Ŵakajipeleka na Mtima Wose mu Mexico

NCHAKUKONDWESKA comene kuwona kuti ŵawukirano ŵanandi awo Mbakaboni, ŵakucepeskako vyakukhumba pa umoyo kuti ŵacite vinandi mu uteŵeti wawo pakuŵa Ŵakhristu. (Mat. 6:22) Kasi ŵakusintha vinthu wuli? Kasi ŵakukumana na masuzgo wuli? Kuti timanye mazgoro gha mafumbo agha, tiyeni timanye ŵanji awo panyengo yasono ŵakuteŵetera mu Mexico.

“TIKENERANGA KUSINTHA”

Dustin na Jassa ŵa ku United States ŵakatorana mu Janyuwale 2007. Nyengo yicoko waka yikati yajumphapo, ŵakafiska cilato cawo ca kuŵa na boti lawo na lawo ico ŵakaŵa naco kwa nyengo yitali, ndipo likaŵawovwiranga kwa caka cose. Ŵakakakiliranga boti lawo ili pafupi na Astoria, mu Oregon, U.S.A., tawuni yakutowa yakuzingilizgika na tumapiri uto tuli na makuni ghanandi, na mapiri agho pacanya pake pakuŵa ciwuvi, pafupi na Nyanja ya Pacific. Dustin wakati: “Kulikose uko mungalaŵiska pa malo agha, nkhwakutowa.” Mbumba iyi yikaghanaghananga kuti yikaŵa na umoyo wambura kukhumba vinandi ndiposo kuti yikathembanga Yehova. Ŵaŵiri aŵa ŵakati: ‘Nakuti tikovwirika na boti lithu la mamita 7.9, tikugwira nchito ya maora ghacoko, tikuwungana na mpingo wa ciyowoyero cinyake, ndipo nyengo na nyengo tikuteŵetera nga mbapayiniya ŵakanyengo.’ Kweni nyengo yikati yajumphapo ŵakawona kuti ŵakajipusikanga. Dustin wakati: “M’malo mwa kukhozgera mpingo, nyengo yinandi tikamaliranga pa kunozga boti lithu. Tikamanya kuti usange tikukhumba nadi kuŵika Yehova pa malo ghakwamba mu umoyo withu, tikeneranga kusintha.”

Jassa wakasazgirapo kuti: “Pambere nindatengwe nkhakhalanga ku Mexico, uko nkhawungananga na mpingo wa Cingelezi. Nkhakondwanga comene kuteŵetera ku malo agha, ndipo nkhaŵa wakukhumbisiska kuwelerako.” Pa nyengo yakusopera ya mbumba, kuti ŵanweke comene kukateŵetera ku caru cinyake, Dustin na Jassa ŵakamba kuŵazga nkhani zakulongosora umoyo wa ŵabali na ŵadumbu awo ŵakasamira ku vyaru vinyake uko minda yikaŵa kuti yaca kale mwakuti yivunike. (Yoh. 4:35) Dustin wakati: “Nase tikakhumbanga kuti tisange minda yanthena iyi.” Ŵakati ŵapulika kuti mu Mexico mukaŵa gulu liphya ilo likakhumbikwiranga wovwiri, Dustin na Jassa ŵakasankha kuti ŵalute. Ŵakaleka nchito zawo, ŵakaguliska boti lawo na kuluta ku Mexico.

‘CINTHU CIWEMI COMENE ICO TILI KUCITA’

Dustin na Jassa ŵakafikira mu tawuni ya Tecomán iyo yili pafupi na Nyanja ya Pacific kweni pa mtunda wa makilomita 4,345 kumwera kwa Astoria. Dustin wakati: “M’malo mwa tumphepo tuwemi twakuzizima na mapiri ghakutowa, kuno kukocha comene ndipo kuli makuni gha mazobala pera.” Pakwamba ŵakatondeka kusanga nchito. Pakuti ndalama zawo zikaŵa zicoko, iwo ŵakaguranga vyakurya vyakuchipako pakuyaniska na ivyo ŵakaguranga pakwamba. Jassa wakati: “Kweni pambere vyakurya ivi vindatichipe, ŵanthu awo tikasambiranga nawo Baibolo ŵakamba kutipa mango, nthoci, vipayipayi panji kuti mapapaya, na mathumba ghakuzura na mazobala.” Nyengo yikati yajumphapo, mbumba iyi yikasanga nchito ku sukulu ya pa Intaneti yakusambizga ciyowoyero iyo yili ku Taiwan. Panyengo yasono, ndalama izo ŵakusanga pa nchito iyi ndizo zikuŵawovwira pakugura ivyo ŵakukhumba.

Kasi Dustin na Jassa ŵakujipulika wuli na umo ŵakukhalira sono? Iwo ŵakati: “Kusama nchinthu ciwemi comene ico tili kucita. Sono ndipo ubwezi withu na Yehova ndiposo ku yumoza na munyake ngukuru comene kuluska umo tikaghanaghaniranga. Zuŵa lililose tikucitira lumoza vinthu, tikulutira lumoza mu uteŵeti, tikudumbiskana umo tingawovwilira ŵanthu awo tikusambira nawo Baibolo, na kunozgekera maungano. Kweniso tili kufwatuka ku masuzgo agho tikaŵanga nagho kumasinda.” Ŵakasazgirapo kuti: “Pa nyengo yasono tikumanya ivyo kale tikalekanga kuvipulikiska, ivyo ni unenesko wa layizgo ilo lili pa lemba la Salmo 34:8, ilo likuti: ‘Cetani ’mwe! muwone kuti Yehova ndi muwemi.’”

ŴANCHITO MASAUZANDI GHANANDI ŴAKUJIPELEKA, KASI NCHIVICI ICO CIKUŴACISKA?

Ŵabali na ŵadumbu ŵakujumpha 2,900, ŵakutorana ndiposo ŵambura kutora panji kutengwa, ŵasama kuti ŵakateŵetere mu vigaŵa vya ku Mexico ivyo ŵapharazgi ŵa Ufumu mbacoko. Ŵanandi pa ŵabali na ŵadumbu aŵa ŵali na vyaka vya m’ma 20 na 30. Cifukwa wuli Ŵakaboni wose aŵa ŵali kusankha kucita mulimo wakusuzga uwu? Apo ŵacoko waka pa ŵabali na ŵadumbu aŵa ŵakafumbika fumbo ili ŵakayowoya vifukwa vikuruvikuru vitatu. Kasi vifukwa ivi ni vyakuti wuli?

Kuti ŵalongore kuti ŵakutemwa Yehova na ŵazengezgani. Leticia wakabapatizika apo wakaŵa na vyaka 18. Mudumbu uyu wakati: “Apo nkhajipatuliranga kwa Yehova, nkhamanya kuti nkheneranga kumuteŵetera na mtima wane wose. Ntheura kuti nilongore kuti nkhutemwa Yehova na mtima wane wose, nkhakhumba kuti nimalirenge nkhongono na nyengo yane yinandi pa kumuteŵetera.” (Mrk. 12:30) Hermilo, uyo wali kutora Leticia, wakaŵa na vyaka vya m’ma 20 apo wakalutanga kukateŵetera uko ŵapharazgi ŵa Ufumu ŵakaŵa ŵacoko. Iyo wakati: “Nkhawona kuti kovwira ŵanthu kuti ŵamanye Ciuta ni nthowa yiwemi yakulongolera citemwa ku ŵazengezgani.” (Mrk. 12:31) Ntheura wakawuleka msumba usambazi wa Monterrey, uko wakagwiranga nchito mu banki na kukhala umoyo wapacanya, ndipo wakasamira mu tawuni yicoko.

Kuti ŵaŵe na cimwemwe ceneko kweniso cambura kumara. Wakati wabapatizika waka, Leticia wakaluta ku tawuni yinyake na mupayiniya uyo wacita uteŵeti uwu kwa nyengo yitali, ndipo ŵakakapharazgako kwa mwezi umoza. Pakukumbuka ivyo vikacitika, Leticia wakati: “Nkhazizwa comene. Pakuwona umo ŵanthu ŵakapulikizgiranga uthenga wa Ufumu uwo tikaŵapharazgiranga, nkhaŵa na cimwemwe cikuru comene. Paumaliro wa mwezi uwu nkhati: ‘Ivi ndivyo nkhukhumba kucita pa umoyo wane.’” Mwakuyana waka, cimwemwe ca ŵapharazgi ŵanyake ndico cikakopa Essly kuti waciteko uteŵeti uwu. Mudumbu uyu ngwambura kutengwa ndipo sono wali na vyaka vya m’ma 20. Apo wakaŵa kuti wacali ku sekondare, wakakumana na Ŵakaboni ŵanandi ŵamwamphu awo ŵakateŵeteranga uko ŵapharazgi mbacoko. Mudumbu uyu wakati: “Pakuwona visko vyacimwemwe vya ŵabali na ŵadumbu aŵa, nkhanweka kuti nane nikhale nga umo iwo ŵakakhaliranga.” Ŵadumbu ŵanandi ŵacita nga ni Essly. Nakuti mu Mexico, ŵadumbu ŵambura kutengwa ŵakujumpha 680 ŵakuteŵetera uko ŵapharazgi mbacoko. Ici nchakuwonerapo ciwemi nadi ku ŵawukirano na ŵalara wuwo.

Kuti umoyo wawo uŵe wacandulo ndiposo wakukhorweska. Wati wamalizga masambiro gha ku sekondare, Essly wakapika mwaŵi wakuti wakasambire ku yunivesite kwambura kulipira. Ŵanyake ŵakamuciska kuti wazomere mwaŵi uwu kuti wazakaŵe na umoyo uwo ŵakuti “umoyo uwemi,” wazakasange digiri, nchito yapacanya, galimoto, na kuŵa na nyengo yakuvakacira. Ndipouli, wakalondezga yayi ulongozgi wawo. Essly wakati: “Ŵakhristu ŵanyane ŵanandi ŵakapenjanga vinthu ivi, ndipo nkhawona kuti ŵakaleka kuŵika vinthu vyauzimu pa malo ghakwamba. Kweniso nkhawona kuti ŵakasoŵanga cakucita na masuzgo agho ŵakasangananga nagho cifukwa ca kucita vinthu vya caru. Nkhakhumbanga kugwiliskira nchito uwukirano wane kuti niteŵetere Yehova.”

Essly wakacita makosi ghanyake agho ghakamovwira kuti wasange nchito kuti yimovwirenge apo wakucita upayiniya, ndipo pamanyuma wakasamira uko ŵapharazgi ŵa Ufumu ŵakaŵa ŵacoko comene. Wakamba kusambira viyowoyero ivyo Ŵaotomi na Ŵatlapaneco ŵakuyowoya. Para wakulaŵiska kumanyuma mu vyaka vitatu ivyo wapharazgira mu vigaŵa ivi, panyengo yasono wakuti: “Kuteŵetera uko ŵapharazgi mbacoko kwapangiska kuti umoyo wane uŵe wakukhorwa nadi kweniso wacandulo. Cakuzirwa comene nchakuti uteŵeti uwu wakhozga ubwezi wane na Yehova.” Phillip na Racquel, ŵakutorana awo ŵali na vyaka vya m’ma 30, ŵeneawo ŵali kufuma ku United States nawo ŵakuzomerezga fundo iyi. Ŵakati: “Caru cikusintha luŵiro comene mwakuti ŵanandi ŵakuwona kuti nchakusuzga kuti ŵasange ivyo ŵakukhumba pa umoyo. Kweni umoyo withu ukuŵa wacandulo para tikusanga ŵanthu ŵanandi awo ŵakutegherezga uthenga wa mu Baibolo. Uteŵeti uwu ngwakukhorweska nadi.”

UMO MUNGACITIRA NA MASUZGO

Mbunenesko kuti uteŵeti wa uko ŵapharazgi ŵa Ufumu mbacoko uli na masuzgo ghake. Suzgo limoza nkhusanga ndalama zakujipwelelelera. Kuti musange ndalama zakujipwelelelera mukwenera kuŵa ŵakukhumbisiska kusintha mwakuyana na umo vinthu viliri ku malo agho. Verónica, mupayiniya uyo wateŵetera kwa nyengo yitali wakalongosora kuti: “Apo nkhateŵeteranga ku malo ghanyake, nkhaphikanga na kuguliska vyakurya vya ndalama zicoko. Ku ghanyake, nkhaguliskanga vyakuvwara na kumeta sisi. Pa nyengo yasono, nkhutozga nyumba na kusambizga ŵapapi awo nkhakwamba kuŵa na ŵana, ndipo nkhuŵasambizga umo ŵangayowoyeskerana na ŵana ŵawo.”

Kuzgoŵera mitheto na maluso gha ŵanthu ŵanyake lingaŵa suzgo likuru, comenecomene para mukukhala ku cigaŵa cakutali ico ŵanthu awo ŵakukhalako mbeneco cikaya. Ndimo vikaŵira na Phillip na Racquel apo ŵakapharazgiranga ŵanthu awo ŵakuyowoya Cinahuatl. Phillip wakati: “Tikupambana comene mikhaliro na ŵanthu ŵa ku malo agha.” Kasi nchivici ico cikaŵawovwira kuti ŵaŵawonenge mwakwenelera ŵanthu aŵa? Iwo ŵakati: “Tikaŵikanga mahara pa vinthu viwemi ivyo Ŵanahuatl ŵakacitanga. Mbumba zawo zikutemwana, ŵakucindikana, ndiposo mtima wa kupeleka uwo ŵali nawo.” Racquel wakasazgirapo kuti: “Tikasambira vinandi cifukwa ca kukhala ku malo agha na kuteŵetera lumoza na ŵabali na ŵadumbu.”

UMO MUNGANOZGEKELERA

Kasi mungacita wuli sono kuti munozgekere usange mukukhumba kukateŵetera ku vigaŵa vyakutali uko kukukhumbikwa wovwiri? Ŵabali na ŵadumbu awo ŵali kucitapo uteŵeti uwu ŵakuti: Pambere mundasame, yambani dankha kucepeskako vyakukhumba pa umoyo ndipo sambirani kuŵa ŵakukhorwa. (Fil. 4:11, 12) Kasi mungacitaso cinthu wuli cinyake? Leticia wakayowoya kuti: “Nkhakhumbanga yayi kugwira nchito iyo yikakhumbanga kuti nyengo yinandi nikhalenge waka pa malo ghamoza. Nkhakhumbanga kuti nendenge pa nyengo yiliyose iyo nakhumbira.” Hermilo wakati: “Nkhasambira kuphika, kucapa, na kusita.” Verónica wakayowoya kuti: “Apo nkhaŵa kukaya na mbumba yakwithu, nkhawovwiranga pakutozga vinthu ndiposo nkhasambira kuphika cakurya ciwemi kweni cakuchipa. Kweniso nkhasambira kusunga ndalama.”

Levi na Amelia ŵa ku United States ŵeneawo ŵaŵa mu nthengwa kwa vyaka vinkhondi na vitatu, ŵakalongosora umo malurombo ghakaŵawovwilira kukateŵetera mu Mexico. Levi wakati: “Tikaŵerengesera ndalama izo zikukhumbikwa kuti tikateŵetere ku caru cinyake caka cimoza ndipo tikalomba Yehova kuti watovwire kuti tisange ndalama izi.” Mu myezi yicoko waka, ŵakasunga ndalama izo ŵakazunura mu lurombo lwawo, ndipo ŵakasama nyengo yeneyiyo. Levi wakati: “Yehova wakazgora lurombo lwithu, ntheura sono ise ndise tikeneranga kucitapo kanthu.” Amelia wakasazgirapo kuti: “Tikaghanaghananga kuti tikhalenge kuno kwa caka cimoza pera, kweni taŵa kuno kwa vyaka vinkhondi na viŵiri sono, ndipo tikukhumba yayi kuwera. Cifukwa ca kukhala kuno tamanya kuti Yehova wakovwira nadi. Zuŵa lililose tikuwona kuti iyo ni muwemi nadi.”

Kweniso lurombo lukawovwira comene Adam na Jennifer, mbumba ya ku United States iyo yikupharazgira ŵanthu awo ŵakuyowoya Cingelezi ku Mexico. Iwo ŵakati: “Kulindizga kuti vinthu viŵe makora fikepo yayi. Lombani kwa Yehova usange mukukhumba kukateŵetera mu caru cinyake, kufuma apo, citanipo kanthu pa malurombo ghinu. Lekani kukhumba vinandi pa umoyo winu, lembani kalata ku ofesi ya munthavi ya mu caru ico mukukhumba kukateŵeteramo, ndipo para mwapendesera mtengo wake, lutani.”a Usange mungacita nthena, umoyo wakukondweska ndiposo wakuzura na vinthu vyauzimu ukumulindilirani.