Mungateŵetera Ciuta Mwakukondwa Nangauli Muli Ŵakutangwanika
YEHOVA wakukhumba kuti muŵe ŵakukondwa. (Sal. 100:2) Pakuti ndimwe yumoza wa ŵateŵeti ŵake, mukweneraso kuti muli ŵakutangwanika. Panyake mukaŵa ŵakutangwanika nthena yayi apo mukajipatuliranga kwa Ciuta, kweni sono mungawona nga mukufyenyeka cifukwa ca nchito yakulembeka na milimo yinyake yauzimu. Nyengo zinyake mungajipa mulandu para mwatondeka kufiska vyose ivyo mukukhumba kucita. Kasi mungacita wuli vinthu mwakwenelera na kulutilira kuŵa na “cimwemwe ca Yehova”?—Neh. 8:10.
Mukukhala mu nyengo zinonono ndipo muli na masuzgo ghanandi, ntheura mukwenera kucita vinthu mwakulongosoka. Ulongozgi uwo mpositole Paulosi wakayowoya ngwakukhumbikwa comene pa nkhani iyi. Iyo wakati: “Muŵe maso comene na umo mukwendera, nga mbambura vinjeru cara, kweni nga mbanthu ŵavinjeru, ŵakujigulira nyengo, pakuti mazuŵa ngaheni.”—Efe. 5:15, 16.
Mwakuyana na ulongozgi wavinjeru uwu, kasi mungajiŵikira wuli vyakucita ivyo mungakwaniska na kugaŵa nyengo yakucitira sambiro la mwaŵene, kupwelelera mbumba, uteŵeti wa m’munda, nchito, na milimo yinyake yakukhumbikwa?
Kasi mukukumbuka umo mukaŵira ŵakukondwa mukati mwajipatulira waka kwa Ciuta na kubapatizika? Mukaŵa ŵakukondwa cifukwa ca kumanya Yehova na khumbo lake. Panji mukalimbikira kusambira kwa myezi yinandi kuti mumumanye makora na kusanga cimwemwe. Mukacita makora nadi kucita ntheura. Ivyo mukasambira vili kusintha umoyo winu kuti uŵe uwemi.
Kuti mulutilire kuŵa ŵacimwemwe, mukwenera kujilyeska mwauzimu nyengo zose. Usange vikumusuzgani kusanga nyengo yakuŵazgira na kusambilira Baibolo, sandani makora ndondomeko yinu. Nanga pa zuŵa mungasambira na kulanguruka nyengo yicoko waka, muŵenge pafupi na Yehova, ndipo ici cimovwiraninge kuti mulutilire kuŵa ŵacimwemwe.
Ŵateŵeti ŵanandi ŵa Ciuta ŵangajigulira nyengo iyo ŵakumalira pa vinthu vyakuzirwa pacoko na kucitira vinthu vyakuzirwa comene. Jifumbani kuti, ‘Kasi nkhumalira nyengo yitali wuli pakuŵazga magazini gha ku caru panji nyuzipepara, kulaŵilira TV, kupulikizga sumu, panji kucita vinthu vinyake ivyo nkhutemwa?’ Vinthu ivi ni viwemi para tikuvicita mwakwenelera. (1 Tim. 4:8) Usange mwamanya kuti muli na suzgo la kugaŵa nyengo, citanipo kanthu kuti musinthe ndondomeko yinu.
Adam, uyo wali na ŵana ŵatatu, ndiposo mulara mu mpingo, wakulongosora ivyo vikumovwira. Iyo wakuti: “Nkhuyezgayezga kuti nileke kukhumba vinandi mu umoyo wane. Nkhukhumba cara kucita vinthu ivyo vinganimalira nyengo, ndiposo kuŵa na katundu uyo wakukhumbikwira phwelelero likuru. Ici cikung’anamura kuti nili na umoyo wa kujinora yayi, kweni nkhutemwa waka kucita vinthu mwambura kutalulira.”
Para mukulanguruka pa viwemi ivyo mwasanga cifukwa ca kusankha makora vinthu, muŵengeso ŵacimwemwe ndiposo muŵenge na maghanoghano ghawemi. Mwaciyelezgero, Mariusz, uyo ni mulara mu mpingo ndipo wali na ŵana ŵatatu, wakuti: “Nkhati namba kusambira Baibolo, nkhamba kuŵa na cigomezgo kuti vinthu viŵenge makora. Masuzgo ghacali kuniwira nyengo na nyengo, ndipo ghanandi Yehova pera ndiyo wakughamanya. Kweni nkhuwonga cifukwa ca wovwiri wake, nkhulindilira vyamunthazi na cimwemwe.”
Nga umo vikaŵira na Mariusz’, maghanoghano ghawemi ghangamazga yayi vyenjezgo vyose. Kweni ghangamovwirani kuti mujipulike makora ndiposo kuti mumalane na masuzgo mu umoyo winu. Tikuŵazga kuti: “Mazuŵa ghose gha munthu wakusuzgika ngaheni, kweni mtima wakusangwa uli na ciphikiro lutaluta.” (Zinth. 15:15) Kweniso ghanaghanirani citemwa ico Ciuta wamulongorani kale. Para mukulanguruka pa vinthu ivi, mumutemwenge comene Ciuta ndipo mukuzgenge cimwemwe cinu.—Mat. 22:37.
Mbumba yikuŵa na cimwemwe cikuru para yikudangizga Yehova na khumbo lake. Para ŵanthu mu mbumba ŵakulongora mikhaliro ya Ukhristu, mphindano zikucepa ndipo ŵakufwatukirana comene yumoza na munyake. Ntheura nyumba yinu yiŵenge malo gha mtende na umoza ku mbumba yose.—Sal. 133:1.
Para mbumba yikucitira lumoza vinthu vyauzimu, yikuŵa na cimwemwe ceneko. Mariusz wakuti: “Nyengo iyo tikuŵira pamoza nga ni mbumba nkhuyiwona kuŵa yakuzirwa comene. Muwoli wane wakunovwira comene. Nyengo zose para nchamacitiko wakuŵa pafupi nane, kwali ni mu uteŵeti wa m’munda, panji para nkhunozga malo gha ungano wa cigaŵa, ndiposo para namuyowoya nkhani ku mipingo yinyake wakuluta nane. Ici cikunikhozga comene.”
Malemba ghakuphalira Ŵakhristu kuti ŵapwelelerenge mbumba zawo mwakuthupi. (1 Tim. 5:8) Kweni usange nchito iyo mukugwira yikumumalirani nyengo na nkhongono, yingamupokani cimwemwe pakuteŵetera Ciuta. Phalirani Yehova nkhani iyi mu lurombo. (Sal. 55:22) Ŵanji ŵasankha kupenja nchito yinyake kuti ŵadangizgenge Ufumu wa Ciuta. Mkhristu wakwenera kuzomerezga yayi kuti ndalama zinandi izo wakupokera pa nchito iyo yikumumalira nyengo, zimujare kumaso na kusulako vinthu vyakuzirwa comene vyauzimu.—Zinth. 22:3.
Mungawovwirika usange mungalemba vyandulo vyose na uheni wa nchito iyo mukukhumba kwamba panji iyo mukugwira. Nchito ya malipiro ghawemi ndiposo yakukhorweska njakukhumbikwa nadi. Kweni, kasi nchito iyo mukugwira yikovwira kuti mbumba yinu yicitenge makora mwauzimu? Sandani vyose mwakufwasa ndipo sankhani ivyo vingamovwirani kuti ubwezi winu na Yehova uŵenge pakwamba.
Usange mwawona kuti nchito yinu yikumovwirani yayi kuti mucitenge makora vinthu vyauzimu, mukwenera kusintha. Ŵakhristu ŵanandi ŵasintha vinthu vinyake mwakuti ŵaŵe na nyengo yakucitira vinthu vyauzimu. Mbali munyake wa ku Poland wakuti: “Nkhaghanaghana kuleka waka nchito iyo nkhagwiranga ku kampani, cifukwa kanandi nkhagwiliranga kutali. Nkhaŵavya nyengo yakukwana yakucitira vinthu vyauzimu kweniso kupwelelera mbumba yane.” Pasono wakugwira nchito iyo yikumulyera nyengo yicoko comene ndiposo nkhongono.
Sangani Cimwemwe Pakovwira Ŵanji
Yesu wakati “muli kukondwa kukuru mu kupeleka kuluska mu kupokera.” (Mil. 20:35) Ŵakhristu ŵali na mipata yinandi comene yakupelekera. Nyengo zinyake ivyo vikukhumbikwa nkhumwemwetera, casa, panji kumuwonga kufumira pasi pa mtima munthu uyo wakufwilirapo pa kucita vinthu vyauzimu. Ivi vikovwira kuti mose mwaŵaŵiri muŵe ŵacimwemwe.
Mpositole Paulosi wakaciska Ŵakhristu ŵanyake kuti: “Muyowoye mwakupembuzga kwa awo ŵakusuzgika maghanoghano, mufighilire ŵakulopwa.” (1 Tes. 5:14) Ŵanthu ŵakusuzgika maghanoghano ŵangawona nga kuti paŵekha ŵangazizipizga yayi masuzgo. Kasi imwe mungaŵawovwira? Usange mwawona kuti mbali winu wakuleka kuŵa na cimwemwe pakuteŵetera Yehova, yezgani kumukhwimiska. Para mwacita nthena namwe mukhozgekenge. Masuzgo ghanyake munthu wangaghamazga yayi. Ndipouli, mungamucitira lusungu na kumuciska mbali winu kuti wagomezgenge wovwiri wa Yehova, uwo ngwambura kutondeka. Awo ŵakucita ntheura ŵakukhuŵara yayi.—Sal. 27:10; Yes. 59:1.
Nthowa yinyake nkhupempha awo mukuwona kuti ŵalije cimwemwe kuti mwende nawo mu uteŵeti. Apo Yesu wakatuma ŵasambiri 70, wakaŵatuma “ŵaŵiriŵaŵiri.” (Luka 10:1) Kasi mukuzomerezga yayi kuti apa wakaŵapa mwaŵi wakuti ŵakhozganenge? Kasi namwe lero mungacita yayi nthena kuti movwire ŵanji kwambaso kuŵa na cimwemwe?
Lero tili na vifukwa vinandi vyakuŵira ŵakwenjerwa. Ndipouli, Paulosi wakuticiska kuti: “Sekelerani mu Fumu nyengo zose. Nkhuwerezgaso kuti, Sekelerani!” (Fil. 4:4) Cifukwa cakuti mukutemwa Ciuta, kumupulikira, ndiposo mukulimbikira mulimo uwo wamupani, umoyo winu ukuŵa wacandulo. Ici cikumupani cimwemwe. Kweniso Yehova wakumovwirani kulimbana na masuzgo agho ghakumuwirani.—Rom. 2:6, 7.
Na cipulikano, tikumanya kuti pakhala pacoko comene kuti caru ciphya ca Yehova cifike. Mu caru ici tizamuŵa na vitumbiko ndiposo vifukwa vyakukwana vyakuŵira na cimwemwe. (Sal. 37:34) Ntheura para tikughanaghanira ivyo Yehova watilayizga tikusangwa. Ndipouli, tikuluwa yayi vitumbiko ivyo Yehova wakutipa nanga ni sono. Cifukwa ca ivi, tikuteŵetera “Yehova na kukondwa!”—Sal. 100:2.
[Chati pa peji 8]
(Mu magazini yakusindikizga ndimo vikuwoneka makora)
Usange mukukhumba kuŵa ŵacimwemwe, mungasintha umo mukugaŵira nyengo yinu
VYAKUSANGULUSKA
NYUMBA na KUPWELELERA MBUMBA
NCHITO
MAUNGANO
SAMBIRO LA MWAŴENE
UTEŴETI
[Vithuzithuzi pa peji 10]
Kasi mungawovwira ŵanji kuti ŵaŵeso ŵacimwemwe?