Kasi Mukusanga Cimwemwe Nadi mu Mazgu gha Ciuta?
LORRAINE wakati: “Apo nkhambanga kuŵazga Baibolo mwakukhazikika, nkhakondwanga nalo yayi, ndipo nkhawonanga nga ni mulimo wakuvuska comene. Cikaŵa cakusuzga kulipulikiska, ntheura kanandi nkhaŵikangapo mtima yayi.”
Ŵanji nawo ŵakuzomerezga kuti apo ŵakambanga kuŵazga Baibolo, ŵakakondwanga nalo yayi. Kweni ŵakaleka yayi cifukwa ŵakamanyanga kuti kuŵazga Baibolo nkhwakuzirwa. Marc wakati: “Pa nyengo ya kuŵazga Baibolo panji sambiro la wamwene, nchipusu kutimbanizgika na vinthu vinyake. Kulomba ndiposo citatata vikanovwira kuti niŵe na cizgoŵi ca kuŵazga Baibolo zuŵa lililose.”
Kasi mungacita wuli kuti munwekenge comene na Mazgu gha Ciuta, Baibolo? Kasi mungacita wuli kuti mukondwenge para mukuliŵazga? Wonani masacizgo agha.
Vilato Ndiposo Umo Mungacitira
Pambere mundambe kuŵazga Baibolo, lombani ndipo ŵikani mtima pa ivyo muŵazgenge. Lombani Yehova kuti wamovwirani kuŵa na mtima wakukhumbisiska kusambira Mazgu ghake. Muŵeyelerani kuti wajure maghanoghano na mtima winu mwakuti mupulikiske vinjeru vyake. (Sal. 119:34) Para mukuleka kulomba mbwenu muŵazgenge Baibolo mwadango waka, ndipo mungalutilira yayi kuŵa na khumbo la kusambira. Lynn wakati: “Nyengo zinyake nkhuŵazga mwakucimbilira ndipo nkhutondeka kusanga fundo zakukondweska. Kanandi fundo zikuru nkhuzipulikiska viŵi yayi. Kweni nkhulomba kuti nijikorenge, ndipo kucita nthena kukovwira kuti maghanoghano ghane ghaleke kwendendeka.”
Zirwiskani ivyo mukusambira. Kumbukani kuti umoyo winu ukuthemba pa kupulikiska na kulondezga ivyo mukusambira mu Baibolo. Ntheura, ŵikanipo mtima kuti pakuŵazga musangenge fundo izo zingamovwirani ndipo muzilondezgenge. Chris wakati: “Nkhupenjerezga fundo izo zinganovwira kuŵanika maghanoghano ghaheni na vilato viheni. Nkhukhozgeka comene na Baibolo ndiposo mabuku ghithu cifukwa muli fundo izo zikunovwira, ndipo fundo izi zikuŵa nga ŵalembera waka ine.”
Jiŵikirani vilato vyakuti mungafiska. Muŵe na cilato ca kusanga fundo yiphya yakukhwaskana na ŵanthu awo wakuzunulika mu Baibolo. Kuti mumanye fundo zinandi zakukhwaskana na ŵanji mwa ŵanthu aŵa, wonani buku la Insight on the Scriptures panji Watch Tower Publications Index. Musangenge candulo comene para mukusanda umoyo wa ŵanalume na ŵanakazi awo ŵakuzunulika mu Baibolo.
Penjani nthowa ziphya zakudumbiskirana Malemba. (Mil. 17:2, 3) Ndivyo Sofiya wakucita. Iyo wakati: “Khumbo lane ndakuti nisambire nthowa ziphya zakudumbiskirana na ŵanthu mu uteŵeti, mwakuti nilongosorenge mwakupulikikwa unenesko wa mu Baibolo. Gongwe la Mulinda likunovwira kufiska cilato ici.”—2 Tim. 2:15.
Ŵani na cithuzithuzi ca nkhani ya mu Baibolo iyo mukuŵazga. Lemba la Ŵahebere 4:12 likuti: “Mazgu gha Ciuta ngamoyo.” Apo mukuŵazga Malemba, zomerani kuti uthenga wa Ciuta ukhazikike mu maghanoghano ghinu mwa kughanaghanira ivyo awo ŵakuzunulika mu Baibolo ŵakawonanga. Ŵani nga mukupulika ivyo iwo ŵakapulikanga ndiposo umo ŵakakhwaskikiranga. Jitorani kuti vinthu vinyake ivyo vikacitikiranga ŵanthu aŵa namwe vikumucitikirani. Sambirani kucita vinthu nga umo iwo ŵakacitiranga. Kucita nthena kumovwiraninge kupulikiska na kusungilira ivyo Baibolo likuyowoya.
Patulani nyengo yakusandira malemba ghakusuzga na kuwona umo ghakulongosolekera. Nyengo zose muŵenge na nyengo yakukwana yakusambilira. Pa nyengo iyi mungasangaso mafumbo ghanyake ghakukondweska agho ghangakhumbikwira kuti mughasande makora. Sandani mazgu ghacilendo, wonani mazgu ghamusi, ndipo wonani fundo zinyake zakuyanako na mazgu agho. Para mukupulikiska makora na kulondezga ivyo mukuŵazga, mbwenu muzamukondwa comene na Mazgu gha Ciuta. Namwe mungayowoya nga umo wakayowoyera wamasalimo kuti: “Visimikizgo vinu [Yehova] vili nga ndi ciharo cane muyirayira; enya, ndivyo cikondwero ca mtima wane.”—Sal. 119:111.
Lekani kuŵazga mwakucimbilira. Mukwenera kugaŵa mwamahara nyengo iyo mukucitira sambiro la mwaŵene. Woneseskani kuti mukunozgekera maungano gha mpingo. Raquel wakati: “Nyengo zinandi nkhuŵa wakwenjerwa comene mwakuti nkhutondeka kuŵika mtima pa ivyo nkhuŵazga. Ntheura, nkhuwona kuti kusambira nyengo yicoko kukunovwira. Para nkhucita nthena nkhusanga candulo comene na ivyo nkhusambira.” Chris nayo wakati: “Para nkhuŵazga mwakucimbilira, njuŵi yane yikunisuska cifukwa nkhukumbuka vinandi yayi. Nkhani iyo nkhuŵazga yikunifika pa mtima yayi.” Ntheura, ŵani na nyengo yakukwana.
Nwekerani Mazgu gha Ciuta. Petrosi wakati: “Nga mbabonda ŵakubabika sono, nwekerani mkaka wanadi wa mazgu, mwakuti kwizira mu mkaka uwu, mukure kufika ku ciponosko.” (1 Pet. 2:2) Mwakawiro, ŵabonda ŵakunwekera kale mkaka. Ŵakuŵa na cilyokolyoko cakawiro. Kweni pakuyowoya za mazgu gha Ciuta, Baibolo likuticiska kuti tighanwekerenge. Usange mukuŵazga peji limoza la mu Baibolo zuŵa lililose mbwenu mughanwekerenge mazgu gha Ciuta. Mwaluŵiro, mwambenge kukondwa na mazgu gha Ciuta nangauli pakwamba mukaghawonanga nga nganonono.
Langulukani pa nkhani iyo mukuŵazga. Mungasangaso candulo cikuru para mukulanguruka pa ivyo mukuŵazga. Kucita nthena kumovwiraninge kuti muwone kukolerana kwa nkhani izo mwasambira. Muzamusanga vinjeru vyauzimu, ivyo ni thumbiko lapadera comene.—Sal. 19:14; Zinth. 3:3.
Citani Mwamahara na Nyengo
Kuti munthu walutilire kusambira wakukhumbikwira kufwilirapo, kweni paumaliro wakusanga vitumbiko vyambura mapendeko. Para mucitenge nthena mbwenu mughapulikiskenge makora Malemba. (Heb. 5:12-14) Umanyi na vinjeru ivyo mukusanga mu Malemba vimovwiraninge kuŵa na cimwemwe ndiposo mtende. Vinjeru ivyo vikusangika mu Mazgu gha Ciuta ni “khuni la umoyo” kwa awo wakuvikoleska na kuvigwiliskira nchito.—Zinth. 3:13-18.
Kusambira comene Mazgu gha Ciuta kungamovwirani kuti muŵe na mtima wakupulikiska. (Zinth. 15:14) Ici cimovwiraninge kuti mupelekenge ulongozgi wakucontha mtima uwo ngwakujintha mu Baibolo. Usange mukusankha vinthu mwakukolerana na Malemba ndiposo ulongozgi uwo uli mu mabuku gha “muzga wakugomezgeka na wakucenjera,” muŵenge na mtende wa mu mtima. (Mat. 24:45) Vinthu vimwenderaninge makora, muŵenge na cigomezgo ciwemi ca munthazi, ndipo ivyo muyowoyenge na kucita vilongozgekenge na Mazgu gha Yehova. Kweniso ubwezi winu na Yehova uŵenge wakukhora.—Sal. 1:2, 3.
Kutemwa Ciuta kumuciskaninge kuti mupharazgenge. Nakuti para mukucita nthena musangenge njombe yikuru. Sofiya wakuŵikapo mtima kuti wakumbukirenge Malemba na kughagwiliskira nchito kuti wovwire awo wakuŵapharazgira, ndiposo kuti wasangenge candulo na uteŵeti. Iyo wakati: “Nkhuŵa wakukondwa comene para nkhuwona umo ŵanthu ŵakucitira na mazgu gha mu Baibolo.”
Tili paubwezi na Yehova cifukwa cakuti tikusangwa na mazgu ghake ndipo ici nchandulo cikuru comene. Kusambira Baibolo kutovwirenge kuti timanye vipimo vya Yehova na kupulikiska makora citemwa cake, wanangwa wake, ndiposo urunji wake. Padera pa kusambira Baibolo, palije cinyake ico cingatovwira kuti tisange vitumbiko vyanthena. Ntheura, jipelekani na mtima wose pakuŵazga Mazgu gha Ciuta. Para mukucita nthena, ndikuti nyengo mukuyigwiliskira nchito mwamahara.—Sal. 19:7-11.
[Bokosi/Cithuzithuzi pa peji 5]
KUŴAZGA MAZGU GHA CIUTA: VILATO NDIPOSO UMO MUNGACITIRA
▪ Pambere mundambe kuŵazga Baibolo, lombani ndipo ŵikani mtima pa ivyo muŵazgenge.
▪ Zirwiskani ivyo mukusambira.
▪ Jiŵikirani vilato vyakuti mungafiska.
▪ Penjani nthowa ziphya zakudumbiskirana Malemba.
▪ Ŵani na cithuzithuzi ca nkhani ya mu Baibolo iyo mukuŵazga.
▪ Patulani nyengo yakusandira malemba ghakusuzga na kuwona umo ghakulongosolekera.
▪ Lekani kucimbilira pakuŵazga
▪ Nwekerani Mazgu gha Ciuta.
▪ Langulukani pa nkhani iyo mukuŵazga.
[Cithuzithuzi pa peji 4]
Para mukuŵazga nkhani ya mu Baibolo namwe jitorani nga vinthu vyakuyanako vikumucitikirani