Pelekani na Mtima Wose, Ndipo Wongani Para Mwapokera

YEHOVA, Ŵadada ŵithu ŵakucanya, wakutitemwa comene. Baibolo likutiphalira kuti wakupwelelera ŵateŵeti ŵake wose. (1 Pet. 5:7) Wakutipwelelera mu nthowa zakupambanapambana mwakuti timuteŵetere mwakugomezgeka. (Yes. 48:17) Yehova wakukhumba kuti tigwiliskirenge nchito wovwiri uwo wakupeleka, comenecomene para tikusuzgika. Dango ilo wakapeleka ku Ŵaisrayeli kwizira mwa Mozesi likalongora makora fundo iyi.

Mu Dango ili, Yehova wakalongosora kuti wapwelelerenge ŵakusuzgika nga mbakavu, ŵalanda, vyokoro na ŵalendo. (Lev. 19:9, 10; Dute. 14:29) Wakumanya kuti ŵateŵeti ŵake ŵanyake ŵangakhumbikwira kovwirika na ŵasopi ŵanyawo. (Yak. 1:27) Ntheura nchiwemi yayi kuti ŵateŵeti ŵake ŵakanenge wovwiri wakufuma ku ŵabali ŵawo ŵauzimu awo ŵaciskika na Yehova. Nangauli vili nthena, tikwenera kuwonga na mtima wose para tapokera wovwiri.

Ndipouli, Baibolo likulongosora kuti ŵanthu ŵa Ciuta ŵakwenera kuŵa na mzimu wa kupa. Kumbukani ‘cokoro cakusoŵerwa’ ico Yesu wakaciwona mu tempele ku Yerusalemu. (Luka 21:1-4) Nacoso cikwenera kuti cikasanganga candulo na wovwiri wakufuma kwa Yehova nga umo Dango likayowoyeranga. Nangauli cikaŵa cikavu, cokoro ici cikamanyikwanga kuŵa munthu uyo wakapokeranga waka yayi, kweni wakupa. Cikwenera kuti cikaŵa cakukondwa cifukwa ca mzimu wake wa kupa. Nga ni umo Yesu wakayowoyera, “muli kukondwa kukuru mu kupeleka kuluska mu kupokera.” (Mil. 20:35) Pakuti mwamanya fundo iyi, kasi mungacita wuli kuti “mupenge” mwakuti muŵe ŵakukondwa?—Luka 6:38.

“Nchici ico Tindiwezgerengepo kwa Yehova”

Wamasalmo wakafumba kuti: “Nchici ico tindiwezgerengepo kwa Yehova pa vyakundovwira vyake vyose?” (Sal. 116:12) Kasi wakawovwirika wuli? Yehova wakamusungilira mu nyengo ya “suzgo na citima.” Kweniso Yehova wakathaska umoyo wake ku nyifwa. Ntheura, wakakhumbanga ‘kumuwezgera’ Yehova. Kasi wamasalmo uyu wakeneranga kucitaci? Iyo wakati: “Tindifiske mapangano ghane kwa Yehova.” (Sal. 116:3, 4, 8, 10-14) Wakadumura kuti wasungenge na kufiska vyose ivyo wakalayizga Yehova.

Namwe mungacita. Mwauli? Mwa kulondezga malango gha Ciuta na fundo za mu Malemba nyengo zose. Ntheura, nyengo zose woneseskani kuti kusopa Yehova nkhwakuzirwa mu umoyo winu ndiposo mukulongozgeka na mzimu wake mu cilicose ico mukucita. (Muph. 12:13; Gal. 5:16-18) Kuyowoya unenesko, mungamuwezgera yayi Yehova fikepo cifukwa ca ivyo wamucitirani. Ndipouli, wakukondwa kuwona kuti mukumuteŵetera na mtima wose. (Zinth. 27:11) Ni mwaŵi ukuru comene kukondweska Yehova mu nthowa iyi.

Wovwirani Kuti Vinthu Vyendenge Makora pa Mpingo

Mungazomerezga kuti mwasanga candulo cikuru comene mu mpingo. Kwizira mu mpingo, Yehova wapeleka cakurya cinandi comene cauzimu. Muli kupokera unenesko uwo ukamusuturani ku mautesi gha cisopa ndiposo cisi cauzimu. (Yoh. 8:32) Pa maungano gha mpingo, gha dera na gha cigaŵa agho ghakunozgeka na “muzga wakugomezgeka na wakucenjera,” mukusambira vinthu vyakulongozgera ku umoyo wamuyirayira ndiposo wambura masuzgo mu paradiso pa caru capasi. (Mat. 24:45-47) Kasi mungapenda vyandulo vyose ivyo muli kusanga ndiposo ivyo musangenge kwizira mu mpingo wa Ciuta? Kasi mpingo muwuwezgerenge vici cifukwa ca vyandulo ivyo mwasanga?

Mpositole Paulosi wakalemba kuti: “Viŵaro vyose vya thupi, pakulungika pamoza mwakukolerana na kubamphikika na findo lililose ilo likupeleka ivyo vikukhumbikwa, kwakuyana na umo ciŵaro cilicose cikugwilira nchito mwakwenelera, vikovwira kuti thupi likurenge na kujizenga mu citemwa.” (Efe. 4:15, 16) Nangauli lemba ili likuyowoya za Ŵakhristu ŵakuphakazgika, kweni fundo yake yingakhwaska Ŵakhristu wose mazuŵa ghano. Mkhristu waliyose wangawovwira kuti vinthu vyendenge makora pa mpingo, ndiposo kuti ukurenge. Mwawuli?

Tingawovwira usange tingaŵa ŵakukhozga ndiposo ŵakupembuzga ŵanyithu mwauzimu. (Rom. 14:19) Mwa kulongora cipambi ca mzimu wa Ciuta ku ŵasopi ŵanyithu mu vyose ivyo tikucita, tingawovwiraso kuti “thupi likurenge.” (Gal. 5:22, 23) Kweniso tingapenjerezga nthowa yakuti ‘ticitire ico nchiwemi kwa wose, comenecomene kwa awo mbamoza na ise mu cipulikano.’ (Gal. 6:10; Heb. 13:16) Waliyose mu mpingo, ŵabali na ŵadumbu, ŵana na ŵalara ŵangawovwira ‘kuzenga thupi mu citemwa.’ Thupi ili ni mpingo.

Padera pa kuzenga thupi, tingagwiliskira nchito maluso ghithu, nkhongono, na vyuma vithu mu mulimo wa kupharazga uwo ukucitika mu mpingo. Yesu Khristu wakati: “Mukapokera kwawanangwa.” Ntheura tikwenera kucitaci pera? Iyo wakati tikwenera ‘kupeleka kwawanangwa.’ (Mat. 10:8) Pa cifukwa ici, tikwenera kucita mulimo wakuzirwa wa kupharazga Ufumu na kuzgora ŵanthu kuŵa ŵasambiri. (Mat. 24:14; 28:19, 20) Kasi pali vinyake ivyo vikumutondeskani kucita mulimo uwu mwakufikapo? Kumbukani cokoro ico Yesu wakalongosora. Ivyo cikapeleka vikaŵa vicoko comene. Kweni Yesu wakayowoya kuti cikaluska wose. Cikapeleka vyose ivyo cikaŵa navyo.—2 Kor. 8:1-5, 12.

Pokerani Wovwiri na Mtima Wose

Ndipouli, nyengo zinyake mungakhumba kuti mpingo umovwirani. Pokerani wovwiri uliwose uwo mpingo ungapeleka. Yehova wapeleka ŵanalume awo mbakwenelera kuti ‘ŵaliske mpingo,’ kumovwirani para mukusuzgika. (Mil. 20:28) Ŵalara ndiposo ŵanji mu mpingo mbakunweka kupembuzga, kovwira na kumuvikilirani mu nyengo zinonono.—Gal. 6:2; 1 Tes. 5:14.

Kweni nyengo zose para mwapokera wovwiri, mukwenera kuwonga kufumira pasi pa mtima. Wonani kuti ni lusungu lukuru lwa Ciuta kupokera wovwiri kufuma ku awo mukusopa nawo Yehova. (1 Pet. 4:10) Cifukwa wuli kuwonga nkhwakuzirwa? Tikukhumba yayi kuti tiŵe nga ni ŵanthu ŵambura kusopa, awo ŵakupokera waka kwambura kuwonga.

Ŵani Ŵamahara

Pakuyowoya za Timote, Paulosi wakalembera mpingo wa Ŵafilipi kuti: “Pakuti nilije munyake wakuŵa na maghanoghano ghakuyana na ghake, uyo wazamupwelelera nadi vya imwe.” Ndipouli, wakasazgirako kuti: “Ŵanji wose ŵakupenja vyakukhumba vyawo, vya Khristu Yesu cara.” (Fil. 2:20, 21) Pakughanaghanira umo Paulosi wakacitiranga, kasi ise tingacita wuli kuti tigege kutangwanika na ‘vyakukhumba vithu’?

Tikwenera cara kucicizga ŵanthu mu mpingo kuti ŵatovwire kumazga masuzgo ghithu. Cifukwa wuli? Ghanaghanirani fundo iyi: Tose tingaŵa ŵakukondwa usange mbali panji mudumbu watovwira para tili mu suzgo yamabuci. Kweni, kasi tingacita kuŵacicizga kuti ŵatovwire? Yayi. Kweniso pakuti ŵabali ŵithu nyengo zose ŵakuŵa ŵakukondwa kutovwira, tikwenera kuwona mwakwenelera ivyo ŵakuticitira. Nakuti vyose ivyo ŵabali ŵakuticitira para tili mu suzgo, tikukhumba kuti ŵacitenge mwakujipeleka, umo ŵakhumbira ŵeneko.

Ndipo nadi, ŵabali na ŵadumbu nyengo zose ŵakuŵa mcanya kumovwirani. Kweni nyengo zinyake nawo vingaŵasuzga kuti ŵamovwirani kuyana na umo imwe mukukhumbira. Usange ndimo vyaŵira, manyani kuti Yehova wamovwiraninge mu masuzgo ghinu ghose nga umo wakacitira na wamasalmo.—Sal. 116:1, 2; Fil. 4:10-13.

Ntheura mungadondanga yayi, pokerani wovwiri uwo Yehova wamupani ndipo muwongenge kufumira pasi pa mtima, comenecomene mu nyengo zamasuzgo izi. (Sal. 55:22) Ndivyo wakukhumba kuti mucitenge. Kweniso wakukhumba kuti namwe muŵe ‘ŵakupeleka mwakukondwa.’ Ntheura ‘dumurani mu mtima winu’ kupeleka ivyo mungafiska kukhozgera kusopa kwaunenesko. (2 Kor. 9:6, 7) Mwa kucita nthena, muŵenge na mzimu wa kupa ndiposo kuwonga.

[Bokosi/Vithuzithuzi pa peji 31]

“Nchici ico tindiwezgerengepo kwa Yehova pa vyakundovwira vyake vyose?”—Sal. 116:12.

▪ Penjelezgani nthowa ‘yakucitira ico nchiwemi kwa wose’

▪ Muŵe ŵakukhozga ndiposo ŵakusanguluska ŵanji

▪ Citani mulimo wa kuzgora ŵanthu kuŵa ŵasambiri umo mungafiskira kuyana na umo vinthu viliri pa umoyo winu