Maungano Ghakunozgekera Uteŵeti Agho Ngakovwira
1. Kasi chilato cha maungano ghakunozgekera uteŵeti ntchakuti wuli?
1 Pa nyengo yinyake, Yesu wakakumana na ŵasambiri ŵake 70 pambere ŵandalute kukapharazga. (Luka 10:1-11) Wakaŵakhozga. Wakaŵakumbuska kuti ŵamuŵa ŵekha yayi chifukwa Yehova uyo ni ‘Mwenecho wa vuna’ ndiyo wakuŵalongozga. Kweniso wakaŵapa ulongozgi uwo ukaŵawovwira kuti ŵaŵe ŵakukwana kuchita mulimo uwu. Kufuma apo, wakaŵagaŵa “ŵaŵiriŵaŵiri.” Mazuŵa ghano napo, chilato cha maungano agho tikuchita pambere tindalute mu upharazgi ntchakuti ghatikhozge, kutovwira kuti tiŵe ŵakukwana kweniso ŵakunozgeka kupharazga.
2. Kasi ungano wakunozgekera uteŵeti ukwenera kutora nyengo yitali wuli?
2 Panyengo yasono, ungano wakunozgekera uteŵeti ukuŵa wa maminiti 10 panji 15. Mu nyengo iyi, uyo wakulongozga wakugaŵa ŵapharazgi, kuŵaphalira uko ŵamupharazga, na kulomba. Kweni sono visinthenge. Kwambira mu Epulero, ungano wakunozgekera uteŵeti uzamuchitikanga kwa maminiti 5 panji 7. Kweni para mukuchita pamanyuma pa maungano gha mpingo, ukwenera kutora maminiti ghachoko kujumpha apa, chifukwa ŵabali na ŵadumbu ŵakuŵa kuti ŵapulika kale fundo zinandi za mu Malemba. Para ungano wakunozgekera uteŵeti ngufupi, vikovwira kuti ŵabali na ŵadumbu ŵakapharazge nyengo yitali. Kweniso, usange ŵapharazgi ŵanguŵa kuti ŵambapo kale kupharazga, ŵakulekezga nyengo yitali yayi kupharazga chifukwa cha ungano uwu.
3. Kasi maungano gha uteŵeti ghakwenera kuchitika wuli kuti ghaŵe ghakovwira?
3 Ungano wakunozgekera uteŵeti ukwenera kuŵa wakovwira ku ŵapharazgi. Mu mipingo yinandi chikuŵa makora kuti gulu lililose la uteŵeti linozgekerenge palekha. Ichi chikovwira kuti ŵapharazgi ŵaleke kwenda mtunda utali pakuluta kukanozgekera uteŵeti panji pakuluta ku chigaŵa icho ŵamupharazgako. Kweniso ŵapharazgi ŵangagaŵika mwaluŵiro, ndipo chikuŵa chipusu ku ŵalaŵiliri ŵa magulu kovwira awo ŵali mu gulu lawo. Wupu wa ŵalara ungawona umo vinthu viliri mu mpingo wawo na kuchita icho chingaŵa chakovwira. Pambere mundajare na lurombo, wose ŵakwenera kumanya uko ŵamupharazga na uyo ŵendenge nayo.
4. Chifukwa wuli maungano ghakunozgekera uteŵeti nagho tikwenera kughazirwiska nga umo tikuchitira na maungano ghanyake?
4 Maungano Ghakunozgekera Uteŵeti Nagho Ngakuzirwa nga Ni Maungano Ghanyake gha Mpingo: Pakuti maungano ghakunozgekera uteŵeti ghakuchitika kuti ghawovwire awo ŵanjirenge mu upharazgi, pakuŵa mpingo wose yayi. Kweni ichi chikung’anamura kuti ngakuzirwa pachoko yayi pakuyaniska na maungano ghanyake gha mpingo. Nga umo ghaliri maungano ghanyake ghose, maungano ghakunozgekera uteŵeti ntchawanangwa chakufuma kwa Yehova icho chikutovwira kuchiskana kuti titemwanenge na kuchita milimo yiwemi. (Heb. 10:24, 25) Ntheura, uyo wakulongozga ungano uwu wakwenera kunozgekera makora mwakuti Yehova wachindikike kweniso kuti uŵe wakovwira ku ŵabali na ŵadumbu. Usange ŵangafiska, ŵabali na ŵadumbu awo ŵakuluta mu upharazgi ŵakwenera kuyezgayezga kuti ŵaŵepo pa ungano uwu.
Maungano ghakunozgekera uteŵeti ngakuzirwa pachoko yayi pakuyaniska na maungano ghanyake gha mpingo
5. (a) Kasi mulaŵiliri wa uteŵeti wali na mulimo wuli pakunozga maungano ghakunozgekera uteŵeti? (b) Kasi mudumbu wakwenera kuchita wuli para wakuchitiska ungano wakunozgekera uteŵeti?
5 Ivyo Uyo Wakulongozga Wakwenera Kunozgekera: Kuti munthu wanozgekere makora nkhani, wakwenera kupika mwaluŵiro. Uyo walongozgenge ungano wakunozgekera uteŵeti nayo wakwenera kupika mwakutendekera mulimo uwu. Para gulu lililose la uteŵeti likunozgekera palekha, mulaŵiliri wa gulu panji movwiri wake ndiyo wakwenera kuchitiska ungano wakunozgekera uteŵeti. Kweni para mpingo wose uzamukumana pamoza kuti unozgekere ungano wa uteŵeti, mulaŵiliri wa uteŵeti wangachitiska ungano uwu panji wangasankha munyake. Ŵalaŵiliri ŵanyake ŵa uteŵeti ŵakulemba ndondomeko ya maungano ghakunozgekera uteŵeti na kupeleka kwa wose awo ŵalongozgenge ungano uwu ndipo yinyake ŵakuyikhoma pa bolodi. Mulaŵiliri wa uteŵeti wakwenera kusankha ŵabali ŵakwenelera. Kuti maungano agha ghaŵe ghakovwira vikuthemba pa luso lwa awo ŵakulongozga. Usange palije mulara, muteŵeti wakovwira, panji mubali munyake wakubatizika, mulaŵiliri wa uteŵeti wakwenera kupempha mudumbu wakubatizika wakwenelera kuti wachitiske ungano uwu.—Wonani nkhani yakuti “Para Wachitiskenge Ni Mudumbu.”
6. Chifukwa wuli uyo walongozgenge ungano wakunozgekera uteŵeti wakwenera kunozgekera makora?
6 Para tapika nkhani mu Sukulu ya Uteŵeti wa Chiuta panji mu Ungano wa Uteŵeti, tikuŵikapo mtima ndipo tikunozgekera makora. Palije uyo wakwamba kunozgekera uku wali mu nthowa wakuluta ku maungano. Ndimoso tikwenera kuchitira para tapika mulimo wa kulongozga ungano wakunozgekera uteŵeti. Pakuti sono ungano wakunozgekera uteŵeti uŵenge ufupi, tikwenera kunozgekera makora chomene mwakuti ungano uwu uŵenge wakovwira na kumara pa nyengo yake. Kweniso pakunozgekera, uyo walongozgenge wakwenera kumanyirathu chigaŵa chakupharazgako.
7. Kasi ni vinthu wuli vinyake ivyo uyo walongozgenge ungano uwu wangadumbiskana na awo ŵakuluta mu upharazgi?
7 Ivyo Mungadumbiskana: Pakuti vinthu vikupambana malo na malo, muzga wakugomezgeka wandalembe autilayini ya maungano ghakunozgekera uteŵeti. Bokosi lakuti: “Pa Ungano Wakunozgekera Uteŵeti Mungadumbiskana” likulongosora ivyo tingadumbiskana. Chingaŵa chiwemi kuti ungano wakunozgekera uteŵeti uzakachitikenge mwakudumbiskana. Nyengo zinyake pangazakaŵa chiyezgelero panji vidiyo ya pa jw.org/tum iyo yili na ulongozgi wakwenelera. Pakunozgekera ungano wa uteŵeti, uyo wamulongozga wakwenera kughanaghanira ivyo wamuyowoya kuti wakakhozge na kovwira awo ŵakuluta mu upharazgi kuti ŵaŵe ŵakukwana.
Pakunozgekera ungano wa uteŵeti, uyo wamulongozga wakwenera kughanaghanira ivyo wamuyowoya kuti wakakhozge na kovwira awo ŵakuluta mu upharazgi kuti ŵaŵe ŵakukwana
8. Kasi mungadumbiskana vichi pa ungano wakunozgekera uteŵeti pa Chisulo na pa Sabata?
8 Pa Chisulo, ŵapharazgi ŵanandi ŵakugaŵira magazini gha Gongwe la Mulinda na Galamukani! Ŵanandi awo ŵakunjira mu uteŵeti pa Chisulo ŵakupharazga yayi mukati mu sabata. Ntheura ŵangaluwa upharazgi uwo ŵakayezgelera pa Nyengo Yakusopera ya Mbumba. Ipo chingaŵa chiwemi kudumbiskana masachizgo agho ghakuŵa pa peji laumaliro la Uteŵeti Withu wa Ufumu. Kweniso mungadumbiskana umo mungachitira kuti mukayowoyepo ivyo vyachitika mu chigaŵa chinu, ivyo mwapulika pa wayilesi, pa TV, mu nyuzipepara, panji vyakukhwaskana na holide. Mungadumbiskanaso ivyo mungachita kuti mukizeso para munthu wapokera magazini. Usange pa ungano wakunozgekera uteŵeti pali ŵabali panji ŵadumbu awo ŵagaŵirapo kale magazini agho mwamugaŵira, uyo wakulongozga wangaŵapempha kuti ŵayowoyepo masachizgo ghawo mwakudumura panji kuti ŵayowoyepo vinthu vyakukhozga ivyo vikachitika apo ŵakagaŵiranga. Pa Sabata, uyo wakulongozga wangachita mwakuyana waka na buku, burosha, panji thirakiti ilo tikugaŵira mwezi uwo. Mabuku panji maburosha agho tikusambizgira ŵanthu, nga ni burosha la Uthenga Uwemi na la Tegherezgani kwa Ciuta panji buku la Baibolo Likusambizgaci? tingagaŵira nyengo yiliyose. Ntheura uyo wachitiskenge ungano uwu wangalongosora mwakudumura umo mungachitira pakugaŵira buku panji maburosha agha.
9. Kasi para mukuchita upharazgi wapadera, mungadumbiskana vichi pa Chisulo na Sabata?
9 Usange mpingo ukuchita upharazgi wapadera pa Chisulo na Sabata, mungadumbiskana umo mungachitira kuti mugaŵire magazini gha mwezi uwo na kapepara kakuchemera ŵanthu panji thirakiti. Kweniso mungadumbiskana umo mungachitira para munthu wakukhumba kumanya vinandi. Panyakeso mungadumbiskana viwemi ivyo vikachitika apo mukachitanga upharazgi wapadera.
10, 11. Chifukwa wuli ntchakukhumbikwa kuti ŵapharazgi ŵanozgekerenge ungano wakunozgekera uteŵeti?
10 Ivyo Ŵapharazgi Ŵakwenera Kunozgekera: Ŵapharazgi nawo ŵangawovwira kuti ungano uwu wende makora. Para ŵanozgekerathu, ŵangakawovwiraso ŵapharazgi ŵanyawo. Ŵanganozgekera pa Nyengo Yakusopera ya Mbumba. Kweniso ŵakwenera kusangirathu magazini na mabuku ghanyake pambere ungano wakunozgekera uteŵeti undambe, mwakuti para ungano uwu wamara ŵazakalutenge luŵiro uko ŵamupharazga.
11 Kweniso ŵakwenera kwiza ku ungano wakunozgekera uteŵeti pambere undambe. Tikwenera kufwilirapo kuti tifikenge mwaluŵiro pa maungano ghose gha mpingo. Kweni vikutimbanizga chomene para tiza mwakuchedwa pa ungano wakunozgekera uteŵeti. Chifukwa wuli? Pali vinthu vinandi ivyo mubali uyo wakulongozga wakughanaghanira pambere wandagaŵe ŵapharazgi. Usange ŵapharazgi mbachoko wangaghanaghana kuti ŵalute ku chigaŵa icho chikakhalako pa ulendo wajumpha. Usange mwamupharazga kutali, awo ŵalije vyakwendapo wangaŵagaŵa na awo ŵali na vyakwendapo. Para chigaŵa icho mwamupharazgako ntchakofya, uyo wakulongozga wangaghanaghana kuti ŵadumbu ŵendere lumoza na ŵabali panji ŵabali ŵakapharazgenge pafupi na magulu gha ŵadumbu. Ŵapharazgi awo mbachekuru panji mbalwari wangaŵapa chigaŵa chafulati. Awo ŵamba sono kupharazga wangaŵagaŵa na awo ŵakamba kale. Kweni para ŵapharazgi ŵiza mwakuchedwa, kanandi uyo wakulongozga wakuŵagaŵaso panji kusintha vinthu vinyake. Nyengo zinyake tingachedwa pa vifukwa vyakupulikikwa. Kweni para kanandi tikuchedwa, tikwenera kujifumba usange tikuchedwa chifukwa chakuti tikughazirwiska yayi maungano ghakunozgekera uteŵeti panji chifukwa chakuti tikunozgekera mwakutendekera yayi.
12. Kasi usange kanandi mukusankha mwekha munthu uyo mwendenge nayo, mukwenera kuchita wuli?
12 Ŵapharazgi ŵangapanganiranathu pambere ungano uwu undayambe kuti ŵakapharazgire lumoza, panji uyo wakulongozga wangachita kuŵagaŵira. Usange kanandi mukupangana nayo mwekha uyo mwendenge nayo, mukwenera ‘kusanuzga.’ Mukwenera kwenda na ŵapharazgi ŵakupambanapambana m’malo mwa kwenda na ŵabwezi ŵinu pera nyengo zose. (2 Kor. 6:11-13) Nyengo zinyake mungenda na mupharazgi uyo wamba waka sono kupharazga kuti mumovwire kusambizga mwaluso. (1 Kor. 10:24; 1 Tim. 4:13, 15) Mukwenera kupulikiska ulongozgi. Unyake mwa ulongozgi uwu ungaŵa wakukhwaskana na uko mwamuyambira kupharazga. Usange ungano uwu wamara, mukwenera kuluta nyengo yeneyiyo, ndipo ntchiwemi yayi kusintha uyo ŵamugaŵirani panji vinyake ivyo mwaphalirika.
13. Kasi maungano ghakunozgekera uteŵeti ghangatovwira wuli usange tose tikuŵikapo mtima?
13 Ŵakati ŵamara kupharazga, ŵasambiri 70 awo Yesu wakaŵatuma ‘ŵakawerako na chimwemwe.’ (Luka 10:17) Ivyo Yesu wakaŵaphalira pa ungano uwo ŵakaŵa nawo pambere ŵandalute kukapharazga ndivyo vikwenera kuti vikaŵawovwira kuti ŵakapharazge makora. Mazuŵa ghano napo, maungano ghakunozgekera uteŵeti ghakovwira chomene. Usange tose tikuŵikapo mtima na kuchita chigaŵa chithu, maungano agha ghangaŵa ghakukhozga ndiposo ghangatovwira kuti tiŵe ŵakukwana na ŵakunozgeka kuchitira “ukaboni ku mitundu yose.”—Mat. 24:14.