Mulongozgi Withu Uyo Wakutonda
“Wakaluta kukatonda na kumalizga kutonda kwake.”—UVU. 6:2.
1, 2. (a) Kasi Baibolo likuwuyaniska na vici mulimo wa Khristu kufuma mu 1914? (b) Kasi Khristu wacita vici kufuma waka apo wakaŵikikira pa cizumbe?
MU CILIMIKA ca 1914 Khristu wakaŵikika pa cizumbe kuŵa Themba la Ufumu wa Yehova wa Umesiya. Kasi tikughanaghana kuti sono wakucita vici? Kasi tikumuwona nga ni themba ilo lakhala waka pa cizumbe cake na kudodoliska pa caru capasi na cilato ca kuwona umo mpingo wake ukucitira? Para ndimo tikughanaghanira, ipo tingakhumbikwira kusintha kaghanaghaniro kithu. Mu buku la Masalmo na la Uvumbuzi wakuyaniskika na themba lankhongono ilo lakwera pa haci, likuluta “kukatonda na kumalizga kutonda kwake,” ndipo likulutilira “kusakata.”—Uvu. 6:2; Sal. 2:6-9; 45:1-4.
2 Khristu wakati waŵikika waka pa cizumbe ca uthemba, cinthu cakwamba ico wakacita nkhuthereska “cinjoka na ŵangelo ŵake.” Khristu panji kuti Mikayeli, pakuŵa mungelo mukuru ndiposo mulongozgi wa ŵangelo ŵake, wakacimbizga Satana na viŵanda vyake kucanya na kuŵaponya pa caru capasi. (Uvu. 12:7-9) Pamasinda, pakuŵa “thenga la phangano,” Yesu na Ŵawiske ŵakendera tempele lauzimu. (Mal. 3:1) Wakeruzga Cikhristu cautesi, ico nchigaŵa ciheni comene ca “Babuloni Mukuru,” wakacisanga na mulandu wa ndopa na wa kucita uzaghali na ŵandyali.—Uvu. 18:2, 3, 24.
Khristu Wakatozga Muzga Wake
3, 4. (a) Kasi Khristu wafiska mulimo wuli pakuŵa “thenga” la Yehova? (b) Kasi kwendera kwa tempele kukavumburaci, ndipo Yesu wali kumupa mulimo wuli muzga?
3 Kwendera uko Yehova wakacita pamoza na “thenga” lake kukavumburaso kuti mu luŵaza lwa tempele lauzimu mukaŵa Ŵakhristu ŵanyake awo ŵakaŵa ku cigaŵa ca Cikhristu cautesi cara. Ndipouli, Ŵakhristu ŵakuphakazgika aŵa panji kuti “ŵana ŵa Levi” nawo ŵakeneranga kutozgeka. Uku kukaŵa kufiskika kwa ucimi wa Malaki, uwo ukati: “[Themba Yehova] tilikhale pasi nga ndi mwengi na mutozgi wa siliva; tilitozge ŵana ŵa Levi na kuŵayenga nkhanira nga ndi golide na siliva, ŵasuke ŵapeleke sembe zakurunjika kwa Yehova.” (Mal. 3:3) Yehova wakatuma ‘thenga lake la phangano,’ Khristu Yesu kuti litozge Ŵaisrayeli ŵauzimu aŵa.
4 Ndipouli, Khristu wakasanga kuti Ŵakhristu ŵakuphakazgika ŵakulimbikira kupeleka cakurya cauzimu pa nyengo yakwenelera ku ŵamumbumba ya cipulikano. Kufuma mu 1879, ŵalutilira kupharazga unenesko wa Ufumu wa Ciuta kwizira mu magazini iyi, nangauli nyengo zinyake ŵakumana na masuzgo. Yesu wakati pakuzakendera ŵateŵeti ŵake, mu nyengo ya “umaliro wa mgonezi,” wazamusanga muzga wakuŵapa ‘cakurya pa nyengo yakwenelera.’ Wazamuphalira muzga uyu kuti ngwakukondwa ndipo ‘wazamumwimika pa vyake vyose’ vya pa caru capasi. (Mat. 24:3, 45-47) Pakuŵa mutu wa mpingo Wacikhristu, Khristu watuma “muzga wakugomezgeka na wakucenjera” kuti walaŵilire vinthu vya Ufumu wake pa caru capasi. Wakupeleka ulongozgi ku “ŵateŵeti ŵake” ŵakuphakazgika na ŵa “mberere zinyake” kwizira mu Wupu Wakulongozga.—Yoh. 10:16.
Kuvuna Caru Capasi
5. Kasi mpositole Yohane wakawona themba likucitaci?
5 Mu mboniwoni, mpositole Yohane wakawona cinthu cinyake ico Themba la Umesiya likeneranga kucita mu “zuŵa la Fumu,” pamanyuma pakuti laŵikika pa cizumbe mu 1914. Yohane wakati: “Nkhalaŵiska, ndipo wonani! bingu lituŵa, ndipo pa bingu pakakhala yunji nga ni mwana wa munthu, wakaŵa na mphumphu yagolide pa mutu wake na cigelo cakuthwa mu woko lake.” (Uvu. 1:10; 14:14.) Yohane wakapulika mungelo wa Yehova wakuphalira wakuvuna kuti wakhizge cigelo cake, pakuti “vuna ya caru capasi yaca fikepo.”—Uvu. 14:15, 16.
6. Yesu wakati nchivici cizamucitika mu munda wa tirigu?
6 “Vuna ya caru capasi” iyi, yikutikumbuska za ntharika ya Yesu ya tirigu na duru. Yesu wakajiyaniska na munthu uyo wakaseŵa mbuto ya tirigu mu munda wake. Ndipo wakalindiliranga kuzakavuna tirigu, uyo wakwimira ‘ŵana ŵa ufumu’ panji kuti Ŵakhristu ŵakuphakazgika awo ŵamuwusira lumoza na Yesu. Kweni usiku, mulwani, “Dyabulosi” wakaseŵamo mbuto ya duru mu munda, awo “mbana ŵa muheni.” Mweneko wa munda wakaphalira ŵanchito kuti ŵavileke vyose vikulire lumoza mpaka nyengo ya vuna, uwo ‘mbumaliro wa mgonezi.’ Pa nyengo iyi wazamulangura ŵangelo ŵake kuti ŵapature tirigu na duru.—Mat. 13:24-30, 36-41.
7. Kasi Khristu wakucita wuli mulimo wa “vuna ya caru capasi”?
7 Yesu walutilira kucita mulimo wa vuna pa caru cose capasi mwakuti wafiske ivyo Yohane wakawona mu mboniwoni. “Vuna ya caru capasi” yikamba na kuwunganya ŵakukhalira ŵa 144,000, awo “mbana ŵa ufumu” panji kuti “tirigu” wa mu ntharika ya Yesu. Mphambano iyo yilipo pakati pa Ŵakhristu ŵaunenesko na ŵautesi yikawoneka makora pamasinda pa Nkhondo Yakwamba ya Caru Cose, ndipo vikawovwira kuti ŵa mberere zinyake ŵawunganiskike, ico nchigaŵa caciŵiri ca “vuna ya caru capasi.” Aŵa “mbana ŵa ufumu” yayi, m’malo mwake mba “mzinda ukuru” awo mbakukhumbisiska kujilambika ku Ufumu. Ŵakuvunika kufuma mu “ŵanthu wose, ŵamitundu yose, na mayowoyero ghose.” Ŵakujilambika ku Ufumu wa Umesiya, uwo uzamuwusika na Yesu Khristu na ŵa 144,000 awo ‘mbatuŵa.’—Uvu. 7:9, 10; Dan. 7:13, 14, 18.
Umo Wakulongozgera Mipingo
8, 9. (a) Nchivici cikulongora kuti Khristu wakuwona ivyo waliyose wakucita mu mpingo? (b) Nga umo vyalongolekera pa peji 26, ni vinthu wuli “vyakunyang’amira vya Satana” ivyo tikwenera kuŵambara?
8 Mu nkhani iyo yajumpha, tikasambira kuti Khristu wakamanyanga umoyo wauzimu wa mpingo uliwose wa mu nyengo ya Ŵakhristu ŵakwambilira. Mazuŵa ghano, pakuŵa Themba ilo lapika “mazaza ghose . . . kucanya na caru capasi,” Khristu, Mulongozgi withu, ndiyo ni mutu wa mipingo yose pa caru capasi. (Mat. 28:18; Kol. 1:18) Yehova wali “kumuzgora [kuŵa] mutu pacanya pa vinthu vyose ku mpingo” wa ŵakuphakazgika. (Efe. 1:22) Pa caru capasi pali mipingo yakujumpha 100,000 ya Ŵakaboni ŵa Yehova, kweni Khristu wakumanya cilicose ico cikucitika mu mpingo uliwose.
9 Ku mpingo wa ku Tiyatira Yesu wakatumako uthenga uwu: “Ivi ni vinthu ivyo Mwana wa Ciuta wakuyowoya, uyo wali na maso nga ni dimi la moto, . . . ‘Nkhumanya milimo yako.’” (Uvu. 2:18, 19) Ŵanyake mu mpingo uwu wakaŵasuska cifukwa ca nkharo zawo ziheni, ndipo wakaŵaphalira kuti: “Ndine mweneuyo wakusanda ziso na mitima, ndipo nizamumupa waliyose payekha kwakuyana na milimo yake.” (Uvu. 2:23) Mazgu agha ghakulongora kuti Khristu wakuwona waka ivyo mpingo wose ukucita pera yayi, kweniso ivyo munthu waliyose mu mpingo wakucita. Yesu wakalumba Ŵakhristu ŵa ku Tiyatira “ŵeneawo ŵakamanya cara ‘vinthu vyakunyang’amira vya Satana.’” (Uvu. 2:24) Mazuŵa ghano napo wakulumba wose awo ŵakuŵambara “vinthu vyakunyang’amira vya Satana” ivyo vikusangika pa Intaneti, mu mavidiyo, ndiposo mu maghanoghano ghakupuluska gha ŵanthu. Yesu wakukondwa comene kuwona ivyo Ŵakhristu ŵanandi ŵakucita mazuŵa ghano kuti ŵalongozgeke na iyo mu umoyo wawo wose.
10. Kasi ŵalara awo Khristu wakugwiliskira nchito kulongozga mpingo ŵakuyaniskika na vici, kweni ŵakwenera kumanya vici?
10 Khristu wakulaŵilira mwacitemwa mipingo yake pa caru capasi kwizira mu ŵalara. (Efe. 4:8, 11, 12) Mu nyengo ya Ŵakhristu ŵakwambilira, ŵalaŵiliri wose ŵakaŵa ŵakuphakazgika. Buku la Uvumbuzi likuŵalongora nga ni nyenyezi mu woko lamalyero la Khristu. (Uvu. 1:16, 20) Mazuŵa ghano, ŵalara ŵanandi mu mipingo mba mberere zinyake. Ŵakwimikika pamasinda pa kulomba na kulongozgeka na mzimu utuŵa. Ipo nawo ŵakulongozgeka na Khristu. (Mil. 20:28) Ndipouli, ŵakwenera kumanya kuti Khristu wakugwiliskira nchito ŵanalume ŵakuphakazgika ŵacoko waka awo ŵali mu Wupu Wakulongozga kuti walongozge ŵasambiri ŵake.—Ŵazgani Milimo 15:6, 28-30.
“Zaninge, Fumu Yesu”
11. Cifukwa wuli tikunweka kuti Mulongozgi withu wize luŵiro?
11 Mu uvumbuzi uwo Yohane wakapika, Yesu wakayowoya kanandi waka kuti wakwiza mwaluŵiro. (Uvu. 2:16; 3:11; 22:7, 20) Tikukayika yayi kuti wakang’anamuranga kwiza kuti wazakeruzge Babuloni Mukuru na cilicose ico cili ku cigaŵa ca caru ca Satana. (2 Tes. 1:7, 8) Cifukwa cakuti mpositole Yohane wakanweka comene kuti wawone vinthu ivi vikufiskika, wakati: “Ameni! Zaninge, Fumu Yesu.” Ise tikukhala mu nyengo yaumaliro ya caru ciheni ca Satana ici, nase tikunweka kuti Mulongozgi withu na Themba lithu wize luŵiro mwakuti wazakatuŵiske zina la Ŵawiske na kuthuwuska muwuso wawo.
12. Kasi Khristu wamalizgenge dankha mulimo wuli pambere mphepo zakuparanya zindalekezgeke?
12 Para ŵa 144,000 ŵamara kudindika, Yesu wazamuparanya gulu la Satana lakuwoneka na maso. Baibolo likulongosora kuti mphepo zakuparanya mgonezi wa Satana zizamulekezgeka dankha yayi mpaka apo ŵa 144,000 ŵazamumalira kudindika.—Uvu. 7:1-4.
13. Mu cigaŵa cakwamba ca “suzgo yikuru,” kasi Khristu wazamulongora wuli kuŵapo kwake?
13 Ŵanthu ŵanandi ŵakumanya yayi kuti Khristu wakamba “kuŵapo” mu 1914. (2 Pet. 3:3, 4) Ndipouli, sonosono apa wavumburenge kuŵapo kwake mwa kupeleka ceruzgo ca Yehova pa vigaŵa vyakupambanapambana vya mgonezi wa Satana. Nchakuwonekerathu kuti kuparanyika kwa “munthu uyo nchikanamalango,” panji kuti ŵalongozgi ŵa Cikhristu cautesi kuzamuvumbura “kuŵapo kwake.” (Ŵazgani 2 Ŵatesalonika 2:3, 8.) Uwu uzamuŵa ukaboni wambura kususkika wakuti Khristu wamba kweruzga pakuŵa wakwimikika na Yehova. (Ŵazgani 2 Timote 4:1.) Kuparanyika kwa Cikhristu cautesi ico nchigaŵa ciheni comene ca Babuloni Mukuru, ndilo lizamuŵa jando la kuparanyikirathu kwa ufumu wa caru cose wa cisopa cautesi. Yehova wazamukhuŵilizga ŵandyali kuti ŵaparanye muzaghali wauzimu uyu. (Uvu. 17:15-18) Ici cizamuŵa cigaŵa cakwamba ca “suzgo yikuru.”—Mat. 24:21.
14. (a) Cifukwa wuli cigaŵa cakwamba ca suzgo yikuru cizamudumulizgika? (b) Kasi “cimanyikwiro ca Mwana wa munthu” cizamung’anamuraci ku ŵanthu ŵa Yehova?
14 Yesu wakati mazuŵa gha suzgo yikuru iyi ghazamudumulizgika “cifukwa ca ŵakusoleka” panji kuti Ŵakhristu ŵakuphakazgika awo ŵazamuŵa kuti ŵacali pa caru capasi. (Mat. 24:22) Yehova wazamuzomerezga yayi kuti Ŵakhristu ŵakuphakazgika na ŵa mberere zinyake ŵazakaparanyikire lumoza na cisopa cautesi. Yesu wakatiso “pamanyuma pa suzgo ya mazuŵa agho,” pazamuŵa vimanyikwiro pa zuŵa, mwezi, na nyenyezi, “ndipo penepapo cimanyikwiro ca Mwana wa munthu cizamuwonekera kucanya.” Ici cizamupangiska kuti mitundu yose pa caru capasi ‘yizakajipamanthe cifukwa ca kutengera.’ Kweni ndimo vizamuŵira yayi na ŵakuphakazgika ndiposo ŵa mberere zinyake. Iwo ‘ŵazamwimilira na kwinuska mitu yawo, cifukwa kuwombokwa kwawo kuzamuŵa kuti kwasendelera.’—Mat. 24:29, 30; Luka 21:25-28.
15. Kasi Khristu wazamucita mulimo wuli para wiza?
15 Pambere Mwana wa munthu wandamalizge kutonda kwake, wazamwiza dankha mu nthowa yinyake. Yesu wakati: “Para Mwana wa munthu wakwiza mu ucindami wake, na ŵangelo wose pamoza nayo, penepapo wazamukhala pa cizumbe cake caucindami. Ndipo mitundu yose yizamuwungana panthazi pake, ndipo iyo wazamupatura ŵanthu, yumoza ku munyake, nga ni umo muliska wakupatulira mberere ku mbuzi. Ndipo wazamuŵika mberere ku woko lake lamalyero, kweni mbuzi ku lamazere.” (Mat. 25:31-33) Ulendo uwu, Khristu wazamupatura ŵanthu ŵa “mitundu yose” kuŵaŵika mu magulu ghaŵiri. Lakwamba, la “mberere” kwimira awo ŵakovwira ŵabali ŵake ŵauzimu (Ŵakhristu ŵakuphakazgika), ndipo laciŵiri, la “mbuzi” kwimira “awo ŵakupulikira cara makani ghawemi ghakuyowoya vya Fumu yithu Yesu.” (2 Tes. 1:7, 8) Mberere zikwimira “ŵarunji” awo ŵazamupokera “umoyo wamuyirayira” pa caru capasi, ndipo mbuzi ‘zizamufumapo kuya ku kudumulika kwamuyirayira’ panji kuti kuparanyika.—Mat. 25:34, 40, 41, 45, 46.
Yesu Wakumalizga Kutonda Kwake
16. Kasi Khristu, Mulongozgi withu wazamumalizga wuli kutonda kwake?
16 Para awo wazamuwusa nawo ŵamara kudindika ndiposo mberere zamanyikwa na kuŵikika ku woko lake lamalyero mwakuti ziponoskeke, Khristu wazamumalizga “kutonda kwake.” (Uvu. 5:9, 10; 6:2) Wazamulongozga ŵangelo, na ŵabali ŵake awo ŵazamuŵa kuti ŵawuskika, ndipo wazamuparanya caru cose ca Satana, ico cikusazgapo ŵandyali, ŵasilikari, na ŵamalonda. (Uvu. 2:26, 27; 19:11-21) Kutonda kwa Khristu kuzamumara para wazakaparanya mgonezi wa Satana uwu. Paumaliro wazamujalira Satana na viŵanda vyake mu cizongwe kwa vilimika cikwi.—Uvu. 20:1-3.
17. Mu muwuso wa vilimika cikwi, kasi Khristu wazamuŵalongozgera nkhu ŵa mberere zinyake, ndipo tikwenera kusimikizga kucitaci?
17 Pakuyowoya za “mzinda ukuru” wa mberere zinyake, awo ŵazamupona suzgo yikuru, mpositole Yohane wakati: “Mwanamberere, uyo wali pafupi na cizumbe, wazamuŵaliska, ndipo wazamuŵalongozgera ku visimi vya maji gha umoyo.” (Uvu. 7:9, 17) Mu muwuso wake wa vilimika cikwi, Khristu wazamulutilira kulongozga ŵa mberere zinyake awo ŵazamupulikira mazgu ghake, na kuŵalongozgera ku umoyo wamuyirayira. (Ŵazgani Yohane 10:16, 26-28.) Ipo tiyeni tilutilire kulondezga Mulongozgi withu wakugomezgeka mpaka mu caru ciphya ico Yehova walayizga.
Kuweleramo
• Kasi Khristu wakacitaci wakati waŵikika pa cizumbe?
• Kasi Khristu wakugwiliskira nchito anjani pakulongozga mipingo?
• Kasi Khristu Mulongozgi withu wizenge mu nthowa wuli?
• Kasi Khristu wazamulutilira wuli kutilongozga mu caru ciphya?
[Cithuzithuzi pa peji 29]
Kuparanyika kwa caru ca Satana ici kuzamuvumbura kuŵapo kwa Khristu