“Nyengo Yakutemeka” Yili Pafupi
NGA ni nchimi Habakuku, ŵasambiri ŵa Yesu nawo ŵakakhumbanga comene kuwona umo masuzgo ghamalirenge. Ŵakati ŵasambira ivyo Ufumu wa Ciuta uzamucita kuti unozge vinthu pa caru, ŵakafumba Yesu kuti: “Vinthu ivi vizamuŵako pawuli, ndipo nchivici cizamuŵa cimanyikwiro ca kuŵapo kwinu [mu nkhongono ya Ufumu] na ca umaliro wa mgonezi?” (Mateyu 24:3) Pakuzgora, Yesu wakati Yehova Ciuta pera ndiyo wakumanya nyengo yeneko apo Ufumu uzamuŵa na mazaza ghose pa caru. (Mateyu 24:36; Mariko 13:32) Ndipouli, Yesu na ŵateŵeti ŵanji ŵa Ciuta ŵakayowoyerathu vinthu vinyake ivyo vizamulongora kuti nyengo yaumaliro yili pafupi.—Wonani bokosi kumalyero.
Kasi mukuzomerezga yayi kuti vinthu ivi vyazara comene mazuŵa ghano? Yesu wakayowoyaso kuti mulimo wa kusambizga uzamucitika pa caru cose. Wakati: “Makani ghawemi agha gha ufumu, ghazamupharazgika mu caru cose kuti uŵe ukaboni ku mitundu yose; penepapo ndipo umaliro wizenge.”—Mateyu 24:14.
Ivi ndivyo vikucitika nadi mazuŵa ghano. Ŵakaboni ŵa Yehova ŵakujumpha mamiliyoni ghankhondi na ghaŵiri ndiwo ŵakucita mulimo uwu mu vyaru 236. Iwo ŵakuphalira ŵanthu ivyo Ufumu uzamucita na kuŵawovwira kuti ŵalondezgenge ivyo Ciuta wakukhumba. Khumbo la Ciuta ndakuti wamazge masuzgo na vyakuŵinya. Lutilirani kusambira vya Ufumu wa Ciuta, ndipo muzamupokera umoyo wamuyirayira mu caru cambura masuzgo.
[Bokosi pa peji 15]
Malemba Agho Ghakuyowoya za Mazuŵa Ghaumaliro
• Nkhondo zakuti zindacitikepo nakale.
• Vindindindi vikuru.
• Njara.
• Nthenda zakwambukira.
• Kusazgikira kwa ucikanamalango.
• Kuzizima kwa citemwa.
• Kunanga caru capasi.
• Kutemweska ndalama.
• Kuleka kupulikira ŵapapi.
• Kujitemwa comene.
• Kuŵavya citemwa cakawiro.
• Unonono mtima.
• Kuzara kwa kuleka kujikora.
• Kuzara kwa kuleka kutemwa uwemi.
• Kutemwa vyakusanguluska m’malo mwa kutemwa Ciuta.
• Ŵanandi ŵakuyowoya waka pa mulomo kuti Mbakhristu.
• Kuzara kwa nchimi zitesi.
• Kuyuzgika kwa Ŵakhristu ŵaunenesko.
• Kuleka kuŵikako mahara ku macenjezgo gha mu Baibolo.
[Cithuzithuzi pa peji 15]
Ŵakaboni ŵa Yehova ŵakusambizga ŵanji vya Ufumu wa Ciuta pa caru cose