Mzimu Utuŵa Ukutipa Nkhongono Zakutondera Viyezgo na Kugongowa
“Muzamupokera nkhongono para mzimu utuŵa wiza pa imwe.”—MIL. 1:8.
1, 2. Kasi Yesu wakaŵalayizga vici ŵasambiri ŵake, ndipo cifukwa wuli?
YESU wakamanyanga kuti ŵasambiri ŵake paŵekha, ŵangasungilira yayi vyose ivyo wakaŵaphalira. Pakughanaghanira za ukuru wa mulimo uwo ŵakapika, nkhongono za ŵalwani ŵawo, ndiposo kunyotwa kwa mathupi ghawo, nchakuwonekerathu kuti ŵakakhumbikwiranga nkhongono zapadera. Lekani pambere wandalute kucanya, Yesu wakaphalira ŵasambiri ŵake kuti: “Muzamupokera nkhongono para mzimu utuŵa wiza pa imwe, ndipo muzamuŵa ŵakaboni ŵane mu Yerusalemu na mu Yudeya mose na Samariya ndiposo ku vigaŵa vyakutali comene vya caru capasi.”—Mil. 1:8.
2 Layizgo ili likamba kufiskika pa Pentekoste 33 C.E., apo mzimu utuŵa ukapa nkhongono ŵalondezgi ŵa Yesu Khristu kuti ŵapharazge mu Yerusalemu mose. Ŵakususka ŵakatondeka kulekeska mulimo uwu. (Mil. 4:20) Wose awo ŵakulondezga Yesu ŵakukhumbikwira nkhongono zakufuma kwa Ciuta “mazuŵa ghose mpaka umaliro wa mgonezi.”—Mat. 28:20.
3. (a) Yowoyani mphambano pakati pa mzimu utuŵa na nkhongono. (b) Kasi nkhongono za Yehova zikutovwira wuli?
3 Yesu wakalayizga ŵasambiri ŵake kuti ‘ŵazamupokera nkhongono para mzimu utuŵa wiza pa iwo.’ Pali mphambano pakati pa “nkhongono” na “mzimu.” Mzimu utuŵa ndiwo ukugwira nchito pa munthu panji cinthu cinyake kuti khumbo la Ciuta lifiskike, apo nkhongono ndiyo yikupangiska kuti cinthu cicitike. Nkhongono yingakhala waka mwa munthu panji cinthu cinyake mpaka apo yingakhumbikwira kugwira nchito. Lekani mzimu utuŵa tingawuyaniska na moto wa magesi uwo ukunjira mu batire para likuchajika, ndipo moto wa magesi uwo wanjira mu batire tingawuyaniska na nkhongono iyo yasungika waka. Nkhongono izo Yehova wakutipa kwizira mu mzimu utuŵa zikutovwira kufiska milimo yithu Yacikhristu, ndiposo kuti tilimbane na vinthu ivyo vingatiwezgera nyuma mwauzimu.—Ŵazgani Mika 3:8; Ŵakolose 1:29.
4. Kasi mu nkhani iyi tidumbiskanenge vici, ndipo cifukwa wuli?
4 Kasi tikumanya wuli kuti tili na nkhongono ya mzimu utuŵa? Kasi mzimu utuŵa ungatipangiska kuti ticite wuli vinthu para takumana na masuzgo? Apo tikuyezgayezga kuteŵetera Ciuta mwakugomezgeka, kanandi tikukumana na viyezgo vinandi, vinyake vikufuma kwa Satana na caru cake ciheni, vinyake vikwiza cifukwa cakuti ndise ŵambura kufikapo. Nchakuzirwa kuti tilimbane na masuzgo agha mwakuti tilutilire kuŵa Ŵakhristu, ticite uteŵeti nyengo zose, ndiposo kuŵa paubwezi uwemi na Yehova. Tiyeni tiwone umo mzimu utuŵa ukutipira nkhongono zakutondera viyezgo, zakuzizipizgira vyakulema, ndiposo kugongowa.
Ukutovwira Kutonda Viyezgo
5. Kasi lurombo lungatovwira wuli?
5 Yesu wakasambizga ŵalondezgi ŵake kulomba kuti: “Mungatitoleranga mu kuyezgeka cara, kweni mutiwombore kwa muheni.” (Mat. 6:13) Yehova watayengepo yayi ŵateŵeti ŵake ŵakugomezgeka awo ŵakumulomba nthena. Pa nyengo yinyake, Yesu wakati “Ŵadada ŵakucanya ŵapelekenge mzimu utuŵa ku awo ŵakuŵalomba.” (Luka 11:13) Nchakukhozga kumanya kuti Yehova wakutilayizga kuti watipenge nkhongono. Ndipouli, ici cikung’anamura kuti Yehova wativikilirenge kuti tileke kuyezgeka yayi. (1 Kor. 10:13) Kweni para tikuyezgeka, tikwenera kufwilirapo comene kulomba.—Mat. 26:42.
6. Kasi mazgoro gha Yesu ghakajintha pa vici apo Satana wakamuyezganga?
6 Yesu wakayowoyanga malemba pakuzgora Dyabulosi. Yesu wakaghamanyanga makora Mazgu gha Ciuta, lekani pakuzgora wakatenge: “Kuli kulembeka . . . Kuli kulembekaso . . . Fumapo Satana! Pakuti kuli kulembeka, ‘Yehova Ciuta wako ndiyo ukwenera kumusopa, ndipo ndiyo pera uyo ukwenera kumucitira uteŵeti wakupatulika.’” Yesu wakatonda viyezgo vya Satana cifukwa wakatemwanga Yehova ndiposo wakaghamanyanga makora malemba. (Mat. 4:1-10) Yesu wakati wakana kuthera, Satana wakamuleka.
7. Kasi Baibolo likutovwira wuli kuti titonde viyezgo?
7 Usange Yesu wakathembanga Malemba kuti watonde viyezgo vya Dyabulosi, ise kuli wuli? Kuti titonde Dyabulosi, cakwamba tikwenera kumanya makora malango gha Ciuta na kughalondezga. Ŵanthu ŵanandi para ŵakusambira Baibolo na kuwona kuzirwa kwa vinjeru vya Ciuta na urunji wake, ŵakwamba kulondezga fundo zake. “Mazgu gha Ciuta” ghali nadi na nkhongono iyo yikupanikizga “maghanoghano na makhumbiro gha mtima.” (Heb. 4:12) Para munthu wakuŵazga comene Baibolo na kulangulukapo, ‘wangamanya unenesko wa Yehova.’ (Dan. 9:13) Ipo cingaŵa ciwemi kughanaghanirapo comene malemba agho ghakuyowoya umo tingacitira na suzgo lithu.
8. Kasi tingapokera wuli mzimu utuŵa?
8 Yesu wakatonda viyezgo cifukwa wakamanyanga Malemba kweniso ‘wakazura na mzimu utuŵa.’ (Luka 4:1) Kuti nase tiŵe na nkhongono zanthena, tikwenera kusendelera kwa Yehova mwa kugwiliskira nchito vyose ivyo wakutipa kuti tizuzgike na mzimu wake. (Yak. 4:7, 8) Tikwenera kuŵazga Baibolo, kulomba, ndiposo kuwungana na Ŵakhristu ŵanyithu. Ŵanandi ŵakusanga candulo para ŵakucita milimo yose Yacikhristu, iyo yikuŵawovwira kuti ŵaghanaghanirenge vinthu vyauzimu.
9, 10. (a) Kasi ŵanandi mu cigaŵa cinu ŵakuyezgeka na vici? (b) Kasi kulanguruka na kulomba vingamovwirani wuli kutonda viyezgo nanga ni para mukupulika vyakulema?
9 Kasi ni viyezgo wuli ivyo imwe mukwenera kutonda? Kasi muli kuyezgekapo kucita myati yambura kwenelera na munthu uyo ni mfumu panji muwoli winu yayi? Usange mundatore panji kutengwa, kasi muli kusonganapo na munthu uyo ni Kaboni yayi? Mkhristu wangayezgeka kuwona vinthu vyaukazuzi ivyo vingiza mwamabuci pa Intaneti panji TV. Kasi namwe vili kumucitikiranipo, usange ni nthena, kasi mukacita wuli? Cingaŵa camahara kumanya umo maubudi ghacokoghacoko ghakulongozgera ku zakwananga zikuru. (Yak. 1:14, 15) Ghanaghanirani umo mungakhuŵazgira Yehova, mpingo, ndiposo mbumba yinu usange mwacita kwananga kukuru. Munthu wakuŵa na njuŵi yituŵa pekha para wakulutilira kulondezga malango gha Yehova. (Ŵazgani Salmo 119:37; Zintharika 22:3.) Para mwakumana na viyezgo vyanthena, lombani kuti musange nkhongono zakutondera.
10 Pali cinthu cinyake ico tikwenera kukumbuka pa nkhani ya viyezgo vya Dyabulosi. Yesu wakati wakhala mazuŵa 40 mu mapopa kwambura kurya Satana wakiza na kumuyezga. Tikukayika yayi kuti Dyabulosi wakawona kuti uwu ukaŵa ‘mpata uwemi’ wakuyezgera Yesu. (Luka 4:13) Satana wakupenja mipata yiwemi yakutiyezgera. Ipo nchakuzirwa kuti nyengo zose tiŵenge ŵakukhora mwauzimu. Kanandi Satana wakunjilirapo pa suzgo ilo munthu wali nalo. Ntheura, para tikupulika vyakulema panji kugongowa, tikwenera kuŵeyelera Yehova kuti watipe mzimu wake.—2 Kor. 12:8-10.
Ukutovwira Kutonda Vyakulema na Kugongowa
11, 12. (a) Cifukwa wuli ŵanandi mazuŵa ghano ŵakugongowa? (b) Nchivici cingatipa nkhongono zakutondera kugongowa?
11 Pakuŵa ŵanthu ŵambura kufikapo, nyengo zinandi tikugongowa. Vili nthena cifukwa cakuti tili mu nyengo zakusuzga comene kuluska kale. (2 Tim. 3:1-5) Apo Haramagedoni yikusendelera, masuzgo ghakukhwaskana na ndalama, kusuzgika maghanoghano, ndiposo vinthu vinyake, ghakusazgikira. Ntheura, tileke kuzizwa para ŵanji ŵakusuzgika kuti ŵapwelelere makora mbumba zawo. Ŵanyake ŵakuwona kuti ni mphingo mwakuti ŵakuthika waka lusoko. Usange ndivyo namwe vikumucitikirani, kasi mungatonda wuli?
12 Kumbukani kuti Yesu wakati ŵasambiri ŵake ŵazamupokera mzimu utuŵa kuti uŵawovwire. (Ŵazgani Yohane 14:16, 17.) Mzimu utuŵa ngwankhongono comene. Yehova wakupeleka nkhongono zinandi “nkhanira” kuti zitovwire kuzizipizga ciyezgo cilicose ico cingatiwira. (Efe. 3:20) Mpositole Paulosi wakati nangauli “tikutikinyulika mu nthowa yiliyose” kweni para tikuthemba mzimu utuŵa, tikupokera “nkhongono zakuluska zakawiro.” (2 Kor. 4:7, 8) Pasono Yehova wawuskengepo vyenjezgo yayi, kweni wali kulayizga kuti kwizira mu mzimu wake watipenge nkhongono zakuzizipizgira.—Fil. 4:13.
13. (a) Kasi muwukirano munyake wakusanga wuli nkhongono zakuzizipizgira masuzgo? (b) Kasi mukumanyapo waliyose uyo wali na masuzgo ghakuyana waka?
13 Wonani ivyo vikacitikira Stephanie wa vilimika 19, uyo ni mupayiniya wanyengozose. Apo wakaŵa na vilimika 12 wakalwara sitiroku kweniso ŵakamusanga na suzgo linyake mu wongo. Ŵakamucitapo opareshoni kaŵiri, ndipo sitiroku yikamuweleraso kaŵiri. Ivi vikacitiska kuti viŵaro vya kumazere vileke kugwira nchito makora, ndiposo kuti wasuzgikenge pakulaŵiska. Nangauli Stephanie wali na suzgo, kweni wakucita vinthu vyakuzirwa. Wakuluta ku maungano gha mpingo ndiposo mu uteŵeti wa m’munda. Ndipo wakuwona kuti woko la Yehova likumovwira kuzizipizga. Kanandi wakukhozgeka para wakuŵazga mabuku ghakulongosora Baibolo agho ghakuŵa na nkhani za Ŵakhristu ŵanyake awo nawo ŵakusuzgika. Ŵabali na ŵadumbu ŵakumukhozga kwizira mu makalata, ndiposo kuyowoya nayo pambere maungano ghandambe panji para ghamara. Ŵanthu ŵakunweka nawo ŵakuwonga ivyo Stephanie wakuŵasambizga ndipo ŵakwiza ku nyumba kwake kuti waŵasambizgenge Baibolo. Stephanie wakuwonga comene Yehova, ndipo wakutemwa lemba la Salmo 41:3 ilo wakuwona kuti likufiskika pa iyo.
14. Kasi tileke kucita vici para tagongoweskeka, ndipo cifukwa wuli?
14 Para tavuka panji para tazingiziwa tileke kughanaghana kuti vinthu vingaŵako makora usange tingaleka kucita vinthu vinyake vyauzimu. Para tingacita nthena vinthu vikuhenipirathu. Cifukwa nchakuti tikupokera mzimu utuŵa para tikusambira Baibolo patekha ndiposo na mbumba yithu, kupharazga, na para tikuwungana na mpingo. Milimo yauzimu yikupumuzga nyengo zose. (Ŵazgani Mateyu 11:28, 29.) Nangauli kanandi ŵabali na ŵadumbu ŵakwiza pa maungano ŵali na vyakulema, kweni para ŵakuwelera ku nyumba ŵakuŵa na nkhongono, mabatire ghawo ghauzimu ghakuŵa kuti ghachajika.
15. (a) Kasi kuŵa Mkhristu nchipusu? Longosorani ivyo Malemba ghakuyowoya. (b) Kasi Ciuta wakutilayizga vici, ndipo tikwenera kujifumba fumbo wuli?
15 Tileke kughanaghana kuti kuŵa Mkhristu nchipusu waka. Pakukhumbikwira citatata kuti munthu walutilire kuŵa Mkhristu wakugomezgeka. (Mat. 16:24-26; Luka 13:24) Ndipouli, kwizira mu mzimu wake utuŵa, Yehova wangaŵapa nkhongono awo ŵavuka. Nchimi Yesaya yikati: “Awo ŵakulindilira Yehova ndiwo tiŵapokeleso nkhongono ziphya, tiŵawuluke na mapapindo nga ndi nombo, tiŵachamare, ndipo kuti ŵamkuvuka cara, tiŵendeŵendenge pasi kwambura kulopwa nkhongono.” (Yes. 40:29-31) Ntheura, tingacita makora kujifumba kuti, Nchivici comene cikucitiska kuti tiwonenge milimo yauzimu kuŵa yakuvuska?
16. Kasi tingacita wuli kuti tileke kutangwanika na vinthu vinyake ivyo vikutivuska panji kutigongoweska?
16 Mazgu gha Yehova ghakuticiska kuti ‘tisandenge ivyo ni vinthu vyakuzirwa comene.’ (Fil. 1:10) Mpositole Paulosi wakayaniska Ŵakhristu na ŵanthu awo ŵakucita ciphalizgano ca kucimbira mtunda utali. Wakati: “Tiyeni tiwuskeko uzito uliwose . . . ndipo ticimbire na cizizipizgo ciphalizgano ico caŵikika panthazi pithu.” (Heb. 12:1) Fundo yake apa njakuti tileke kutangwanika na vinthu vyambura kwenelera ivyo vingativuska pawaka. Mutepanji taŵanji tikuyezga kusazgirapo nthangwanika uku tili ŵakutangwanika kale. Usange kanandi mukuwona kuti mukuvuka panji kuzingiziwa, mungacita makora kusanda nyengo iyo mukumalira pa kugwira nchito, kukatembeya, maseŵero, ndiposo vinthu vinyake vyakusanguluska. Para tikucita vinthu mwavinjeru, ciŵenge cipusu kumanya ivyo tingatondeka, kweniso titangwanikenge yayi na vinthu vyambura kwenelera.
17. Cifukwa wuli ŵanji ŵangagongowa, kweni Yehova wakutisimikizgira vici?
17 Ŵanji ŵangaŵa kuti ŵakugongowa cifukwa ca kuwona kuti umaliro wa caru ciheni ici ukucedwa. (Zinth. 13:12) Kweni waliyose uyo wakuwona nthena, wangakhozgeka na mazgu agho ghali pa Habakuk 2:3 agho ghakuti: “Ciwonesko cicali kulindilira nyengo yake; cikupusumpha ku umaliro kuteta cara. Nanga ciziwulike, lindilira ici; citize nadi, kuti ciziwulike cara.” Yehova wakutisimikizgira kuti umaliro wa caru ciheni ici wizenge pa nyengo yake yakutemeka.
18. (a) Kasi ni malayizgo wuli agho ghakumukhozgani? (b) Kasi tizamusambiraci mu nkhani yakulondezgapo?
18 Ŵateŵeti wose ŵa Yehova ŵakulindilira zuŵa ilo vyakulema na kugongoweskeka vizamumalira, nyengo iyo ŵazamukondwa na ‘uphya wawo.’ (Job 33:25) Nanga ni sono, mzimu utuŵa ungatipa nkhongono apo tikufukafuka kucita milimo yauzimu. (2 Kor. 4:16; Efe. 3:16) Lekani kuzomerezga vyakulema kuti vimutondeskani kusanga vitumbiko vyamuyirayira. Viyezgo, vyakulema, ndiposo kugongowa, vyose vimalenge nakuti usange vyatondeka kumara sono vizamumara mu caru ciphya ca Ciuta. Mu nkhani yakulondezgapo, tizamusambira umo mzimu utuŵa ukovwilira Ŵakhristu kuti ŵazizipizge nthambuzgo, ŵakane para ŵakucicizgika kucita viheni, ndiposo kuzizipizga masuzgo ghanyake.
Kasi Mungazgora wuli?
• Kasi kuŵazga Baibolo kukutovwira wuli?
• Kasi lurombo na kulanguruka vikutovwira wuli?
• Kasi mungatonda wuli vinthu ivyo vingapangiska kuti mugongowe?
[Cithuzithuzi pa peji 24]
Maungano ghakutikhozga mwauzimu