Nyengo Yakusopera ya Mbumba—Kasi Mungacita Wuli Kuti Yiŵenge Yakukondweska?

Dada munyake wa ku Brazil wakati: “Pa Nyengo Yakusopera ya Mbumba yithu, cidumbirano cikunozga comene mwakuti kanandi cikufika mpaka usiku para nindaciyimike.” Dada munyake wa ku Japan wakati mwana wake wa vyaka 10 wakukondwa comene pa Nyengo Yakusopera ya Mbumba ndipo wakukhumba kuti tilutilirenge waka. Cifukwa wuli? Dada wake wakati: “Wakukhozgeka comene ndipo ivi vikusazgirako cimwemwe cake.”

Mbunenesko kuti ni ŵana wose yayi awo ŵakukhozgeka ndipo ŵanji ŵakukondwa yayi na Nyengo Yakusopera ya Mbumba. Cifukwa wuli? Dada munyake wa ku Togo wakayowoya kuti, “Nyengo yakusopera Yehova yikwenera kuŵa yakuvuska yayi.” Usange ni nthena, kasi cingaŵa cifukwa ca umo mukucitira pa nyengo iyi? Mbumba zinandi zasanga kuti Nyengo Yakusopera ya Mbumba ‘njakukondwera’ nga umo buku la Yesaya likuyowoyera vya Sabata.—Yes. 58:13, 14.

Ŵadada Ŵacikhristu ŵakwenera kumanya kuti Nyengo Yakusopera ya Mbumba yikuŵa yakukondweska usange waliyose mu mbumba ngwakufwatuka. Ralf, uyo wali na ŵana ŵanayi, wakayowoya kuti pa Nyengo Yakusopera ya Mbumba ŵakudumbiskana mwakufwatuka, ndipo waliyose wakuŵa na vyakucita. Mbunenesko kuti nyengo zinyake cikuŵa cakusuzga kuti waliyose wakondwe kweniso waŵe na vyakucita. Mama munyake wakati: “Nyengo zinyake vikunitonda kuti Nyengo Yakusopera ya Mbumba yiŵe yakukondweska.” Kasi mungacita wuli kuti Nyengo Yakusopera ya Mbumba yiŵenge yakukondweska?

MUŴENGE ŴAKUNOZGEKA KUSINTHA NDIPOSO MUCITENGE VINTHU VYAKUPAMBANAPAMBANA

Dada wa ŵana ŵaŵiri ku Germany, wakati: “Tiŵenge ŵakunozgeka kusintha.” Natalia, mama wa ŵana ŵaŵiri, wakati: “Cakuzirwa comene pa Nyengo Yakusopera ya Mbumba yithu, nkhucita vinthu vyakupambanapambana.” Mbumba zinandi zikugaŵa nyengo pa Nyengo Yakusopera ya Mbumba. Cleiton, dada wa ŵana ŵaŵiri wa ku Brazil, wakati: “Ici cikovwira kuti sambiro liŵenge lakukondweska ndiposo kuti waliyose waŵenge na cakucita.” Para ŵangagaŵa nyengo yakusambilira, ŵapapi ŵangasambira nkhani izo mwana waliyose wakukhumbikwira usange ŵana mbakupambana comene vyaka. Kweniso ŵapapi ŵangawovwira makora waliyose mu mbumba na kuŵa ŵakunozgeka kusankha nkhani zakuti ŵasambire kweniso umo ŵangasambilira.

Kasi mbumba zinyake zikucita wuli kuti zicitenge vinthu vyakupambanapambana pa Nyengo Yakusopera ya Mbumba? Mbumba zinyake zikwamba na kwimba sumu kwa Yehova. Juan, wa ku Mexico, wakati: “Ici cikovwira kuti waliyose waŵenge wakunozgeka mu maghanoghano.” Mbumba yake yikusankha sumu zakuyana na ivyo ŵasambirenge pa nyengo iyo.

Mbumba zinandi zikuŵazgira lumoza Baibolo. Kuti mulimo uwu uŵe wakukondweska, ŵamumbumba ŵakupokerana kuŵazga vigaŵa vya ŵanthu ŵa mu Baibolo. Dada munyake wa ku Japan, wakayowoya kuti kwa iyo vikaŵa “vyacilendo kuŵazga mu nthowa iyi.” Kweni ŵana ŵake ŵaŵiri mbakukondwa cifukwa cakuti ŵapapi ŵawo ŵakuŵazga nawo. Mbumba zinyake zikuyezgelera ivyo vikulongosoreka mu nkhani za mu Baibolo. Roger, dada wa ŵana ŵaŵiri wa ku South Africa, wakati: Kanandi ŵana “ŵakuwona fundo zinyake mu nkhani za mu Baibolo izo taŵapapi tindaziwone.”

Nthowa yinyake iyo mungacitira vinthu vyakupambanapambana, nkhucitira lumoza milimo yinyake, nga ngwa kupanga cingalaŵa ca Nowa cakuyelezgera, panji tempile la Solomoni. Milimo iyi yikukhumbikwira kupenjerezga, ndipo pakupenjerezga mungasanga vinthu vyakukondweska comene. Mwaciyelezgero, ku Asia, msungwana wa vyaka vinkhondi, ŵapapi ŵake, na abuya ŵake, ŵakakhala pa balaza. Ŵakacitanga maseŵero ghakujambulika pa thabwa, ndipo pakuseŵera ŵakafumbananga vya maulendo gha umishonale gha mpositole Paulosi. Mbumba zinyake zikucita maseŵero ghakujambulika pa thabwa ghakukhwaskana na vinthu ivyo vikuzunulika mu nkhani za mu buku la Exodus. Donald wa ku Togo, uyo wali na vyaka 19, wakati: Kucita vinthu vyakupambanapambana “pa Nyengo yithu Yakusopera ya Mbumba kwawovwira kuti nyengo iyi yiŵe yakukondweska comene kweniso kuti vinthu visinthe mu mbumba yakwithu.” Kasi mungaghanaghanira mulimo unyake wakuti muzakacite pa Nyengo Yakusopera ya Mbumba kuti yizakaŵe yakukondweska comene?

KUNOZGEKERA NKHWAKUKHUMBIKWA COMENE

Nangauli kusambira vinthu vyakupambanapambana kweniso kuŵa ŵakunozgeka kusintha, vikovwira kuti Nyengo Yakusopera ya Mbumba yiŵe yakukondweska, kweni kuti yiŵe yakusambizga comene, waliyose wakwenera kunozgekera. Nyengo zinyake ŵana ŵakuvuka, ntheura ŵadada ŵakwenera kughanaghanirapo pakusankha vyakuti ŵasambire na kunozgekera makora. Dada munyake wakati: “Para nanozgekera, waliyose wakusanga candulo cikuru comene.” Dada munyake wa ku Germany wakuphalilirathu ŵamumbumba yake ivyo ŵazamusambira mu masabata ghakulondezgapo. Para pa ndondomeko ya Nyengo Yakusopera ya Mbumba pali cigaŵa ca kuwonelera yimoza mwa ma DVD ghithu, dada wa ŵana 6 wa ku Benin wakupelekerathu mwakutendekera mafumbo agho ghazamuzgoreka. Nadi, para tanozgekera, Nyengo Yakusopera ya Mbumba yikuŵa yakusambizga.

Para ŵamumbumba ŵamanyirathu ivyo ŵazamusambira ŵangadumbiskana mukati mwa sabata, ntheura vingawovwira kuti ŵanweke na ivyo ŵazamusambira. Kweniso usange waliyose wali na cakucita, Nyengo Yakusopera ya Mbumba wayiwonenge kuti njake.

MUŴENGE NA NYENGO YAKUSOPERA YA MBUMBA NYENGO ZOSE

Mbumba zinandi zikusuzgika kuti ziŵe na Nyengo Yakusopera ya Mbumba nyengo zose.

Ŵadada ŵanandi ŵakugwira nchito maora ghanandi kuti ŵasange vyakukhumbikwa. Mwaciyelezgero, dada munyake wa ku Mexico wakunyamuka pa nyumba 6 koloko mulenji na kuwera 8 koloko usiku. Kweniso nyengo zinyake pangakhumbikwira kusintha zuŵa lakuŵira na Nyengo Yakusopera ya Mbumba cifukwa ca vinthu vinyake vyauzimu.

Ndipouli, tikwenera kuŵikapo mtima kuti tiŵenge na Nyengo Yakusopera ya Mbumba nyengo zose. Loïs, wa ku Togo wa vyaka 11, wakalongosora umo mbumba yakwake yikuŵikirapo mtima, wakati: “Nangauli nyengo zinyake tikwamba mwakucedwa cifukwa ca kutangwanika, kweni tikuŵa na Nyengo Yakusopera ya Mbumba nyengo zose.” Lekani mbumba zinyake zikuŵa na Nyengo Yakusopera ya Mbumba kuuyambiro wa sabata. Usange pacitika cinthu cinyake camabuci, ŵangasankha zuŵa linyake mukati mwa sabata.

Nga umo zina lakuti “Nyengo Yakusopera ya Mbumba” likulongolera, ici nchigaŵa ca kusopa Yehova. Waliyose mu mbumba yinu wakwenera kupeleka ‘vipasi vya milomo yake’ kwa Yehova sabata yiliyose. (Hos. 14:2) Kweniso mphanyi Nyengo Yakusopera ya Mbumba yaŵa yakukondweska kwa waliyose, “pakuti cimwemwe ca Yehova ndico nkhongono zinu.”—Neh. 8:9, 10.