Kasi Mungakateŵetera uko Kukukhumbikwa Ŵapharazgi Ŵanandi?

“Tikakhalanga makora ku United States pamoza na ŵana ŵithu ŵaŵiri, kweni tikafipanga mtima kuti tingatolera kaghanaghaniro ka ŵanthu ŵa ku malo agha, awo ŵakatemwanga comene vinthu vyakuthupi. Pakwamba ine na muwoli wane tikacitapo umishonale, ndipo tikakhumbanga kulutilira kuŵa ŵakukondwa ŵambura kukhumba vinandi.”

CIFUKWA ca khumbiro ili, mu 1991 Ralph na Pam ŵakalembera maofesi gha munthavi ghakupambanapambana, kuŵaphalira kuti ŵakukhumbisiska kukateŵetera uko kukukhumbikwa ŵapharazgi ŵanandi. Ofesi ya munthavi ya ku Mexico yikaŵazgora, ndipo yikaŵaphalira kuti ku caru ici kukukhumbikwira ŵapharazgi kuti ŵakapharazgirenge ŵanthu awo ŵakuyowoya Cingelezi. Ŵabali ŵa ku ofesi ya munthavi iyi ŵakati ku caru ici vuna yikaŵa kuti “yaca kale.” (Yoh. 4:35) Pakajumpha nyengo yicoko waka, Ralph na Pam ŵakamba kunozgekera kuluta pamoza na ŵana ŵawo ŵaŵiri ŵasepuka, munyake wakaŵa na vilimika 8 ndipo munyake vilimika 12.

Cigaŵa Cikuru

Ralph wakuti: “Pambere tindasame ku United States, ŵabali na ŵadumbu ŵanyake ŵakatiphalira kuti kusamira ku caru cinyake nkhwakofya comene. Iwo ŵakatifumba kuti: ‘Kasi para mwakalwara mwamucita wuli?’ ‘Cifukwa wuli mwaghanaghana za kusamira uko ŵanthu ŵakuyowoya Cingelezi? Ŵanthu awo ŵakuyowoya Cingelezi ŵamunweka yayi kusambira unenesko.’ Ndipouli, tikakhumbisiska kusama. Nakwenenako, tikaŵa kuti tasanda kale na kuwona kuti cikaŵa ciwemi kusamira ku caru ici. Tikaŵa kuti tanozgekera kwa vilimika vinandi. Tikaŵavya ngongoli zikuruzikuru, tikasungirathu ndalama zakuti zikatovwire, ndipo tikadumbiskananga kanandi waka za masuzgo agho tingakumana nagho para tingasama.”

Ralph na mbumba yake ŵakaluta dankha ku ofesi ya munthavi ya ku Mexico. Ŵabali ŵa ku ofesi iyi ŵakaŵalongora mapu gha caru cose ca Mexico ndipo ŵakaŵaphalira kuti: “Ici ndico nchigaŵa ico mwamuteŵeterako.” Mbumba iyi yikamba kukhala mu msumba wa San Miguelde Allende, uwo mukukhala ŵanthu ŵakufumira ku vyaru vyakupambanapambana, uwo wuli kumpoto kwa msumba wa Mexico pa mtunda wa makilomita 240. Ŵakati ŵakhala kwa vilimika vitatu mpingo wa ciyowoyero ca Cingelezi ukakhazikiskika ndipo ukaŵa na ŵapharazgi 19. Uwu ukaŵa mpingo wakwamba wa ciyowoyero ca Cingelezi ku Mexico. Kweni ŵakaŵa na mulimo ukuru wakuti ŵacite.

Ŵanthu pafupifupi 1 miliyoni ŵa ku United States ŵakukhala ku Mexico. Kweniso kuli ŵanthu ŵanandi ŵa ku Mexico awo ŵakuyowoya Cingelezi cifukwa ca nchito panji sukulu. Ralph wakuti: “Tikalomba Yehova kuti watipe ŵanthu ŵakuvuna ŵanandi. Tikaŵa na cipinda cinyake cakuti ŵabali awo ŵakizanga ‘kuzakapacira caru’ ici ŵafikirengemo.”—Maŵa. 13:1, 2.

Ŵakacepeskako Vyakucita Mwakuti Ŵapharazgenge Comene

Pakajumpha nyengo yitali yayi, kukiza ŵabali na ŵadumbu awo ŵakakhumbanga kusazgirako uteŵeti wawo. Ŵanyake mwa ŵabali aŵa, ŵakaŵa Bill na Kathy, awo ŵakafuma ku United States. Ŵakaŵa kuti ŵateŵeterapo kale vilimika 25 ku vigaŵa ivyo kukakhumbikwiranga ŵapharazgi ŵanandi. Ŵakaghanaghananga kusambira ciyowoyero ca ku Spain, kweni ŵakasintha maghanoghano ŵati ŵakhala mu msumba wa Ajijic uwo wuli mphepete mwa nyanja ya Chapala, uko kukakhalanga ŵanthu ŵanandi ŵa ku United States awo ŵakaŵa kuti ŵapumura nchito. Bill wakuti: “Ku Ajijic, tikayezgayezga comene kupenja ŵanthu ŵakuyowoya Cingelezi awo ŵakakhumbanga kusambira unenesko.” Vilimika viŵiri vikamara yayi, Bill na Kathy ŵakaŵa ŵakukondwa comene cifukwa mpingo waciŵiri wa ciyowoyero ca Cingelezi ukakhazikiskika ku Mexico.

Ken na Joanne ŵa ku Canada ŵakakhumbanga kucepeskako vinyake pa umoyo wawo mwakuti ŵaŵe na nyengo yinandi yakucitira vinthu vya Ufumu. Nawo ŵakasamira ku Mexico. Ken wakuti: “Vikatitolera nyengo kuti tizgoŵere kugeza maji ghazizimu, kukhala mu nyumba yambura magesi ndiposo telefoni.” Kweni ŵakaluwangako masuzgo agha cifukwa ca mulimo wa kupharazga. Pati pajumpha nyengo yicoko waka, Ken wakimikika kuŵa muteŵeti wakovwira, ndipo vilimika viŵiri vikati vyajumpha wakimikika kuŵa mulara. Cikaŵa cakusuzga comene kwa mwana wawo msungwana Britanny kuti wazgoŵerane na ŵadumbu ŵaciwukirano ŵa mu mpingo wa ciyowoyero ca Cingelezi uwo ŵakawungananga. Kweni wakati wajipeleka kovwirapo pa mulimo wa kuzenga Nyumba za Ufumu, wakasanga ŵabwezi ŵanandi comene.

Patrick na Roxanne awo ŵakafuma ku Texas ku United States ŵakamanya vinandi vyakukhwaskana na umishonale apo ŵakaŵa kufupi na caru ico ŵanthu ŵake ŵakuyowoya Cingelezi. Patrick wakuti: “Apo tikakatembeyanga ku Monterrey, tikawona nga ni para ndiko Yehova watilongozgera kuti tikawovwire ŵanthu.” Ŵakaguliska nyumba yawo iyo yikaŵa ku Texas, na ‘kwambukira’ ku Mexico. (Mil. 16:9) Kusanga vyakukhumbikwa pa umoyo kukaŵa kwakusuzga ku Mexico, kweni mu vilimika viŵiri, ŵakasangwa kuwona kuti kagulu kawo kakamba kukura kufuma pa Ŵakaboni 17 kufika pa mpingo wa ŵapharazgi 40.

Jeff na Deb ni mbumba yinyake iyo yikacepeskako vinthu vinyake mwakuti yisazgireko uteŵeti wake. Ŵakaguliska nyumba yawo yikuru ku United States na kusamira ku cirwa ca Cancún, mu caru ca Mexico ndipo ŵakamba kukhala mu kanyumba kacoko. Apo ŵakaŵa mu United States ŵakazgoŵera kucitira maungano mu nyumba izo zikuŵa na makina agho ghakovwira kuti muŵe mphepo yiwemi. Sono ŵakwenda maora ghankhondi na ghatatu kuti ŵafike uko ŵakucitira ungano mu ciyowoyero ca Cingelezi, uwo ukucitikira pa luŵaza. Kweni ŵakaŵa ŵakukondwa comene kuwona kukhazikiskika kwa mpingo wa ŵapharazgi pafupifupi 50 ku Cancún.

Ŵabali na Ŵadumbu ŵanji ŵa ku Mexico nawo ŵakamba kovwira mulimo wa kupharazga mu ciyowoyero ca Cingelezi. Mwaciyelezgero, peneapo Rubén na mbumba yake ŵakapulika kuti mpingo wakwamba wa ciyowoyero ca Cingelezi ukakhazikiskika mu San Miguel de Allende, nakuti Mexico nchigaŵa ca mpingo uwu, ŵakaghanaghana zakovwira. Kuti ŵacite nthena, ŵakakhumbikwiranga kuti ŵasambire Cingelezi, kusambira mdauko uphya, na kwenda mtunda wa makilomita 800 sabata yiliyose kuti ŵakasangikenge pa maungano. Rubén wakayowoya kuti: “Tikasangwa comene kupharazgira ŵanthu ŵa mu vyaru vinyake awo ŵakukhala ku Mexico kwa vilimika vinandi. Ŵanthu aŵa ŵakapulika makani ghawemi mu ciyowoyero cawo kwa nyengo yakwamba. Ŵanji mwa ŵanthu aŵa ŵakathiska masozi cifukwa ca kuwonga.” Pamanyuma pakuti ŵawovwira mpingo wa ku San Miguel de Allende, Rubén na mbumba yake ŵakacita upayiniya mu msumba wa Guanajuato, ku Mexico kweneuko ŵakawovwira kukhazikiska mpingo wa ciyowoyero ca Cingelezi weneuwo wuli na ŵapharazgi ŵakujumpha 30. Panyengo yasono ŵakuteŵetera na kagulu ako kakuyowoya Cingelezi mu Irapuato, msumba uwo uli kufupi na Guanajuato.

Kupharazga ku Awo Mbakusuzga Kuŵasanga

Padera pa kupharazgira ŵalendo, kuliso ŵenecaru ŵanandi awo ŵakuyowoya Cingelezi. Kanandi cikuŵa cakusuzga kuŵaphalira uthenga wa Ufumu cifukwa ŵakukhala mu vigaŵa ivyo mukukhala ŵanthu ŵakukhupuka ndipo ŵanchito ndiwo ŵakupokelera ŵalendo. Panji, usange mwenenyumba ndiyo wamupokelerani, wakutegherezga cara uthenga withu cifukwa wakughanaghana kuti Ŵakaboni ŵa Yehova ni kagulu ka mphatuka mu cigaŵa ico. Ndipouli, para ŵenenyumba aŵa ŵakumana na Ŵakaboni ŵa mu vyaru vinyake, ŵanji ŵakutegherezga makora comene.

Apulikani ivyo vikacitikira Gloria mu msumba ucoko wa Querétaro ku Mexico. Iyo wakalongosora kuti: “Ŵakaboni ŵa Yehova awo ŵakuyowoya Cispanishi ŵakafika ku nyumba yane kweni nkhakana kuti ŵanipharazgire. Ndipouli, peneapo mbumba yane na ŵabwezi ŵane ŵakamba kusuzgika, nkhasuzgika comene maghanoghano, antheura nkhalomba kwa Ciuta, kuŵeyelera kuti wanovwire kumazga masuzgo. Pakajumpha nyengo yayi, mwanakazi munyake uyo wakuyowoya Cingelezi wakafika pa nyumba yithu. Wakanifumba usange mu nyumba yithu walipo uyo wakuyowoya Cingelezi. Pakuti wakaŵa mulendo, nkhakhumbanga kumanya vinandi vyakukhwaskana na iyo, ndipo nkhamuphalira kuti nane nkhuyowoya Cingelezi. Peneapo wakayowoyanga, nkhaghanaghananga kuti, ‘Kasi mwanakazi uyu wakupenjaci kuno?’ Kweni nkhaŵa kuti nalomba kwa Ciuta kuti wanovwire. Panji Ciuta wazgora lurombo lwane mwakunitumira mulendo uyu.” Gloria wakazomera kusambira Baibolo ndipo wakalondezganga ivyo wakasambira, ndipo wakabapatizika nangauli mbumba yake yikamususkanga comene. Pasono, Gloria ni mupayiniya wanyengo zose, ndipo mfumu wake na mwana wake munyamata ŵakuteŵetera Yehova.

Vyandulo ku Awo Ŵakusazgirako Uteŵeti Wawo

Kuteŵetera ku cigaŵa ico kuli ŵapharazgi ŵacoko ŵa Ufumu kuli na masuzgo ghake, kweni vyandulo ni vinandi. Ralph, uyo wazunurika kuuyambiro wa nkhani yino, wakuti: “Tikasambizganga Baibolo ŵanthu ŵakufuma ku Britain, China, Jamaica, Sweden, ndiposo ku Ghana. Ŵanji mwa ŵasambiri aŵa ŵakamba kupharazga nyengo zose. Ndipo mu vilimika ivyo vyajumpha, mbumba yithu yawona mipingo yinkhondi na yiŵiri ya ciyowoyero ca Cingelezi yikukhazikiskika. Ŵana ŵithu wose ŵaŵiri ŵakakolerana nase kucita upayiniya, ndipo wose ŵakuteŵetera pa Beteli ku United States.”

Panyengo yasono, mu Mexico muli mipingo ya ciyowoyero ca Cingelezi 88 na tumagulu tunandi. Nchivici cawovwira kuti vinthu vyendenge makora nthena? Ŵanthu ŵanandi awo ŵakuyowoya Cingelezi ku Mexico ŵakaŵa ŵandakumanepo na Ŵakaboni ŵa Yehova. Ŵanyake ŵakapulikizganga cifukwa ŵakapwelerako cara ŵanthu awo ŵakaŵasuskanga kukwawo. Ndipouli, ŵanji ŵakazomera sambiro la Baibolo cifukwa ŵakapumura pa nchito ndipo ŵakaŵa na nyengo ya kucitira vinthu vyauzimu. Kusazgirapo apa, ŵapharazgi ŵanandi mu mipingo ya Cingelezi mbapayiniya, ceneico cawovwira ŵanji kuŵa ŵamwamphu kweniso kuti mipingo yikure.

Vitumbiko Vikumulindilirani

Mwambura kukayika, ŵanthu ŵanandi pa caru cose capasi ŵakukondwa kupulika uthenga wa Ufumu mu ciyowoyero cawo. Ntheura nchakukhozga kuwona kuti ŵabali na ŵadumbu ŵakukhwima mwauzimu, ŵawukirano, ŵacekuru, ŵa mu nthengwa na awo ŵali mu nthengwa yayi, mbakukhumbisiska comene kusamira uko ŵapharazgi ŵa Ufumu mbacoko. Ndipo nadi, ŵakuzizipizga masuzgo, kweni masuzgo agha nkhanthu kacoko pakuyaniska na cimwemwe ico ŵakuŵa naco cifukwa ca kusanga ŵanthu ŵa mitima yiwemi awo ŵakuzomera unenesko. Kasi namwe mungasintha vinthu vinyake mu umoyo winu mwakuti musamire ku cigaŵa cinyake panji ku caru cinyake uko ŵapharazgi ŵa Ufumu mbacoko?a (Luka 14:28-30; 1 Kor. 16:9) Usange mungacita ntheura, muzamutumbikika comene.

[Mazgu ghamusi]

[Bokosi pa peji 21]

Ŵakupumura pa Nchito Awo Mbakukondwa

Beryl wakasama ku Britain na kukakhala ku Canada. Kura, wakaŵa bwana mulara wa makampani ghanandi. Kweniso wakamanyanga kwendeska haci mwaluso ndipo nyengo yinyake ŵakamusora kuti wakimire caru ca Canada ku maseŵero gha Olympics gha 1980. Wati wapumura nchito na kuwelera ku Chapala, ku Mexico, Beryl na mfumu wake ŵakatemwanga kurya mu malesitilanti. Peneapo wakawona ŵanthu ŵanyake ŵacekuru ŵeneawo ŵakaŵa ŵakukondwa, wakaŵatawuzga na kuŵafumba ico ŵakacitanga mu Mexico. Kanandi ŵanthu awo ŵakawonekanga kuŵa ŵakukondwa ŵeneawo ŵakaryanga mu lesitilanti iyi, ŵakaŵa Ŵakaboni ŵa Yehova. Berly na mfumu wake ŵakaghanaghananga kuti usange kumanya Ciuta kukupangiska kuti munthu waŵe wakukondwa. Ntheura nawo ŵakanweka kuti ŵamumanye Ciuta. Ŵati ŵaungana na mpingo kwa myezi yinandiko, Berly wakazomera kusambira Baibolo ndipo pamanyuma pake wakazgoka Kaboni wa Yehova. Kwa vilimika vinandi, Berly wakacita upayiniya wanyengo zose.

[Bokosi pa peji 22]

“Likaŵa Thumbiko Kuŵa Nawo”

Ŵabali ŵa uko kuli ŵapharazgi ŵacoko ŵa Ufumu, ŵakuwonga comene awo ŵakusamirako. Ofesi ya munthavi yinyake ku Caribbean yikalemba kuti: “Usange ŵabali ŵakuwaro kwa caru ico wangawelera ku kwawo, mbwenu mipingo yinandi yiyaghayikenge. Ni thumbiko kuŵa nawo.”

Mazgu gha Ciuta ghakuyowoya kuti, “wumba wa [ŵanakazi] awo ŵakuthuwuska makani ngukuru.” (Sal. 68:11) Ntheura, nchakuzizwiska yayi kuti pakati pa awo ŵakuteŵetera mu vyaru vinyake pali ŵadumbu ŵanandi ŵambura kutengwa. Ŵadumbu aŵa ŵakovwira comene. Ofesi ya munthavi yinyake ku Eastern Europe yikati: “Mu mipingo yithu yinandi muli ŵadumbu ŵanandi mutepanji nyengo zinyake ŵakujumpha hafu ya ŵapharazgi. Ŵanandi mwa ŵadumbu aŵa ni ŵaphya mu unenesko, kweni ŵadumbu awo mbapayiniya, ŵeneawo mbalendo ŵakufuma ku vyaru vinyake ŵakovwira ŵadumbu ŵaphya aŵa. Ŵadumbu ŵakufuma mu vyaru vinyake aŵa nchawanangwa nadi kwa ise.”

Kasi ŵadumbu aŵa ŵakuyowoyaci za kuteŵetera mu vyaru vinyake? Angelica uyo wali na vilimika pafupifupi 30 ndipo ngwambura kutengwa, mweneuyo wateŵetera vilimika vinandiko nga ni mupayiniya wakuti: “Masuzgo nganandi, ku caru cinyake uko nkhateŵetera. Nkhasuzgikanga zuŵa lililose kwenda mu mathipa ndiposo kuwona ŵanthu ŵanandi ŵakusuzgika. Kweni nkhakondwanga comene kovwira ŵanthu mu uteŵeti. Nkhakhwaskikanga comene na mazgu ghakuwonga ghacitemwa agho ŵadumbu ŵakayowoyanga cifukwa ca kwiza kuzakaŵawovwira. Mudumbu munyake wakaniphalira kuti, cifukwa cakuti nkhenda mtunda utali kwiza ku caru cawo kuzakacita upayiniya nayo waciskika kucita uteŵeti wanyengo zose.”

Sue, uyo ni mupayiniya wa vilimika vya m’ma 50 wakuti: “Tikukumana nadi na masuzgo, kweni ghangayana yayi na vitumbiko ivyo tikupokera. Uteŵeti ukukondweska. Cifukwa cakuti nyengo yinandi nkhuŵa mu uteŵeti na ŵapayiniya ŵaciwukirano, nkhuŵaphalira ivyo nasambira mu Baibolo ndiposo mu mabuku ghithu umo tingacitira na masuzgo. Kanandi ŵakuniphalira kuti ŵakukhozgeka cifukwa cakuti ine nkhuzizipizga masuzgo uku nkhulutilira kuteŵetera, ndipo nawo ŵakusambira kuti ŵangatonda masuzgo. Kovwira ŵadumbu aŵa kukunikhozga comene.”

[Mapu pa peji 20]

(Mu magazini yakusindikizga ndimo vikuwoneka makora)

MEXICO

Monterrey

Guanajuato

Irapuato

Ajijic

Chapala

Nyanja ya Chapala

San Miguel de Allende

Querétaro

MSUMBA WA MEXICO

Cancún

[Cithuzithuzi pa peji 23]

Ŵanji mbacimwemwe cifukwa ca kupharazgira ŵalendo awo ŵakupulika makani ghawemi kwa nyengo yakwamba