Ŵaŵazgi Ŵithu Ŵakufumba Kuti . . . 

Kasi Yesu Ndiyo ni Mikayeli Mungelo Mukuru?

▪ Zgoro lakudumura ndakuti enya. Mu vyaru vinandi, nchacilendo yayi kuwona munthu yumoza wakucemeka na mazina ghanandi. Mu Baibolo namo ŵanthu ŵanyake ŵakucemeka na mazina ghanandi. Mwaciyelezgero, Yakobe wakucemekaso Israyeli. (Genesis 35:10) Mpositole Petrosi wakucemeka na mazina ghankhondi, Simeone, Simoni, Petrosi, Kefase, na Simoni Petrosi. (Mateyu 10:2; 16:16; Yohane 1:42; Milimo 15:7, 14) Kasi tingapanikizga wuli kuti Mikayeli ni zina linyake la Yesu? Tiyeni tiwone ukaboni wa mu Malemba.

Mu Baibolo, zina la mungelo wankhongono wakucemeka Mikayeli likusangika pa malo ghankhondi. Mu buku la Daniel zina ili likusangika pa malo ghatatu. Pa Daniel 10:13, 21, tikuŵazga kuti mungelo munyake uyo wakatumika wakathaskika na Mikayeli, uyo wakucemeka “yumoza wa ŵakaronga ŵakuru” ndiposo “karonga winu.” Kufuma apo, pa Daniel 12:1, tikusambira kuti mu nyengo yaumaliro “wamkwima Mikayeli, karonga mukuru uyo wali na mazaza pa ŵanthu ŵakwinu.”

Mikayeli wakuzunulikaso pa lemba la Uvumbuzi 12:7, ilo likulongosora kuti “Mikayeli na ŵangelo ŵake” ŵakurwa nkhondo yakuzirwa iyo yikupangiska kuti Satana Dyabulosi na ŵangelo ŵake ŵaheni ŵafumeko kucanya.

Wonani kuti pa nkhani zose izo zayowoyeka apa, Mikayeli wakulongoreka kuti ni mungelo wankhondo uyo wakulwera ŵanthu ŵa Ciuta na kuŵavikilira, ndiposo kulimbana na Satana, mulwani mukuru wa Yehova.

Pa Yuda vesi 9 Mikayeli wakucemeka “mungelo mukuru.” Lizgu lakuti “mungelo mukuru” likulongora kuti njumoza pera. Lemba linyake ilo likuzunura za mungelo mukuru ni 1 Ŵatesalonika 4:16, apo Paulosi wakulongosora za Yesu kuti: “Fumu [Yesu] yeneco yizamukhira kufuma kucanya na nchemerezgo yakulangura, na mazgu gha mungelo mukuru na mbata ya Ciuta.” Ntheura pa vesi ili, Yesu Khristu iyomwene wakumanyikwa kuti ni mungelo mukuru, panji mungelo mulara.

Pakuwona ivyo vyalongosoreka apa, tingati fundo njakuti wuli pera? Fundo njakuti, Yesu Khristu ndiyo ni Mikayeli mungelo mukuru. Mazina ghose ghaŵiri, lakuti Mikayeli (ilo likung’anamura kuti “Ni Njani Wali nga Ni Ciuta?”) ndiposo lakuti Yesu (ilo likung’anamura kuti “Yehova ni Mponoski”) ghakulongosora za mulimo wake pakuŵa wakwamba kukhozgera muwuso wa Ciuta. Lemba la Ŵafilipi 2:9 likuti: “Ciuta . . . wakamukwezga [Yesu] pa malo ghapacanya ndipo mwalusungu wakamupa zina ilo lili pacanya pa zina linyake lililose.”

Nchakuzirwa kumanya kuti umoyo wa Yesu ukambira apo wakababika pa caru capasi yayi. Pambere Yesu wandababike pano pasi, mungelo wakiza kwa Mariya na kumuphalira kuti waŵenge na mwana mu nkhongono ya mzimu utuŵa ndipo mwana uyu wakwenera kumuthya zina lakuti Yesu. (Luka 1:31) Apo Yesu wakaŵa pano pasi, kanandi wakayowoyanga kuti wakaŵako kale pambere wandaŵe munthu.—Yohane 3:13; 8:23, 58.

Ntheura, Mikayeli mungelo mukuru ni Yesu apo wakaŵa kucanya pambere wandaŵe munthu. Wakati wawuka na kuwelera kucanya, Yesu wakambaso uteŵeti wake wakuŵa Mikayeli mungelo mulara, “kuti Ciuta Ŵadada wapike ucindami.”—Ŵafilipi 2:11.