Pa Maungano gha Kunozgekera Uteŵeti wa m’Munda Tidumbiskanengeso Lemba la Zuŵa Yayi

Kumanyuma uku, pa maungano gha kunozgekera uteŵeti wa m’munda nyengo zinyake tikadumbiskananga lemba la zuŵa mwakudumura usange fundo zake zikukolerana na uteŵeti wa m’munda. Kweni sono vyasintha. Tingagwiliskirangaso nchito kabuku ka Kusanda Malemba Zuŵa na Zuŵa yayi pakunozgekera maungano gha uteŵeti. Nga umo vikaŵira kale, awo ŵakulongozga ŵangagwiliskira nchito Baibolo, Uteŵeti Withu wa Ufumu, buku la Sukulu ya Uteŵeti, Kukambitsirana, na vinyake ivyo vikukolerana na uteŵeti wa m’munda. Awo ŵagaŵirika kuti ŵalongozgenge ŵakwenera kunozgekera makora fundo izo zingawovwira awo ŵalutenge mu uteŵeti pa zuŵa ilo. Nga umo vikaŵira kale, ungano uwu ukwenera kucitika mu maminiti ghambura kujumpha 15 ndipo ukwenera kuŵa ufupi para walongozgana na maungano gha mpingo.