“Niŵenge Wakupendera Kwamuyirayira Yayi!”

Yikayowoyeka na Sara van der Monde

Kanandi ŵanthu ŵakuniphalira kuti: “Sara, nyengo zose ukumwemwetera. Cifukwa wuli ukuŵa wakukondwa?” Nkhuŵaphalira kuti nili na cigomezgo capadera comene. Cigomezgo cane nkhucilongosora mwakudumura kuti, “Niŵenge wakupendera kwamuyirayira yayi!”

NKHABABIKA mu 1974 ku Paris, France. Nkhababika mwakusuzgikira, ndipo pamasinda nkhasangika na suzgo lakukhwaskana na wongo. Suzgo ili likanitondeskanga kwenda na kuyowoya makora. Nkhaŵaso na nthenda ya vizilirisi ndipo nkhaŵa pa ngozi ya kwambura matenda ghanyake.

Apo nkhaŵa na vilimika viŵiri, mbumba yithu yikasamira ku Melbourne, ku Australia. Pamasinda pa vilimika viŵiri adada ŵakaticimbira. Nkhukumbuka kuti nyengo iyi ndiyo nkhawona kukhumbikwa kwa kuŵa pafupi na Ciuta. Ŵamama ŵakaŵa Ŵakaboni ŵa Yehova, ndipo nyengo zose ŵakalutanga nane ku maungano, uko nkhasambira kuti Ciuta wakunitemwa na kunipwelelera. Ivyo nkhasambira kweniso citemwa ico ŵamama ŵakanilongoranga vikanovwira kujiwona kuŵa wakuvikilirika nangauli adada ŵakaticimbira.

Ŵamama ŵakanisambizgaso umo ningalombera kwa Yehova. Nakuti nkhawona kuti kulomba kukuniŵira kupusu comene kuluska kuyowoya. Pakulomba nkhukhumbikwira kuzunura lizgu lililose ndendende yayi, cifukwa mazgu agho nkhuyowoya nkhughamanya makora mu maghanoghano ghane. Nangauli ivyo nkhuyowoya vikupulikikwa makora yayi, kweni nkhukhozgeka kumanya kuti Yehova wakupulika cilicose, kwali nayowoya mu mtima panji nayowoya mwakusuzgikira.—Sal. 65:2.

Kuzizipizga Masuzgo

Apo nkhaŵa na vilimika vinkhondi, suzgo lane likakura mwakuti nkhakhumbikwiranga visulo vyakuti vinovwirenge pakwenda. Cikaniŵiranga cakusuzga kwenda makora na visulo. Apo nkhaŵa na vilimika 11, nkhatondekerangathu kwenda. Pamasinda nkhatondekanga kuwuka nekha pa bedi kwambura wovwiri wa cisulo cinyake ca magesi ico cikaninyamuranga kuniŵika pa njinga ya injini, iyo nkhendeskeranga giya la mu woko.

Nyengo zinyake nkhuŵa na citima cifukwa cakuti nili wakupendera. Kweni para vyaŵa nthena nkhukumbuka mazgu gha ŵamumbumba yithu, ghakuti: “Kwenjerwa na ivyo ungatondeka kucita yayi. Dodoliska waka pa ivyo ungacita.” Mazgu agha ghakunovwira kuti nifiske kwendeska haci, boti, wato, nanga nkhwendeska galimoto ku malo uko kukwenda magalimoto ghacoko waka! Nkhukondwa na maluso agho nili nagho nga nkhupenta, kusona, kusona majuveti, kuloca saru, na kuwumba vinthu vinyake.

Cifukwa cakuti ndine wakupendera comene ŵanji ŵakuti mphanyi nkhujikhalira waka kwambura kusopa. Apo nkhaŵa na vilimika 18, asambizgi ŵane ŵakaniphalira kuti nifumepo pa nyumba mwakuti “nifwatuke” ku cisopa ca ŵamama. Ŵakajipeleka kuti ŵanisangirenge na nyumba wuwo. Kweni nkhaŵaphalira kuti ningalekapo yayi cigomezgo cane, ndipo nizamufumapo pa nyumba pekha para nili wakunozgeka kukhala panekha.

Nkhabapatizika pati pajumpha nyengo yicoko waka kufuma apo asambizgi ŵakati nifumepo pa nyumba. Vilimika viŵiri vikati vyajumphapo, nkhamba kukhala panekha. Sono nkhukondwa cifukwa cakuti nkhujipwelelera nekha.

Pempho Ilo Likaniciruska

Nakumanapo na viyezgo kwa vilimika vinandi. Kweni zuŵa linyake nkhazukuma comene apo mwana wa sukulu munyane uyo nayo ngwakupendera wakaniphalira kuti titorane. Pakwamba nkhakondwa. Nga mbamwali ŵanandi, nane nkhudokera kutengwa. Kweni nkhawona kuti ningaŵa wakukondwa cifukwa cakuti natengwa ku wakupendera munyane yayi. Nakuti munyamata uyu tikupambana vigomezgo, vyakucita, na vilato. Ntheura nkhawona kuti nchambura kwenelera kutorana nayo. Nkhaŵikapo mtima kuti nipulikire ulongozgi wa Ciuta wakupulikikwa makora wa kutora panji kutengwa mu Fumu pera. (1 Kor. 7:39) Ntheura, nkhamukana munyamata uyu.

Nanga ni sono nkhujipulika kuti nkhacita makora comene. Ndipo nili na cigomezgo cose kuti nizamuŵa wakukondwa mu caru ciphya ico Ciuta wali kulayizga. (Sal. 145:16; 2 Pet. 3:13) Pasono nasimikizga mtima kuti nilutilirenge kugomezgeka kwa Yehova na kuŵa wakukhorwa nangauli nili wakupendera.

Nkhulindilira zuŵa ilo nizamuduka kufuma pa njinga na kucimbira nga ni mphepo. Apo ndipo nizamuti, “Nkhaŵa wakupendera, kweni sono nili makora, ndipo niŵenge makora kwamuyirayira!”