Mafumbo Ghakufumira ku Ŵaŵazgi
Pa Genesis 6:3, tikuŵazga kuti: “Mzimu wane kuti ukhalenge mu munthu mazuŵa ghose cara, pakuti iye ndi thupi, kweni mazuŵa ghake tighaŵenge vilimika makumi khumi pacanya makumi ghaŵiri.” Kasi Yehova wakang’anamuranga kuti ŵanthu ŵakhalenge vilimika 120 pera, ndipo kasi Nowa wakapharazga za Ciwowota kwa vilimika ivi?
Zgoro la mafumbo ghose ghaŵiri ndakuti yayi.
Pambere Ciwowota cindacitike, ŵanthu ŵanandi ŵakakhalanga vilimika vyakujumpha 120. Nowa wakaŵa na vilimika 600 apo Ciwowota cikacitikiranga, ndipo wakafwa na vilimika 950. (Gen. 7:6; 9:29) Ŵanyake awo ŵakababika pamanyuma pa Ciwowota ŵakakhala vilimika vyakujumpha 120. Mwaciyelezgero, Arpakshad wakafwa na vilimika 438 ndipo Shela wakafwa na vilimika 433. (Gen. 11:10-15) Kweni mu nyengo ya Mozesi, ŵanthu ŵanandi ŵakakhalanga vilimika 70 panji 80. (Sal. 90:10) Ntheura, lemba la Genesis 6:3 likulongora cigoti ca vilimika vya ŵanthu yayi nesi kuti ŵanandi ŵakhalenge vilimika 120.
Ipo kasi vesi ili likulongora kuti Ciuta wakaphalira Nowa kuti wacenjezge ŵanji kuti kwizenge pharanyiko para pajumpha vilimika 120? Yayi. Ciuta wakayowoya na Nowa kanandi waka. Pa vesi 13 mu nkhani iyi tikuŵazga kuti: “Ciuta wakati kwa [Nowa], ‘Natema kumalizga ŵanthu wose; pakuti caru cazura na citimbaheti nkhaza.’” Mu vilimika vyakulondezgapo, Nowa wakamalizga mulimo ukuru comene wa kukhoma cingalaŵa. Apa napo: “Yehova wakati kwa [Nowa], ‘Njira mu cingalaŵa, iwe na mbumba yako yose.’” (Gen. 6:13; 7:1) Pakaŵaso nyengo zinyake apo Yehova wakaphalira Nowa nkhani zinyake.—Gen. 8:15; 9:1, 8, 17.
Ndipouli, ivyo vili pa Genesis 6:3 vikupambana na ivyo tawona apa. Lemba ili likuzunurapo Nowa yayi, nesi kuyowoyapo kuti Ciuta wakayowoyanga na iyo. Ipo tingati likuyowoya waka za cilato ca Ciuta panji ivyo wakasimikizga kucita. (Yaniskani na Genesis 8:21.) Nchakuzirwa kukumbuka kuti nanga ni pambere Adamu wandalengeke, Baibolo likuyowoyaso kuti: “Ciuta wakati.” (Gen. 1:6, 9, 14, 20, 24) Apa nchakuwonekerathu kuti Yehova wakayowoyanga na munthu yayi, cifukwa pa nyengo iyi munthu wakaŵa kuti wandalengeke.
Ntheura, kungaŵa kubudiska yayi para tingati lemba la Genesis 6:3 likulongora kuti Ciuta wakasimikizga mtima kuparanya mgonezi uheni pa caru capasi. Apo Yehova wakatemanga kuti wacitenge ici kukaŵa vilimika 120 kunthazi, nangauli Nowa wakamanyanga yayi. Kweni cifukwa wuli wakatema nyengo? Ndipo cifukwa wuli wakalindilira?
Mpositole Petrosi wakati: “Ciuta wakalindilira mwakuzika mu mazuŵa gha Nowa, peneapo ngalaŵa yikazengekanga, mwenemumo ŵanthu ŵacoko waka, ndiko kuti maumoyo ghankhondi na ghatatu, ŵakayegheka makoraghene pa maji.” (1 Pet. 3:20) Apo Yehova wakasimikizga mtima na kuyowoya za vilimika 120, pakaŵa vinthu vinyake ivyo vikeneranga kucitika. Pakati pajumpha vilimika 20 Nowa na muwoli wake ŵakamba kubaba ŵana. (Gen. 5:32; 7:6) Ŵana ŵawo ŵatatu ŵakakura na kutora, mwakuti mbumba yikakura kufika pa “maumoyo ghankhondi na ghatatu.” Ndipo ŵakeneranga kukhoma cingalaŵa. Uwu ukaŵa mulimo upusu yayi para tikuwona za ukuru wa cingalaŵa ndiposo unandi wa ŵamumbumba ya Nowa. Kuzika kwa Ciuta pa vilimika 120 kukapeleka mpata kuti vinthu ivi vicitike ndiposo kuti malo ghakuponoskekeramo ghanozgeke, kuti ŵanthu ŵankhondi na ŵatatu ŵakugomezgeka ‘ŵayegheke makoraghene pa maji.’
Baibolo likuyowoyapo yayi za cilimika ico Yehova wakaphalilira Nowa vya Ciwowota. Kufuma pa nyengo iyo ŵana ŵake ŵakababikira, kukura, na kutora, mutepanji kukakhalaso vilimika 40 panji 50 pambere Ciwowota cindacitike. Pamasinda Yehova wakati kwa Nowa: “Natema kumalizga ŵanthu wose.” Ndipo wakatiso Nowa wakhome cingalaŵa cikuru na kunjiramo na mbumba yake. (Gen. 6:13-18) Kwa vilimika ivyo vikakhalako, Nowa wakacita vinandi padera kuŵa murunji. Wakaŵa “mupharazgi wa urunji” ndipo uthenga wake ukaŵa wakudunjika, kucenjezga ŵanthu ŵambura kopa Ciuta kuti ŵaparanyikenge. Nowa wakamanyanga yayi cilimika ico pharanyiko ili lizirenge, kweni wakagomezganga kuti lizenge kwambura kutondeka. Ndipo namwe mukumanya kuti Ciwowota cikiza nadi.—2 Pet. 2:5.