Umo Tingasangira Candulo na Gulu la Uteŵeti wa M’munda
1. Kasi ni vyandulo wuli ivyo ticali kusanga mu magulu ghithu gha uteŵeti?
1 Kasi pali vinthu vinyake ivyo vikacitikanga pa Sambiro la Buku la Mpingo ivyo mukuwona kuti vikumupambani? Pa sambiro la buku tikaŵangapo ŵacoko, ndipo waliyose wakaŵanga wakufwatuka. Pa cifukwa ici, cikaŵanga cipusu kusanga ŵanyithu awo ŵakatikhozganga. (Zinth. 18:24) Mulaŵiliri wa sambiro la buku wakatimanyanga makora, ndipo wakatiwovwiranga waliyose payekha. (Zinth. 27:23; 1 Pet. 5:2, 3) Ticali kusanga vyandulo ivi mu magulu ghithu gha uteŵeti.
2. Kasi tingacita wuli kuti tisange ŵabwezi mu gulu lithu awo ŵangatikhozga mwauzimu?
2 Citanipo Kanthu: Unandi wa ŵapharazgi awo ŵakaŵanga mu magulu gha sambiro la buku ukuyana waka na awo ŵali mu Magulu gha uteŵeti. Usange tikupharazga “pamoza” na ŵanyithu, tingaŵa nawo paubwezi wa dyakapo nane nidyakepo. (Fil. 1:27) Kasi mbalinga awo mwendapo nawo mu upharazgi mu gulu linu? Kasi ‘mungasanuzga’ pa nkhani iyi? (2 Kor. 6:13) Tingacemera yumoza wa mu gulu lithu kunyumba kuti wazakaŵepo pa nyengo ya kusopa kwa mbumba panji kuti wazakamweko maji. Mu mipingo yinyake, magulu gha uteŵeti ghakusinthana kupokelera mulendo uyo wazamuyowoya nkhani yacisanisani. Para ni nyengo yawo kupokelera mulendo uyu, gulu lose likunozga cakurya kuti ŵakarye pamoza na kukhozgana yumoza na munyake. Ŵakucita ivi nanga ni para mubali uyu wangatondeka kuŵapo pa cakurya pa vifukwa vinyake.
3. Kasi mu magulu gha uteŵeti mukuŵa mwaŵi wuli wakukhozgeka na ŵalara?
3 Nangauli sono tikukumana kaŵiri pera pa sabata m’malo mwa katatu umo tikacitiranga kale, kweni ici cikung’anamura kuti ŵalara ŵagowozgeko mulimo wawo wakuliska mberere yayi. Gulu lililose lili na mulaŵiliri kuti wakhozgenge awo ŵali mu gulu lake na kuŵasambizga kupharazga. Usange mulaŵiliri wa gulu linu wandapanganepo namwe kuti mwendere lumoza mu upharazgi, mbwenu imwe mungamupempha kuti muzakendepo nayo. Kweniso, mulaŵiliri wa uteŵeti wakunozga ndondomeko yakwendera gulu limoza kuumaliro wa mwezi uliwose. Para mpingo uli na magulu ghacoko, mulaŵiliri wa uteŵeti wakwendera gulu lililose kaŵiri pa caka. Kasi imwe mukusintha ndondomeko yinu kuti muzakaŵepo para wakwendera gulu linu?
4. (a) Kasi maungano ghakunozgekera uteŵeti ghakucitika wuli? (b) Cifukwa wuli tikwenera kujipeleka kuti mu nyumba yithu mucitikirenge ungano wakunozgekera uteŵeti wa m’munda?
4 Cikuŵa ciwemi kuti gulu lililose likumanenge palekha pakunozgekera uteŵeti wa m’munda kuumaliro wa sabata. Para magulu ghakukumana pa malo ghakupambanapambana, cikovwira kuti ŵapharazgi ŵaleke kwenda mtunda utali pakuluta ku ungano wakunozgekera uteŵeti panji uko ŵamupharazga. Ŵapharazgi ŵangagaŵika luŵiro na kuluta uko ŵamupharazga kwambura kucedwa. Kweniso, cikuŵa cipusu kwa mulaŵiliri wa gulu kupwelelera awo ŵali mu gulu lake. Ndipouli, pangaŵa vyakucitika vinyake ivyo vingapangiska kuti magulu ghaŵiri panji kujumpha apa ghakumane pamoza pakunozgekera uteŵeti wa m’munda. Usange mpingo wose ukukumana pamoza pakunozgekera uteŵeti wa m’munda pa Cisulo cakwamba ca mwezi panji paumaliro wa Sambiro la Gongwe, cikuŵa makora kuti gulu lililose lipike nyengo yicoko mwakuti mulaŵiliri wa gulu wagaŵe awo ŵali mu gulu lake pambere mundajare na lurombo.—Wonani bokosi lakuti “Kasi Mungajipeleka Kuti mu Nyumba Yinu Mucitikirenge Ungano Wakunozgekera Uteŵeti?”
5. Kasi tingaŵa na cigomezgo wuli nangauli ndondomeko ya Sambiro la Buku yili kumara?
5 Nangauli ndondomeko ya Sambiro la Buku yili kumara, kweni Yehova wacali kutipa vyose ivyo tikukhumbikwira kuti ticite khumbo lake. (Heb. 13:20, 21) Yehova wakutipwelelera, ndipo tikusoŵerwa kanthu cara. (Sal. 23:1) Pali vitumbiko vinandi ivyo tikusanga kwizira mu magulu ghithu gha uteŵeti wa m’munda. Usange tikucitapo kanthu na ‘kuseŵa pakuru, tizamuvunaso pakuru.’—2 Kor. 9:6.
[Bokosi pa peji 6]
Kasi Mungajipeleka Kuti mu Nyumba Yinu Mucitikirenge Ungano Wakunozgekera Uteŵeti?
Mu mipingo yinyake magulu gha uteŵeti ghakucitira pamoza ungano wakunozgekera uteŵeti kuumaliro wa sabata cifukwa ŵalije malo ghakukumanako. Maungano ghakunozgekera uteŵeti wa m’munda nchigaŵa ca ivyo vikwenera kucitika pa mpingo, ntheura ni mwaŵi ukuru comene para maungano agha ghakucitira mu nyumba yithu. Kasi mungajipeleka kuti mu nyumba yinu mucitikirenge ungano uwu? Kugongowa yayi cifukwa ca umo nyumba yinu yiliri. Ŵalara ŵazamusanda malo uko nyumba yinu yili na fundo zinyake izo ŵakasandanga pakusankha malo ghakucitirako sambiro la buku. Usange mungajipeleka, manyiskani mulaŵiliri wa gulu linu.