Kasi Mungambukira ku Makedoniya?

APO wakaŵa mu msumba wa Trowa mu Asia Minor, mpositole Paulosi wakawona mboniwoni. Munthu wa ku Makedoniya wakamuŵeyelera kuti: “Mwambukire mu Makedoniya ndipo mutovwire.” Paulosi wati wawona mboniwoni iyi, mwaluŵiro iyo pamoza na awo wakendanga nawo, ‘ŵakadumura kuti Ciuta waŵacema kuti ŵakapharazge makani ghawemi’ ku ŵanthu ŵa ku Makedoniya. Kasi nchivici cikacitika? Mu msumba ukuru wa mu Makedoniya wa Filipi, Lidiya na ŵa mu nyumba yake ŵakazgoka Ŵakhristu. Ŵanthu ŵanyakeso mu msumba uwu wa Makedoniya, uwo ukaŵa pasi pa Ŵaroma, nawo ŵakapulikana.—Mil. 16:9-15.

Mazuŵa ghano, Ŵakaboni ŵa Yehova nawo ŵali na mwamphu wanthena uwu. Ŵanandi ŵasamira ku malo agho ŵapharazgi ŵa Ufumu mbacoko. Ndipo ŵakujisangira ŵekha vyakukhumbikwa pa umoyo. Mwaciyelezgero, Lisa wakakhumbanga kuti umoyo wake wose wacitenge uteŵeti. Ntheura wakasama ku Canada kuluta ku Kenya. Kuti ŵasazgireko uteŵeti wawo, Trevor na Emily, awo nawo mba ku Canada, ŵakaluta ku Malaŵi. Paul na Maggie, ŵa ku England, ŵakati ŵapumura pa nchito, ŵakawona kuti ni mwaŵi ukuru wakucitira vinandi mu uteŵeti wa Yehova, ndipo ŵakaluta Kuvuma kwa Africa. Kasi muli na mzimu wakujipata? Kasi namwe mungacita ivyo ŵanyinu aŵa ŵali kucita? Usange ni nthena, kasi ni fundo wuli za mu Baibolo ndiposo masacizgo agho ghangamovwirani kuti mucite makora?

Jisandani

Cinthu cimoza ico mukwenera kughanaghanira ni ivyo vikumutumani kuti mukateŵetere ku caru cinyake. Yesu wakati dango likuru pa ghose ndakuti: “Utemwenge Yehova Ciuta wako na mtima wako wose na umoyo wako wose na maghanoghano ghako ghose.” Ivyo vikwenera kumutumani kukateŵetera ku caru cinyake, nkhutemwa Ciuta na khumbo lakuti mufiske mulimo wa kuzgora ŵanthu kuŵa ŵasambiri. Yesu wakalutilira, wakati: “Laciŵiri, lakuyanako nalo, ni ili, ‘Utemwenge mzengezgani wako umo ukujitemwera wamwene.’” Munthu wakulongora kuti wakutemwa mzengezgani wake para wakukhumbisiska kuti wamovwire. (Mat. 22:36-39; 28:19, 20) Kuteŵetera mu caru cinyake nkhanchito ndipo pakukhumbikwira mzimu wa kujipata. Ulendo uwu ngwakulutira kukasangwa yayi. Citemwa ndico cikwenera kumutumani. Remco na Suzanne, ŵa ku Netherlands, awo sono ŵakuteŵetera ku Namibia, ŵakuti, “Citemwa ndico cikutikhazika kuno.”

Willie, uyo ni mulaŵiliri wa dera ku Namibia, wakuti: “Awo ŵakuteŵetera nyengo yitali mu caru cinyake, ni awo pakwiza ŵakuŵavya maghanoghano ghakuti ŵabali ŵaŵapwelelerenge. Ŵakwizira kuteŵetera pamoza na ŵabali, kuŵawovwira pa mulimo wa kupharazga.”

Mwati mwasanda ivyo mukukhumbira kukateŵetera ku caru cinyake, jifumbani kuti: ‘Kasi nkhumanyapo vici ivyo vingakanovwira ku caru cinyake? Kasi nili na luso pakupharazga? Kasi ni viyowoyero wuli ivyo nkhumanya? Kasi nili wakukhumbisiska kusambira ciyowoyero cinyake?’ Dumbiskanani makora nkhani iyi na mbumba yinu. Kumanani na ŵalara ŵa mpingo. Ndipo lombani Yehova pa nkhani iyi. Para mungajisanda mu nthowa iyi, muwonenge usange muli na maluso ndiposo usange mungafiska nadi kukateŵetera mu caru cinyake.—Wonani bokosi lakuti “Jimanyani Dankha.”

Uko Mungakateŵetera

Paulosi wakacemekera ku Makedoniya mu mboniwoni. Lero, Yehova wakuyowoya nase kwizira mu mboniwoni yayi. Kweni ŵanthu ŵa Ciuta ŵakumanya vigaŵa vinandi ivyo vikukhumbikwira ŵapharazgi kwizira mu magazini iyi na mabuku ghanyake. Ntheura yambani kulemba mazina gha malo ghanthena agha. Usange mundanozgeke kukasambira ciyowoyero cinyake, panji mwamukhaliska yayi mu caru ico, ghanaghanirani kukateŵetera mu caru ico ŵakuyowoya ciyowoyero ico imwe mukucimanya. Kufuma apo, fumbilirani nkhani zakukhwaskana na visa, mendero, civikiliro, mitengo ya vinthu ndiposo mphepo. Mungawovwirika usange mungayowoya na awo ŵali kusamapo kale. Pakucita nthena lombani. Kumbukani kuti Paulosi na ŵanyake “ŵakakanizgika na mzimu utuŵa kuyowoya mazgu mu cigaŵa ca Asiya.” Nangauli ŵakakhumbanga kuluta ku Bitiniya, “mzimu wa Yesu ukaŵazomerezga cara” kucita ntheura. Mwakuyana waka, pangatora nyengo kuti mumanye malo agho mungakawovwira nadi.—Mil. 16:6-10.

Pasono mukwenera kuti mwamanya uko mungaluta. Usange mukughanaghana kukateŵetera mu caru cinyake, lembani makalata ku maofesi gha munthavi gha Ŵakaboni ŵa Yehova gha mu vyaru ivyo mukukhumba kulutako. Longosorani ivyo mukucita mu gulu la Ciuta, kweniso fumbani mafumbo agho mungaŵa nagho, nga ni mitengo ya vinthu, nyumba zakugonamo izo mungakazisanga, vipatala, ndiposo usange nchito yingakasangika. Kufuma apo, pelekani kalata panji makalata ghinu ku komiti ya uteŵeti ya mpingo winu. Nawo ŵalembenge kalata yawo na kutumira lumoza na yinu ku maofesi gha munthavi agho mwayowoya. Mazgoro agho mupokerenge ndigho ghamovwiraninge kumanya uko mungakawovwira comene.

Willie, uyo wazunulika kukwambilira, wakati: “Kanandi awo vikuŵendera makora ni awo ŵakudankha kulutako ku caru ico na kupenja malo agho ŵakuwona kuti ŵangakhala mwakukondwa. Mwanalume munyake na muwoli wake ŵakawona kuti nchakusuzga kuti ŵakakhale ku mizi. Ntheura ŵakakhala mu katawuni kacoko, uko nakoso kukaŵa kwakusuzga, kweni kukaŵa kwakuti ŵangakhala mwakukondwa.”

Masuzgo Ghanyake

Kwambura kukayika, musanganenge na masuzgo ghanyake cifukwa ca kukhala ku malo ghacilendo ndiposo kutali na malo agho muli kuzgoŵera. Lisa, uyo wazunulika pakwambilira wakuti: “Phukwa ndilo likusuzga comene.” Kasi nchivici ico cikumovwira? Kucezga na ŵanthu ŵa mu mpingo uwo wali. Wakaŵikapo mtima kuti wamanye zina la munthu waliyose. Kuti wafiske ici, wakatendekeranga kwiza pa maungano ndipo paumaliro wakakhaliranga kuti wacezgenge na ŵabali na ŵadumbu. Lisa wakapharazganga lumoza na ŵanji, wakacemeranga ŵabali na ŵadumbu ŵanandi ku nyumba yake, ndipo wakapanga ŵabwezi ŵaphya. Iyo wakuti: “Nkhudandawurapo yayi cifukwa ca ivyo nili kuleka. Yehova wanitumbika comene.”

Paul na Maggie ŵati ŵalera ŵana ŵawo, ŵakasama pa nyumba yawo, iyo ŵakakhalamo kwa vilimika 30. Paul wakuti: “Cikaŵa cipusu comene kuguliska ivyo tikaŵa navyo kuluska umo tikaghanaghaniranga. Kweni cikaŵa cakusuzga comene kuleka ŵana kumasinda kuluska umo tikaghanaghaniranga. Apo tikaŵa mu ndege tikalira comene. Nchipusu kughanaghana kuti ‘Apa tindacite makora ca!’ Kweni tikagomezga Yehova. Para mwapanga ŵabwezi ŵaphya mukuciskika kuti mulutilire.”

Greg na Crystal ŵakasama ku Canada na kuluta ku Namibia cifukwa cakuti ŵakayowoyanga Cingelezi, ico cikuyowoyekaso mu caru ici. Kweni nyengo yikati yajumphapo, ŵakawona kuti cingaŵa ciwemi kuti ŵasambire ciyowoyero ca ku Namibia. Iwo ŵakuti: “Nyengo zinyake tikagongowanga. Kweni tati tasambira ciyowoyero ca uku, ndipo tikamanya umo ŵanthu ŵakukhalira. Tikamba kuzgoŵera kukhala ku malo agha cifukwa ca kucezga na ŵabali.”

Ŵabali ŵa ku malo agho tili, nawo ŵakovwirika para ŵakuwona kuti tili ŵakujiyuyura ndiposo ŵakukhumbisiska kuteŵetera. Jenny wakukumbuka mbumba zinyake izo zikasamira ku cigaŵa ico wakakulira ku Ireland. Iyo wakuti: “Mbumba izi zikaŵa zakucezgeka comene. Ŵakizira kuteŵetera, kuteŵetereka cara. Ŵakaŵa ŵamwamphu ndiposo ŵakukondwa mwakuti nane nkhadokera kuteŵetera.” Pasono, Jenny na mfumu wake mbamishonale ku Gambia.

Thumbiko la Yehova “Likusambazga”

Ivyo vikacitikira Paulosi ku Makedoniya vikaŵa vyakukondweska comene. Pakati pajumpha vilimika khumi, iyo wakalembera ŵabali ŵa ku Filipi kuti: “Nkhuwonga Ciuta wane nyengo zose para nkhumukumbukani.”—Fil. 1:3.

Trevor na Emily, awo ŵakateŵeteranga ku Malaŵi pambere ŵandacemekere ku Sukulu ya Giliyadi, nawo ndimo ŵakughanaghanira. Iwo ŵakuti: “Nyengo zinyake tikakayikanga usange ivyo tikucita ni vyakwenelera, kweni tikaŵa ŵakukondwa. Tikatemwananga comene ndipo tikawona kuti Yehova wakutitumbika.” Greg na Crystal, awo ŵazunulika kale, ŵakuti: “Palijeso cinyake ico tingacita kuluska ici.”

Ni waliyose yayi uyo wangakwaniska kukateŵetera ku caru cinyake. Ŵanyake ŵangacita makora kusamira ku cigaŵa cinyake ico cikukhumbikwira ŵapharazgi mu caru cawo cenecico. Ŵanji ŵangakateŵetera ku mipingo yinyake ya kufupi na kwawo. Cinthu cakuzirwa nkhucita vyose ivyo mungafiska kuti muteŵetere Yehova. (Kol. 3:23) Ntheura muwonenge kuti mazgu ghakupelekeka na Ciuta ngaunenesko, agho ghakuti: “Thumbiko la Yehova likusambazga, ndipo kuti wakusazgako citima cara.”—Zinth. 10:22.

[Bokosi\Cithuzithuzi pa peji 5]

Jimanyani Dankha

Kuti muwone usange mungafiska kukateŵetera mu caru cinyake, wonani mafumbo ghakulondezgapo agha ndipo sandani makora pamoza na kulomba usange nchakwenelera nadi kwa imwe kuti mucite ici. Fundo za mu magazini gha Gongwe la Mulinda ghakumasinda zingamovwirani kuti mujisande makora.

• Kasi ndine munthu wakutemwa vinthu vyauzimu?—“Masitepe Opezera Chimwemwe” (Okutobala 15, 1997, peji 6)

• Kasi nili na luso pakupharazga?—“Mmene Mungapambanire mu Utumiki wa Upayiniya” (Meyi 15, 1989, peji 21)

• Kasi ningakakhala kutali na mbumba ndiposo ŵabwezi ŵane?—“Kulimbana ndi Malingaliro a Kulakalaka Kumudzi Kwanu mu Utumiki wa Mulungu” (Meyi 15, 1994, peji 28)

• Kasi ningasambira ciyowoyero cinyake?—“Kutumikira Mumpingo wa Chinenero China” (Malici 15, 2006, peji 17)

• Kasi nili nazo ndalama zakukakhalira ku caru cinyake?—“Kodi Mungakatumikire Kudziko Lina?” (Okutobala 15, 1999, peji 23)

[Cithuzithuzi pa peji 6]

Ŵabali ŵakovwirika para ŵakuwona kuti tili ŵakujiyuyura na ŵakukhumbisiska kuteŵetera

[Cithuzithuzi pa peji 7]

Awo ŵakwizira kuteŵetera ndiwo vinthu vikuŵendera makora