Cinthu Cakovwira Mbumba

1. Kasi mbumba za Ŵaisrayeli zikandulanga wuli na zuŵa la Sabata?

¹ Kusunga Sabata cikaŵa cawanangwa ico Yehova wakapeleka mwacitemwa kuti covwire mbumba. Ŵaisrayeli ŵakapumuranga nchito zawo za zuŵa na zuŵa ndipo ŵakaŵanga na nyengo yakughanaghanira za uwemi wa Yehova ndiposo ubwezi wawo na iyo. Ŵapapi ŵakasangirangapo mpata wa kusambizga ŵana ŵawo Dango la Ciuta kuti likhale mu mtima wawo. (Dute. 6:6, 7) Sabata yiliyose ŵanthu ŵa Yehova ŵakaŵanga na nyengo pa zuŵa la Sabata ya kuwona umo ubwezi wawo na Yehova ukwendera.

2. Kasi kusunga Sabata kukutisambizgaci za Yehova?

² Mbunenesko kuti lero Yehova wakukhumba kuti mbumba zisungenge Sabata yayi. Ndipouli, dango ili likutisambizga kanthu kanyake kakukhwaskana na Ciuta withu. Iyo nyengo zose wakukhumba kuti ŵanthu ŵake ŵaŵe na umoyo uwemi wauzimu. (Yes. 48:17, 18) Lero, nthowa yimoza iyo Yehova wakulongolera citemwa cake nkhwizira mu Mbumba.

3. Kasi Cilato ca Nyengo Yakusopera ya Mbumba Nchakuti Wuli?

³ Kasi Cilato ca Nyengo Yakusopera ya Mbumba Nchakuti Wuli? Mu Janyuwale 2009, Sambiro la Buku la Mpingo likamba kucitikira pamoza na Sukulu ya Uteŵeti wa Ciuta ndiposo Ungano wa Uteŵeti. Cifukwa cimoza cakusinthira cikaŵa cakuti mbumba ziŵe na mpata wa kukhozga ubwezi wawo na Yehova mwakuŵa na ndondomeko ya Nyengo Yakusopera ya Mbumba sabata yiliyose. Mbumba yiliyose yikaciskika kuti yicitenge sambiro la mbumba panyengo iyo yikaŵa yakucitira sambiro la buku, usange nchakwenelera. Ndipo zikaciskikaso kuti pa nyengo iyi zikwenera kudumbiskana nkhani za mu Baibolo mwambura kucimbilira ndiposo kusambira nkhani izo zingawovwira mbumba.

4. Kasi mbumba yikwenera kudumbiskana kwa ora limoza pera? Longosorani.

⁴ Kuti tikafike pa Sambiro la Buku la Mpingo, tikakhumbikwiranga nyengo yakuvwalira, yakwendera, na vinyake vyantheura. Taŵanandi ŵa ise, tikatoranga maora ghanandi kuti tifike pa ungano wa ora limoza uwu na kuwerako. Pakuti ndondomeko ya maungano ghithu yili kusintha, sono nyengo iyi njakusopera Yehova nga ni mbumba. Ntheura, tileke kuŵikirathu kuti Nyengo Yakusopera ya Mbumba yikwenera kuŵa ya ora limoza pera. M’malo mwake, tikwenera kughanaghanira ivyo mbumba yithu yikusoŵerwa ndiposo masuzgo gha mu mbumba yithu, ndipo Nyengo Yakusopera ya Mbumba yikwenera kuŵa yakukwana.

5. Kasi nyengo yose tikwenera kumalira kudumbiskana pamoza? Longosorani.

⁵ Kasi Nyengo Yose Yikwenera Kumalira Waka pa Kudumbiskana? Para ŵakutorana ndiposo mbumba izo zili na ŵana zikudumbiskana pamoza nkhani za mu Malemba, zikukhozgana yumoza na munyake. (Rom. 1:12) Wose mu mbumba ŵakukolerana comene. Ntheura, kudumbiskana nkhani za mu Malemba ndiko nkhwakuzirwa comene pa Nyengo Yakusopera ya Mbumba. Ndipouli, waliyose mu mbumba wangaŵaso na nyengo ya kusambira payekha. Mwaciyelezgero, pamanyuma pa kudumbiskana pamoza, mose mungalutilira kuŵa pamoza apo waliyose wakulutilira kusambira payekha, mutepanji wangamalizga kunozgekera maungano gha mpingo panji kuŵazga magazini. Mbumba zinyake zikusankha kuzimwiska T.V. mu maora ghose agho ŵali kuŵika kuti ni Nyengo Yakusopera ya Mbumba.

6. Kasi cidumbirano cingacitika wuli?

⁶ Kasi Cidumbirano Cikwenera Kucitika Wuli? Ni nyengo zose yayi apo mukwenera kudumbiskana mwa mafumbo na mazgoro. Kuti Nyengo Yakusopera ya Mbumba yiŵe yakukondweska, mbumba zinandi zili na ndondomeko yakuyanako na ya maungano gha mpingo agho tikucita mukati mwa sabata. Ŵakugaŵa cidumbirano cawo mu vigaŵa vyakupambanapambana na kuvicita mu nthowa zakupambanapambana. Mwaciyelezgero, ŵangaŵazga Baibolo pamoza, kunozgekera maungano ghanyake gha mpingo, ndipo ŵangayezgelera umo ŵangakacitira mu uteŵeti. Pa peji 6 pali masacizgo ghanyake.

7. Kasi ni mzimu wuli uwo ŵapapi ŵakwenera kuyezgayezga kuti uŵengepo pa nyengo iyi?

⁷ Kasi Ni Mzimu Wuli Uwo Ŵapapi Ŵakwenera Kuyezgayezga Kuti Uŵengepo pa Nyengo Iyi? Mbumba yinu yizamusambira makora para pa nyengo iyi pakuŵa citemwa ndiposo para waliyose ngwakufwatuka. Mungasankha kusambilira pawaro para pa zuŵa ilo kwaca makora. Muli ŵanangwa kupumulira para nchakukhumbikwa. Mbumba zinyake zikuŵikapo vyakumwa pamanyuma pa kudumbiskana. Nangauli ŵapapi ŵazamuŵa maso kuti pa Nyengo Yakusopera ya Mbumba ŵaleke kucenya panji kukalipira mwana, kweni ŵakhumbikwirenge kusanga nyengo ya kumazgira suzgo ilo ŵaliwona. Cingaŵa cawemi kuti nkhani zacisisi mudumbiskanenge pamphepete na mwana, pa nyengo yinyake mu sabata iyo mwakuti muleke kumukhozga soni pamaso pa ŵanyake. Nyengo Yakusopera ya Mbumba yingaŵanga yakupora yayi nesi yambura kunozga, kweni yikwenera kulongora kuti tikusopa Ciuta wakukondwa.—1 Tim. 1:11.

8, 9. Kasi mitu ya mbumba yikwenera kunozgekera wuli?

⁸ Kasi Mutu wa Mbumba Wanganozgekera Wuli? Mbumba yizamusanga candulo comene para mutu wa mbumba wakunozgekerathu pambere Nyengo Yakusopera ya Mbumba yindakwane mwa kusankha ivyo ŵazamudumbiskana ndiposo nthowa yiwemi iyo ŵangacitira. (Zinth. 21:5) Mfumu wangacita makora kudumbiskana na muwoli wake pa nkhani iyi. (Zinth. 15:22) Imwe muli mitu ya mbumba, mwalekeraci kuti nyengo zinyake mufumbengeso ŵana ŵinu kuti ŵapelekepo masacizgo ghawo pa nkhani iyi? Para mucitenge nthena, mumanyenge makora ivyo ŵakutemwa ndiposo ivyo ŵakwenjerwa navyo.

⁹ Sabata zinandi mutu wa mbumba wazamumaliranga nyengo yinandi kunozgekera pera yayi. Nchakuwonekerathu kuti mbumba zizamuŵa zakusangwa comene kuŵa na vinthu vinyake vyambura kusintha sabata yiliyose, ndipo mutu wa mbumba wazamukhumbikwira kuti nyengo yiliyose wizinge na ndondomeko yiphya yayi. Wangawona kuti nchiwemi kunozgekera para Nyengo Yakusopera ya Mbumba yamara waka apo ivyo mbumba yake yasambira vikuŵa vicali mu mutu. Mitu ya mbumba yinyake yikulemberathu mwakudumura nkhani izo ŵazamudumbiskana na kuŵika pa malo ghakuti waliyose wangawona, nga mpha cijaro panji pa kalendara. Ici cikupangiska kuti waliyose mu mbumba waŵe wakunweka na kuwonerathu ivyo ŵazamudumbiskana, ndiposo kunozgekera usange nchakukhumbikwa.

10. Kasi awo ŵali ŵekha ŵangacita wuli pa Nyengo Yakusopera ya Mbumba?

¹⁰ Wuli Usange Nili Nekha? Awo ŵali ŵekha ŵangacita sambiro la ŵeneco pa Nyengo Yakusopera ya Mbumba. Ndondomeko yiwemi ya sambiro la ŵeneco yikusazgapo kuŵazga Baibolo, kunozgekera maungano, ndiposo kuŵazga magazini gha Gongwe la Mulinda na Galamukani! Ŵapharazgi ŵanji ŵakusazgirapo vinyake pa sambiro la ŵeneco. Nyengo zinyake, ŵangapempha mupharazgi panji mbumba kuti ŵadumbiskane lumoza fundo zakukhozga za mu Malemba.

11, 12. Kasi ni vyandulo wuli vinyake ivyo vikuŵapo cifukwa ca kuŵa na Nyengo Yakusopera ya Mbumba?

¹¹ Kasi Pakuŵa Vyandulo Wuli Para Nyengo Zose Tikuŵa na Nyengo Yakusopera ya Mbumba? Awo ŵakusopa mwaunenesko na mtima wose ŵakusendelera pafupi na Yehova. Kweniso, mbumba izo zikusopera pamoza zikukhozga ubwezi wawo. Pakuyowoya za vitumbiko ivyo ŵakasanga, ŵakutorana ŵanyake ŵakalemba kuti: “Pakuti tili ŵapayiniya ŵambura ŵana, tikulindilira mwakunweka Nyengo Yakusopera ya Mbumba. Tikujipulika kuti tikuŵa ŵakukolerana comene ndiposo tikusendelera pafupi na Ŵadada ŵithu ŵakucanya. Sono para tikuwuka pa zuŵa ilo tili kuŵika kuti tisambirenge pamoza, tikuyowoya kuti: ‘Nganya, zuŵa lakukondweska lira lafikaso tu!’”

¹² Nyengo Yakusopera ya Mbumba yikovwiraso mbumba izo zikuŵa zakutangwanika. Mama munyake uyo wakulera yekha ŵana ŵasepuka ŵaŵiri ndiposo ni mupayiniya wanyengozose wakalemba kuti: “Kale, tikatondekanga kucita sambiro la mbumba. Likaŵa lambura kukhazikika cifukwa nkhaŵanga wakuvuka. Nkhamanyanga yayi umo ningacitira. Ntheura nkhumuwongani comene cifukwa ca kunozga Nyengo Yakusopera ya Mbumba. Sono tikusanga vyandulo vinandi cifukwa cakuti nyengo zose tikucita sambiro la mbumba.”

13. Kasi mbumba yithu yikwenera kucita wuli kuti yisange candulo na ndondomeko iyi?

¹³ Nga umo likaŵira zuŵa la Sabata, Nyengo Yakusopera ya Mbumba nchawanangwa cakufuma kwa Ŵadada ŵithu ŵakucanya ico cingawovwira mbumba. (Yak. 1:17) Mbumba za Ŵaisrayeli zikasanganga candulo mwakuyana na umo zikacitiranga na zuŵa la Sabata. Mwakuyana waka, nase mbumba zithu zisangenge candulo mwakuyana na umo zikucitira na Nyengo Yakusopera ya Mbumba. (2 Kor. 9:6; Gal. 6:7, 8; Kol. 3:23, 24) Para mucitenge mwamahara na nyengo iyi, mbumba yinu yingayowoya nga ni wamasalmo kuti: “Kweni ine nkhuti nkhuwemi kukhala pafupi na Ciuta; ine ndaŵika Yehova Ciuta kuŵa ciphokwero cane.”—Sal. 73:28.

[Mazgu Ghakukhozgera pa peji  5]

Nyengo Yakusopera ya Mbumba yingaŵanga yakupora yayi nesi yambura kunozga, kweni yikwenera kulongora kuti tikusopa Ciuta wakukondwa

[Bokosi pa peji 6]

SUNGANI

Masacizgo gha umo Mungacitira pa Nyengo Yakusopera ya Mbumba

Baibolo:

• Citirani lumoza kuŵazga Baibolo kwa sabata yiliyose. Para cigaŵa ico mukuŵazga cikuyowoya za ŵanthu ŵakupambanapambana, munyake wangaŵazga mazgu ghakulongosora, ndipo ŵanyake ŵangaŵazga mazgu gha ŵanthu ŵanyake.

• Citani seŵero la nkhani ya mu Baibolo iyo mukuŵazga.

• Waliyose mu mbumba muphaliliranithu mwakutendekera kuti waŵazge vipaturo vinyake mu Baibolo na kulemba fumbo limoza panji ghaŵiri agho wali nagho pa nkhani iyo. Pamanyuma penjerezgani lumoza zgoro la fumbo la waliyose.

• Sabata yiliyose lembani mavesi gha mu Baibolo pa makadi ndipo yezgani kusunga mavesi agha pamtima na kughalongosora. Lembani makadi ghanandi, ndipo weleranimo sabata yiliyose na kuwona malemba agho mukughakumbukira.

• Tegherezgani Baibolo lakujambulika pa matepi na kulondezga mu Baibolo linu.

Maungano:

• Nozgekerani lumoza maungano ghanyake.

• Sambirani sumu za Ufumu izo zili pa ndondomeko ya maungano gha sabata iyo.

• Para munyake wali na nkhani mu Sukulu ya Uteŵeti panji ciyezgelero mu Ungano wa Uteŵeti, dumbiskanani umo wangacitira, panji yezgelerani pamaso pa mbumba yose.

Vyakusoŵa vya Mbumba:

• Wonani nkhani izo zili mu buku la Zimene Achinyamata Amafunsa panji Sambirani kwa Msambizgi Waluso.

• Yezgelerani umo ŵana ŵangakamazgira suzgo ilo ŵangakumana nalo ku sukulu.

• Ŵana ŵangayezgelera nga mbapapi ndipo ŵapapi ŵangayezgelera nga mbana. Ŵana ŵasande nkhani mu mabuku ghithu ndipo pamanyuma ŵadumbiskane na ŵapapi ŵawo.

Uteŵeti:

• Yezgelerani umo mungakapharazgira pa Cisulo na pa Sabata.

• Dumbiskanani vilato ivyo mbumba yingajiŵikira kuti yisazgireko uteŵeti pa nyengo ya Cikumbusko panji ya holide.

• Pelekani mpata kwa waliyose mu mbumba kuti kwa maminiti ghacoko waka wapenjerezge zgoro la fumbo linyake ilo wangafumbika mu uteŵeti, pamanyuma yezgelerani.

Masacizgo Ghanyake:

• Ŵazgirani pamoza nkhani ya mu magazini ghaphya.

• Waliyose mu mbumba waŵazgirethu nkhani iyo yamukondweska mu magazini ghaphya, ndipo wazakayilongosore pa Nyengo Yakusopera ya Mbumba.

• Nyengo zinyake pemphani mupharazgi panji ŵakutorana kuti ŵaŵepo pa Nyengo Yakusopera ya Mbumba ndipo mutepanji mungaŵafumba mafumbo ghanyake ghakukhwaskana na vinthu vyauzimu.

• Wonelerani na kudumbiskana yimoza mwa mavidiyo ghithu.

• Dumbiskanani cigaŵa cakuti “Zimene Achinyamata Amadzifunsa” panji “Zoti Banja Likambirane” mu Galamukani!

• Dumbiskanani cigaŵa cakuti “Sambizgani Ŵana Ŵinu” panji “Cigaŵa ca Ŵanyamata na Ŵasungwana” mu Gongwe la Mulinda.

• Ŵazgani na kudumbiskana nkhani zinyake za mu Yearbook panji mu buku liphya ilo likafumiskika pa ungano wa cigaŵa wa sonosono.

• Para mwawera ku ungano wa cigaŵa, wadera, panji wapadera, weleranimo fundo zikuru.

• Wonani vinthu ivyo Yehova wali kulenga, ndipo dumbiskanani ivyo vikutisambizga pakukhwaskana na Yehova.

• Citirani lumoza vinthu vinyake ivyo vikuyowoyeka mu Baibolo, nga nkhupanga panji kuwumba vinthu ivyo vyazunulika, kujambura mapu gha malo agho ghakuyowoyeka mu Baibolo, panji chati.