Bokosi la Fumbo

◼ Para mwanalume na mwanakazi ŵendera lumoza mu uteŵeti, kasi mwanakazi wakwenera kuvwara cinthu kumutu para wacitiskenge sambiro la Baibolo kwa nyengo yicoko waka?

Usange wendera lumoza na mwanalume, mwanakazi wakwenera kuvwara cinthu kumutu para wakucitiska sambiro lakukhazikika. (1 Kor. 11:3-10) Gongwe la Mulinda la Chichewa la Julayi 15, 2002, pa peji 27, likati: “Uku nkhusambizga uko munthu wakuŵa kuti wanozgekera ndipo ndiyo wakulongozga. Para vinthu vili nthena, sambiro likuŵa cigaŵa ca masambiro gha mpingo. Usange mwanakazi wakucitiska sambiro lakukhazikika uku mwanalume wakubapatizika walipo wakwenera kuvwara cinthu ku mutu.” Wakwenera kucita nthena nanga ni para wenda na mwanalume uyo ni mupharazgi wambura kubapatizika. Kweniso, kwali sambiro ilo likucitikira nkhu, panji likutora nyengo yitali wuli.

Kweni para sambiro lindakhazikiskike, mudumbu wangakhumbikwira kuvwara cinthu ku mutu yayi nanga pangaŵa mwanalume. Vili nthena nanga ni para wawelerako kuti wakalongore umo tikucitira sambiro la Baibolo panji kudumbiskana fundo zinyake mu buku ilo tikusambizgira ŵanthu Baibolo. Ntheura, ŵapharazgi ŵakwenera kuwona ŵekha umo vinthu viliri usange mphakwenelera kuvwara cinthu ku mutu panji yayi.