izo Zikuyowoyeka

Nkhani za Baibolo izo zikuyowoyeka zikusoleka kufuma pa mitu yakupambanapambana yakujumpha 170. Zinyake mwa izo ni izi:

◼ Uko Ŵanthu Ŵalikufumira—Kasi Ivyo Mukugomezga Nvyakuzirwa?

◼ Kawonero ka Uciuta ka Kugonana na Nthengwa

◼ Kunanga Caru Kukwiziska Cilango ca Ciuta

◼ Kucita Navyo Vyenjezgo vya Umoyo

◼ Kasi Umoyo Wuno Ndiwo Wekha Uwo Ulipo?

[Cithuzithuzi pa peji 30]

Nkhani ya Baibolo

[Cithuzithuzi pa peji 30]

Sambiro la “Gongwe la Mulinda”

[Cithuzithuzi pa peji 31]

Sambiro la Baibolo la Mpingo

[Cithuzithuzi pa peji 31]

Sukulu ya Uteŵeti wa Ciuta

[Cithuzithuzi pa peji 32]

Ungano wa Uteŵeti