Mafumbo Ghakufumira ku Ŵaŵazgi

Kasi nchakwenelera kuti mudumbu wavwarenge cinthu ku mutu para wakung’anamura nkhani za Baibolo kuya mu ciyowoyero ca mawoko pa maungano gha mpingo, gha dera na gha cigaŵa?

Fundo njakuti, mudumbu wakwenera kuvwara cinthu ku mutu para wakucita milimo ya mfumu wake panji iyo mbali wakwenera kucita mu mpingo. Ivi vikukolerana na fundo iyo mpositole Paulosi wakayowoya yakuti, “mwanakazi waliyose uyo wakulomba panji kucima kwambura kudika kanthu ku mutu wake, wakukhozga soni mutu wake” cifukwa “mutu wa mwanakazi ni mwanalume.” (1 Kor. 11:3-10) Para mudumbu wavwara cinthu cakwenelera ku mutu mwakuyana na ivyo wakucita, wakulongora kuti wakujilambika ku ulongozgi wa Ciuta weneuwo wali kupeleka ku mpingo.—1 Tim. 2:11, 12.a

Wuli usange mbali wakuyowoya nkhani ndipo mudumbu wakung’anamura kuya mu ciyowoyero ca mawoko? Mbunenesko kuti mudumbu uyu wakuwerezgapo waka ivyo mbali wakuyowoya, kung’anamura kuti ivyo wakusambizga ni vyake cara kweni vya mbali uyo wakuyowoya. Ndipouli, kung’anamura nkhani kuya mu ciyowoyero ca mawoko kukupambana comene na kung’anamura nkhani kuya mu viyowoyero vinyake. Mu viyowoyero ivi ŵategherezgi ŵakulaŵiska uyo wakuyowoya na kutegherezga kwa uyo wakung’anamura. Ŵanthu ŵakuŵika mahara comene yayi ku ŵadumbu awo ŵakung’anamura nkhani zanthena izi. Nyengo zinyake mudumbu wangakhala pasi, panji wangasankha kwimilira na kulaŵiska uyo wakuyowoya nkhani m’malo mwa kulaŵiska ŵategherezgi. Ntheura cingaŵa cakwenelera viŵi yayi kuti wavwarenge cinthu ku mutu.

Cifukwa ca vinthu ivyo tikugwiliskira nchito pakung’anamura nkhani kuya mu ciyowoyero ca mawoko vyeneivyo vikovwira kuti ŵanthu ŵawonenge makora, ŵanthu maso ghakuŵa kwa uyo wakung’anamura nkhani. Uyo wakung’anamura ndiyo kanandi wakuwoneka pa TV, peneapo mbali uyo wakuyowoya nkhani kanandi wakuwonekapo yayi. Ntheura cingaŵa cakwenelera kuti mudumbu uyo wakung’anamura nkhani kuya mu ciyowoyero ca mawoko wavwarenge cinthu ku mutu.

Kasi ulongozgi uwu ukukhwaska wuli awo ŵakung’anamura nkhani kuya mu ciyowoyero ca mawoko pa Sukulu ya Uteŵeti wa Ciuta, Sambiro la Baibolo la Mpingo, Ungano wa Uteŵeti, na Sambiro la Gongwe la Mulinda? Kasi mudumbu uyo wakung’anamura kuya mu ciyowoyero ca mawoko panyengo iyi, nayo wakwenera kuvwara cinthu ku mutu? Pakuti ŵanthu wose awo ŵawungana ŵakumanya kuti mudumbu ndiyo cara wakusambizga kweni mbali, cingaŵa cakukhumbikwa viŵi yayi kuti panyengo iyi wavwarenge cinthu ku mutu. Mwaciyelezgero, para wakung’anamura fundo izo ŵabali na ŵadumbu ŵakuyowoya, nkhani izo zikuyowoyeka na ŵadumbu, panji viyezgelero. Ndipouli, para wakung’anamura nkhani iyo yikuyowoyeka na mbali pa maungano agha, Sambiro la Gongwe la Mulinda, Sambiro la Baibolo la Mpingo, panji kudangilira pa kwimba sumu, wakwenera kuvwara cinthu ku mutu. Mu nyengo ya ungano, mudumbu wangang’anamura fundo izo ŵabali, ŵadumbu, ŵana na ŵalara ŵa mpingo ŵakuyowoya. Ntheura, cingaŵa cakwenelera kuti wavwarenge cinthu ku mutu mpaka pa umaliro wa ungano.

[Mazgu ghamusi]