Mzimu Utuŵa Ngwakukhumbikwa pa Umoyo Winu

APO Themba Davide likacita kwananga kukuru, likalomba mwakufumira pasi pa mtima kuti: “Lekani kundijowora kundifumya pamaso pinu, ndipo muleke kuwuskapo pa ine mzimu winu utuŵa.”—Salmo 51:11.

Kanandi Davide wakawonanga umo mzimu utuŵa ukagwiliranga nchito pa iyo. Apo wakaŵa muwukirano, ukamovwira kuti wathereske Goliyati, uyo wakaŵa msilikari wakofya. (1 Samuel 17:45-50) Ukamovwiraso kuti walembe masalmo ghanyake ghakunozga comene agho palije ghangayana nagho. Davide wakalongosora kuti: “Mzimu wa Yehova ukuyowoya mwa ine, mazgu ghake ghali pa lulimi lwane.”—2 Samuel 23:2.

Yesu Khristu nayo wakazomerezga kuti mzimu utuŵa ukaŵa pa Davide. Pa nyengo yinyake, Yesu wakaphalira ŵategherezgi ŵake kuti: “Mwa mzimu utuŵa, Davide iyomwene wakayowoya kuti, ‘Yehova wakati ku Fumu yane: “Khala ku woko lane lamalyero mpaka niŵike ŵalwani ŵako kusi ku malundi ghako.”’” (Mariko 12:36; Salmo 110:1) Yesu wakamanya kuti mzimu utuŵa ndiwo ukawovwira Davide apo wakalembanga masalmo. Kasi mzimu utuŵa nase ungatovwira?

“Lutilirani Kulomba, Ndipo Kupikenge kwa Imwe”

Mzimu utuŵa ungamovwirani kuti mulembe salmo yayi. Kweni namwe mungakumana na masuzgo ghakofya nga umo wakaŵira Goliyati kwa Davide. Mwaciyelezgero, ghanaghanirani za Isabel.a Mfumu wake wakamuleka na kutora kamwali kaphya. Wakamulekera ngongoli yikuru ndipo wakamovwiranga yayi kupwelelera ŵana ŵasungwana ŵaŵiri, awo ŵakababirana. Isabel wakati: ‘Vikaniŵinya comene, ndipo nkhajiwona nga ndine waka ciswaswa. Kweni kufuma apo mfumu wane wakanilekera, nkhuwona kuti mzimu utuŵa wa Ciuta wanovwira comene.’

Kasi Isabel wakalindizganga kuti wapokerenge mzimu utuŵa kwambura kucitapo kanthu? Yayi. Zuŵa lililose wakalombanga Ciuta kuti wamutumire mzimu wake. Isabel wakamanya kuti wakakhumbikwiranga nkhongono ya Ciuta kuti yimovwire kuŵa wacikanga, kupwelelera makora ŵana ŵake, kweniso kuti wajiwonenge kuti ngwakuzirwa. Wakalondezga mazgu gha Yesu agha: “Lutilirani kulomba, ndipo kupikenge kwa imwe; lutilirani kupenja, ndipo musangenge; lutilirani kukhung’uska, ndipo kumujulikiraninge.”—Mateyu 7:7.

Roberto nayo wakawona kuti wakakhumbikwiranga mzimu wa Ciuta kuti umovwire pa suzgo linyake. Wakakhweŵanga comene hona ndiposo camba. Wakalimbana na suzgo ili kwa vilimika viŵiri, ndipo cikaŵa cipusu yayi kulimazga. Yikaŵangapo nyengo apo wakatondekanga kujikora ndipo wakakhweŵangaso. Roberto wakulongosora kuti: “Ukusuzgika maghanoghano para waleka kumwa minkhwala yakuzweteska wongo. Zuŵa lililose ukuŵa na cilyokolyoko.”

Roberto wakuyowoyaso kuti: “Kweni nkhaŵikapo mtima kuti nisinthe umoyo wane mwakuti Ciuta wakondwenge na uteŵeti wane. Nkhayezganga kughanaghanira comene pa vinthu vya mu Baibolo. Zuŵa lililose, nkhalombanga kufumira pasi pa mtima, kupempha Ciuta kuti wanipe nkhongono yakuti nitozge umoyo wane. Nkhamanya kuti panekha ningafiska yayi. Nkhawona umo Yehova wakazgolera malurombo ghane, comenecomene para nkhukwenyelera cifukwa cakuti nakhweŵaposo. Nkhugomezga kuti nkhongono zikawelerangamo cifukwa ca mzimu utuŵa wa Ciuta, ndipo kwambura mzimu uwu mphanyi nkhamazga yayi suzgo lane.”—Ŵafilipi 4:6-8.

Kuwuluka na “Mapapindo nga ndi Nombo”

Nga ni Isabel na Roberto, Ŵakaboni ŵa Yehova ŵanandi ŵawovwirikapo na mzimu utuŵa. Nkhongono ya Yehova, iyo yikawovwira pa kulenga vinthu vyose, yingamovwirani usange mukukhumba. Ciuta ngwakukhumbisiska ndipo ngwakunweka kumupaniko mzimu wake usange mungalomba kufumira pasi pa mtima. Kweni kuti mupokere mzimu uwu, mukwenera kusambira unenesko wakukhwaskana na Ciuta na kuŵikapo mtima kucita khumbo lake.—Yesaya 55:6; Ŵahebere 11:6.

Mzimu utuŵa ungamupani nkhongono kuti muteŵetere makora Ciuta na kutonda masuzgo agho mungakumana nagho. Baibolo likutisimikizgira kuti: “[Yehova] wakupa nkhongono ŵakulopwa, ndipo ku mweneuyo walije mphavu wakumusazgirako. . . . Awo ŵakulindilira Yehova ndiwo tiŵapokereso nkhongono ziphya, tiŵawuluke na mapapindo nga ndi nombo, tiŵachamale, ndipo kuti ŵamkuvuka cara, tiŵendeŵendenge pasi kwambura kulopwa nkhongono.”—Yesaya 40:28-31.

[Mazgu ghamusi]

[Mazgu Ghakukhozgera pa peji 8]

‘Zuŵa lililose, nkhalombanga kufumira pasi pa mtima kuti Ciuta wanipe nkhongono. Nkhamanya kuti panekha ningafiska yayi. Nkhawona umo Yehova wakazgolera malurombo ghane’

[Bokosi/Cithuzithuzi pa peji 7]

IVYO MZIMU UTUŴA UKUCITA

Ciuta wakagwiliskira nchito mzimu utuŵa kuti walenge caru na vinthu vinyake vyose. Wamasalmo wakati: “A Yehova, nawo mbunandi wa nchito zinu! Muli kuzicita zose na vinjeru vinu; caru nchakuzura na vilengiwa vinu. Para mukutuma mzimu winu, vikulengeka.”—Salmo 104:24, 30; Genesis 1:2; Job 33:4.

Mzimu utuŵa ukakhuŵirizga ŵanalume ŵakopa Ciuta kuti ŵalembe Baibolo. Mpositole Paulosi wakalemba kuti: “Malemba ghose ngakupelekeka na Ciuta mwa mzimu ndipo ngacandulo.” (2 Timote 3:16) Mazgu gha Cigiriki agho ghali kung’anamulika kuti “ngakupelekeka na Ciuta” ghakung’anamura kuti ‘Ciuta ndiyo wakathutiramo.’ Mvuci panji mzimu wa Yehova ukalongozga awo ŵakalemba Baibolo kuti ŵalembe “mazgu gha Ciuta.”—1 Ŵatesalonika 2:13.

Mzimu utuŵa ukawovwira ŵateŵeti ŵa Ciuta kuti ŵacime vyamunthazi kwambura kubudiska. Mpositole Petrosi wakalongosora kuti: “Palije ucimi wa Lemba uwo ukufuma ku kang’anamuliro kanyake. Cifukwa nanga nkhamoza, ucimi undizepo na khumbo la munthu, kweni ŵanthu ŵakayowoyanga vyakufuma kwa Ciuta pakulongozgeka na mzimu utuŵa.”—2 Petrosi 1:20, 21; Joel 2:28.

Mzimu utuŵa ukawovwira Yesu na ŵanalume ŵanji kuti ŵapharazge makani ghawemi gha Ufumu wa Ciuta na kucita minthondwe. Yesu wakati: “Mzimu wa Yehova uli pa ine, cifukwa wali kuniphakazga kuti nipharazge makani ghawemi ku ŵakavu, wali kunituma kupharazga kufwatuka kwa ŵamikoli na kuwonaso kwa ŵacibulumutira.”—Luka 4:18; Mateyu 12:28.

[Bokosi/Cithuzithuzi pa peji 9]

UMO MZIMU UTUŴA UNGAMOVWILIRANI

Mzimu utuŵa ungamupani nkhongono kuti mulimbane na viyezgo na kumazga nkharo izo zingamupwetekeskani. Mpositole Paulosi wakati: “Ciuta ngwakugomezgeka, ndipo wazomerenge cara kuti imwe muyezgeke kujumpha ico mungazizipizga, kweni pamoza na ciyezgo wapelekengeso nthowa yakufumiramo mwakuti mumanye kucizizipizga.”—1 Ŵakorinte 10:13.

Mzimu utuŵa ungamovwirani kuti muŵe na mikhaliro yakukondweska Ciuta. “Vipambi vya mzimu nchitemwa, cimwemwe, mtende, kukhomezga, lusungu, uwemi, cipulikano, kuzika na kujikora.”—Ŵagalatiya 5:22, 23.

Mzimu utuŵa ungamovwirani kuti muzizipizge viyezgo. “Mu vinthu vyose, nili na nkhongono mwa uyo wakunipa nkhongono.”—Ŵafilipi 4:13.