Kasi Mukukumbuka?
Kasi mwakondwa na nkhani za mu magazini ghasonosono gha Gongwe la Mulinda? Wonani usange mungazgora mafumbo agha:
• Kasi mwana uyo wafwira mu nthumbo ya anyina wazamuwuskika?
Umoyo ukwamba para mama watora waka nthumbo. Yehova wangawuska munthu wa msinkhu uliwose, cifukwa vinthu vyose ni vyamacitiko kwa iyo. (Mrk. 10:27) Kweni Baibolo likuyowoya mwakudunjika yayi usange wazamuwuska ŵana awo ŵali kufwira mu nthumbo za ŵanyinawo.—4/15, peji 12, 13.
• Kasi tingasambira vici ku nyerere, mbira za mu malibwe, zombe ndiposo mtondori?
Nyerere, mbira, zombe ndiposo mtondori vikulongora kuti vili na vinjeru vyakawiro. Mwantheura, vikuthuwuska vinjeru vya Ciuta. (Zinth. 30:24-28)—4/15, peji 16-19.
• Nchinthu wuli cakuzirwa cakukhwaskana na Ŵakaboni ŵa Yehova ico cikacitika mu 1909?
Mu 1909 ofesi ya pa caru cose ya wupu wakuzomerezgeka na dango wa Watch Tower Bible and Tract Society, weneuwo ukovwira Ŵakaboni ŵa Yehova pa mulimo wa kupanga mabuku na vinthu vinyake, yikasama kufuma ku Pittsburgh, ku Pennsylvania kuya ku Brooklyn ku New York, uko yili mpaka sono.—5/1-CN peji 22-24.
• Cifukwa wuli Baibolo likuti kukhala cete nkhuwemi?
Baibolo likulongora kuti kukhala cete kungaŵa cilongolero cakuti munthu ngwanchindi, ngwavinjeru na umanyi, ndipo kukovwira pakulanguruka. (Sal. 37:7; 63:6; Zinth. 11:12)—5/15, peji 3-5.
• Kasi John Wycliffe, William Tyndale, Robert Morrison, na Adoniram Judson ŵakaŵa ŵakuyana pa vinthu wuli?
Wose ŵakatemwanga Mazgu gha Ciuta, ndipo ŵakaghang’anamulira mu viyowoyero ivyo ŵanthu ŵanandi ŵakavimanyanga. Wycliffe na Tyndale ŵakang’anamulira mu Cingelezi, ndipo Judson wakang’anamulira mu Ciburmese, ciyowoyero ca ku Myanmar.—6/1-CN peji 8-11.
• Kasi ni mathemba ghalinga gha Yuda agho ghakaŵa ghamwamphu pa nyumba ya Ciuta?
Uthemba wa Yuda uwo ukaŵa kumwera ukawusika na mathemba 19. Pa mathemba agha, agho ghakamanyikwa cifukwa ca mwamphu ghakaŵa Asa, Yehoshafati, Hezekiya na Yosiya.—6/15, peji 7-11.
• Kasi Ŵakhristu wose ŵakuphakazgika ŵakupeleka cakurya cauzimu?
Yayi. Ŵakhristu wose ŵakuphakazgika na mzimu wa Ciuta nchigaŵa ca muzga wakugomezgeka na wakucenjera, kweni ŵekha awo ŵali mu Wupu Wakulongozga ndiwo ŵakulaŵilira mulimo wa kupeleka cakurya cauzimu.—6/15, peji 22-24.
• Cifukwa wuli ŵasilikari Ŵaciroma ŵakawona cakuvwara ca Yesu kuŵa cakuzirwa?
Ŵasilikari awo ŵakaŵa apo Yesu wakakomekera ŵakapalura yayi cakuvwara ca Yesu. Kanandi cakuvwara cantheura ici cikasonekanga na salu ziŵiri, kweni cakuvwara ca Yesu cikaŵavya musono. Lekani ŵakaciwona kuŵa cakuzirwa.—7/1-CN peji 22.
• Cifukwa wuli tingayowoya kuti citemwa ndico cikapambaniskanga kasambizgiro ka Yesu na ka ŵalongozgi ŵa cisopa?
Ŵalongozgi ŵa cisopa ŵa mu nyengo ya Yesu ŵakatinkhanga ŵanthu awo ŵakawonekanga kuŵa ŵapasi. Nakuti ŵakatemwanga Ciuta yayi. Yesu wakatemwanga Ŵawiske ndipo wakacitiranga citima ŵanthu. (Mat. 9:36)—7/15, peji 15.
• Cifukwa wuli nkhani ya kendeskero ka ndalama yingaŵa yakusuzga mu mbumba, ndipo kasi mfumu na muwoli ŵangacita wuli makora pa nkhani iyi?
Kanandi para mfumu na muwoli ŵakupindana pa nkhani ya ndalama cikuŵa cifukwa ca kuleka kugomezgana. Cinyake cikuŵa cakuti ŵali kukulira kwakupambana. Kuti mbumba zicitenge makora pa nkhani iyi zikwenera kucita vinthu vinayi ivi: Kusambira kuyowoyeskana mwakuzika para ŵakudumbiskana za ndalama, kudumbiskana umo ŵakwenera kuwonera ndalama, kulemba bajeti ya mbumba ndiposo kugaŵana milimo iyo waliyose wakwenera kucita.—8/1-CN peji 10-12.