“Mucindikenge Awo Ŵakufukafuka Comene Pakati Pinu”

“Mucindikenge awo ŵakufukafuka comene pakati pinu na kumulongozgani mu Fumu ndiposo kumusokani.”—1 TES. 5:12.

1, 2. (a) Kasi vinthu vikaŵa wuli ku mpingo wa ku Tesalonika apo Paulosi wakaŵalemberanga kalata yake yakwamba? (b) Kasi Paulosi wakaŵaciska vici Ŵatesalonika?

JITORANI kuti namwe mukaŵa mu mpingo wa ku Tesalonika, uwo ukaŵa umoza mwa mipingo yakwambilira mu Europe. Mpositole Paulosi wakakhala nyengo yitali mu msumba uwu na cilato ca kukhozga ŵabali. Wakwenera kuti wakimika ŵanalume ŵalara kuti ŵalongozgenge nga umo vikaŵira mu mipingo yinyake. (Mil. 14:23) Kweni mpingo wa ku Tesalonika ukati wamba waka, Ŵayuda ŵakanozga gulu ilo likacimbizga Paulosi na Sila mu msumba uwu. Ŵakhristu ŵa mu Tesalonika ŵakwenera kuti ŵakawona kuti ŵajoworeka, mutepanji ŵakaŵaso na wofi comene.

² Nchakupulikikwa kuti Paulosi wati wacimbizgika ku Tesalonika, mtima wake ukafipa comene cifukwa ca mpingo uwu. Wakayezgayezga kuti wawelereko, kweni ‘Satana wakamujandizga.’ Ntheura, wakatuma Timote kuti wakakhozge mpingo uwu. (1 Tes. 2:18; 3:2) Timote wakati wiza na lipoti liwemi, Paulosi wakakhuŵilizgika kulembera kalata Ŵatesalonika. Fundo yinyake iyo Paulosi wakalemba mu kalata iyi, yikaŵa yakuŵaciska kuti ‘ŵacindikenge awo ŵakulongozga pakati pawo.’—Ŵazgani 1 Ŵatesalonika 5:12, 13.

3. Cifukwa wuli Ŵakhristu ŵa mu Tesalonika ŵakeneranga kughanaghanira comene ŵalara?

³ Ŵabali awo ŵakalongozganga mu mpingo wa ku Tesalonika ŵakamanyanga vinandi yayi nga umo wakaŵira Paulosi pamoza na ŵanyake awo wakendanga nawo, kweniso ŵakaŵavya viharo vyauzimu ivyo ŵalara ŵa mu Yerusalemu ŵakaŵa navyo. Nakuti pakajumpha na cilimika yayi kufuma apo mpingo uwu ukambira. Ndipouli, awo ŵakaŵa mu mpingo uwu ŵakaŵa na cifukwa ciwemi cakuwongera ŵanalume ŵalara awo ‘ŵakafukafukanga comene’ na ‘kulongozga’ mpingo ndiposo ‘kusoka’ ŵabali. Ŵakeneranga nadi “kuŵaghanaghanira comene nkhanira [ŵalara] mu citemwa cifukwa ca mulimo wawo.” Fundo iyi yikalondezgana na ulongozgi wa Paulosi wakuti “muŵe pa mtende yumoza na munyake.” Kasi imwe muŵengeko ku Tesalonika, mukatenge mulongorenge kuwonga mulimo wa ŵalara? Kasi mukuŵawona wuli ŵanalume awo ni “vyawanangwa” ivyo Ciuta wapeleka mu mpingo winu kwizira mwa Khristu?—Efe. 4:8.

“Ŵakufukafuka Comene”

4, 5. Cifukwa wuli mulimo wa kusambizga ukaŵa upusu yayi mu nyengo ya Paulosi, ndipo cifukwa wuli mazuŵa ghano napo ngupusu yayi?

⁴ Kasi ŵanalume ŵalara ŵa ku Tesalonika ‘ŵakafukafukanga’ wuli, Paulosi na Sila ŵati ŵatumika ku Bereya? Pakuyezga Paulosi, nawo ŵakwenera kuti ŵakasambizganga mpingo vinthu vya mu Malemba. Nyengo zinyake mungajifumba kuti, ‘Kasi Ŵakhristu ŵa ku Tesalonika ŵakazirwiskanga Mazgu gha Ciuta?’ Baibolo likuti ŵa ku Bereya ŵakaŵa “na maghanoghano ghawemi kuluska ŵa mu Tesalonika,” ‘ŵakasandanga Malemba mwakupwelelera zuŵa na zuŵa.’ (Mil. 17:11) Ŵayuda ŵa ku Tesalonika ndiwo ŵakuyowoyeka apa kuti Ŵakhristu yayi. Awo ŵakazgoka Ŵakhristu ‘ŵakapokera mazgu gha Ciuta, nga ni mazgu gha ŵanthu cara, kweni nga ni mazgu gha Ciuta.’ (1 Tes. 2:13) Ŵanalume ŵalara ŵakwenera kuti ŵakafukafukanga comene kuliska mpingo mwauzimu.

⁵ Mazuŵa ghano, muzga wakugomezgeka na wakucenjera wakupeleka cakurya ku mskambo “pa nyengo yakwenelera.” (Mat. 24:45) Mwakulongozgeka na muzga, ŵalara ŵakufukafuka comene kulyeska ŵabali ŵawo mwauzimu. Ŵakhristu ŵanji mu mpingo ŵali na mabuku ghanandi ghakulongosora Baibolo, ndipo ŵanyake ŵali na Watch Tower Publications Index na Watchtower Library on CD-ROM. Kuti mpingo ukhute mwauzimu, ŵalara ŵakutora nyengo yitali kunozgekera nkhani na cilato cakuti ivyo ŵamuyowoya vikaŵe vyacandulo. Kasi muli kughanaghanirapo kuti ŵalara ŵakumalira nyengo yinandi wuli pakunozgekera nkhani za maungano gha mpingo, gha dera, na gha cigaŵa?

6, 7. (a) Kasi ŵanalume ŵalara ŵa mu Tesalonika ŵakasambirako vici kwa Paulosi? (b) Cifukwa wuli nyengo zinyake ŵalara cingaŵaŵira cakusuzga kuyezga Paulosi?

⁶ Ŵanalume ŵalara ŵa mu Tesalonika ŵakaluwa yayi umo Paulosi wakaliskiranga mskambo. Paulosi wakacitanga maulendo ghauliska mwadango waka yayi. Nga umo tikadumbiskirana mu nkhani yajumpha, Paulosi ‘wakaŵa wakuzika, nga umo mama wakonkheska wakucitira pakupwelelera ŵana ŵake.’ (Ŵazgani 1 Ŵatesalonika 2:7, 8.) Wakaŵa wakunozgeka ‘kupeleka’ nanga mbumoyo wake. Pakuliska mskambo, ŵanalume ŵalara ŵakeneranga kucita nga ndiyo.

⁷ Ŵalara mazuŵa ghano ŵakulondezga Paulosi pakupwelelera mskambo. Mwakawiro, mberere zinyake ni zakuzika yayi. Ndipouli, ŵalara ŵakuyezga kucita nazo mwamahara na ‘kusanga viwemi’ mwa izo. (Zinth. 16:20) Pakuti ŵalara nawo mbambura kufikapo, nyengo zinyake vingaŵasuzga kuwona mwakwenelera mberere yiliyose. Kweni ŵakuyezgayezga kuŵa ŵakuzika kwa waliyose, ndipo ŵakwenera kulumbika cifukwa ca citatata ico ŵakucita kuti ŵaŵe ŵaliska ŵawemi?

8, 9. Kasi ŵalara ‘ŵakulinda umoyo withu’ mu nthowa wuli?

⁸ Tose tili na cifukwa ca ‘kujilambikira’ ku ŵalara. Nga umo Paulosi wakalembera, iwo ‘ŵakulinda umoyo withu.’ (Heb. 13:17) Mazgu agha ghakutikumbuska za ŵaliska ŵaviŵeto awo ŵakajinoranga tulo na cilato cakuti ŵavikilire mskambo. Mwakuyana waka, ŵalara mazuŵa ghano ŵangajinora tulo apo ŵakovwira awo ŵakulwara, kusuzgika maghanoghano, panji awo ŵali na suzgo lauzimu. Mwaciyelezgero, ŵabali awo ŵali mu Makomiti Ghakudumbiskana na Cipatala ŵakuwuskika usiku kuti ŵakawovwire ŵabali mu vipatala. Ndipo tikuwonga comene uteŵeti wawo uwo ŵakucita kuti ŵatovwire.

⁹ Ŵalara awo ŵali mu Makomiti gha Vyakuzenga na makomiti agho ghakovwira para kwacitika masuzgo ghamabuci ŵakufukafuka comene kovwira ŵabali. Nchakwenelera kukolerana nawo na mtima withu wose. Ghanaghanirani umo ŵakajipatira ŵabali awo ŵakapelekanga wovwiri ku Myanmar, pamasinda pa cimphupulu (cakucemeka Cyclone Nargis) ca mu 2008. Gulu ilo likapelekanga wovwiri ku mpingo wa ku Bothingone, cigaŵa ico cikanangika comene ku Irrawaddy Delta, likajumphanga mu vitanda ivyo vikamba kuvunda. Ŵabali ŵa ku malo agha ŵakati ŵawona kuti pa gulu ili paliso uyo kale wakaŵa mulaŵiliri wawo wa dera, ŵakacemerezga kuti: “Wonani! Ni mulaŵiliri withu wa dera! Yehova watithaska!” Kasi mukuwonga mulimo uwo ŵalara ŵakucita muhanya na usiku? Ŵabali ŵanji ŵakuteŵetera mu makomiti ghapadera kuti ŵapwelelerenge nkhani zakusuzga za ceruzgo. Ŵabali aŵa ŵakujithumbwa yayi na ivyo ŵakufiska, ndipo awo ŵakwandula na uteŵeti wawo ŵakuwonga comene.—Mat. 6:2-4.

10. Kasi ni milimo wuli iyo ŵalara ŵakucita iyo ŵanji ŵangayimanya viŵi yayi?

¹⁰ Mazuŵa ghano napo, ŵalara ŵakucita mulimo uwo ukusazgapo kulemba. Mwaciyelezgero, mulaŵiliri wa milimo ya wupu wa ŵalara wakunozga ndondomeko ya maungano agho ghakucitika sabata yiliyose. Mulembi wakuwunganya pamoza malipoti gha m’munda gha mwezi uliwose, ndiposo gha cilimika cilicose. Mulaŵiliri wa sukulu wakugaŵa nkhani za mu sukulu. Pamanyuma pa myezi yitatu yiliyose, ndalama za mpingo zikupendeka. Ŵalara ŵakuŵazga makalata ghakufuma ku ofesi ya munthavi na kulondezga ulongozgi uwo ukovwira kuti “umoza mu cipulikano” ulutilire. (Efe. 4:3, 13) Kwizira mu kufukafuka kwa ŵalara, ‘vinthu vyose vikucitika mwakwenelera ndiposo mu ndondomeko.’—1 Kor. 14:40.

“Kumulongozgani”

11, 12. Kasi mbanjani ŵakulongozga mpingo, ndipo mulimo wawo ukusazgapo vici?

¹¹ Paulosi wakati ŵanalume ŵalara ŵa mu Tesalonika ŵakafukafukanga ‘kulongozga’ mpingo. Mazgu agha mu Cigiriki ghakung’anamura kwimilira panthazi ndipo ghangang’anamuraso kuti kunjilikizga, na kudangilira pakati pawo. (1 Tes. 5:12) Mbalara ŵeneŵaŵa awo Paulosi wakati “ŵakufukafuka comene.” Apa wakayowoyanga za “mulaŵiliri wakulongozga” pera yayi, kweni ŵalara wose mu mpingo. Mazuŵa ghano, ŵalara ŵanandi ŵakwima panthazi pa mpingo na kucitiska maungano. Kusintha uko kwacitika sonosono apa kuti “mulaŵiliri wakulongozga” timucemenge kuti “mulaŵiliri wa milimo ya wupu wa ŵalara” kukutovwira kuwona ŵalara wose kuti ni wupu wakukolerana.

¹² ‘Kulongozga’ mpingo kukusazgapo vinandi padera pa kusambizga. Fundo yakuyana waka yikusangika pa 1 Timote 3:4. Paulosi wakati mulaŵiliri wakwenera kuŵa “mwanalume uyo wakulongozga makora ŵamunyumba yake, wakuŵa na ŵana ŵakujilambika na mtima wose.” Apa mazgu ghakuti ‘kulongozga’ ghakusazgapo kusambizga ŵana ŵake, kweniso kudangilira mbumba yake, ndiposo kuŵa na “ŵana ŵakujilambika.” Ŵalara ŵakulongozga mu mpingo na kovwira kuti waliyose mu mpingo wajilambikenge kwa Yehova.—1 Tim. 3:5.

13. Cifukwa wuli pangatora nyengo kuti ŵalara ŵakake fundo para ŵakukumana?

¹³ Ŵalara kuti ŵalongozge makora mskambo, ŵakudumbiskana dankha kwaŵekha umo ŵangawovwilira mpingo. Nangauli mulara yumoza wangakaka makora waka fundo zose za mpingo, kweni ndimo vikuŵira yayi. Nga umo wupu wakulongozga ukacitiranga mu nyengo ya ŵapositole, mazuŵa ghano napo wupu wa ŵalara ukudumbiskana vinthu mwakufwatuka, ndiposo kupenjerezga ulongozgi wa mu Malemba. Cilato cawo nchakuti ŵalondezge fundo za mu Malemba pakovwira mpingo. Vidumbirano vikuŵa vyacandulo usange mulara waliyose wakunozgekera ungano wa ŵalara. Ŵalara ŵakwenera kusanda fundo za mu Malemba ndiposo ulongozgi uwo muzga wakupeleka, nangauli kucita nthena kukutora nyengo yitali. Usange pali kupambana maghanoghano, nga umo vikaŵira na wupu wakulongozga mu nyengo ya ŵapositole pa nkhani ya ukotoli, pangakhumbikwira nyengo yakusazgikira ndiposo kupenjerezga mwakukwana kuti ŵakake fundo iyo yikukolerana na Malemba.—Mil. 15:2, 6, 7, 12-14, 28.

14. Kasi mukuwonga usange wupu wa ŵalara ukuteŵetera mwakukolerana, ndipo cifukwa wuli?

¹⁴ Kasi cingacitika nchivici usange mulara yunji wakukosera pa fundo yake panji maghanoghano ghake gha mu mutu? Wuli usange munyake wali nga ni Diyoterefe, ndipo wakuseŵa mzimu wa kugaŵaniska? (3 Yoh. 9, 10) Mpingo wose ungasuzgika. Usange Satana wakakhumbanga kutimbanizga Ŵakhristu mu mpingo wakwambilira, nchakuwonekerathu kuti mazuŵa ghano napo, wangaleka yayi kutimbanizga mtende mu mpingo. Wangaseŵa makhumbiro ghauryezi, nga nkhukhumba kumanyikwa. Lekani ŵalara ŵakukhumbikwira kuŵa ŵakujicefya na kuteŵetera mwakukolerana nga ni wupu. Tikuwonga comene ŵalara awo ŵakucita nthena.

“Kumusokani”

15. Cifukwa wuli ŵalara ŵakusoka ŵanji?

¹⁵ Paulosi wakayowoyaso mulimo unyake wakusuzga kweni wakuzirwa uwo ŵanalume ŵalara ŵakucita. Mulimo uwu ngwakusoka mskambo. Mu Malemba ghakwambira Mateyu mpaka Uvumbuzi, ni Paulosi pera uyo wali kuzunurapo lizgu ilo lili kung’anamulika kuti “kusoka.” Lizgu ili likuyowoya za ulongozgi wankhongono, kweni likung’anamura nkhaza yayi. (Mil. 20:31; 2 Tes. 3:15) Mwaciyelezgero, Paulosi wakalembera Ŵakorinte kuti: “Nkhulemba vinthu ivi, kuti nimukhozgani soni cara, kweni kumusokani pakuŵa ŵana ŵane ŵakutemweka.” (1 Kor. 4:14) Wakaŵasoka cifukwa cakuti wakaŵatemwanga.

16. Kasi ŵalara ŵakwenera kukumbuka vici para ŵakusoka ŵanji?

¹⁶ Ŵalara ŵakumanya kuzirwa kwa kusoka ŵanji mu nthowa yakwenelera. Ŵakulongora lusungu, citemwa, ndiposo ŵakovwira nga umo Paulosi wakacitiranga. (Ŵazgani 1 Ŵatesalonika 2:11, 12.) Ndipouli, ŵalara ‘ŵakukoleska mazgu ghakugomezgeka mwakuti ŵaciske na cisambizgo caunenesko.’—Tito 1:5-9.

17, 18. Kasi mukwenera kukumbuka vici para mulara wakumusokani?

¹⁷ Ŵalara nawo mbambura kufikapo ndipo ŵangayowoya vinthu ivyo pamasinda ŵangadandawura navyo. (1 Mathe. 8:46; Yak. 3:8) Ŵalara ŵakumanyaso kuti ŵabali na ŵadumbu, kanandi ‘ŵakukondwa’ yayi para ŵakupokera ulongozgi. (Heb. 12:11) Ntheura, para mulara wakusoka yunji, wakwenera kuti wakucita nthena pamanyuma pakuti waghanaghanirapo comene na kulomba. Usange mulara wakumusokani, kasi mukumuwonga cifukwa cakuti walongora kuti wakumutemwani?

¹⁸ Tiyelezgere kuti muli na suzgo linyake muthupi ndipo mukumanya yayi umo mungalilongosolera kwa dokotala. Pamasinda dokotala wabowozga suzgo linu, kweni imwe mukuti mulije suzgo ilo. Kasi mumukwiyirenge cifukwa cakuti wabowozga suzgo linu? Yayi. Nanga wangati ŵamucitani opareshoni, muzomerenge cifukwa mukumanya kuti wakukhumba kumovwirani. Mbunenesko kuti mungakhwaskika na umo dokotala wayowoyera, kweni kasi mukanenge kupokera wovwiri wake? Cara. Mwakuyana waka, tegherezgani para mukusokeka na awo Yehova na Yesu ŵangaŵatuma kuti ŵamovwirani mwauzimu, ndipo lekani kuŵika maghanoghano pa umo ŵayowoyera.

Wongani Yehova Cifukwa ca Kupeleka Ŵalara

19, 20. Kasi mungalongora wuli kuti mukuwonga ŵanalume awo ni “vyawanangwa” ivyo Yehova wapeleka?

¹⁹ Kasi mukucita wuli para mwapokera cawanangwa ico comene canozgekera imwe? Kasi mukulongora kuwonga mwa kucigwiliskira nchito? Ŵalara ndiwo ni “vyawanangwa” ivyo Yehova wali kupeleka kwa imwe kwizirwa mwa Yesu Khristu. Nthowa yimoza iyo mungalongolera kuti mukuwonga nkhutegherezga comene para ŵalara ŵakuyowoya nkhani pa mpingo na kulondezga fundo izo ŵakuyowoya. Mungalongoraso kuwonga mwa kuzgorapo pa maungano. Citaniko mulimo uwo ŵalara ŵakudangilira, nga ni mulimo wa kupharazga. Usange mwasanga candulo na ulongozgi uwo mwapokera kufuma kwa mulara, kasi mungamuphalira yayi? Kweniso mwalekeraci kuwonga mbumba za ŵabali ŵalara? Kumbukani kuti, mulara kuti wafukefuke comene mu mpingo, mbumba yake yikujipata pa vinthu vinyake.

²⁰ Tili nadi na vifukwa vyakukwana vyakuwongera ŵalara, awo ŵakufukafuka comene pakati pithu, kutilongozga, na kutisoka. Ŵanalume ŵalara ni “vyawanangwa” nadi vyakufuma kwa Yehova.

Kasi Mukukumbuka?

• Cifukwa wuli Ŵakhristu ŵa ku Tesalonika ŵakakhumbikwiranga kuwonga awo ŵakalongozganga pakati pawo?

• Kasi ŵalara pa mpingo winu ŵakufukafuka wuli kuti imwe musange candulo?

• Kasi mukwandula wuli na ulongozgi wa ŵalara?

• Para mulara wakumusokani, kasi mukwenera kukumbuka fundo wuli?

[Cithuzithuzi pa peji 27]

Kasi nthowa izo ŵalara ŵakuliskira mpingo mukuzimanya makora?