Yehova Wakukondwa Cifukwa ca Kugomezgeka Kwinu
“Mwana wane, khala wavinjeru na kukondwereska mtima wane, mwakuti ndimuzgore uyo wandicenya.”—ZINTH. 27:11.
1, 2. (a) Kuyana na buku la Job, kasi Satana wakususka vici? (b) Nchivici cikulongora kuti Satana wakalutilira kususka Yehova Yobu wati wafwa?
YEHOVA wakazomerezga Satana kuyezga Yobu muteŵeti wa Ciuta wakugomezgeka. Ntheura, viŵeto vyose ivyo Yobu wakaŵa navyo vikafwa kweniso ŵana ŵake ndipo iyo wakalwara comene. Kweni apo Satana wakasuskanga Yobu muteŵeti wakugomezgeka, wakaghanaghananga vya Yobu pera cara. Satana wakayowoya kuti: “Nkhanda kulifya nkhanda! Enya, munthu tiwapeleke vyose ivyo wali navyo kuwombora umoyo wake.” Fundo iyi yikulongora kuti Satana wakasuska kugomezgeka kwa Yobu pera yayi kweniso ŵanthu wose. Vili nthena cifukwa cakuti Yobu wati wafwa, Satana wakalutilira kususka.—Job 2:4.
2 Vikati vyajumpha vilimika pafupifupi 600 pamasinda pa kuyezgeka kwa Yobu, Solomoni wakalemba kuti: “Mwana wane, khala wavinjeru na kukondwereska mtima wane, mwakuti ndimuzgore uyo wandicenya.” (Zinth. 27:11) Pa nyengo iyi napo, Satana wakaŵa kuti wacali kususka Yehova. Mpositole Yohane wakawona Satana mu mboniwoni wakutundura ŵateŵeti ŵa Ciuta wati wacimbizgika kucanya Ufumu wa Ciuta wati wakhazikiskika mu 1914. Lero napo, peneapo tili mukati mweneco mwa mazuŵa ghaheni agha, Satana wacali kususka ŵateŵeti ŵa Ciuta ŵakugomezgeka.—Uvu. 12:10.
3. Ni fundo wuli zakuzirwa izo tikusambira mu buku la Job?
3 Ntheura tiyeni tiwone fundo zitatu zakuzirwa izo tikusambira mu buku la Job. Cakudanga, kuyezgeka kwa Yobu kukuvumbura uyo ni mulwani wa ŵanthu, mweneuyo wakwimikana na ŵanthu ŵa Ciuta. Mulwani uyu ndi Satana Dyabulosi. Caciŵiri, nanga tiyezgeke wuli, kuŵa paubwezi na Ciuta kutovwirenge kukhalilira ŵakugomezgeka. Cacitatu, para tikuyezgeka Ciuta wakutovwira kuzizipizga nga umo wakacitira na Yobu. Lero napo Yehova wakutovwira kwizira mu gulu lake, Mazgu ghake, ndiposo mzimu wake utuŵa.
Manyani Mulwani Winu
4. Kasi ni njani wakucitiska kuti pa caru paŵe mikhaliro yiheni?
4 Ŵanandi ŵakugomezga yayi kuti Satana waliko. Nangauli ŵakuzizwa na vyakucitika vya mu caru, ŵakumanya yayi kuti Satana Dyabulosi ndiyo wakucitiska. Mbunenesko kuti masuzgo ghanji ghali kwamba cifukwa ca tekha taŵanthu. Ŵapapi ŵithu ŵakwamba, Adamu na Eva ŵakagalukira Mlengi wawo. Kufuma pa nyengo yira, ŵanthu ŵacita vinthu mwambura mahara. Ndipouli, Dyabulosi ndiyo wakacitiska kuti Eva wagalukire Ciuta. Ndiyo wapangiska masuzgo agho ghaliko mazuŵa ghano. Cifukwa cakuti Satana ni “ciuta wa mgonezi uno,” ŵanthu ŵakulongora mikhaliro yakuyana na yake nga nkhujitemwa, mphindano, sanji, umbunu, upusikizgi na ucigaluka. (2 Kor. 4:4; 1 Tim. 2:14; 3:6; ŵazgani Yakobe 3:14, 15.) Mikhaliro iyi yapangiska kuti paŵe vivundungweru vya ŵandyali na ŵa visopa, kutinkhana, vimbundi ndiposo utimbanizgi, ivyo vikupangiska kuti pa caru paŵe masuzgo.
5. Kasi vinthu vyakuzirwa ivyo tamanya ticitenge navyo vici?
5 Taŵateŵeti ŵa Yehova tikumanya vinthu vinandi vyakuzirwa. Tikumanya uyo wakupangiska kuti vinthu pa caru capasi vihenipe. Kasi tikuciskika yayi kupharazgira ŵanji mwakuti ŵamanye uyo wakucitiska masuzgo? Kasi tili ŵakukondwa yayi kuŵa ku cigaŵa ca Yehova, ndiposo kulongosolera ŵanji umo wazamuparanyira Satana ndiposo kumazga masuzgo?
6, 7. (a) Kasi ni njani wakucitiska kuti ŵasopi ŵaunenesko ŵatambuzgikenge? (b) Kasi tingacita wuli nga ni Elihu?
6 Satana wakucitiska masuzgo pera yayi kweniso wakususka ŵanthu ŵa Ciuta. Ngwakukhumbisiska comene kuti watiyezge. Yesu Khristu wakaphalira mpositole Petrosi kuti: “Simoni, Simoni, wona! Satana wakukhumba imwe mwaŵanthu kuti wamupetani nga ni tirigu.” (Luka 22:31) Mwakuyana waka, waliyose uyo wakulondezga Yesu wazamuyezgeka. Petrosi wakayaniska Dyabulosi na “nkhalamu yakuwuluma,” iyo yikukhumba “kumilimitizga yunji.” Nakuti Paulosi wakayowoya kuti: “Wose awo ŵakukhumba kuŵa na umoyo wa kusopa Ciuta mwakujipeleka mwa Khristu Yesu, nawo ŵatambuzgikenge.”—1 Pet. 5:8; 2 Tim. 3:12.
7 Para mbali panji mudumbu withu mu mpingo wasangana na suzgo, kasi tingalongora wuli kuti tikumumanya mulwani withu? M’malo mwa kumugega uyo wasangana na suzgo, tikwenera kucita nga umo wakacitira Elihu, uyo wakayowoya mwaubwezi kwa Yobu. Tikovwirana nayo kulimbana na mulwani withu Satana. (Zinth. 3:27; 1 Tes. 5:25) Cilato cinthu nkhovwira muteŵeti munyithu kuti walutilire kugomezgeka mwambura kupwelerako za masuzgo agho wasangana nagho na kukondweska mtima wa Yehova.
8. Cifukwa wuli Satana wakatondeka kumulekeska Yobu kucindika Yehova?
8 Vinthu vyakwambilira ivyo Satana wakacitiska kuti Yobu wataye vikaŵa viŵeto. Viŵeto ivi vikaŵa vyakuzirwa comene kwa Yobu. Vikamovwirangaso Yobu pa kusopa. Pamasinda pa kuŵapaturatoweske, “wakawuka namacerocero wakapeleka sembe zakocha kwakuyana na unandi wawo wose; pakuti Yobu wakati, ‘Panji ŵana ŵane ŵananga, kumucitira Ciuta phuzu mu mitima yawo.’ Ntheura ndimo wakacitiranga Yobu mazuŵa ghose.” (Job 1:4, 5) Ici cikulongora kuti Yobu wakapelekanga sembe za nyama kwa Yehova nyengo na nyengo. Wakati wamba kusuzgika wakalutilira yayi kucita nthena. Wakaŵavya “mphango” zakuti wacindikire Yehova. (Zinth. 3:9) Kweni wakamucindika nipera na mulomo wake.
Iŵani Paubwezi na Yehova
9. Nchinthu wuli cakuzirwa ico tili naco?
9 Kwali ndise ŵasambazi panji ŵakavu, ŵawukirano panji ŵacekuru, ŵalwari panji yayi, tose tingaŵa paubwezi na Yehova. Mwambura kupwelerako za viyezgo ivyo tingakumana navyo, kuŵa paubwezi na Ciuta kutovwirenge kuti tilutilire kugomezgeka kwa iyo ndiposo kumukondweska. Nanga ni ŵanthu awo ŵakamanyanga vicoko vya Yehova, ŵakalutilira kugomezgeka ndiposo kuŵa ku cigaŵa ca Yehova.
10, 11. (a) Kasi mudumbu withu munyake wakacita wuli na viyezgo? (b) Ni zgoro wuli lankhongono ilo wakamuzgora Satana?
10 Ghanaghanirani za mudumbu Valentina Garnovskaya, uyo njumoza wa Ŵakaboni awo ŵakalutilira kugomezgeka ku Russia mwambura kupwelerako za viyezgo nga ni Yobu. Mu 1945, apo wakaŵa na vilimika 20, mbali munyake wakamupharazgira. Mbali uyu wakawelerako kaŵiri kukadumbiskana nayo fundo za mu Baibolo, ndipo kufuma apo, ŵakakumanaso yayi. Nangauli vikaŵa nthena, Valentina wakamba kupharazgira ŵazengezgani ŵake. Cifukwa ca kupharazga, wakakakika na kujalirika mu gadi kwa vilimika vinkhondi na vitatu. Mu 1953 ŵakamufumiska mu gadi ndipo nyengo yeneiyo wakambiraso kupharazga. Wakakakikaso na kujalirika mu gadi kwa vilimika khumi. Wati wakhalamo vilimika ŵakamusamuskira ku gadi linyake. Mu gadi ili, mukaŵa ŵadumbu awo ŵakaŵa na Baibolo. Zuŵa linyake mudumbu yunji wakamulongora Valentina Baibolo. Cikaŵa cakukondweska comene! Cifukwa padera pa Baibolo ili, linyake ilo wakaliwonapo likaŵa la mbali uyo wakamupharazgira mu 1945.
11 Mu 1967, Valentina ŵakamufumiska mu gadi ndipo wakapatulira umoyo wake kwa Yehova mwa kubapatizika. Cifukwa cakuti wakaŵa mwanangwa, wakajipeleka comene mu uteŵeti mpaka mu 1969. Ndipouli mu cilimika cenecici wakakakikaso, ulendo uwu wakakhala mu gadi kwa vilimika vitatu. Kweni wakalutilira kupharazga. Pambere wandafwe mu cilimika ca 2001, wakaŵa kuti wawovwira ŵanthu 44 kusambira unenesko. Wakakhala mu gadi vilimika 21. Wakaŵa wakunozgeka kutaya cilicose kusazgapo wanangwa mwakuti walutilire kugomezgeka kwa Ciuta. Ndipo mu mazuŵa gha umaliro gha umoyo wake, Valentina wakati: “Nkhaŵavya nyumba yane na yane. Vinthu ivyo nkhaŵa navyo vikazura waka sutikesi yimoza, ndipouli nkhaŵa wakukondwa ndiposo wakukhorwa kuteŵetera Yehova.” Valentina wakamuzgora Satana mwacikanga, uyo wakuti ŵanthu ŵangalutilira yayi kugomezgeka kwa Ciuta usange ŵangayezgeka. (Job 1:9-11) Tingaŵa na cigomezgo kuti wakakondweska mtima wa Yehova ndiposo kuti Yehova wazamuwuska Valentina na wose awo ŵakagomezgeka mpaka nyifwa.—Job 14:15.
12. Kasi citemwa cikovwira wuli ubwezi withu na Yehova?
12 Ubwezi withu na Yehova ukujintha pa umo ise tikumutemwera. Tikukondwa na mikhaliro yake ndipo tikuyezgayezga kukhala mwakukolerana na khumbo lake. Mwakupambana na ivyo Dyabulosi wakuyowoya tikumutemwa Yehova mwakucicizgika yayi panji pa vifukwa vya uryezi. Kutemwa kwakufumira pasi pa mtima, kukutikhozga kuti tilutilire kugomezgeka kwa iyo para tikuyezgeka. Nakuti Yehova “wakufighilira mendero gha ŵatuŵa ŵake.”—Zinth. 2:8; Sal. 97:10.
13. Kasi Yehova wakuviwona wuli ivyo tikumucitira?
13 Citemwa cikuticiska kucindika Yehova, nangauli tingajiwona nga tikucita vinandi yayi. Wakumanya ivyo tikukhumba kucita, ndipo wakuteruzga yayi para tatondeka kucita. Kwa iyo cakuzirwa ni ivyo tikucita pera cara kweni cifukwa ico tikucitira. Nangauli Yobu wakaŵa wacitima ndipo wakazizipizga comene, wakaphalira awo ŵakamutunduranga umo iyo wakutemwera Yehova. (Ŵazgani Job 10:12; 28:28.) Mu cipaturo ca umaliro ca buku la Job, Yehova wakakwiyira Elifaz, Bildad, na Zofar cifukwa cakuti ŵakayowoya utesi. Mwa kuzumunura Yobu kanayi kuti “muteŵeti wane” ndiposo kumuphalira kuti waŵaŵeyelere ŵakwananga mwa kupeleka sembe, Yehova wakalongora kuti wakakolerananga na Yobu. (Job 42:7-9) Mphanyi nase tacita vinthu mu nthowa yakuti Yehova watitemwe.
Yehova Wakovwira Ŵateŵeti Ŵake Ŵakugomezgeka
14. Kasi Yehova wakamovwira wuli Yobu kuti wasinthe kaghanaghaniro kake?
14 Nangauli Yobu wakaŵa wambura kufikapo, wakalutilira kugomezgeka kwa Ciuta. Nyengo yinyake Yobu wakawonanga vinthu mwambura kwenelera cifukwa ca masuzgo. Mwaciyelezgero, wakaphalira Yehova kuti: “Nkhulilira kwa Imwe ndipo kuti mukundipulika cara . . . Mwazgoka wankhaza kwa ine; na nkhongono ya woko linu mukundisuzga.” Nakuti Yobu wakajilunjikiskanga, apo wakati: “Ndili muheni cara” ndiposo nili na “nkhaza mu mawoko ghane cara, ndipo lurombo lwane ndutuŵa.” (Job 10:7; 16:17; 30:20, 21) Ndipouli, Yehova wakamulengera lusungu na kumovwira Yobu. Ciuta wakamufumba Yobu mafumbo agho ghakamovwira kuti wamanye kuti Ciuta ni mukuru kuluska munthu. Yobu wakazomera na kusintha kaghanaghaniro kake.—Ŵazgani Job 40:8; 42:2, 6.
15, 16. Kasi Yehova wakovwira wuli ŵateŵeti ŵake mazuŵa ghano?
15 Yehova wakupelekaso ulongozgi uwemi uwo ukutovwira comene. Mwaciyelezgero, Yesu Khristu wakapeleka sembe yakuwombora yeneiyo yikapeleka mwaŵi wa kugowokereka zakwananga. Cifukwa ca sembe iyi, tingaŵa paubwezi na Ciuta nangauli tili ŵambura kufikapo. (Yak. 4:8; 1 Yoh. 2:1) Para tikuyezgeka, tikulomba Ciuta kuti watovwire ndiposo kutikhozga na mzimu wake utuŵa. Kweniso tili na Baibolo, ndipo usange tikuliŵazga na kughanaghanirapo, tingatonda viyezgo. Kuŵazga kukutovwira kupulikiska nkhani yakukhwaskana na kugomezgeka ndiposo uyo ngwakwenelera kuwusa cilengiwa cose.
16 Kweniso, tikwandula cifukwa ca ubali wa pa caru cose weneuwo Yehova wakuwupa cakurya cauzimu kwizira mwa “muzga wakugomezgeka na wakucenjera.” (Mat. 24:45-47) Mu mipingo yose ya Ŵakaboni ŵa Yehova pafupifupi 100,000, mukucitika maungano agho ghakutikhozga na kutovwira kutonda viyezgo. Ciyelezgero ni ivyo vikacitikira Sheila, muwukirano wa vilimika 15 wa ku Germany nga umo tiwonerenge mu ndime yakulondezgapo.
17. Kasi ivyo vikacitikira muwukirano munyake vikulongora wuli kuzirwa kwa kusangika pa maungano nyengo zose?
17 Zuŵa linyake ku sukulu, ŵasambizgi ŵakizamo yayi mu kilasi ilo Sheila wakasambiranga. Ŵana ŵa sukulu ŵakamba kuyezgelera kuwukwa pa thabwa ilo ŵakulicema Ouija leneilo ŵati likuŵavwira kumanya vya munthazi. Nyengo yeneiyo Sheila wakafumamo mu kilasi, ndipo ivyo wakapulika kuti vikacitika mu kilasi vikamupangiska kuti waŵe wakukondwa cifukwa cakuti wakafumamo. Peneapo ŵakawukwanga, ŵana ŵa sukulu ŵanji ŵakajipulika kuti ŵakoleka na viŵanda ndipo ŵakacimbira cifukwa ca wofi. Nchivici ico cikamupangiska Sheila kuti wafumemo mu kilasi mwaluŵiro? Iyo wakati: “Pambere ivi vindacitike tikaŵa kuti tasambira waka ku Nyumba ya Ufumu uheni wa vyakucimira vya Ouija. Ntheura nkhamanya cakucita. Nkhakhumbanga kukondweska Yehova, nga umo Baibolo likuyowoyera pa Zintharika 27:11.” Sheila wakacita makora cifukwa wakawungana na mpingo na kupulikizga maungano na mtima wose.
18. Kasi imwe mwadumura kucitaci?
18 Tiyeni tose tilondezgenge ulongozgi uwo gulu la Ciuta likutipa. Tikusanga wovwiri para tikusangika pa maungano nyengo zose, kusambira Baibolo na mabuku ghakulembeka na muzga, kulomba, ndiposo kucezga na Ŵakhristu ŵakukhwima mwauzimu. Yehova wakukhumba kuti titondenge viyezgo, ndipo wali na cigomezgo kuti tilutilirenge kugomezgeka kwa iyo. Tili na mwaŵi ukuru comene wa kucindika Yehova, kulutilira kugomezgeka kwa iyo ndiposo kukondweska mtima wake.
Kasi Mukukumbuka?
• Kasi ni viyezgo na mikhaliro wuli ivyo Satana wakucitiska?
• Nchinthu wuli cakuzirwa ico tili naco?
• Kasi ubwezi withu na Yehova wajintha pa vici?
• Kasi Yehova wakutovwira wuli mazuŵa ghano?
[Cithuzithuzi pa peji 8]
Kasi mukuphalirako ŵanji vinthu vyakuzirwa ivyo mukumanya?
[Cithuzithuzi pa peji 9]
Tingawovwira ŵasopi ŵanyithu kuti ŵalutilire kugomezgeka kwa Ciuta
[Cithuzithuzi pa peji 10]
Valentina Wakaŵa wakunozgeka kutaya cilicose kuti walutilire kugomezgeka kwa Ciuta