Sendelerani kwa Ciuta
‘Ufumu Wako Ukhozgekenge’
KWAMBIRA kale, ŵawusi ŵanandi ŵawuskikapo pa citengo. Ŵanji ŵanthu ŵaleka kuŵavotera, apo ŵanji ŵakucita kuŵaphanga mazaza. Wuli pakuyowoya za Yesu Khristu, Themba la Ufumu wakucanya wa Ciuta? Kasi cilipo ico cingamutondeska kuti wawuse nga Themba lakwimikika na Ciuta? Zgoro la fumbo ili tikulisanga mu mazgu agho Yehova wakayowoya kwa Davide, Themba la Israyeli, agho ghali kulembeka mu buku la 2 Samuel cipaturo 7.
Kukwambilira kwa cipaturo ici, tikusambira kuti Davide soni zamukora pakuwona kuti iyo wakukhala mu nyumba yakutowa, peneapo likasa la Ciuta likukhala mu cihema.a Davide wakulongosora kuti wakukhumba kuzengera Yehova nyumba yakwenelera, panji kuti tempele. (Vesi 2) Kweni Davide ndiyo wazengenge nyumba iyi yayi. Kwizira mwa nchimi Natani, Yehova wakuphalira Davide kuti mwana wake ndiyo wazamuzenga tempele.—Vesi 4, 5, 12, 13.
Yehova wakondwa comene na kukhumbisiska kwa Davide. Pakukhumba kumuwonga ndiposo mwakuyana na ucimi, Ciuta wakucita phangano na Davide lakuti wazamuwuska munthu munyake wa mu fuko la Davide uyo wazamuwusa kwamuyirayira. Natani wakuphalira Davide layizgo la Ciuta, lakuti: “Nyumba yako na ufumu wako tivikhozgekenge muyirayira panthazi pane; cizumbe cako camkwimikika muyirayira.” (Vesi 16) Kasi ni njani uyo ni Muhaliri mweneco wa phangano ili, mweneuyo wazamuwusa muyirayira?—Salmo 89:20, 29, 34-36.
Yesu wa ku Nazarete wakafuma mu mphapu ya Davide. Pakupharazga za kubabika kwa Yesu, mungelo wakati: “Yehova Ciuta wazamumupa cizumbe ca Davide ŵawiske, Ndipo wazamuwusa nga ni themba pa nyumba ya Yakobe muyirayira, ndipo ufumu wake uzamumara cara.” (Luka 1:32, 33) Ntheura phangano ilo Ciuta wakacita na Davide likufiskika mwa Yesu Khristu. Pa cifukwa ici, wakuwusa mu khumbo la munthu cara, kweni kwizira mu layizgo la Ciuta ilo likumupa mazaza ghakuwusira muyirayira. Tikwenera kukumbuka kuti ivyo Ciuta walayizga vikucitika.—Yesaya 55:10, 11.
Tikusambiramo vinthu viŵiri vyakuzirwa mu 2 Samuel cipaturo 7. Cakwamba, tili na cigomezgo kuti palije cinthu panji munthu uyo wangatondeska Yesu Khristu kuwusa. Ntheura tikusimikizga kuti kwizira mu muwuso wake, wazamufiska ivyo wakalayizga mwakuti khumbo la Ciuta lizakafiskike pa caru capasi nga umo viliri kucanya.—Mateyu 6:9, 10.
Caciŵiri, nkhani iyi yikutisambizga cinthu cakukondweska comene cakukhwaskana na Yehova. Kumbukani kuti Yehova wakawona na kuzirwiska ivyo mtima wa Davide ukakhumbanga. Nchakukhozga comene kumanya kuti Yehova wakuwona na kutizirwiska para tikujipeleka pakumusopa. Nyengo zinyake, vinthu nga mbulwari panji ucekuru, vingatitondeska kufiska vyose ivyo mtima withu ukukhumba pakuteŵetera Ciuta. Usange ndimo viliri, mphanyi tapembuzgika na fundo yakuti Yehova wakuwona nanga ni madazgo gha mu mtima wa munthu uyo ngwakujipeleka fikepo pakumusopa.
[Mazgu ghamusi]
a Likasa la phangano likaŵa bokosi lakupatulika ilo likapangika mwakulongozgeka na Yehova ndiposo mwakuyana na umo mweneco wakakhumbiranga. Likimiranga kuŵapo kwa Yehova mu Israyeli wakale.—Exodus 25:22.