Vifukwa Vinkhondi Vyakopera Ciuta M’malo mwa Kopa Munthu

MUNYAMATA wakakondwa comene. Ivyo vikacitika ndivyo wakalindizganga yayi. Apo wakadumbirananga na Ŵakaboni ŵa Yehova wakajulika kumaso. Kwa vilimika vinandi wakajifumbanga cifukwa ico Ciuta wazomerezgera masuzgo. Kweni pa nyengo iyi wakazgoreka makora kufuma mu Baibolo. Pakwamba wakamanyanga yayi kuti Baibolo liri na fundo zakuzirwa comene ndiposo zakukondweska.

Ŵalendo ŵakati ŵaluta waka, mama uyo wakaŵa mweneko nyumba wakakwiya na kwiza ku cipinda ca munyamata uyu. Wakamufumba kuti: “Kasi ŵanthu ŵara mbanjani?”

Munyamata uyu wakazizwa ndipo wakazgora cilicose yayi.

Mama uyu wakakalipa kuti: “Nkhuŵamanya, ndipo para uzamuŵapokeleraso uzamufuma mu nyumba yane kuti ukapenje malo kunyake.”

Mama uyu wakajara cijaro na kufumapo.

Ŵakhristu Ŵaunenesko Ŵakumanya Kuti Ŵasuskikenge

Ivyo vikacitikira munyamata uyu ni vyacilendo yayi. Mazgu gha Ciuta ghakulongosora kuti: “Wose awo ŵakukhumba kuŵa na umoyo wa kusopa Ciuta mwakujipeleka mwa Khristu Yesu, nawo ŵatambuzgikenge.” (2 Timote 3:12) Ŵakhristu ŵaunenesko ŵakutemweka yayi ndipo ŵazamutemwekapo yayi. Cifukwa wuli? Mpositole Yohane wakaphalira Ŵakhristu ŵanyake kuti: “Tikumanya kuti tili ŵakufuma kwa Ciuta, kweni caru cose cikugona mu nkhongono za muheni.” Satana Dyabulosi wakuyowoyekaso kuti ni “nkhalamu yakuwuluma, wakukhumba kumilimitizga yunji.” (1 Yohane 5:19; 1 Petrosi 5:8) Kopa ŵanthu nchilwero cimoza cankhongono ico Satana wakugwiliskira nchito comene.

Nanga ni Yesu Khristu, uyo wakacita vinthu vinandi viwemi ndiposo wakacitapo kwananga kulikose yayi, wakanyozeka na kutambuzgika. Wakati: “Ŵakanitinkha kwambura cifukwa.” (Yohane 15:25) Pa usiku wakuti namacero wafwenge, wakaphalira ŵalondezgi ŵake kuti: “Usange caru cikumutinkhani, imwe mukumanya kuti cadankha kutinkha ine pambere cindatinkhe imwe. Kumbukani mazgu agho nkhayowoya kwa imwe kuti, Muzga ni mukuru cara kuluska fumu yake. Usange ŵakanitambuzga ine, ŵatambuzgenge na imwe wuwo.”—Yohane 15:18, 20.

Cifukwa ca mazgu agha, ŵanandi ŵakatondeka kwamba kusopa kwaunenesko. Pakuyowoya za ŵanji awo nyengo yinyake ŵakamupenjanga Yesu, Baibolo likuti: “Pakaŵavya nanga njumoza uyo wakayowoyanga vya iyo pakweru cifukwa ca kopa Ŵayuda.” (Yohane 7:13; 12:42) Ŵalongozgi ŵa visopa ŵa mu nyengo iyi ŵakawofyanga kuti ŵacimbizgenge mu sunagoge waliyose uyo wakupulikana mwa Khristu. Ntheura, kopa ŵanthu kukatondeska ŵanandi kuŵa ŵalondezgi ŵa Khristu.—Milimo 5:13.

Mpingo wa Cikhristu ukati wakhazikiskika, tikuŵazga kuti kukawuka “nthambuzgo yikuru” kwimikana na mpingo wa mu Yerusalemu. (Milimo 8:1) Nakuti, mu vigaŵa vyose ivyo vikawusikanga na Ŵaroma, Ŵakhristu ŵakatambuzgikanga. Ŵanthu ŵakumanyikwa mu Roma ŵakaphalira mpositole Paulosi kuti: “Pakuti nadi mphatuka iyi, tikumanya kuti kulikose yikuyowoyereka uheni.” (Milimo 28:22) Enya, Ŵakhristu ŵaunenesko ŵakasuskikanga kulikose uko ŵakaŵa.

Nanga ni sono, Satana wacali kugwiliskira nchito cilwero ca kopa ŵanthu mwakuti ŵatondeske ŵanandi kuŵa ŵalondezgi ŵa Khristu. Ŵanthu awo ŵakusambira Baibolo na Ŵakaboni ŵa Yehova ŵakususkika panji kunyozeka na ŵanyawo ku sukulu, ku nchito, ŵazengezgani ŵawo panji ŵabwezi ŵawo. Ŵangawopa kuti ŵalekenge kucindikika, ŵabwezi ŵawo ŵaŵacimbirenge, ndiposo ŵalekenge kupokera wovwiri. Mu mizi yinyake, ŵalimi ŵakopa kuti ŵazengezgani ŵawo ŵangakana kuŵawovwira pa kuvuna panji kuvikilira viŵeto vyawo. Nangauli vingaŵa nthena, ŵanandi ŵasankha kugomezga Ciuta na kucita vinthu mwakuyana na Mazgu ghake, nga ni umo Yesu Khristu wakacitira. Yehova waŵatumbika cifukwa ca kucita nthena.

Vifukwa Vyakopera Ciuta, M’malo mwa Kopa Munthu

Baibolo likuticiska kuti tiwopenge Ciuta pera, munthu yayi. Likuti: “Kopa Yehova ndilo jando la vinjeru.” (Salmo 111:10) Wofi uwu ngwakwenelera, ndipo ukutipangiska kuti tileke kumukwiyiska Uyo wakatipa umoyo. Kopa Ciuta kukuyanako na citemwa. Cifukwa wuli pera tikwenera kopa Ciuta m’malo mwa kopa munthu? Tiyeni tiwone vifukwa vinkhondi.

 1 Yehova Ngwapacanya Comene. Yehova ngwankhongono comene kuluska munthu waliyose. Para tikopa Ciuta, tikulongora kuti tili ku cigaŵa ca Wankhongono Zose, uyo “mitundu ya ŵanthu yikuŵa nga ndi nthonyezi ya mu ciŵiya.” (Yesaya 40:15) Cifukwa cakuti Ciuta ngwankhongono zose wangaparanya “homwa [lililose] ilo lafulikira” awo ŵakumugomezga. (Yesaya 54:17) Tiyeni tileke kuzomerezga cilicose kutitondeska kusambira za iyo ndiposo kucita khumbo lake, cifukwa Ciuta ndiyo wazamusankha awo mbakwenelera kupokera umoyo wamuyirayira.—Uvumbuzi 14:6, 7.

 2 Ciuta watovwirenge na kutivikilira. Lemba la Zintharika 29:25 likuti: “Kopa ŵanthu kukuthya msampha, kweni uyo wakugomezga Yehova tiwasungikenge.” Kopa munthu ni msampha cifukwa kungatipangiska kuti tileke kulongora cipulikano cithu mwa Ciuta. Ciuta wakutisimikizgira kuti wali na nkhongono zakutivikilira. Baibolo likuti: “Ungopanga, pakuti Ine ndili nawe, ungofiwanga, cifukwa Ine ndine Ciuta wako; tindikukhozge na kukovwira, enya, tindikufighilire na woko lane la malyero ilo ndakutonda vyose.”—Yesaya 41:10.

 3 Ciuta wakutemwa awo ŵakusendelera kwa iyo. Mpositole Paulosi wakalemba mazgu ghakukondweska ghakuti: “Nakhorwa ine kuti nanga ni nyifwa nesi umoyo nesi ŵangelo nesi maboma panji vinthu ivyo viliko sono panji vinthu ivyo vikwiza panji nkhongono panji kutumphuka panji kunyang’amira panji cilengiwa cinyake cilicose, vimanyenge cara kutipatura ku citemwa ca Ciuta ico cili mwa Khristu Yesu Fumu yithu.” (Ŵaroma 8:37-39) Usange tikumugomezga Ciuta na kumupulikira, tingatemweka na Muwusi wa Cilengiwa cose. Uwu ni mwaŵi ukuru comene.

 4 Tikuzirwiska vyose ivyo Ciuta waticitira. Yehova ni Mlengi withu. Mwakusazgirapo watipa waka vinthu vyakukhumbikwa pa umoyo withu yayi, kweni watipaso ivyo tingasangwa navyo. Iyo ni Mupi nadi wa cawanangwa cilicose ciwemi. (Yakobe 1:17) Pakuwonga lusungu lwa Ciuta, Davide, munthu wakugomezgeka, wakalemba kuti: “A Yehova, Ciuta wane, milimo yinu njakuzizwiska iyo mwayandaniska; maghanoghano naghoso agho ghakutipwelera; . . . ghambura mapendeka.”—Salmo 40:5.

 5 Ŵanji awo ŵakususka ŵangasintha. Para mungalutilira kopa Ciuta na kumutemwa mungawovwira awo ŵakumususkani. Ghanaghanirani za ŵabali ŵa Yesu. Pakwamba ŵakapulikananga mwa iyo yayi kweni ŵakatenge: “Wafuntha.” (Mariko 3:21; Yohane 7:5) Pamanyuma, Yesu wakati wawuka, ŵanandi mwa iwo ŵakamba kumugomezga. Ŵanung’una ŵa Yesu, Yakobe na Yuda, ŵakalembako nanga ni vigaŵa vinyake vya mu Baibolo. Pakaŵaso Saulosi uyo wakatambuzganga comene Ŵakhristu, uyo wakazakaŵa mpositole Paulosi. Ŵanji awo ŵakutisuzga ŵangawona kuti tili na unenesko wa mu Baibolo cifukwa cakuti talutilira kuŵa ŵakugomezgeka.—1 Timote 1:13.

Mwaciyelezgero, Aberash, mwanakazi wa kuno ku Africa, wakalombanga kuti wamanye unenesko wakukhwaskana na Ciuta. Wakati wamba kusambira Baibolo na Ŵakaboni ŵa Yehova, ŵabali ŵake ndiposo ŵalongozgi ŵa visopa ŵakamususka comene. Ŵabali ŵake ŵanyake awo ŵakamba kusambira Baibolo ŵakaleka cifukwa ca kopa ŵanthu. Kweni iyo wakalomba kwa Ciuta kuti wamupe nkhongono na cikanga, ndipo wakabapatizika na kuŵa yumoza wa Ŵakaboni ŵa Yehova. Kasi nchivici cikacitika pamanyuma pake? Ŵabali ŵake ŵankhondi na ŵatatu ŵakambaso kusambira Baibolo ndipo ŵacali kulutilira kusambira.

Umo Mungalekera Kopa Munthu

Lekani kopa ŵanthu ndipo citani cilicose ico mungafiska kuti mukhozge ubwezi winu na Ciuta. Mungacita nthena mwa kusambira Baibolo na kulanguruka pa malemba nga ni Ŵahebere 13:6, ilo likuti: “Yehova ni movwiri wane; nopenge cara. Kasi munthu wangacitaci kwa ine?” Manyani kuti pali vifukwa viwemi ivyo tikwenera kopera Ciuta m’malo mwa kopa munthu.

Kumbukaniso kuti mutumbikikenge para mukulondezga ivyo mukuŵazga mu Baibolo. Mungakhorwa na mazgoro gha mafumbo ghakuzirwa comene. Mungaŵa na vinjeru vyakumazgira masuzgo. Mungasangwa na cilindizga ciwemi ca munthazi nangauli sono mukukumana na masuzgo. Ndiposo mungalomba kwa Ciuta nyengo yiliyose.

Mpositole Yohane wakalemba kuti: “Caru cikuluta, ntheura pera makhumbiro ghake, kweni uyo wakucita khumbo la Ciuta wakukhalilira muyirayira.” (1 Yohane 2:17) Iyi ni nyengo yakuti tikhome na kulutilira kopa Ciuta. M’malo mwa kuzomerezga kuti cipulikano cinu cilopwe cifukwa ca kopa ŵanthu, pulikirani mazgu gha Ciuta agha: “Mwana wane, khala wavinjeru na kukondwereska mtima wane, mwakuti ndimuzgore uyu wandicenya.” (Zintharika 27:11) Uwu ni mwaŵi wapadera comene.

Kumbukani kuti palije munthu wangamupani ivyo Ciuta wazamupeleka kwa awo ŵakumopa. Baibolo likuti: “Njombe ya kujiyuyura na kumopa Yehova ndi usambazi, na ulemu, na umoyo.”—Zintharika 22:4.

[Cithuzithuzi pa peji 14]

Cifukwa ca cikanga cake, ŵabali ŵankhondi na ŵatatu ŵa Aberash ŵakulutilira kusambira Baibolo