LAYIBULARE YA PA INTANETI ya Watchtower
Watchtower
LAYIBULARE YA PA INTANETI
Chitumbuka
  • BAIBOLO
  • MABUKU
  • MAUNGANO
  • w10 9/15 pp. 21-25
  • “Mulongozgi Winu Njumoza, Khristu”

Vidiyo palije.

Phepani, pali suzgo linyake.

  • “Mulongozgi Winu Njumoza, Khristu”
  • Gongwe la Mulinda Likupharazga Ufumu wa Yehova—2010
  • Mitu Yichoko
  • Nkhani Zakuyanako na Iyi
  • Karonga wa Israyeli
  • Mulongozgi Uyo Wakayowoyekerathu
  • Mulaŵiliri wa Mpingo Wacikhristu
  • Khristu Wakalongozga Mulimo wa Kupharazga
  • Umo Yesu Wakulongozgera Mpingo
  • Kristu Wakurongozga Mpingo Wake
    Gongwe la Mulinda Likupharazga Ufumu wa Yehova—2002
  • Yehova Wakulongozga Ŵanthu Ŵake
    Gongwe la Mulinda Likupharazga Ufumu wa Yehova (Lakusambira)—2017
  • Mulongozgi Withu Uyo Wakutonda
    Gongwe la Mulinda Likupharazga Ufumu wa Yehova—2010
  • Kasi Mwapokera “Mzimu wa Unenesko”?
    Gongwe la Mulinda Likupharazga Ufumu wa Yehova—2002
Wonani Vinyake
Gongwe la Mulinda Likupharazga Ufumu wa Yehova—2010
w10 9/15 pp. 21-25

“Mulongozgi Winu Njumoza, Khristu”

“Kucemeka ‘ŵalongozgi’ [cara], pakuti Mulongozgi winu njumoza, Khristu.”—MAT. 23:10.

1. Kasi Ŵakaboni ŵa Yehova ŵakuwona kuti Mulongozgi wawo ni njani, ndipo cifukwa wuli?

MACHALICHI gha Cikhristu cautesi ghakusora munthu kuŵa mulongozgi wawo. Mwaciyelezgero, Ŵakatolika mulongozgi wawo ni papa. Ŵakaboni ŵa Yehova ŵakucita nthena yayi. Mbasambiri panji ŵalondezgi ŵa munthu yayi. Fundo iyi yikukolerana na ucimi wa Yehova wakukhwaskana na Mwana wake, wakuti: “Wonani, nkhamucita kuŵa kaboni ku ŵanthu, cilongozgi na mulanguli ku ŵanthu.” (Yes. 55:4) Ŵakhristu ŵakuphakazgika ndiposo ŵa “mberere zinyake” ŵakukhumba mulongozgi munyake yayi padera pa uyo Yehova wali kuŵapa. Ŵakukolerana na mazgu gha Yesu ghakuti: “Mulongozgi winu njumoza, Khristu.”—Mat. 23:10.

Karonga wa Israyeli

2, 3. Kasi Mwana wa Ciuta wakawovwira wuli Ŵaisrayeli?

2 Pambere mpingo Wacikhristu undambe, Yehova wakasora mungelo kuti walongozge Ŵaisrayeli. Wati waŵafumya mu Eguputo, Yehova wakati: “Wona, nkhutuma mungelo panthazi pako, kukusungilira iwe mu nthowa na kukunjizga mu malo agho ndanozga kale. Muŵe naye maso, mupulikire mazgu ghake, mungamusosomolanga, pakuti ntha tiwagowokere kwananga kwinu; cifukwa zina lane lili mwa iye.” (Ex. 23:20, 21) Mungelo uyu wakwenera kuti wakaŵa Mwana wakwamba wa Ciuta.

3 Vikuwoneka kuti pambere wandababike kuŵa munthu, Mwana wa Ciuta wakacemekanga Mikayeli. Mu buku la Daniel, Mikayeli wakuyowoyeka kuti ni “karonga” wa Israyeli, mtundu wa Daniyeli. (Dan. 10:21) Msambiri Yuda wakalongora kuti Mikayeli wakawovwiranga Ŵaisrayeli pambere Daniyeli wandaŵeko. Mozesi wakati wafwa, Satana wakwenera kuti wakakhumbanga citanda ca Mozesi, mutepanji kuti wakhuŵilizge Ŵaisrayeli kuti ŵasopenge vikozgo. Mikayeli wakanjilirapo kuti ivi vileke kucitika. Yuda wakati: “Apo mungelo mukuru Mikayeli wakimikana na Dyabulosi, ndipo ŵakapindananga cifukwa ca thupi la Mozesi, kuti wakayezga kumweruzga na mazgu ghaheni cara; kweni wakati: ‘Mphanyi Yehova wakucenya.’” (Yuda 9) Nyengo yicoko waka pambere Yeriko wandazingilizgike, tikukayika yayi kuti Mikayeli, “cilongozgi wa nkhondo ya Yehova” ndiyo wakawonekera Joshua, kumusimikizgira kuti Yehova wamovwirenge. (Ŵazgani Joshua 5:13-15.) Apo ciŵanda cikajandizga mungelo kuti wayowoye uthenga wakuzirwa kwa nchimi Daniyeli, mungelo mukuru, Mikayeli wakiza na kovwira mungelo uyu.—Dan. 10:5-7, 12-14.

Mulongozgi Uyo Wakayowoyekerathu

4. Kasi ucimi ukayowoyaci za kwiza kwa Mesiya?

4 Pambere ivi vindacitike, Yehova wakatuma mungelo Gabriyeli kuti wakaphalire nchimi Daniyeli za ucimi wakwiza kwa “wakuphakazgika, karonga” panji kuti Mesiya Mulongozgi. (Dan. 9:21-25)a Pa nyengo yake mu 29 C.E., Yohane wakabapatiza Yesu. Mzimu utuŵa ukapungulika pa Yesu, kumuphakazga kuŵa Khristu panji kuti Mesiya. (Mat. 3:13-17; Yoh. 1:29-34; Gal. 4:4) Ici cikacitiska kuti waŵe Mulongozgi wapadera comene.

5. Kasi Khristu wakacita wuli nga ni Mulongozgi apo wakaŵa pa caru capasi?

5 Kufuma apo wakambira uteŵeti wake pa caru capasi, Yesu wakalongora kuti ni Mulongozgi. Pakati pajumpha mazuŵa ghacoko waka kufuma apo wakambira uteŵeti wake, wakasora ŵasambiri na kucita munthondwe wakwamba. (Yoh. 1:35–2:11) Apo wakendendekanga kupharazga makani ghawemi gha Ufumu, wakaŵanga na ŵasambiri ŵake. (Luka 8:1) Wakaŵasambizga kupharazga ndipo iyo ndiyo wakalongozganga mulimo uwu. (Luka 9:1-6) Ŵalara mu mpingo ndimo nawo ŵakwenera kucitira.

6. Kasi Khristu wakalongora wuli kuti ni Muliska ndiposo Mulongozgi muwemi?

6 Pakujiyaniska na muliska wacitemwa, Yesu wakalongora kuti waliso na mulimo unyake. Ŵaliska ŵa mberere ŵa mu vyaru vya kumafumiro gha dazi gha Asiya para ŵakuluta na mberere uko zamurya, iwo ndiwo ŵakwenda panthazi. W. M. Thomson wakati: “Muliska wakwenda panthazi pa mberere kuti wazilongozge waka yayi, kweni kuti wawonenge usange nthowa njiwemi. . . . Wakuŵa na ndodo mu woko, wakudangilira mskambo kuya ku utheka wakubiliŵira, ndipo wakuzivikilira ku vilwani.” (The Land and the Book) Kuti walongore kuti ni Muliska ndiposo Mulongozgi muwemi, Yesu wakati: “Ndine muliska muwemi; muliska muwemi wakupeleka umoyo wake cifukwa ca mberere. Mberere zane zikupulika mazgu ghane, ndipo nkhuzimanya, ndiposo zikunilondezga.” (Yoh. 10:11, 27) Yesu wakacita nadi mwakuyana na ivyo wakayowoya, wakapeleka umoyo wake kuŵa sembe yakuwombolera mberere zake, kweni Yehova wakamuwuska “kuŵa Mulongozgi Mulara na Mponoski.”—Mil. 5:31; Heb. 13:20.

Mulaŵiliri wa Mpingo Wacikhristu

7. Kasi Yesu wakulaŵilira wuli mpingo Wacikhristu?

7 Wakati wakhala pacoko waka kuluta kucanya, Yesu wakaphalira ŵasambiri ŵake kuti: “Mazaza ghose ghapika kwa ine kucanya na caru capasi.” (Mat. 28:18) Wati wakwera kucanya, Yehova wakamutuma kuti wapungulire mzimu utuŵa pa ŵasambiri ŵake mwakuti uŵakhozge. (Yoh. 15:26) Pa Pentekoste 33 C.E., Yesu wakapungulira mzimu uwu pa Ŵakhristu ŵakwambilira. (Mil. 2:33) Uku kukaŵa kwamba kwa mpingo Wacikhristu. Yehova wali kwimika Mwana wake kuti walongozgenge mpingo Wacikhristu. (Ŵazgani Ŵaefeso 1:22; Ŵakolose 1:13, 18.) Yesu wakulaŵilira mpingo Wacikhristu kwizira mwa mzimu utuŵa, ndiposo ŵangelo awo ŵali ‘kulambikika kwa iyo.’—1 Pet. 3:22.

8. Kasi Khristu wakalongozganga wuli ŵasambiri ŵake, ndipo sono wakucita wuli?

8 Kweniso, kwizira mwa mzimu utuŵa, Khristu wali kupeleka “ŵanthu kuŵa vyawanangwa,” ŵanji “kuŵa ŵaliska na ŵasambizgi” mu mpingo. (Efe. 4:8, 11) Mpositole Paulosi wakakhuŵilizga ŵalaŵiliri Ŵacikhristu kuti: “Muŵe maso pa mwaŵene na pa mskambo wose, weneuwo mzimu utuŵa wamwimikani kuŵa ŵalaŵiliri pakati pake, kuti muliske mpingo wa Ciuta.” (Mil. 20:28) Apo mpingo Wacikhristu ukambanga, ŵalaŵiliri wose ŵakaŵa ŵanalume ŵakuphakazgika. Ŵapositole na ŵalara ŵa mu mpingo wa ku Yerusalemu ndiwo ŵakaŵa mu wupu wakulongozga. Khristu wakalongozganga “ŵabali” wose ŵakuphakazgika kwizira mu wupu uwu. (Heb. 2:11; Mil. 16:4, 5) Mu nyengo zaumaliro zino, Khristu wali kuŵika vinthu “vyake vyose” vya Ufumu vya pa caru capasi mu mawoko gha “muzga wakugomezgeka na wakucenjera” ndiposo Wupu Wakulongozga. (Mat. 24:45-47) Ŵakuphakazgika ndiposo ŵa mberere zinyake ŵakumanya kuti para ŵakuzomera kulongozgeka na Wupu Wakulongozga ndikuti ŵakulongozgeka na Mulongozgi wawo, Khristu.

Khristu Wakalongozga Mulimo wa Kupharazga

9, 10. Kasi Khristu wakacita wuli kuti makani ghawemi gha Ufumu ghathandazgike ku mitundu yinyake?

9 Kufuma apo wakambira uteŵeti wake, Yesu wakalongozga mulimo wa kupharazga na kusambizga. Wakanozga ndondomeko ya umo makani ghawemi gha Ufumu ghakeneranga kupharazgikira. Apo wakaŵa pa caru capasi, wakaphalira ŵasambiri ŵake kuti: “Kuluta mu nthowa ya mitundu cara, ndipo kunjira mu msumba wa Ŵasamariya cara; kweni nyengo zose lutaninge ku mberere zakuzgeŵa za nyumba ya Israyeli. Uku mukuluta, pharazgani, mutenge, ‘Ufumu wa kucanya waneng’enera.’” (Mat. 10:5-7) Pamasinda pa Pentekoste 33 C.E., ŵasambiri ŵake ŵakacita nadi mwamwamphu mulimo uwu, ndipo ŵakapharazgira Ŵayuda na awo ŵakaphendukira ku Ciyuda.—Mil. 2:4, 5, 10, 11; 5:42; 6:7.

10 Pamasinda, kwizira mwa mzimu utuŵa Yesu wakalongozga kuti makani ghawemi gha Ufumu ghapharazgike mu Samariya ndiposo mu vigaŵa vinyake. (Mil. 8:5, 6, 14-17; 10:19-22, 44, 45) Yesu iyomwene wakakhuŵilizga Saulosi wa ku Taraso kuti waŵe Mkhristu, mwakuti makani ghawemi ghapharazgike ku ŵamitundu. Yesu wakaphalira Hananiya kuti: “Wuka, ulute ku msewu wakucemeka Wakunyoloka, ndipo pa nyumba ya Yudasi ukafumbilire munthu zina lake Saulosi, wakufuma ku Taraso. . . . Lutanga, cifukwa munthu uyu nchiŵiya cakusoleka kwa ine kuyeghera zina lane ku mitundu kweniso ku mathemba na ŵana ŵa Israyeli.” (Mil. 9:3-6, 10, 11, 15) “Munthu uyu” wakazakaŵa mpositole Paulosi.—1 Tim. 2:7.

11. Kwizira mu mzimu utuŵa, kasi Khristu wakacita wuli kuti mulimo wa kupharazga uthandazgike?

11 Apo nyengo yakuti makani ghawemi ghapharazgike ku ŵamitundu yikakwana, mzimu utuŵa ukalongozga Paulosi pa maulendo ghake gha ku Asiya na ku Europe. Buku la Milimo likuti: “Apo [nchimi Zacikhristu na ŵasambizgi mu mpingo wa ku Antiyoke wa ku Siriya] ŵakateŵeteranga Yehova na kuziŵizga, mzimu utuŵa ukati: ‘Pa ŵanthu wose munipatulire Baranaba na Saulosi kuti ŵacite mulimo uwo naŵacemera.’ Penepapo ŵakaziŵizga kurya ndipo ŵakalomba na kuŵika mawoko ghawo pa iwo na kuŵaleka kuti ŵalutenge.” (Mil. 13:2, 3) Yesu ndiyo wakacema Saulosi wa ku Taraso kuti waŵe ‘ciŵiya cakusoleka,’ kunyamulira zina lake ku ŵamitundu. Ntheura, Khristu, Mulongozgi wa mpingo ndiyo wakawovwira kuti mulimo uwu ulute panthazi. Pa ulendo waciŵiri wa umishonale wa Paulosi, vikawonekerathu kuti Yesu wakugwiliskira nchito mzimu utuŵa kuti walongozge mulimo wa kupharazga. Nkhani iyi yikulongora kuti Yesu wakalongozganga Paulosi na ŵanyake uko ŵakeneranga kuluta ndiposo nyengo yakulutira, ndipo mboniwoni iyo ŵakawona yikaŵalongozgera ku Europe.—Ŵazgani Milimo 16:6-10.

Umo Yesu Wakulongozgera Mpingo

12, 13. Kasi buku la Uvumbuzi likulongora wuli kuti Khristu wakumanya makora ivyo vikucitika mu mpingo uliwose?

12 Yesu wakamanyanga cilicose ico cikacitikanga mu mipingo yakwambilira ya ŵalondezgi ŵake ŵakuphakazgika. Wakamanyanga umo mpingo uliwose ukacitiranga vinthu. Fundo iyi yikuwoneka makora para tikuŵazga vipaturo 2 na 3 vya buku la Uvumbuzi. Yesu wakazunura mazina gha mipingo yose yinkhondi na umoza ya mu Asiya. (Uvu. 1:11) Tili na cigomezgo cose kuti wakamanyanga makora umo mipingo iyi ndiposo yinyake iyo yikaŵako nyengo yira yikacitiranga mwauzimu.—Ŵazgani Uvumbuzi 2:23.

13 Yesu wakalumba yinyake mwa mipingo iyi cifukwa ca kuzizipizga nthambuzgo, kugomezgeka ku mazgu ghake, ndiposo kukana ŵacigaluka. (Uvu. 2:2, 9, 13, 19; 3:8) Kweni mipingo yinandi wakayisuska cifukwa citemwa cawo cikazizima, yikazomerezga kusopa vikozgo, uzaghali, ndiposo mphatuka. (Uvu. 2:4, 14, 15, 20; 3:15, 16) Pakuŵa mulaŵiliri wacitemwa, wakaphalira mipingo yose, kusazgapo iyo wakayisuska, kuti: “Wose awo nkhuŵatemwa nkhuŵacenya na kuŵalanga. Ntheura, uŵe wamwamphu ndipo upere.” (Uvu. 3:19) Nangauli Yesu wakaŵa kucanya, wakalongozganga mpingo wa ŵasambiri ŵake pa caru capasi kwizira mu mzimu utuŵa. Paumaliro wa uthenga uliwose wakuluta ku mipingo iyi, wakayowoyanga kuti: “Uyo wali na khutu wapulike ico mzimu ukuyowoya ku mipingo.”—Uvu. 3:22.

14-16. (a) Kasi Yesu walongora wuli kuti ni Mulongozgi wacikanga wa ŵanthu ŵa Yehova? (b) Nchivici cacitika cifukwa cakuti Yesu waŵa na ŵasambiri ŵake “mazuŵa ghose mpaka umaliro wa mgonezi”? (c) Kasi mu nkhani yakulondezgapo tizamusanda vici?

14 Tawona kuti Mikayeli (Yesu) ndiyo wakaŵa Mulongozgi wankhongono wa Israyeli. Pamasinda wakaŵa Mulongozgi wacikanga ndiposo Muliska wacitemwa wa ŵasambiri ŵake ŵakwambilira. Apo wakaŵa pa caru capasi wakalongozga mulimo wa kupharazga makani ghawemi gha Ufumu. Wakati wawuskika ku ŵakufwa wakalutilira kulaŵilira mulimo uwu.

15 Kwizira mu mzimu utuŵa, Yesu wakalongozga mulimo wa kupharazga uwu kuti ufike ku vigaŵa vyakutali comene vya caru capasi. Pambere wandakwelere kucanya, Yesu wakaphalira ŵasambiri ŵake kuti: “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane mu Yerusalemu na mu Yudeya mose na Samariya ndiposo ku vigaŵa vyakutali comene vya caru capasi.” (Mil. 1:8; ŵazgani 1 Petrosi 1:12.) Mwakulongozgeka na Khristu, makani ghawemi gha Ufumu ghakapharazgika comene mu nyengo ya Ŵakhristu ŵakwambilira.—Kol. 1:23.

16 Kweni Yesu wakalongora kuti mulimo uwu ulutilirenge mpaka mu nyengo yaumaliro. Wakati waphalira ŵalondezgi ŵake kuti ŵapharazge na kuzgora ŵanthu kuŵa ŵasambiri, Yesu wakati: “Ine nili namwe mazuŵa ghose mpaka umaliro wa mgonezi.” (Mat. 28:19, 20) Kufuma waka apo wakapikira mazaza gha kuwusa mu 1914, Khristu waŵa na ŵasambiri ŵake ndipo ndiyo ni Mulongozgi wawo. Mu nkhani yakulondezgapo tizamusanda mulimo uwo wacita kufuma mu 1914.

[Mazgu ghamusi]

a Kuti mumanye vinandi vya ucimi uwu wonani cipaturo 11, mu buku la Samalani Ulosi wa Danieli!

Kuweleramo

• Kasi Mwana wa Ciuta wakalongora wuli kuti wakaŵa Mulongozgi wa Israyeli?

• Kasi Khristu wakulongozga wuli mpingo?

• Kasi Khristu walongozga wuli mulimo wa kupharazga makani ghawemi?

• Nchivici cikulongora kuti Khristu wakumanya umoyo wauzimu wa mpingo uliwose?

[Cithuzithuzi pa peji 21]

“Nkhutuma mungelo panthazi pako”

[Cithuzithuzi pa peji 23]

Khristu wakutuma “vyawanangwa” kuliska mskambo wake

    Mabuku gha Chitumbuka (1982-2023)
    Fumani
    Njirani
    • Chitumbuka
    • Tumizgani
    • Ivyo Mukukhumba
    • Copyright © 2025 Watch Tower Bible and Tract Society of Pennsylvania
    • Malango
    • Phangano
    • Privacy Settings
    • JW.ORG
    • Njirani
    Tumizgani