Sendelerani kwa Ciuta
Yehova Wali Kutipa Wanangwa wa Kusankha
MKHRISTU munyake wambura kutengwa wakati: “Kanandi nkhaŵanga na wofi wambura kwenelera. Nkhaghanaghananga kuti nibudirenge Yehova.” Mkhristu uyu wakaghanaghananga kuti ivyo vikamucitikira apo wakaŵa mucoko vimutondeskenge kucita vinthu makora. Kasi ndimo vikuŵira nadi? Kasi tingatondeka kucita makora cifukwa ca vinthu ivyo vikaticitikira kumanyuma? Yayi. Yehova Ciuta wali kutipa wanangwa ndipo tingasankha umo tikukhumbira kukhalira. Yehova wakukhumba kuti tisankhenge mwamahara, ndipo Mazgu ghake, ghakutiphalira umo tingacitira. Wonani mazgu gha Mozesi agho ghali pa Duteronome cipaturo 30.
Kasi nchinonono kumanya ndiposo kucita ivyo Ciuta wakukhumba?a Mozesi wakati: “Dango ili nkhumuwuzgani muhanya uno ntha ndinonono kwa imwe, panji lili kutali cara.” (Vesi 11) Yehova wakukhumba yayi kuti ticitenge vinthu ivyo vikujumpha msinkhu withu. Ivyo wakukhumba ni vyakusuzga yayi ndipo tingavifiska. Ni vinthu vyakuti tikuvimanya. Tikukhumbikwira kukwera “kucanya” cara nesi kuya “kusirya kwa nyanja” mwakuti timanye ivyo Yehova wakukhumba kuti ticitenge. (Vesi 12, 13) Baibolo likutiphalira makora umo tikwenera kukhalira.—Mika 6:8.
Ndipouli, Yehova wakuticicizga yayi kuti timupulikirenge. Mozesi wakati: “Ndaŵika pamaso pinu muhanya uno umoyo na viwemi, nyifwa na viheni.” (Vesi 15) Tili na wanangwa wa kusankha pakati pa umoyo na nyifwa, viwemi na viheni. Titumbikikenge para tasankha kusopa Ciuta na kumupulikira. Tikumanenge na masuzgo para tasankha kuleka kumupulikira. Kusankha nkhwithu.—Vesi 16-18; Ŵagalatiya 6:7, 8.
Kasi Yehova wali navyo na nchito ivyo tasankha? Nkhanira kwali. Mwakukhuŵilizgika na Ciuta, Mozesi wakati: “Sorani umoyo.” (Vesi 19) Kweni kasi tingasora wuli umoyo? Mozesi wakalongosora kuti: “Mutemwe Yehova Ciuta winu, na kuti mupulikire mazgu ghake, kudemelera kwa Iyo.” (Vesi 20) Usange tikutemwa Yehova, timupulikirenge na kudemelera kwa iyo, mwambura kupwelerako ivyo vingacitika. Para ticitenge nthena, ndikuti tasankha umoyo, uwo uŵenge uwemi comene sono ndipo kunthazi tizamusanga umoyo wamuyirayira mu caru ciphya ca Ciuta.—2 Petrosi 3:11-13; 1 Yohane 5:3.
Mazgu gha Mozesi agha ghakutisambizga fundo yakuzirwa. Kwali muli kukumanapo na masuzgo gha mtundu wuli mu caru ciheni ici, kweni mungatondeka kucita makora cifukwa ca ivyo vikamucitikirani kumanyuma yayi. Yehova wamucindikani comene, wamupani wanangwa wa kusankha. Mungasankha kutemwa Yehova, kumupulikira, ndiposo kulutilira kugomezgeka kwa iyo. Usange musankhenge nthena, Yehova wamutumbikaninge.
Fundo yakuti tili na wanangwa wa kusankha kutemwa Yehova na kumuteŵetera ndiyo yikapembuzga Mkhristu uyo wazunulika kukwambilira kwa nkhani iyi. Iyo wakati: “Nkhutemwa Yehova. Nyengo zinyake, nkhuluwa kuti cakuzirwa comene nchakuti nkhutemwa Yehova. Ntheura ningaŵa wakugomezgeka.” Namwe mungaŵa ŵakugomezgeka, nakuti Yehova wangamovwirani.
[Mazgu ghamusi]
a Wonani nkhani yakuti “Yandikirani kwa Mulungu—Kodi Yehova Amafuna Kuti Tizichita Chiyani?” mu Gongwe la Mulinda la Ciceŵa la Okutobala 1, 2009.