Jivikilirani ku Mizimu Yiheni

JAMES wakakulira ku cirwa ca Malaita ico cili ku Solomon Islands. Kufuma pa wanici wakasambizgika kucindika mizimu. Iyo wakati: “Nindaphalirepo mizimu kuti yipweteke ŵanji, kweni nkhakayikanga usange munthu wangaŵa wakukondwa para wakuleka kucita rarafono [maluso agho ŵanthu ŵakucita kuti ŵapemphe wovwiri ku mizimu], kuti ŵavikilirike.”

Ŵanthu awo ŵakukhala ku Solomon Islands ŵakugomezga kuti mizimu yingawovwira munthu panji kumupweteka, nga ni umo ŵanthu ŵa mu vigaŵa vinyake ŵakugomezgera. Nakuti ŵanthu ŵanandi ŵa ku Melanesia ŵakuyitemwa mizimu iyo ŵeneko ŵakuti njiwemi, ŵakuyiwopa yayi.

Ŵanthu ŵakulongora kuti ŵakugomezga mizimu mu nthowa zakupambanapambana. Mwaciyelezgero, apo James wakaŵa mucoko, ŵanakazi mu cikaya cake ŵakacimbiliranga na ŵana mu nyumba para ŵakupulika kulira kwa kayuni kakucemeka korokoro. Cifukwa wuli? Ŵakagomezganga kuti para kayuni aka kalira ndikuti munthu munyake wali pafupi kupwetekeka.

Ŵanthu ŵanyake mu cikaya ici ŵakuŵika libwe lituŵa pacanya pa milyango ya nyumba zawo. James nayo wakacitangako vinthu ivi, ndipo wakagomezganga kuti libwe ili limuvikilirenge ku mizimu yakofya. Para James waluta ku nchito, wakasoranga tumaluvuvu tose uto twakhala para wamara kurya ndipo wakatuŵikanga mu pepara na kukataya nyengo yinyake. Wakawopanga kuti ŵafwiti ŵangamucitira mayere agho ghangamulwariska.

Mutepanji vinthu ivi vikucitika yayi ku cigaŵa cinu, kweni nga ni James, namwe mungaghanaghana kuti nchiwemi kucitako maluso ghanyake mwakuti mujivikilire ku mizimu yiheni. Mungagomezga kuti kulondezga maluso agha nkhwakuzirwa mwakuti muleke kupwetekeka.

Usange mukugomezga Baibolo, mwambura kukayika mukukhumba kumanya umo likuzgolera mafumbo ghakulondezgapo agha: (1) Kasi mizimu yiheni yingamupwetekani wuli? (2) Kasi kucitako maluso ghanyake kungapangiska kuti mupwetekeke na mizimu yiheni? (3) Kasi mungajivikilira wuli ku mizimu yiheni na kuŵa ŵakukondwa?

Umo Mizimu Yiheni Yikupwetekera

Baibolo likuvumbura kuti mizimu yiheni ni mizimu ya ŵanthu awo ŵali kufwa yayi. Mazgu gha Ciuta ghakuti: “Ŵamoyo ŵakumanya kuti ŵafwenge, kweni ŵakufwa kuti ŵakumanya kanthu cara.” (Mupharazgi 9:5) Mizimu yiheni mbangelo ŵakugaluka awo ŵakolerana na Satana kuti ŵapuluske ŵanthu.—Uvumbuzi 12:9.

Malemba ghakuyowoya mwambura kubisa kuti tikwenera kujivikilira ku mizimu yiheni. Mpositole Paulosi wakalembera Ŵakhristu ŵa ku Efeso kuti: “Tikulimbana na ndopa na thupi cara, kweni na . . . mawumba gha mizimu yiheni mu malo ghakucanya.” Mpositole Petrosi wakalongosora kuti muwusi wa mizimu yose yiheni, Satana Dyabulosi, wali nga ni “nkhalamu yakuwuluma, wakukhumba kumilimitizga yunji.”—Ŵaefeso 6:12; 1 Petros 5:8.

Satana wakupuluska ŵanthu, kuŵapusika panji kuŵayezga kuti ŵacite vinthu ivyo vikukwiyiska Ciuta na cilato cakuti waŵapweteke. Baibolo likuti Satana “wakujizgora mungelo wa ungweru.” (2 Ŵakorinte 11:14) Wakupusikizgira nga ni mzimu wakuvikilira apo cilato cake nchiheni. Satana wakubulumutizga maghanoghano gha ŵanthu kuti ŵaleke kumanya makora unenesko wakukhwaskana na iyo ndiposo Ciuta. (2 Ŵakorinte 4:4) Kasi wakupuluska ŵanthu na cilato wuli?

Satana wakudokera kusopeka. Wakukhumba kuti ŵanthu ŵamusopenge uku ŵakumanya panji mwambura kumanya. Apo Mwana wa Ciuta, Yesu, wakaŵa pa caru capasi, Satana wakakhumbanga kuti Yesu ‘wajikame na kumusopa.’ Kweni Yesu wakati: “Fumapo Satana! Pakuti kuli kulembeka, ‘Yehova Ciuta wako ndiyo ukwenera kumusopa.’” (Mateyu 4:9, 10) Yesu wakakana kucita cilicose ico cingalongora kuti wakusopa Satana.

Yehova ngwankhongono comene kuluska mizimu yose ndipo wazomerezgenge yayi kuti awo ŵakumupulikira ŵapwetekeke. (Salmo 83:18; Ŵaroma 16:20) Kweni kuti tikondweske Yehova Ciuta nga ni umo wakacitira Yesu, tikwenera kukana cilicose ico cingalongora kuti tikusopa Satana panji viŵanda vyake. Ntheura, tikwenera kumanya maluso agho ghakulongora kuti tikucindika na kusopa mizimu yiheni. Kasi tingaghamanya wuli?

Manyani Maluso Agho Ghakukwiyiska Ciuta

Yehova Ciuta wakacenjezga Ŵaisrayeli kuti ŵaleke kutolera maluso gha ŵanthu ŵa mitundu yinyake. Wakati: “Waleke kusangikamo mukati mwinu yumo uyo . . . wakucita maula, panji wakupwelera zinyengo, panji wakuwukwa na minkhwala, panji canusi.” Ku awo ŵakucita vinthu ivi, Baibolo likuti: “Wose ŵeneaŵa ŵakucita ico mbukazuzi kwa Yehova.”—Duteronome 18:10-12.

Ntheura, para mukughanaghanira maluso agho ghazara mu cigaŵa cinu, jifumbani kuti: Kasi maluso agha ghakunipangiska kuti nigomezgenge vya kuwukwa? Kasi maluso agha ghakulongora kuti nkhongono yakuvikilira yikufuma ku vinthu vyambura umoyo? Kasi maluso agha ghakusazgapo kulowa panji kujivikilira ku ulowi? Kasi ghakusazgapo kujilambika ku mizimu m’malo mwa kujilambika kwa Yehova panji Yesu?—Ŵaroma 14:11; Ŵafilipi 2:9, 10.

Nchakuzirwa kuti mukane maluso ghose agho ghakukhozgera kusopa mizimu. Cifukwa wuli? Mwakukhuŵilizgika na mzimu, mpositole Paulosi wakalemba kuti: “Mungamanya cara kuryapo pa ‘thebulu la Yehova’ na pa thebulu la viŵanda.” Wakacenjezga kuti awo ŵakukondweska Yehova ndiposo viŵanda ‘ŵakucitiska sanji Yehova.’ (1 Ŵakorinte 10:20-22) Yehova Ciuta wakukhumba kuti timusopenge iyo pera.—Exodus 20:4, 5.

Ghanaghaniraniso fumbo ili: Kasi maluso agha ghakukhozgera fundo yakuti munthu walije mulandu pa ivyo wakucita? Mwaciyelezgero, uzaghali ndiposo kugonana kwa ŵanthu awo ŵandatorane nkhwakukanizgika mu vyaru vinandi ndiposo mu Baibolo. (1 Ŵakorinte 6:9, 10) Ndipouli, mu vigaŵa vya ku nyanja ya Pacific, mikhaliro iyi njakuzomerezgeka usange msungwana wakuti ŵali kumupenguraa mwakuti waŵe na khumbo la kugonana na mwanalume.

Ndipouli, Baibolo likusambizga kuti tose tizamuŵa na mulandu kwa Ciuta cifukwa ca vyakucita vithu. (Ŵaroma 14:12; Ŵagalatiya 6:7) Mwaciyelezgero, mwanakazi wakwamba Eva wakaghanaghananga kuti wacita kupusikika na Satana kuti waleke kupulikira Ciuta. Wakati: “Njoka yikanipusika ine, nkharya.” Ndipouli, Yehova wakamupa mulandu Eva pa ivyo wakacita. (Genesis 3:13, 16, 19) Nase tikuŵa na mulandu kwa Ciuta cifukwa ca ivyo tikucita.—Ŵahebere 4:13.

Kasi Mukwenera Kucita Vici?

Usange mukukhumba kukondweska Ciuta na kulondezga fundo za mu Baibolo, mukwenera kucitapo kanthu mwaluŵiro kuti mujivikilire kwa Satana na viŵanda vyake. Ŵanthu ŵa mitima yiwemi awo ŵakakhalanga ku Efeso mu nyengo yakale, ŵakalongora ciyelezgero ciwemi pa nkhani iyi. Kuti ŵalekerethu kukolerana na mizimu yiheni, wakatora mabuku ghose gha vyamizimu ndipo “ŵakaghawocha panthazi pa waliyose.”—Milimo 19:19.

Pambere ŵandawoche mabuku agha, ŵanthu aŵa “ŵakizanga [ku ŵapositole] na kuzomera kweniso kuphara pakweru vyakucita vyawo.” (Milimo 19:18) Ŵakati ŵatoreka mtima na ivyo Paulosi wakasambizganga pakukhwaskana na Khristu, ŵakawocha mabuku ghawo gha vyamizimu. Kweniso ŵakaleka kucitako vinthu vyamizimu.

Mbunenesko kuti nchipusu yayi kuleka vinthu vyamizimu. James uyo wazunurika pakwambilira nayo wakasuzgika kuti waleke. Wakamba kusambira Baibolo na Ŵakaboni ŵa Yehova, ndipo wakasangwanga na ivyo wakasambiranga. Ndipouli, wakalutilira kucita maluso ghanyake ghakukolelerana na mizimu yiheni. Wakati wasanda ivyo wakacitanga, wakasanga kuti wakagomezganga ivyo Yehova walayizga, kweni wakawonanga kuti wakwenera kugomezga mizimu kuti wajivikilire ku ulwani.

Kasi nchivici cikawovwira James kuti wasinthe maghanoghano? Iyo wakati: “Nkhalomba Yehova kuti wanivikilire ndiposo kunovwira kuti nimugomezgenge. Kweniso nkhaleka maluso ghakukhwaskana na mizimu.” Kasi wali kupwetekekapo? James wakati: “Nindapwetekekepo, vyose ivyo vyanicitikira vyanisambizga kugomezga Yehova. Nawona umo Yehova wangaŵira mubwezi wane mweneco.” Nakuti kwa vilimika vinkhondi na viŵiri, James wapharazga na kovwira ŵanji kusambira ivyo Baibolo likusambizga.

Mwalekeraci kucita nga ni James? Sandani maluso agho ŵanthu ŵanandi ŵakucita mu cigaŵa cinu ndipo gwiliskirani nchito “nkhongono yinu ya kughanaghana” kuti mumanye usange ghakukolerana na ‘khumbo la Ciuta.’ (Ŵaroma 12:1, 2) Ndipo ŵani na cikanga kuti mujipature ku maluso ghakukhwaskana na mizimu. Usange mucitenge nthena, mungagomezga comene kuti Yehova ‘wazamumupokelerani’ na kumuvikilirani. (2 Ŵakorinte 6:16-18) Nga ni James, namwe muwonenge kuti layizgo la mu Baibolo ili ndaunenesko, likuti: “Zina la Yehova ndi cigongwe cakukhora, murunji wakucimbilira kwenekuko na kuphokwa.”—Zintharika 18:10.

[Mazgu ghamusi]

[Cithuzithuzi pa peji 17]

“Korokoro”

[Kulongosora Cithuzithuzi]

Courtesy of Dr. Bakshi Jehangir

[Cithuzithuzi pa peji 17]

Msungwana wakusora maluvuvu gha cakurya cifukwa ca kopa ŵafwiti kuti ŵangamulowa