Kasi Muli Kupatura Nyengo Yakusambilira Baibolo?
CILIMIKA camara, Wupu Wakulongozga ukapharazga kuti ndondomeko ya maungano gha mpingo yasintha, mwakuti mbumba ziŵenge na nyengo yakukwana yakusambilira Baibolo na kudumbiskana. Usange ndimwe mutu wa mbumba, woneseskani kuti nyengo zose sambiro la Baibolo la mbumba likucitika munthowa yakuti waliyose wasangenge nalo candulo. Mfumu na muwoli awo ŵalije ŵana ŵangatemwa kuti panyengo iyi ŵasambirenge Baibolo pamoza. Panyengo iyi, ŵabali na ŵadumbu awo ŵandatore panji kutengwa, ŵangacita sambiro la Baibolo la iwoŵene.
Ŵanandi ŵakuwonga cifukwa cakuti ŵali na Nyengo Yakusopera ya Mbumba. Mwaciyelezgero, Kevin, uyo ni mulara, wakalemba kuti: “Mpingo withu ukuwonga comene cifukwa ca ndondomeko iyi. Mwakuyana na umo Wupu Wakulongozga ukayowoyera, ise ŵalara tili kudumbiskana kuti panyengo iyi tisambirenge pamoza na mbumba zithu.”
Jodi, uyo mfumu wake ni mulara, wakalemba kuti: “Tili na ŵana ŵasungwana ŵatatu, munyake wali na vilimika 15, munyake 11 ndipo munyake viŵiri. Sonosono apa, tili kusamira ku mpingo wa ciyowoyero ca mawoko. Vikatitoleranga nyengo yitali comene kweniso tikeneranga kufwilirapo kuti tinozgekere maungano ghose gha mpingo. Kweni sono cifukwa ca kusintha uku, tili na nyengo yakusopera ya mbumba.”
John na JoAnn awo mbakutorana ndipo mbapayiniya ŵanyengozose, ŵakalemba kuti: “Sambiro la Baibolo la mbumba yithu likacitikanga mwakujwanthira cifukwa tikasambiranga mukati mwa nyengo iyo tikanozgekeranga vinthu vya ku mpingo. Sambiro la Baibolo la mbumba nchawanangwa cakufuma kwa Yehova, ico cikutikhozga mwauzimu usange tikugwiliskira nchito nyengo yakusambilira mwakwenelera.”
Tony, uyo ni mbali wambura kutora, wa vilimika vya m’ma 20 wali kupatura nyengo kuti pa Ciŵiri, pambere wandagone wasambirenge payekha. Mazuŵa ghanyake wakunozgekera maungano gha mpingo. Ndipouli, Tony wakuti: “Nkhulindilira mwakunweka zuŵa la Ciŵiri.” Cifukwa? Iyo wakuti: “Nyengo iyi yikuŵa yapadera comene kwa ine na Yehova.” Ndipo wakulutizga kuti: “Ivyo nkhusambira pafupifupi maora ghaŵiri, vikukhozga ubwezi wane na Yehova. Kuŵa na nyengo yinandi yakusambilira, kukunovwira kuti nilangurukenge pa mavesi agho naŵazga mu Baibolo.” Kasi para vyaŵa nthena cikucitika nchivici? “Cikupangiska kuti ulongozgi wa Yehova uniconthenge mu mtima kuluska pakwamba.” Kasi wangayowoya ciyelezgero ca ivyo wakusambira? Iyo wakuti: “Mu buku la Insight nkhaŵazga za ubwezi uwo ukaŵa pakati pa Davide na Jonatani. Nkhasambira vinandi kwa Jonatani vyakukhwaskana na umo wakacitiranga pakupwelelera ŵanji. Ciyelezgero cake canovwira kuti nimanye ivyo mubwezi wanadi wakwenera kucita. Nakuti pa zuŵa la Ciŵiri nkhulindilira kuti nimanye vinthu vinandi vyakuzirwa.”
Nadi, ŵateŵeti wose ŵa Yehova ŵasangenge candulo cikuru comene usange ŵacitenge mwamahara na nyengo yakusazgikira iyi kuti ŵacitenge sambiro la Baibolo ndiposo kuti ŵaŵenge na nyengo yakusopera ya mbumba.