Ivyo Tikusambira kwa Yesu
Umo Tingacitira na Ŵanyithu
Cifukwa wuli tikwenera kuŵa ŵalusungu?
Kasi mukulongora lusungu nanga nipara ŵanji ŵakumucitirani nkhaza? Usange tikukhumba kulondezga Yesu, tikwenera kucitira lusungu nanga ni awo ŵakutitinkha. Yesu wakati: “Usange mukutemwa awo ŵakumutemwani, muli na kuwonga wuli? Cifukwa ŵakwananga nawo ŵakutemwa awo ŵakuŵatemwa. . . . Kweni mutemwenge ŵalwani ŵinu, . . . ndipo imwe muti muŵenge ŵana ŵa Cikurukuru: pakuti Iye ngwa wezi ku ŵambura kuwonga na ŵaheni.”—Luka 6:32-36; 10:25-37.
Cifukwa wuli tikwenera kugowokera ŵanyithu?
Para tabuda tikukhumba kuti Ciuta watigowokere. Yesu wakasambizga kuti nchiwemi kulomba kuti Ciuta watigowokere. (Mateyu 6:12) Ndipouli, Yesu wakayowoyaso kuti Ciuta wangatigowokera pekha para nase tikugowokera ŵanyithu. Wakati: “Usange mukuŵagowokera ŵanthu kupuluka kwawo, Ŵawiskemwe ŵa kucanya nawo ŵati ŵamugowokeraninge imwe. Kweni usange mukuwura kuŵagowokera ŵanthu kupuluka kwawo, Ŵawiskemwe nawo kuti ŵati ŵagowokerenge kupuluka kwinu cara.”—Mateyu 6:14, 15.
Kasi mbumba zingaŵa wuli zacimwemwe?
Nangauli Yesu wakatora yayi, kweni tingasambirako vinandi vya umo mbumba zingaŵira zacimwemwe. Wali kutilekera ciyelezgero ciwemi kwizira mwa ivyo wakayowoya na kucita. Wonani fundo zitatu zakulondezgapo izi:
1. Mufumu watemwenge muwoli wake nga ni thupi lake. Yesu wali kupeleka ciyelezgero ciwemi ku ŵafumu. Wakaphalira ŵasambiri ŵake kuti: “Dango liphya nkhumupani, kuti mutemwanenge.” Mwawuli? Wakati: “Nga ndi umo Ine nkhamutemwerani.” (Yohane 13:34) Mwakukolerana na fundo iyi, Baibolo likuphalira ŵafumu kuti: “Temwani ŵawoli ŵinu, umo Khristu nayo wakatemwera ekeleziya, ndipo wakajipelekera ilo; . . . Ntheura ndimo ŵafumu nawoso ŵakwenelera kutemwa ŵawoli ŵawo na ŵawo nga ndi mathupi ghawo na ghawo. Uyo wakutemwa muwoli wake na wake wakujitemwa; cifukwa palije munthu uyo wakutinkha thupi lake; kweni wakulilera na kulivulilira, umo Khristu nayo wakucitira na ekeleziya.”—Ŵaefeso 5:25, 28, 29.
2. Ŵakutorana ŵakwenera kuŵa ŵakugomezgeka kwa munyawo. Kugonana na munthu uyo ŵandatorane nayo nkhwanangira Ciuta, ndipo kukunanga mbumba. Yesu wakati: “Kasi mulive kuŵazga, Cifukwa ceneici munthu wati wasidenge ŵawiske na ŵanyina wademelerenge ku muwoli wake; ndipo ŵaŵenge thupi limoza ŵaŵiri wuwo? Ntheura kuti mbaŵiriso cara, kweni thupi limoza. Ntheura ico Ciuta wagumanya, munthu waleke kupatulanya. . . . Nkhumunenerani, Yose uyo wati wapatenge muwoli wake kwambura cifukwa ca uleŵi, ndipo watorenge munyake, wakuleŵa.”—Mateyu 19:4-9.
3. Ŵana ŵakwenera kupulikira ŵapapi ŵawo. Nangauli Yesu wakaŵa wakufikapo, ndipo ŵapapi ŵake ŵakaŵa ŵambura kufikapo, kweni wakaŵapulikiranga. Baibolo likuti apo Yesu wakaŵa na vilimika 12 “wakikhira nawo, [ŵapapi ŵake] wakaya kafika ku Nazarete; ndipo wakaŵapulikiranga.”—Luka 2:51; Ŵaefeso 6:1-3.
Cifukwa wuli tikwenera kulondezga fundo izi?
Pakuyowoya za vinthu ivyo wakasambizga ŵasambiri ŵake Yesu wakati: “Para mukumanya vyeneivi, muli ŵa mwaŵi usange mukuvicita.” (Yohane 13:17) Kuti tiŵe ŵasambiri ŵanadi ŵa Yesu tikwenera kulondezga ulongozgi uwo Yesu wali kutipa wakukhwaskana na umo tingacitiranga vinthu na ŵanyithu. Wakati: “Na ceneici ndico ŵanthu ŵose ŵati ŵamanyirenge kuti muli ŵasambiri ŵane, para mukutemwana.”—Yohane 13:35.
[Mazgu Ghakukhozgera pa peji 17]
Kuti mumanye vinandi, wonani cipaturo 14 ca buku la Kasi Baibolo Likusambizgaci Comenecomene?*
[Mazgu ghamusi]
* Lakupharazgika na Ŵakaboni ŵa Yehova.
[Cithuzithuzi pa peji 16]
Ntharika ya Yesu ya mwana wakuzgeŵa yikutisambizga kuzirwa kwa kucitira ŵanyithu lusungu ndiposo kuŵagowokera. —Luka 15:11-32
[Cithuzithuzi pa peji 17]
Ŵakutorana ŵakwenera kuŵa ŵakugomezgeka kwa munyawo