Temwani Urunji na Mtima Winu Wose
“Watemwa urunji.”—SAL. 45:6.
1. Nchivici cingatovwira kuti tilutilire kwenda mu “nthowa za urunji”?
KWIZIRA mu Mazgu ghake na mzimu wake utuŵa, Yehova wakulongozga ŵanthu ŵake mu “nthowa za urunji.” (Sal. 23:3) Kweni pakuti tili ŵambura kufikapo, nyengo zinyake tikupatuka mu nthowa iyi. Tikwenera kufwilirapo kuti tambeso kucita ico nchakwenelera. Kasi nchivici cingatovwira? Nga ni Yesu, nase tikwenera kutemwa urunji.—Ŵazgani Salmo 45:6.
2. Kasi “nthowa za urunji” ni vici?
2 Kasi “nthowa za urunji” ni vici? “Nthowa” izo zikuyowoyeka apa ni malango ghaurunji gha Yehova agho munthu wakwenera kulondezga. Mu Cihebere na Cigiriki, lizgu lakuti “urunji” likuyowoya za cinthu ico “nchakunyoloka.” Lizgu ili likulongora kuti pakukhumbikwira kudemelera ku fundo izo ni ziwemi. Pakuti ‘urunji ni lufura lwa citengo ca Yehova,’ ŵateŵeti ŵake ŵakuthemba iyo kuti waŵalongozge mu nthowa ya kunyoloka.—Sal. 89:14.
3. Kasi tingawumanya wuli urunji wa Ciuta?
3 Ciuta tingamukondweska pekha para tikuyezgayezga kulondezga fundo zake za urunji na mtima withu wose. (Dute. 32:4) Kuti ticite nthena tikwenera kusambira vyakukhwaskana na Yehova Ciuta kufuma mu Mazgu ghake, Baibolo. Para tikusambira vinandi vya Yehova na kusendelera kwa iyo zuŵa lililose, titemwenge comene urunji wake. (Yak. 4:8) Tikweneraso kulongozgeka na Mazgu gha Ciuta para tikusankha vinthu vyakuzirwa pa umoyo withu.
Penjani Urunji wa Ciuta
4. Kasi nchivici cikukhumbikwa pa kupenja urunji wa Ciuta?
4 Ŵazgani Mateyu 6:33. Pali vinandi ivyo vikukhumbikwa kuti tipenje urunji wa Ciuta padera pa kupharazga makani ghawemi gha Ufumu. Kuti uteŵeti withu uŵe wakuzomerezgeka na Yehova, zuŵa na zuŵa umoyo withu ukwenera kukolerana na malango ghake. Kasi wose awo ŵakupenja urunji wa Yehova ŵakwenera kucitaci? Ŵakwenera kuvwara “wunthu uphya uwo ukalengeka mwakuyana na khumbo la Ciuta, mu urunji weneco na kugomezgeka.”—Efe. 4:24.
5. Nchivici cingatovwira kuti tileke kugongoweskeka?
5 Apo tikuyezgayezga kulondezga fundo za urunji za Ciuta, nyengo zinyake tingagongoweskeka cifukwa ca maubudi ghithu. Kasi nchivici cingatovwira kuti tileke kugongoweskeka, ndiposo kuti tambe kutemwa urunji? (Zinth. 24:10) Nyengo zose tikwenera kulomba kwa Yehova na “mitima yaunenesko na kukhorwa nkhanira mu cipulikano.” (Heb. 10:19-22) Kwali ndise Ŵakhristu ŵakuphakazgika panji tikulindilira kuzakakhala pa caru capasi, tose tili na cipulikano mu sembe yakuwombora ya Yesu Khristu uyoso ni Musofi withu Mukuru. (Rom. 5:8; Heb. 4:14-16) Magazini yakwamba ya Gongwe la Mulinda yikalongosora kuzirwa kwa ndopa za Yesu izo zikathiskika. (1 Yoh. 1:6, 7) Yikati: “Fundo njakuti usange cinthu cichesamu ukucilaŵiskira pa gilasi liswesi ku ungweru, cikuwoneka cituŵa. Ntheura pera, nanga zakwananga zithu zingaŵa zichesamu wuli, kweni para Ciuta wakuziwona mu ndopa za Khristu, zikuwoneka zituŵa.” (Julayi 1879, peji 6) Yehova waticitira cinthu capadera comene kwizira mu sembe yakuwombora ya Mwana wake wakutemweka.—Yes. 1:18.
Vwarani Vyankhondo Vyauzimu
6. Cifukwa wuli tikwenera kuwoneseska kuti tavwara vyankhondo vyauzimu?
6 Nyengo zose tikwenera kuvwara “ngunya ya pa cifuŵa ya urunji,” cifukwa njakuzirwa comene pa vyankhondo vyauzimu vyakufuma kwa Ciuta. (Efe. 6:11, 14) Kwali tajipatulira sonosono kwa Yehova, panji tikajipatulira ni kale, nchakuzirwa kuti zuŵa lililose tiwoneseskenge kuti tavwara vyankhondo vyauzimu. Cifukwa wuli? Cifukwa Dyabulosi na viŵanda vyake ŵali kuponyeka pa caru capasi. (Uvu. 12:7-12) Satana ni mukali comene ndipo wakumanya kuti nyengo yake njicoko. Lekani wawukira comene ŵanthu ŵa Ciuta. Kasi tikuwona kuzirwa kwa kuvwara “ngunya ya pa cifuŵa ya urunji”?
7. Kasi ticitenge wuli para tikumanya kuzirwa kwa “ngunya ya pa cifuŵa ya urunji”?
7 Ngunya ya pa cifuŵa yikuvikilira mtima. Cifukwa cakuti tili ŵambura kufikapo, nyengo zinyake mtima withu ukutipusika kweniso ukuŵa uheni. (Yer. 17:9) Mtima withu ukukhumba kucita vinthu viheni, ntheura nchakuzirwa kuti tiwusambizgenge. (Gen. 8:21) Para tikumanya kuzirwa kwa “ngunya ya pa cifuŵa ya urunji,” palije nyengo iyo tizamuyivura dankha mwa kucita vyakusanguluska ivyo Ciuta wakutinkha, nesi kudokera kucita vinthu viheni. Nyengo yithu yinandi yimalirenge waka pa kuwonelera TV yayi. M’malo mwake, tiyezgeyezgenge kucita vinthu ivyo vikukondweska Yehova. Nanga ni para tingakhuŵara kwa kanyengo kacoko waka, Yehova watovwirenge kuti tiwuke.—Ŵazgani Zintharika 24:16.
8. Cifukwa wuli tikukhumbikwira “ciskango cikuru ca cipulikano”?
8 Pa vyankhondo vithu vyauzimu paliso “ciskango cikuru ca cipulikano.” Ciskango ici cikutovwira “kuzimyira mivwi yose yakugolera ya muheni.” (Efe. 6:16) Cipulikano ndiposo kutemwa Yehova na mtima wose, vikutovwira kuti ticitenge urunji ndiposo kukhalilira mu nthowa yakuya ku umoyo wamuyirayira. Apo tikusambira vinandi vyakukhwaskana na Yehova, tiwonengeso kuti urunji wake ngwakuzirwa comene. Kweni wuli pakuyowoya za njuŵi yithu? Kasi yikutovwira wuli apo tikuyezgayezga kutemwa urunji?
Sungilirani Njuŵi Yiwemi
9. Kasi tikwandula wuli para tikusungilira njuŵi yiwemi?
9 Apo tikabapatizikanga tikalomba Yehova kuti watipe “njuŵi yiwemi.” (1 Pet. 3:21) Cifukwa cakuti tili na cipulikano mu sembe yakuwombora, ndopa za Yesu zikubenekelera zakwananga zithu, ndipo tikuŵa ŵakutowa pamaso pa Ciuta. Kweni kuti tilutilire kuŵa ŵatuŵa pamaso pa Ciuta, tikwenera kusungilira njuŵi yiwemi. Usange nyengo zinyake njuŵi yithu yikutisuska panji kuticenjezga, tikwenera kuwonga kuti yikugwira nchito makora. Ivi vikulongora kuti njuŵi yithu yindakulungare, yicali kuwona kuti nthowa za urunji za Yehova ni zakuzirwa. (1 Tim. 4:2) Kweni njuŵi yingawovwiraso mwapadera awo ŵakukhumba kutemwa urunji.
10, 11. (a) Yowoyani ciyelezgero ico cikulongora kuti tikwenera kupulikira njuŵi yithu yakusambizgika Baibolo. (b) Cifukwa wuli tingati kutemwa urunji kutovwirenge kuti tiŵe ŵakukondwa comene?
10 Para tacita cinthu ciheni, njuŵi yithu yingatisuska panji kutiyuzga. Muwukirano munyake wakapatuka pa “nthowa za urunji.” Wakatemwanga kulaŵilira vithuzithuzi vyamuziro ndipo wakamba kukhweŵa camba. Njuŵi yikamusuzganga para waluta ku maungano ndipo wakajiwonanga kuti ni mupusikizgi para wakupharazga, ntheura wakaleka kucita milimo yauzimu iyi. Iyo wakati: “Kweni nkhamanyanga yayi kuti njuŵi yinisuzgenge comene cifukwa ca ivyo nkhacitanga.” Wakatiso: “Nkhacita vinthu vyaucindere ivi kwa vilimika vinayi.” Pamanyuma wakaghanaghana za kuwelera mu unenesko. Nangauli wakawonanga kuti Yehova wangapulika yayi lurombo lwake, kweni wakalomba nipera na kupempha cigowokero. Pakati pajumpha maminiti ghacoko waka anyina ŵakiza na kumuciska kuti wambeso kuluta ku maungano. Wakaluta ku Nyumba ya Ufumu, ndipo wakapempha mulara kuti wambe kusambira nayo. Pamasinda wakabapatizika, ndipo wakuwonga comene Yehova kuti wali kumuponoska.
11 Kasi tawona candulo ico tingasanga para tikucita ico nchakwenelera? Para tikutemwa urunji, tiŵenge ŵakukondwa comene pa kucita ivyo vikukondweska Ŵadada withu ŵa kucanya. Wonani kuti zuŵa likwiza ilo ŵanthu wose ŵazamuŵa ŵakukondwa na njuŵi zawo, ndipo ŵazamulongora kuti ŵali kulengeka nadi mu cikozgo ca Ciuta. Ntheura, tiyeni titemwenge urunji kufumira pasi pa mtima withu mwakuti tikondweske Yehova.—Zinth. 23:15, 16.
12, 13. Kasi tingasambizga wuli njuŵi yithu?
12 Kasi tingacita vici kuti tisambizge njuŵi yithu? Para tikuŵazga Baibolo ndiposo mabuku ghithu agho ghakulongosora Baibolo, nchiwemi kukumbuka kuti, “mtima wa murunji [ukughanaghana] makora mazgolero.” (Zinth. 15:28) Wonani umo fundo iyi yingatovwilira para tili na mafumbo ghakukhwaskana na nchito iyo tingagwira. Usange nchito yinyake yikuwonekerathu kuti yikukolerana yayi na ivyo Malemba ghakuyowoya, mwaluŵiro taŵanandi tikulondezga ulongozgi wa muzga wakugomezgeka na wakucenjera. Kweni para tikumanya makora yayi usange nchito iyo tingagwira njakwenelera, tikwenera kusanda na kughanaghanira fundo za mu Baibolo ndiposo kulomba.a Tikwenera kukumbukaso fundo yakuti tileke kukhuŵazga njuŵi za ŵanji. (1 Kor. 10:31-33) Kweni tikwenera kughanaghanira comene fundo izo zikukhwaska ubwezi withu na Ciuta. Usange tikutemwa nadi Yehova, cakwamba tijifumbenge kuti, ‘Kasi para ningagwira nchito iyi, nikwenyerezgenge Yehova panji kumutoposka moyo?’—Sal. 78:40, 41.
13 Para tikunozgekera Sambiro la Gongwe la Mulinda panji Sambiro la Baibolo la Mpingo, tikwenera kughanaghanirapo pa ivyo tikuŵazga. Kasi nyengo zose tikucimbilira waka kugwara mzere apo pali zgoro na kuluta pa ndime yinyake? Kunozgekera kwa nthena kungatovwira yayi kuti titemwenge urunji panji kuŵa na njuŵi iyo yikugwira nchito makora. Usange tikukhumba kutemwa urunji, tikwenera kulimbikira kusambira na kughanaghanirapo pa ivyo tikuŵazga mu Mazgu gha Ciuta. Iyi ni nthowa yekha iyo yingatovwira kuti titemwenge urunji na mtima withu wose.
Kuŵa na Njara Ndiposo Nyota ya Urunji
14. Kasi Yehova Ciuta na Yesu Khristu ŵakukhumba kuti tijipulikenge wuli para tikucita uteŵeti ŵithu wakupatulika?
14 Yehova Ciuta na Yesu Khristu ŵakukhumba kuti ticitenge uteŵeti wakupatulika mwakukondwa. Kasi nchivici citovwirenge kuti tiŵe ŵakukondwa? Kutemwa urunji. Pa Upharazgi wa pa Lupiri, Yesu wakati: “Mbakukondwa awo ŵakupulika njara na nyota ya urunji, pakuti ŵazamukhuta.” (Mat. 5:6) Kasi mazgu agha ngacandulo wuli kwa awo ŵali na nyota ya urunji?
15, 16. Kasi njara na nyota yauzimu vimalenge wuli?
15 Tikukhala mu caru ico cikuwusika na muheni. (1 Yoh. 5:19) Kanandi para tikuŵazga nyuzipepara, tikuwona nkhani zinandi zakukhwaskana na nkhaza ndiposo vivulupi. Ŵanthu ŵarunji ŵakusuzgika maghanoghano para ŵakuwona nkhaza izo zikucitika. (Muph. 8:9) Pakuti tikutemwa Yehova, tikumanya kuti ndiyo pera uyo wangakhutiska mwauzimu awo ŵakukhumba kumanya urunji. Sonosono apa, ŵanthu ŵambura kopa Ciuta ŵaparanyikenge, ndipo awo ŵakutemwa urunji ŵazamukweŵekaso yayi na vyakucita vya ŵacikanamalango. (2 Pet. 2:7, 8) Tizamuwombokwa nadi.
16 Pakuŵa ŵateŵeti ŵa Yehova ndiposo ŵalondezgi ŵa Yesu Khristu, tikumanya kuti wose awo ŵakupulika njara na nyota ya urunji ‘ŵazamukhuta.’ Ŵazamukhorwa comene na macanya ghaphya na caru capasi ciphya umo “muzamukhala urunji.” (2 Pet. 3:13) Ntheura, tiyeni tileke kutaya mtima panji kuzukuma cifukwa cakuti vinthu vyambura urunji ndiposo nkhaza vyatora malo mu caru ca Satana ici. (Muph. 5:8) Yehova, uyo Ngwapacanya Nkhanira wakumanya ivyo vikucitika ndipo sonosono apa wazamuponoska wose awo ŵakutemwa urunji.
Vyandulo vya Kutemwa Urunji
17. Kasi ni vyandulo wuli vinyake ivyo tikusanga cifukwa ca kutemwa urunji?
17 Lemba la Salmo 146:8 likulongosora candulo cikuru ico tikusanga para tikwenda mu nthowa ya urunji. Likuti: ‘Yehova wakutemwa ŵarunji.’ Wonani kuti Fumu ya cilengiwa cose yikutitemwa cifukwa cakuti tikutemwa urunji. Pakuti Yehova wakutitemwa, tikugomezga kuti watipenge ivyo tikusoŵerwa mwakuthupi para tikuŵika vinthu vya Ufumu pakwamba. (Ŵazgani Salmo 37:25; Zintharika 10:13.) Paumaliro caru cose ca pasi cizamuŵa na ŵanthu awo ŵakutemwa urunji. (Zinth. 13:22) Umoyo wamuyirayira mu paradiso ni njombe iyo ŵanthu ŵa Ciuta ŵanandi ŵazamupokera cifukwa ca kutemwa urunji. Nanga ni sono awo ŵakutemwa urunji wa Ciuta ŵakutumbikika na mtende wa mu mtima uwo ukovwira kuti ŵaŵe ŵakukolerana mu mbumba zawo ndiposo mu mipingo.—Fil. 4:6, 7.
18. Kasi tikwenera kulutilira kucita vici apo tikulindilira zuŵa la Yehova?
18 Apo tikulindilira zuŵa likuru la Yehova, tikwenera kulutilira kupenja urunji wake. (Zef. 2:2, 3) Ntheura, tiyeni tilongore kuti tikutemwa nadi nthowa zakunyoloka za Yehova Ciuta. Tingacita nthena usange tikuleka kuvura “ngunya ya pa cifuŵa ya urunji” iyo yikuvikilira mtima withu. Kweniso tikwenera kusungilira njuŵi yiwemi, iyo yitovwirenge kuŵa ŵacimwemwe ndiposo kukondweska mtima wa Ciuta withu.—Zinth. 27:11.
19. Kasi tikwenera kusimikizga kucitaci, ndipo tizamudumbiskana vici mu nkhani yakulondezgapo?
19 Baibolo likuti: “Maso gha Yehova ghakulaŵiska uku na uko mu caru cose ca pasi, kujiwonya nkhongono kovwira awo mitima yawo njakufikapo pamaso pake.” (2 Mid. 16:9) Mazgu agha ghakutipembuzga comene apo tikucita ico nchakwenelera nangauli tikukhala mu caru ca masuzgo umo mukucitika nkhaza, vivulupi, na vinthu vinyake viheni. Ŵanthu ŵanandi awo ŵali kutali na Ciuta, ŵangazizikika para tikwenda mu nthowa za urunji. Kweni tikwandula ndise para tikudemelera ku urunji wa Yehova. (Yes. 48:17; 1 Pet. 4:4) Ntheura, tiyeni tiŵikepo mtima kuti tilutilire kutemwa urunji na mtima withu wose. Kweni kutemwa urunji na mtima wose kukusazgapo kutinkha ucikanamalango. Nkhani yakulondezgapo yizamulongosora ng’anamuro la fundo iyi.
[Mazgu ghamusi]
a Kuti mumanye vinandi pa fundo za mu Baibolo zakukhwaskana na nchito, wonani Gongwe la Mulinda la Ciceŵa la Epulero 15, 1999, peji 28-30.
Kasi Mungazgora Wuli?
• Cifukwa wuli tikwenera kumanya kuzirwa kwa sembe yakuwombora kuti titemwe urunji?
• Cifukwa wuli nchakuzirwa kuvwara “ngunya ya pa cifuŵa ya urunji”?
• Kasi tingasambizga wuli njuŵi yithu?
[Cithuzithuzi pa peji 26]
Njuŵi yithu yakusambizgika makora yikutovwira para tili na mafumbo ghakukhwaskana na nchito iyo tingagwira