Ivyo Tikusambira kwa Yesu

Pa Nkhani ya Umo Tingakhalira mu Mbumba

Kuti ŵakutorana ŵaŵe ŵakukondwa, kasi ŵakwenera kuyiwona wuli nthengwa?

Nthengwa nchinthu cakupatulika. Yesu wakati wafumbika usange kupatana nkhwakuzomerezgeka, wakazgora kuti: “Kasi mundaŵazge kuti uyo wakaŵalenga pakwamba wakaŵalenga iwo mwanalume na mwanakazi ndipo wakati, ‘Pa cifukwa ici mwanalume wasidenge ŵawiske na ŵanyina ndipo wademelerenge ku muwoli wake, ndipo wose ŵaŵiri ŵaŵenge thupi limoza’? Ntheura kuti mbaŵiriso cara, kweni thupi limoza. Pa cifukwa ici, ico Ciuta wagumanya pamoza munthu waleke kupatura. . . . Yose uyo wakupata muwoli wake, kwambura cifukwa ca uzaghali, na kutora munyake wakucita uleŵi.” (Mateyu 19:4-6, 9) Usange ŵakutorana ŵakulondezga ulongozgi wa Yesu uwu ndipo ŵakugomezgana, wose ŵakuŵa ŵakukondwa ndipo ŵakuwona kuti mbakuvikilirika.

Cifukwa wuli mbumba yikuŵa yakukondwa para yikutemwa Ciuta?

Yesu wakati: “‘Utemwenge Yehova Ciuta wako na mtima wako wose na umoyo wako wose na maghanoghano ghako ghose.’ Ili ndilo ni languro likuru comene na lakwamba.” Kasi languro likuru laciŵiri ndakuti wuli? Yesu wakati: “Utemwenge mzengezgani wako [kusazgapo awo ukukhala nawo pafupi comene, ŵa mu mbumba yako] umo ukujitemwera wamwene.” (Mateyu 22:37-39) Ntheura, kuti mbumba yiŵe yakukondwa, yikwenera kuŵa paubwezi na Ciuta, cifukwa kutemwa Ciuta kukutipangiska kuti titemwanenge.

Kasi mfumu na muwoli ŵangakondweskana wuli?

Para ŵafumu ŵakulondezga Yesu, ŵawoli ŵawo ŵakuŵa ŵakukondwa. Yesu wakalongora citemwa ku mpingo, uwo ukuyowoyeka kuti ni muwoli wake. (Ŵaefeso 5:25) Yesu wakati: “Mwana wa Munthu wakiza kuteŵetereka cara, kweni kuteŵetera.” (Mateyu 20:28) Yesu wakacitiranga nkhaza yayi awo ŵakaŵa pasi pake, kweni wakaŵasamphuskanga panji kuti kuŵasanguluska. (Mateyu 11:28) Ntheura, kuti ŵafumu wovwire wose mu mbumba yawo, ŵakwenera kuŵa ŵalusungu pakulongora mazaza ghawo.

Ŵawoli nawo ŵangasanga candulo para ŵangalondezga Yesu. Baibolo likuti: “Mutu wa Khristu ni Ciuta.” Likutiso: “Mutu wa mwanakazi ni mwanalume.” (1 Ŵakorinte 11:3) Yesu wakawonanga kujilambika kwa Ciuta kuti nchinthu capasi yayi. Wakaŵacindikanga comene Awiske. Yesu wakati: “Nyengo zose nkhucita vinthu vyakukondweska kwa iyo.” (Yohane 8:29) Muwoli uyo wakujilambika ku mfumu wake cifukwa ca kutemwa Ciuta na kumucindika wakupangiska kuti mbumba yake yiŵe yakukondwa.

Umo Yesu wakawoneranga ŵana, kasi ŵapapi ŵakusambirako vici?

Yesu wakacezganga na ŵana, ndipo wakanwekanga comene kumanya maghanoghano ghawo, ndiposo umo ŵakujipulikira. Baibolo likuti: “Yesu wakacemera ŵabonda kwa iyo, wakati: ‘Lekani ŵana ŵacoko ŵize kwa ine.’” (Luka 18:15, 16) Pa nyengo yinyake, ŵanthu ŵakasuska ŵasepuka awo ŵakayowoyanga mazgu ghakulongora cipulikano mwa Yesu. Kweni Yesu wakaŵawonga ŵasepuka aŵa, ndipo wakati kwa awo ŵakaŵasuskanga: “Kasi mundaŵazgepo ici, ‘Mwacitiska milomo ya ŵanici na ŵakonkha kumulumbani’?”—Mateyu 21:15, 16.

Kasi ŵana ŵangasambira vici kwa Yesu?

Yesu wali kupeleka ciyelezgero ciwemi comene ku ŵana kuti ŵatemwenge vinthu vyauzimu. Apo Yesu wakaŵa na vilimika 12, wakasangika “mu tempele, wakhala pakati pa ŵasambizgi ndipo wakapulikizganga kwa iwo na kuŵafumba.” Kasi awo ŵakamupulikizganga ŵakacita wuli? “Wose awo ŵakapulikizganga kwa iyo ŵakazukuma comene na kupulikiska kwake na mazgoro ghake.” (Luka 2:42, 46, 47) Ndipouli, Yesu wakajitemwanga yayi cifukwa cakuti wakamanyanga vinandi. Kweni ivyo wakamanyanga vikamupangiska kuti wacindikenge ŵapapi ŵake. Baibolo likuti: “Wakalutilira kujilambika kwa iwo.”—Luka 2:51.

Kuti mumanye vinandi, wonani cipaturo 14 mu buku la Kasi Baibolo Likusambizgaci Comenecomene?a

[Mazgu ghamusi]