Mafumbo Ghakufumira ku Ŵaŵazgi

Cifukwa wuli Mozesi wakakwiyira Eliyazara na Itamara ŵana ŵa Aroni pamanyuma pa nyifwa ya ŵakuru ŵawo Nadabu na Abihu, ndipo wakatuna wuli?—Lev. 10:16-20.

Ŵana ŵa Aroni ŵakati ŵamba waka mulimo wa usofi pa cihema cakukumanamo, Yehova wakakoma Nadabu na Abihu cifukwa cakuti ŵakapeleka moto wambura kuzomerezgeka. (Lev. 10:1, 2) Mozesi wakaphalira ŵana ŵa Aroni awo ŵakapona kuti ŵaleke kulira nyifwa ya ŵakuru ŵawo. Pakati pajumpha nyengo yicoko waka, Mozesi wakakalipira Eliyazara na Itamara, cifukwa ŵakaryako yayi mbuzi ya sembe ya kwananga. (Lev. 9:3) Cifukwa wuli Mozesi wakacita nthena?

Malango agho Yehova wakapeleka kwa Mozesi ghakatenge musofi uyo wapeleka sembe ya kwananga wakeneranga kuryako sembe iyi mukati mu cihema cakukumanamo. Kucita nthena kukalongoranga kuti wayegha kwananga kwa awo ŵapeleka sembe. Kweni usange ndopa zinyake za sembe iyi zatolekera mu Malo Ghakupatulika, ŵakeneranga yayi kuryako. M’malo mwake, ŵakeneranga kuwocha.—Lev. 6:24-26, 30.

Vikuwoneka kuti pamanyuma pa soka ilo likacitika, Mozesi wakakhumbanga kuti malango ghose gha Yehova ghalondezgeke. Wakati wawona kuti mbuzi ya sembe ya kwananga yawocheka, wakakalipa ndipo wakafumba Eliyazara na Itamara kuti ŵalongosore cifukwa ico ŵalekera kuryako, pakuti ndopa za sembe iyi zikatolekera mu Malo Ghakupatulika yayi.—Lev. 10:17, 18.

Aroni ndiyo wakazgora Mozesi cifukwa ndiyo wakakanizga ŵasofi aŵa kuti ŵaleke kuryako. Pakughanaghanira nyifwa ya ŵana ŵake ŵaŵiri, Aroni wakakayikiranga usange pa zuŵa ili musofi waliyose wangaryako na njuŵi yiwemi sembe ya kwananga. Mutepanji wakaghanaghananga kuti Yehova wakondwenge yayi usange ŵangaryako sembe iyi, nangauli kwananga kwa Nadabu na Abihu kukaŵakhwaska yayi.—Lev. 10:19.

Pa zuŵa lakwamba ilo ŵana ŵake ŵakambiranga mulimo wa usofi, Aroni wakakhumbikwiranga kuwoneseska kuti ŵakondweske Ciuta mwa kulondezga dango lililose. Kweni Nadabu na Abihu ŵakafipiska zina la Ciuta, ndipo ukali wake ukagolera pa iwo. Ntheura, Aroni panji wakaghanaghananga kuti mbumba ya usofi iyo mwacitika kwananga uku njakwenelera yayi kuryako sembe yakupatulika.

Mozesi wakwenera kuti wakakhorwa na zgoro la mukuru wake, pakuti nkhani iyi yikumara na mazgu ghakuti: “Wakati wapulika ici Mozesi, cikamuŵira ciwemi mu mtima wake.” (Lev. 10:20) Nchakuwonekerathu kuti Yehova nayo wakakhorwa na zgoro la Aroni.