Maungano Agho ‘Ghakutichiska Kutemwana na Kuchita Milimo Yiwemi’

ŴANTHU ŵa Yehova ŵali kwamba ni kale kuwungana pamoza. Mu nyengo ya Ŵaisrayeli, ŵanalume wose ŵakalutanga ku viphikiro vitatu ivyo vikachitikiranga ku Yerusalemu. (Doto. 16:16) Nyengo zose Ŵakhristu ŵakwambilira ŵakawungananga. Kanandi ŵakawungananga mu nyumba za ŵabali. (Filim. 1, 2) Mazuŵa ghano napo, tikukondwa na maungano gha mpingo, gha dera, na gha chigaŵa. Chifukwa wuli ŵateŵeti ŵa Chiuta ŵakuwungana pamoza? Chifukwa chikuru ntchakuti maungano ngakuzirwa pa kusopa kwithu.—Sal. 95:6; Kol. 3:16.

² Maungano ghakovwiraso awo ŵakusangikapo. Pakuyowoya za Chiphikiro cha Visakasa, Ŵaisrayeli ŵakaphalirika kuti: “Wunganyani ŵanthu, ŵanalume, ŵanakazi, ŵana, na mulendo uyo wakukhala mu misumba yinu kuti ŵapulike na kusambira kumopa Yehova Chiuta winu na kupwelelera kuchita mazgu ghose gha Dango ili.” (Doto. 31:12) Tikuwungana pamoza kuti ‘tisambizgike na Yehova.’ (Yes. 54:13) Kweniso maungano ghakutikhozga, na kutipa mwaŵi wakuti timanyane na ŵanyithu na kukhozgana apo tikuchezga.

MAUNGANO GHA MPINGO

³ Ŵasambiri awo ŵakaŵapo pa ungano pa Pentekoste mu 33 C.E., ŵakalutilira kusambizgika na ŵapositole, ndipo “zuŵa lililose ŵakawungananga mu tempile” na chilato chimoza. (Mil. 2:42, 46) Pamasinda, para Ŵakhristu ŵawungana pamoza kuti ŵasope Chiuta, ŵakaŵerenganga mazgu gha Chiuta, ndiposo makalata gha ŵapositole na ŵasambiri ŵanyake. (1 Kor. 1:1, 2; Kol. 4:16; 1 Tes. 1:1; Yak. 1:1) Kweniso mpingo ukalombanga pamoza. (Mil. 4:24-29; 20:36) Nyengo zinyake ŵamishonale ŵakayowoyanga ivyo vikachitika apo ŵakapharazganga. (Mil. 11:5-18; 14:27, 28) Pa maungano agha, ŵakadumbiskananga visambizgo vya mu Baibolo na umo mauchimi ghakufiskikira. Ŵakasambizgikanga kuti Ŵakhristu ŵakwenera kuŵa na nkharo yiwemi kweniso kusopa Chiuta mwakujipeleka. Ŵakhristu wose ŵakachiskikanga kuti ŵalimbikirenge kupharazga makani ghawemi.—Rom. 10:9, 10; 1 Kor. 11:23-26; 15:58; Efe. 5:1-33.

⁴ Umo kale ŵapositole ŵakachitiranga maungano, ndimo Ŵakhristu ŵakuchitiraso mazuŵa ghano. Tikupulikira ulongozgi wa pa Ŵahebere 10:24, 25, uwo ukuti: “Tiyeni tighanaghaniranenge . . . tingalekanga yayi kuwungana pamoza nga umo ŵakuchitira ŵanyake, kweni tikhwimiskanenge, tichitenge vyose ivi chomene apo tikuwona zuŵa likuneng’enera.” Kuti tilutilire kuŵa ŵakugomezgeka na ŵakukhora mwauzimu mu mazuŵa ghakusuzga na ghaumaliro agha, tikwenera kuwungana nyengo zose. (Rom. 1:11, 12) Mazuŵa ghano, tikukhala pakati pa ŵanthu ŵakupuluka na ŵakubendera. Kweni ise tikupulikira Chiuta ndipo tikukana makhumbiro gha charu. (Fil. 2:15, 16; Tito 2:12-14) Ni mwaŵi wapadera chomene kuwungana na ŵanthu ŵa Yehova. (Sal. 84:10) Kasi chilipo icho chingaluska kusambira na kudumbiskana Mazgu gha Chiuta? Tiyeni tiwone maungano agho ghakutovwira.

MAUNGANO GHA KUUMALIRO KWA SABATA

⁵ Pa maungano agha pakuŵa nkhani yachisanisani. Fundo za nkhani iyi zikufuma mu Baibolo ndipo yikunozgekera ŵanthu wose, nanga ni awo nkhakwamba kwiza pa maungano ghithu, lekani yikuchemeka kuti nkhani yachisanisani. Nkhani iyi yikovwira waliyose mwauzimu, ŵapharazgi ŵa mpingo na awo ŵamba sono kuwungana na mpingo.—Mil. 18:4; 19:9, 10.

⁶ Yesu Khristu, ŵapositole ŵake, na ŵanyawo ŵakayowoyanga nkhani zachisanisani nga ni izo zikuyowoyeka mu mipingo ya Ŵakaboni ŵa Yehova mazuŵa ghano. Yesu wakayowoyanga mwaluso kuluska waliyose pa charu chapasi, mwakuti ŵalinda ŵakati: “Palije munthu uyo wali kuyowoyapo nthena.” (Yoh. 7:46) Yesu wakayowoyanga na mazaza, ndipo ŵanthu ŵakazizikikanga. (Mat. 7:28, 29) Awo ŵakapulikiranga mazgu ghake ŵakawovwirikanga chomene. (Mat. 13:16, 17) Ŵapositole nawo ŵakachitanga nga ni Yesu. Pa Milimo 2:14-36, tikuŵerenga nkhani yapadera iyo Petrosi wakayowoya pa Pentekoste mu 33 C.E. Mu nkhani iyi Petrosi wakachiska ŵanthu. Ndipo ŵanandi ŵakachitapo kanthu chifukwa cha ivyo ŵakapulika. Pamasinda, ŵanthu ŵanyake ŵakazgoka Ŵakhristu chifukwa cha nkhani iyo Paulosi wakayowoya mu Ateni.—Mil. 17:22-34.

⁷ Mazuŵa ghano napo ŵanthu ŵanandi ŵakupindura na nkhani zachisanisani izo zikuyowoyeka mu mipingo sabata yiliyose, na zinyake pa maungano gha dera na gha chigaŵa. Nkhani izi zikutovwira kupulikiska visambizgo vya mu Baibolo ndiposo kuti tiŵe ŵambura kusunkhunyika pa ntchito ya kupharazga Ufumu. Ŵanthu ŵanandi ndiposo awo tikuŵasambizga Baibolo ŵangamanya ivyo Baibolo likusambizga para tikuŵachemerako ku nkhani izi.

⁸ Nkhani zachisanisani zikulongosora visambizgo vya mu Baibolo nga ni mauchimi, ulongozgi wa mu banja, ivyo vikuchitikira ŵachinyamata, na nkharo iyo Ŵakhristu ŵakwenera kuŵa nayo. Nkhani zinyake zikulongosora ivyo Yehova wali kulenga. Zinyake zikulongosora umo ŵanthu awo ŵakuzunulika mu Baibolo ŵakalongolera chipulikano, chikanga, na kugomezgeka ndiposo ivyo tingasambirapo mazuŵa ghano.

⁹ Kuti tipindure mwakukwana na Nkhani zachisanisani, tikwenera kutegherezga chomene, kujura malemba agho uyo wakuyowoya nkhani wazunura, na kumulondezga apo wakuŵerenga na kughalongosora. (Luka 8:18) Para tapulikiska ivyo tikusambira, tiŵikengepo mtima chomene kuti tikoleske ivyo tasambira na kuvichita.—1 Tes. 5:21.

¹⁰ Mpingo ukuŵa na nkhani yachisanisani sabata yiliyose usange pali ŵabali ŵakukwana awo ŵangayowoya nkhani. Nyengo zinyake ŵabali ŵa mipingo yapafupi ŵakuchemeka kuti ŵazakayowoye nkhani iyi. Para ŵabali mbachoko, nkhani zachisanisani zikuyowoyeka usange ŵangakwaniska.

¹¹ Pa maungano gha kuumaliro kwa sabata pakuŵa Sambiro la Gongwe la Mulinda. Sambiro ili likuŵa la mafumbo na mazgoro. Sambiro la Gongwe la Mulinda ni nthowa yikuru iyo Yehova wakutipira chakurya chauzimu panyengo yakwenelera.

¹² Nkhani izo tikusambira pa mpingo zikulongosora umo tingalondezgera ulongozgi wa mu Baibolo zuŵa na zuŵa. Zikutikhozga kuti tilimbane na “mzimu wa charu” na nkharo ziheni. (1 Kor. 2:12) Gongwe la Mulinda likutilongosolera makora visambizgo na mauchimi gha mu Baibolo ndipo likutovwira kuti tikoleske unenesko na kukhalilira pa nthowa ya ŵarunji. (Sal. 97:11; Zinth. 4:18) Para tikusangikapo pa Sambiro la Gongwe la Mulinda na kuzgorapo, tizamukhozgeka na layizgo la Yehova la charu chiphya. (Rom. 12:12; 2 Pet. 3:13) Sambiro la Gongwe la Mulinda likutovwira kuti tiŵe na khumbo la kuteŵetera Yehova. (Gal. 5:22, 23) Tikukhozgeka kuti tizizipizge viyezgo mwakuti ‘tikoleske umoyo wanadi.’—1 Tim. 6:19; 1 Pet. 1:6, 7.

¹³ Kasi tingachita wuli kuti tipindure na Sambiro la Gongwe la Mulinda? Tikwenera kunozgekera mwakutendekera na banja lithu panji patekha na kuŵerenga malemba ghose. Para tili pa maungano, tizgorenge mu mazgu ghithu na ghithu, ndipo unenesko uzamukhazikika chomene mu mitima yithu. Ŵabali na ŵadumbu ŵakhozgekenge chomene para ivyo tikuyowoya pa maungano vikulongora kuti tili na chipulikano. Para nase tikutegherezga chomene apo ŵanyithu ŵakuzgora, tipindurenge na sambiro la Gongwe la Mulinda sabata yiliyose.

MAUNGANO GHA MUKATI MWA SABATA

¹⁴ Sabata yiliyose, tikuwungana pa Nyumba ya Ufumu kuti tichite ungano wakuchemeka kuti Uteŵeti na Umoyo Wachikhristu. Ungano uwu uli na vigaŵa vitatu. Vigaŵa ivi vili kunozgeka kuti vitovwire kuti “tiŵe ŵakwenerera” kuteŵetera Chiuta. (2 Kor. 3:5, 6) Ndondomeko na nkhani za ungano uwu vili mu kabuku kakuti Uteŵeti na Umoyo Wachikhristu. Mu kabuku aka mukuŵaso masachizgo gha umo tingapharazgira.

¹⁵ Chigaŵa chakwamba pa ungano uwu chikuchemeka kuti Mazgu gha Chiuta Mbusambazi. Chigaŵa ichi chikutovwira kuti timanye makora nkhani ya mu Baibolo na umo yikutovwilira. Pa ungano uwu pakuŵa nkhani, kuŵazga, na kudumbiskana machaputara gha sabata iyo. Mu kabuku ka Uteŵeti na Umoyo Wachikhristu, mukuŵaso vithuzithuzi na vinthu vyakovwira pa kusambizga. Ivyo pa ungano uwu vikutovwira chomene pa umoyo withu ndiposo pakusambizga ŵanthu mwakuti tiŵe ‘ŵakukwana, ŵakunozgeka kuchita mlimo uliwose uwemi.’—2 Tim. 3:16, 17.

¹⁶ Chigaŵa Chachiŵiri chikuchemeka Pharazgani Mwaluso. Chigaŵa ichi chikutovwira umo tingachitira kuti tisazgireko luso lwithu pa kupharazga na kusambizga. Ŵapharazgi ŵakuyezgelera umo tingachitira mu uteŵeti kweniso tikuwonelera mavidiyo agho ghakutovwira umo tingapharazgira mwaluso. Chigaŵa ichi chikutovwira kuti tiŵe na “lulimi lwa ŵakusambira” mwakuti timanye “kuzgora wakuvuka na mazgu ghakwenelera.”—Yes. 50:4.

¹⁷ Chigaŵa chachitatu chikuchemeka kuti Umoyo Wachikhristu. Chigaŵa ichi chikutovwira umo tingalondezgera fundo za mu Baibolo pa umoyo withu. (Sal. 119:105) Pa ungano uwu, kanandi tikuŵa na Sambiro la Baibolo la Mpingo. Sambiro la Baibolo la Mpingo likuŵa la mafumbo na mazgoro nga ni sambiro la Gongwe la Mulinda.

¹⁸ Mwezi uliwose para kabuku ka Uteŵeti na Umoyo Wachikhristu kafika, mulaŵiliri wa milimo ya ŵalara panji mulara uyo wakumovwira wakuwona nkhani izo zilimo na kulemba ndondomeko. Sabata yiliyose, mulara uyo wakusambizga mwaluso ndipo wali kusankhika na wupu wa ŵalara, wakuŵa cheyamani. Iyo wakuwoneseska kuti ungano uwu wamba na kumara pa nyengo yake. Kweniso wakuwonga na kupeleka ulongozgi ku awo ŵayowoya nkhani mu sukulu.

¹⁹ Para nyengo zose tikunozgekera, kusangika, na kuzgorapo pa Ungano wa Uteŵeti na Umoyo Wachikhristu, tikumanya Malemba, kupulikiska fundo za mu Baibolo, tikuŵa na chikanga pakupharazga makani ghawemi, kweniso tikuŵa na luso pa kusambizga ŵanthu kuti ŵaŵe ŵasambiri. Awo ŵakusangikapo pa ungano uwu kweni ŵandabatizike, nawo ŵakupindura na vinthu vyauzimu kweniso para ŵakuchezga na ŵabali na ŵadumbu. Kuti tinozgekere ungano uwu na maungano ghanyake, tingagwiliskira ntchito Watchtower Library, JW Library^®, Watchtower ONLINE LIBRARY^™, na layibulare ya pa Nyumba ya Ufumu. Layibulare ya pa Nyumba ya Ufumu yikuŵa na mabuku gha Ŵakaboni ŵa Yehova agho ghangasangika, Buku Lakupenjera Nkhani la Ŵakaboni ŵa Yehova, Mabaibolo ghakupambanapambana, na mabuku ghanyake. Waliyose wangagwiliskira ntchito layibulare iyi pambere maungano ghandambe panji para ghamara.

MAUNGANO GHAKUNOZGEKERA UPHARAZGI

²⁰ Mukati mwa sabata ndiposo kuumaliro wa sabata, ŵapharazgi ŵakukumana mu magulu ghawo gha uteŵeti nyengo yichoko waka kuti ŵanozgekere upharazgi. Maungano agha kanandi ghakuchitikira mu nyumba za ŵabali panji pa malo ghanyake ghakwenelera. Maungano agha ghakuchitikiraso pa Nyumba ya Ufumu. Pakuti ŵapharazgi ŵakukumana kufupi na uko ŵakukhala, chikuŵaŵira chipusu kufika pa malo agha na ku chigaŵa chawo chakupharazgako. Ntheura ŵakwamba luŵiro kupharazga. Mulaŵiliri wa gulu la uteŵeti nayoso chikumuŵira chipusu kovwira waliyose mu gulu lake. Nangauli chikuŵa makora para gulu lililose likukumana palekha, kweni nyengo zinyake magulu ghanyake ghangakumana pamoza. Mwachiyelezgero, usange ŵapharazgi ŵachoko waka ndiwo ŵakupharazga mukati mu sabata, ipo chingaŵa chiwemi kuti magulu ghose ghakumanenge pamoza pa Nyumba ya Ufumu panji pa malo ghanyake ghakwenelera. Ichi chizamovwira kuti ŵapharazgi ŵasange ŵanyawo ŵakwenda nawo. Mpingo wose ungachitiraso pamoza ungano wakunozgekera upharazgi mu mazuŵa gha holide. Kweniso mpingo ungachitira pamoza ungano wa kunozgekera upharazgi para Sambiro la Gongwe la Mulinda lamara.

²¹ Para gulu lichitirenge palekha ungano wakunozgekera upharazgi, mulaŵiliri wa gulu ndiyo wakulongozga. Nyengo zinyake mulaŵiliri wa gulu wangapempha movwiri wake panji mubali munyake wakwenelera kuti wachitiske ungano uwu. Uyo wakuchitiska ungano uwu wakwenera kunozgekera fundo izo zingawovwira ŵapharazgi mu uteŵeti. Paumaliro wa ungano uwu yumoza wakulomba ndipo nyengo yeneyiyo gulu likuluta kukapharazga. Maungano agha ghakutora maminiti 5 panji 7, ndipo ghakwenera kutora nyengo yichoko para mukunozgekera pamasinda pa maungano gha mpingo. Uyo wakulongozga maungano agha wakwenera kuchiska, kovwira, na kulongozga awo ŵamupharazga. Ŵaphya panji ŵanyake awo ŵakukhumbikwira wovwiri ŵangayendera lumoza na ŵapharazgi ŵaluso.

UMO MAUNGANO GHAKUCHITIKIRA PARA MPINGO NGUPHYA PANJI NGUCHOKO

²² Pakuti ŵanthu ŵanandi ŵakuzomera kuŵa ŵasambiri, mipingo nayo yikusazgikira. Kanandi mulaŵiliri wa dera ndiyo wakutumizga fomu ya kupempha mpingo uphya ku ofesi. Kweni nyengo zinyake chikuŵa chiwemi kuti magulu ghachokoghachoko ghawunganenge na mpingo wapafupi.

²³ Nyengo zinyake mipingo yichokoyichoko yingaŵa na ŵadumbu pera. Para vili nthena, mudumbu uyo wakulomba panji kuchitiska maungano pa mpingo wakwenera kuvwara chinthu ku mutu, mwakuyana na ulongozgi wa mu Malemba. (1 Kor. 11:3-16) Kanandi ŵadumbu awo ŵakuchitiska maungano ŵakukhala pasi uku ŵalazga ku ŵategherezgi. Ŵadumbu ŵakuyowoya nkhani nga umo ŵakuchitira ŵabali yayi. Iwo ŵakuŵerenga waka nkhani iyo gulu lanozga na kuyowoyapo. Nyengo zinyake ŵangadumbiskana nkhani iyo panji kuchita viyezgelero. Ofesi yikupempha mudumbu yumoza kuti wachitiskenge maungano, kweniso kuti ndiyo wapokerenge makalata. Para kunthazi ŵabali ŵakwenelera ŵasangika, ndiwo ŵakulutilira kuchita ntchito iyi.

MAUNGANO GHA DERA

²⁴ Mipingo ya mu dera lililose yikuŵa na ungano wa zuŵa limoza kaŵiri pa chaka. Maungano agha ghakupeleka mwaŵi kwa waliyose uyo wizapo kuti ‘wajure mtima wake’ apo wakuchezga na Ŵakhristu ŵanyake. (2 Kor. 6:11-13) Pakusankha mutu wa ungano ndiposo nkhani izo zikuyowoyeka pa maungano agha, gulu la Yehova likughanaghanira dankha ivyo vikukhumbikwa. Pa maungano agha pakuyowoyeka nkhani, pakuŵa viyezgelero, ŵapharazgi ŵanji ŵakuyezgelera umo ŵakachitira apo ŵakapharazganga, mupharazgi wakuyowoya yekha. Pakuŵaso chigaŵa cha kufumba ŵapharazgi ŵanyake. Ulongozgi uwu ukukhozga ŵanthu wose. Pa maungano agha ŵanthu ŵakubatizika, kulongora kuti ŵali kujipeleka kwa Yehova.

MAUNGANO GHA CHIGAŴA

²⁵ Maungano gha chigaŵa ghakuchitika kamoza pa chaka. Kanandi maungano agha ghakuŵa gha mazuŵa ghatatu, ndipo mipingo yakufuma mu madera ghakujumpha pa limoza yikuwungana pamoza. Ofesi iyo yili na chigaŵa chichoko yingawona kuti ntchiwemi kuti mipingo yose mu chigaŵa chake yiwungane pamoza. Mu vyaru vinyake, maungano agha ghangachitika mwakupambana chifukwa cha umo vinthu viliri panji mwakuyana na ulongozgi wa gulu. Nyengo zinyake mu vyaru vinyake mukuchitikira maungano gha mitundu yose na ghapadera, ndipo ŵabali ŵanandi ŵakufuma mu vyaru vyakupambanapambana ŵakwiza pa maungano agha. Ŵanthu ŵanandi ŵakupulika makani ghawemi gha Ufumu chifukwa cha upharazgi uwo ukuchitika wakukhwaskana na maungano ghakuru gha Ŵakaboni ŵa Yehova.

²⁶ Nyengo ya maungano gha chigaŵa njakukondweska chomene ku ŵanthu ŵa Yehova chifukwa ŵakusopera pamoza. Ungweru uwo ukuŵaliraŵalira ukuvumbulika pa maungano agha. Pa maungano ghanyake gha chigaŵa pakufuma mabuku ghaphya ghakuti tisambirenge patekha, pa mpingo, panji kuti tisambizgirenge ŵanthu. Pa maungano agha napo ŵanthu ŵakubatizika. Maungano gha chigaŵa ngakuzirwa chomene chifukwa ghakutovwira kuti tikure mwauzimu. Maungano agha mbukaboni wakuti ŵanthu ŵa Yehova ŵali paubali wa pa charu chose, kweniso kuti ŵakutemwana zanadi nga umo Yesu Khristu wakayowoyera.—Yoh. 13:35.

²⁷ Para tili pa maungano gha mpingo na ghakurughakuru, tikukhozgeka kuchita khumbo la Yehova. Kweniso maungano agha ghakutovwira kuti tikane vinthu vya charu ivyo vingananga chipulikano chithu. Para tili pa maungano agha tikuchindika na kulumba Yehova. (Sal. 35:18; Zinth. 14:28) Tose tikwenera kuwonga Yehova kuti watipa maungano agha, agho ghakutikhozga mwauzimu mu nyengo yaumaliro iyi.

MUGONERO WA FUMU

²⁸ Kamoza pa chaka, pa charu chose mipingo ya Ŵakaboni ŵa Yehova yikuchita Chikumbusko cha nyifwa ya Khristu, panji kuti Mugonero wa Fumu. (1 Kor. 11:20, 23, 24) Ungano uwu ngwakuzirwa chomene ku ŵanthu Yehova. Tikuchiskika kuti tichitenge Chikumbusko.—Luka 22:19.

²⁹ Deti la Chikumbusko likuyana waka na deti ilo kale ŵakachitiranga Paska. (Eks. 12:2, 6; Mat. 26:17, 20, 26) Chaka chilichose, Ŵaisrayeli ŵakaŵanga na chiphikiro cha Paska. Pa chiphikiro ichi ŵakakumbukiranga nyengo iyo ŵakafumira mu Eguputo mu chaka cha 1513 B.C.E. Yehova wakaŵaphalira kuti pa zuŵa la, 14 la mwezi wawo wakwamba ŵarye mwana wa mberere wa Paska na kufuma mu Eguputo. (Eks. 12:1-51) Kuti ŵamanye deti ili, ŵakupenda mazuŵa 13 kufuma apo mwezi uphya wawonekera ku Yerusalemu, cha kuumaliro kwa Malichi panji kukwamba kwa Epulero. Chikumbusko chikuchitika para mwezi wose wanthunthu wawoneka, kuumaliro kwa Malichi panji kukwamba kwa Epulero.

³⁰ Pa Mateyu 26:26-28, Yesu wakalongosora umo Chikumbusko chikwenera kuchitikira. Pa Chikumbusko pakuchitika minthondwe yayi, kweni pakuŵa waka chakurya icho chikwimira thupi na ndopa za Yesu. Awo ŵakurya chakurya ichi ni awo ŵachemeka kukalamulira pamoza na Yesu Khristu mu Ufumu wake kuchanya. (Luka 22:28-30) Ŵakhristu ŵanyake wose, kusazgapo ŵanthu ŵakunweka, ŵakuchiskika kuŵapo pa Mugonero wa Fumu, kweni iwo ŵakuryako yayi. Waliyose uyo wiza pa Chikumbusko wakulongora kuti wakuwonga ivyo Yehova Chiuta wali kuchita pakupeleka Mwana wake, Yesu Khristu. Pambere Chikumbusko chindachitike , mu mipingo yose ya Ŵakaboni ŵa Yehova mukuyowoyeka nkhani yapadera. Nkhani iyi yikovwira ŵanthu kuti ŵazakasangike pa Chikumbusko kweniso yikovwira awo ŵakukhumba kusambira Baibolo kumanya ivyo ŵangachita.

³¹ Ŵakaboni ŵa Yehova ŵakukondwa na maungano ghose chifukwa pa nyengo iyi ‘ŵakughanaghanirana na kuchiskana kuti ŵatemwanenge na kuchita milimo yiwemi.’ (Heb. 10:24) Muzga wakugomezgeka na wavinjeru wakuŵa maso pakunozga maungano agha kuti ghatovwire mwauzimu. Ŵateŵeti wose ŵa Yehova pamoza na ŵanthu wose ŵakunweka, ŵakuchiskika kuti ŵasangikengepo pa maungano ghose. Ŵateŵeti ŵa Yehova mbakukolerana chifukwa ŵakuwona ivyo Yehova wakuŵapa kwizira mu gulu lake. Chakuzirwa chomene ntchakuti para tili pa maungano, tikulumba na kuchindika Yehova.—Sal. 111:1.