Umo Mungacitira Pakusopa Lumoza na Mbumba Panji Pamwekha

KWAMBA mu Janyuwale 2009, mipingo yose ya Ŵakaboni ŵa Yehova yili kusintha ndondomeko ya maungano. Sambiro la Baibolo la Mpingo likucitikira pamoza na Sukulu ya Uteŵeti wa Ciuta mwakuti tisange nyengo yakusopera pamoza na mbumba panji yakusambilira patekha. Kasi mukulondezga ndondomeko yiphya iyi? Kasi mukusanga nayo candulo?

Ŵanji ŵakumanya yayi ivyo ŵangasambira para ŵakusopa pamoza na mbumba. Wupu Wakulongozga ulije cilato cakuti mbumba zose zisambirenge mu nthowa yakuyana waka. Mbumba zikupambana, ntheura mutu wa mbumba panji munthu payekha wakwenera kuwona ivyo vingaŵa vyakovwira mu sabata iyo.

Ŵanji ŵakunozgekera maungano gha mpingo, ndipouli, cikung’anamura kuti ndivyo ŵakwenera kucita nyengo zose yayi. Ŵanji ŵakuŵazga, kudumbiskana, nanga nkhuyezgelera ivyo ŵaŵazga na cilato cakuti ŵana ŵasange candulo. Nyengo zinyake cingaŵa cakwenelera yayi kuti nyengo zose mudumbiskanenge mwa mafumbo na mazgoro nga mpha maungano. Waliyose wakwenera kuŵa wakufwatuka kuyowoyapo maghanoghano ghake pa nyengo iyi. Para waliyose wakufwatuka, cikovwira kuti wose ŵaŵe ŵakukondwa ndiposo kuti ŵaleke kuluwa ivyo ŵasambira.

Dada munyake uyo wali na ŵana ŵatatu wakalemba kuti: “Kanandi tikucita ivyo taŵazga mu Baibolo. Waliyose wakuŵazgirathu vipaturo. Ŵana ŵakuwona ivyo ŵangakapenjerezga mu mabuku, ndipo ŵakulongosora ivyo ŵasanga. Michael [wali na vilimika 7] kanandi wakutemwa kujambura cithuzithuzi panji kulemba fundo. Davide na Kaitlyn [ŵa vilimika 13 na 15] ŵakulemba nkhani ya mu Baibolo mu mazgu ghawo na ghawo. Mwaciyelezgero, apo tikaŵazganga nkhani yakulongosora umo Yosefe wakabawulizgira maloto gha wakupeleka nkhombo na wakuphika wa Faro, Kaitlyn wakalemba nkhani nga ni para nayo wakaŵamo mu jele na kuwona ivyo vikacitikanga.”—Genesis, cipaturo 40.

Vinthu vikupambana mu mbumba. Sacizgo lingaŵa lakovwira ku mbumba yinyake kweni ku yinyake lingatondeka. Bokosi la kulondezgapo ili, lili na masacizgo agho mungalondezga para mukusopa pamoza na mbumba panji pamwekha. Mungalondezgaso masacizgo ghanyake agho mungaŵa nagho.

[Bokosi/​Cithuzithuzi pa peji 6, 7]

Mbumba izo zili na ŵana ŵavilimika vya pakati pa 13 na 19:

• Ŵazgani na kudumbiskana buku la Mayankho a Zimene Achinyamata Amafunsa.

• Ŵazgani nkhani za ŵanthu awo ŵakuzunulika mu Baibolo na kufumba kuti “Kasi uŵenge iwe watenge ucitenge wuli?” (Wonani Gongwe la Mulinda la Ciceŵa la Meyi 15, 1996, peji 14, ndime 17-18.)

• Dumbiskanani vilato ivyo mungafiska mu nyengo yicoko na ivyo mungafiska mu nyengo yitali.

• Muwonelerenge mavidiyo ghakujintha pa Baibolo na kudumbiskana.

• Dumbiskanani cigaŵa ca “Ŵanyamata na Ŵasungwana” ico cikuŵa mu Gongwe la Mulinda.

Ŵakutorana awo ŵalije ŵana:

• Dumbiskanani vipaturo 1, 3, 11-16 vya buku la Umo Mbumba Yingaŵira Yacimwemwe.

• Dumbiskanani fundo izo mwasanga pa kusambira Baibolo.

• Nozgekerani pamoza Sambiro la Baibolo la Mpingo panji Sambiro la Gongwe la Mulinda.

• Dumbiskanani nthowa izo mungasazgirako uteŵeti.

Ŵabali ŵambura kutora na ŵadumbu ŵambura kutengwa panji awo munyawo wa mu nthengwa wali mu cisopa cinyake:

• Sambirani mabuku ghaphya agho mukapokera ku ungano wa cigaŵa.

• Ŵazgani ma Yearbook ghasono na ghakale.

• Penjerezgani mazgoro gha mafumbo agho ŵanthu ŵakutemwa kufumba mu cigaŵa cinu.

• Yezgelerani umo mwamucitira mu uteŵeti wa m’munda.

Mbumba izo zili na ŵana ŵacokoŵacoko:

• Citani seŵero la nkhani za mu Baibolo.

• Citani vinthu ivyo vingawovwira ŵana kukumbukira ivyo ŵasambira, nga ni ivyo vikuŵa mu Galamukani! pa peji 30 na 31.

• Nyengo zinyake, muyezgenge kujambura ivyo mukusambira. (Wonani mutu wakuti “Citatata Cikukhumbikwa” mu Gongwe la Mulinda la Febuluwale 15, 2011, peji 11.)

• Dumbiskanani cigaŵa ca mu Gongwe la Mulinda cakuti “Sambizgani Ŵana Ŵinu.”