Sendelerani kwa Ciuta

Mungasanga “Mahara Ghakumanyira Ciuta”

YEHOVA CIUTA watipa vyose vyakukhumbikwa kuti tisange usambazi wakuzirwa, ndipo iyo wakukhumba kuti tiwusange. Usambazi uwu ngwa ndalama yayi, kweni ungatipa vinthu ivyo tingagura na ndalama yiliyose yayi. Vinthu ivi ni mtende wa mu mtima, umoyo wakukhorweska, ndiposo wacandulo. Kasi ni usambazi wuli? Themba lavinjeru Solomoni likawulongosora pa lemba la Zintharika 2:1-6.

Solomoni wakati usambazi uwu ni “mahara ghakumanyira Ciuta,” panji kuti kumanya unenesko wakukhwaskana na Ciuta na vilato vyake, ivyo vikuvumbulika mu Baibolo. (Vesi 5) Usambazi uwu uli na vigaŵa vinandi.

Visambizgo vyaunenesko. Baibolo likuzgora mafumbo nga ni agha: Kasi zina la Ciuta ni njani? (Salmo 83:18) Nchivici ico cikucitika para munthu wafwa? (Salmo 146:3, 4) Cifukwa wuli tili na umoyo? (Genesis 1:26-28; Salmo 115:16) Kasi mazgoro gha mafumbo ghakuzirwa agha mungaghagura na ndalama zilinga?

Ulongozgi wavinjeru. Baibolo likutiphalira umo tingakhalira makora. Kasi mungacita wuli kuti nthengwa yinu yikhore? (Ŵaefeso 5:28, 29, 33) Mungacita wuli kuti ŵana ŵinu ŵakure ŵamahara? (Duteronome 6:5-7; Ŵaefeso 6:4) Kasi mungacita wuli kuti muŵe ŵakukondwa? (Mateyu 5:3; Luka 11:28) Kasi mukuwona wuli? Kasi ulongozgi wakugomezgeka uwo Baibolo likupeleka pa nkhani izi mungawuyaniska na cuma wuli?

Kumanya umo Ciuta waliri ndiposo mikhaliro yake. Baibolo ndilo lingatiphalira vinthu vyaunenesko vyakukhwaskana na Ciuta. Kasi Ciuta wali wuli? (Yohane 1:18; 4:24) Kasi wakutipwelelera? (1 Petrosi 5:6, 7) Kasi yinyake mwa mikhaliro yake ni nji? (Exodus 34:6, 7; 1 Yohane 4:8) Kasi mukughanaghana kuti vinthu vyaunenesko vyakuyowoya za Mlengi withu tingavigura na ndalama zilinga?

Kusanga “mahara ghakumanyira Ciuta” ni usambazi wauzimu wakuzirwa comene. Kasi mungawusanga wuli? Fundo yakovwira yikusangika pa Zintharika cipaturo 2 vesi 4, apo Solomoni wakayaniska mahara agha na “usambazi wakubisika.” Ghanaghanirani fundo iyi: Usambazi wakubisika ungiza yayi kwa munthu uyo wakukhala waka. Tikwenera kulimbikira kuti tiwusange. Vikuyana waka na para tikukhumba kumanya Ciuta. Usambazi uwu uli kubisika mu Baibolo. Kuti tiwusange tikwenera kulimbikira.

Solomoni wakalongosora ivyo tikwenera kucita kuti tisange “mahara ghakumanyira Ciuta.” Mazgu ghakuti ‘pokelera mazgu ghane’ na “kurazga mtima wako” ghakulongora kuti tikukhumbikwira kuŵa na mtima wakukhumba kusambira. (Vesi 1, 2) Mazgu ghakuti ‘kulilira,’ ‘kughapenja,’ na “kupenjisiska” ghakulongora kuti tikwenera kulimbikira kucitapo kanthu. (Vesi 3, 4) Kuti tisange usambazi uwu, tikwenera kulimbikira kusambira Baibolo na mtima withu wose.—Luka 8:15.

Usange tikwamba ndise kucitapo kanthu, Yehova watovwirenge kuti tisange usambazi uwu. Vesi 6 likuti: “Yehova wakupa vinjeru.” Tingapulikiska unenesko uwo uli mu Baibolo, pekha para Ciuta watovwira. (Yohane 6:44; Milimo 16:14) Kweni manyani kuti: Usange mukufwilirapo kupenjerezga mu Mazgu gha Ciuta, muzamusanga “mahara ghakumanyira Ciuta,” agho ni usambazi uwo ungamovwirani umoyo winu wose.—Zintharika 2:10-21.a

Vipaturo vya Mu Baibolo Ivyo Mungaŵazga mu Okutobala:

◼ Zintharika 1-21

[Mazgu ghamusi]