Ulwari Uleke Kumupokani Cimwemwe
GHANAGHANIRANI kuti kwaca waka ndipo mukujifumba kuti, kwaciraci? Zuŵa na zuŵa mukusuzgika na vyakuŵinya mu thupi panji maghanoghano. Nyengo zinyake mungajipulika nga ni Yobu, uyo wakati: “Mphanyi ndasankha kujikhwintha na nyifwa, kwakuluska umoyo wane.” (Job 7:15) Kweni kasi mungacita wuli para suzgo likulutilira?
Ndimo vikaŵira na Mefibosheti, mwana wa Jonatani mubwezi wa Themba Davide. Apo Mefibosheti wakaŵa na vilimika vinkhondi “wakawa pasi [ndipo] wakazgoka cilima.” (2 Sam. 4:4) Mefibosheti wakwenera kuti wakakwenyelera comene apo ŵakamupusikizgira kuti wakukhumba kuwukira Themba Davide, pamasinda na kumupoka katundu wake. Ndipouli, wakazomerezga yayi kuti ulwari, kupusikizgirika, na kukhuŵara vimupoke cimwemwe.—2 Sam. 9:6-10; 16:1-4; 19:24-30.
Paulosi nayo nchakuwonerapo ciwemi pa nkhani iyi. Ulendo unyake wakalemba vyakukhwaskana na “munga mu thupi” uwo wakalimbananga nawo. (2 Kor. 12:7) Munga uwu panji likaŵa suzgo la nyengo yitali la pa thupi lake, panji ŵanthu awo ŵakamususkanga kuti ni mpositole. Mulimose umo vikaŵira, kweni wakeneranga kuzizipizga suzgo la muthupi panji la maghanoghano.—2 Kor. 12:9, 10.
Mazuŵa ghano napo, ŵateŵeti ŵa Ciuta ŵakusuzgika na ulwari panji masuzgo ghanyake. Mwaciyelezgero, apo Magdalena wakaŵa na vilimika 18, wakasangika na nthenda iyo yikiza cifukwa cakuti ŵasilikari ŵa mu thupi ŵakalimbananga na thupi lake. Iyo wakati: “Nkhacita wofi comene. Nyengo yikati yajumphapo, ulwari ukasazgikira, cakurya cikagayikanga makora yayi mu thupi, mu mulomo mukaŵa vilonda, nkhaŵaso na cidukuruku.” Izabela nayo wakasangana na suzgo lambura kumanyikwa makora. Iyo wakati: “Nkhaŵa na suzgo la maghanoghano kwambira waka pa wanici. Suzgo ili likapangiska kuti nenjerwenge, kutondeka kuthuta makora, ndiposo kunyongolora mu nthumbo. Kanandi nkhupulika vyakulema.”
Kuzomerezga
Ulwari ngwakukondweska yayi. Kweni para suzgo lamuwirani zomerezgani. Ndipouli, nyengo zinyake cikuŵa cipusu yayi kuzomerezga. Magdalena wakati: “Nthenda yane yikulutilira. Kanandi thupi likukana kuwuka pa bedi. Nkhutondeka kupanga mapulani gha munthazi cifukwa ca suzgo lane. Ico cikunikwenyerezga comene nchakuti nkhuteŵetera Yehova nga umo nkhacitiranga kumasinda yayi.”
Zbigniew wakati: “Nyamakazi yakutupiska malundi yikulutilira kunigulura nkhongono. Nyengo zinyake nkhupulika kocha comene mwakuti nkhutondeka kucita na kanchito kapusu wuwo. Para yaniwukira nkhukwenyelera comene.”
Barbara wali kusangika na cakutupa mu wongo, ndipo wakati: “Thupi lane lasintha comene, lusoko nilije, ndipo mutu ukuŵinya pafupipafupi, kweniso maghanoghano ghakukaŵa yayi kutimbanizgika. Cifukwa ca suzgo ili, nkhukhumbikwira kusintha cilicose.”
Ŵanthu wose aŵa, mbateŵeti ŵakujipatulira ŵa Yehova. Cinthu cakwamba mu umoyo wawo nkhucita khumbo la Ciuta. Ŵakumugomezga comene Ciuta ndipo ŵakwandula na ulongozgi wake.—Zinth. 3:5, 6.
Umo Yehova Wakovwilira
Tileke kughanaghana kuti para munthu wakusuzgika ndikuti wakulangika na Ciuta. (Cit. 3:33) Ghanaghanirani ivyo Yobu wakakumana navyo nangauli wakaŵa “wakufikapo na wakunyoloka.” (Job 1:8) Ciuta wakuyezga munthu na viheni yayi. (Yak. 1:13) Ulwari pamoza na masuzgo ghanyake ghose, ni viharo ivyo Adamu na Eva ŵali kutilekera.—Rom. 5:12.
Ndipouli, Yehova na Yesu ŵaŵalekenge waka yayi ŵarunji kwambura kuŵawovwira. (Sal. 34:15) Tikumanya kuti Ciuta ‘nchiphokwero cithu na linga lithu,’ comenecomene mu nyengo ya suzgo. (Sal. 91:2) Kasi tingacita wuli kuti tilutilire kuŵa na cimwemwe apo tikuzizipizga suzgo ilo lingamara luŵiro yayi?
Lurombo: Kwizira mu lurombo, mungamuyeghiska Yehova katundu winu nga umo ŵakacitiranga ŵateŵeti ŵakale. (Sal. 55:22) Para mwacita nthena muŵenge na “mtende wa Ciuta uwo ukuluska ghanoghano lililose.” Mtende uwu “usungilirenge mitima yinu na maghanoghano ghinu.” (Fil. 4:6, 7) Magdalena wakuzizipizga suzgo lake cifukwa cakuti wakulomba na kugomezga Ciuta. Iyo wakati: “Nkhupembuzika na kuŵaso wacimwemwe, para namukhutulira Yehova vya ku mtima kwane. Pasono nkhumanya kukhumbikwa kwa kugomezga Ciuta zuŵa na zuŵa.”—2 Kor. 1:3, 4.
Yehova wangazgora malurombo ghinu kwizira mu mzimu wake, Mazgu ghake, na Ŵakhristu ŵanyinu. Muleke kukhazga kuti Ciuta wamucizganinge mwamunthondwe. Kweni gomezgani kuti wamupaninge vinjeru na nkhongono kuti muzizipizge masuzgo ghose agho ghangamuwirani. (Zinth. 2:7) Wangamukhozgani na kumupani “nkhongono zakuluska zakawiro.”—2 Kor. 4:7.
Mbumba: Para ŵamumbumba ŵakumutemwani na kumughanaghanirani cikuŵako cipusu kuzizipizga masuzgo. Mungaluwanga yayi kuti suzgo linu likukhwaskaso ŵakutemweka ŵinu. Nga ndimwe, nawo ŵangasoŵa cakucita. Ndipouli, ŵaliko kuti ŵamovwirani nanga nipara vyasuzga comene. Kulombera pamoza kungawovwira kuti mtima winu ukhazikike.—Zinth. 14:30.
Pakuyowoya vya mwana wake msungwana na ŵadumbu ŵanyake ŵaciwukirano mu mpingo, Barbara wakati: “Ŵakunovwira mu uteŵeti. Mtima wane ukukondwa para nkhuwona umo ŵakucitira mwamphu mu uteŵeti.” Zbigniew wakati muwoli wake wakumovwira comene. Iyo wakati: “Wakucita nchito zinandi za pa nyumba. Wakunovwira pakuvwara ndipo kanandi wakuniyeghera cikwama pakuluta ku maungano na mu uteŵeti.”
Ŵakhristu ŵanyithu: Para tili na Ŵakhristu ŵanyithu, tikukhozgana na kupembuzgana. Kweni wuli para mukutondeka kuwungana cifukwa ca ulwari? Magdalena wakati: “Ŵabali ŵakuwoneseska kuti ŵanijambulira maungano kuti nandulenge mwauzimu. Ŵakhristu ŵanyane kanandi ŵakuniyimbira foni kuti ŵamanye ivyo ŵangacita kuti ŵanovwire. Ŵakunilembera makalata ghakukhozga. Ivi vikunovwira kuzizipizga suzgo lane, cifukwa nkhuwona kuti ŵakunighanaghanira.”
Izabela uyo wali na suzgo la maghanoghano wakati: “Mu mpingo nili na ‘ŵadada na ŵamama’ ŵanandi, awo ŵakunitegherezga na kunipulikiska. Mpingo uli nga ni mbumba yane, ndiko nkhusanga mtende na cimwemwe.”
Awo ŵakukumana na viyezgo vyakupambanapambana, ŵaleke ‘kujipatura.’ M’malo mwake, ŵakwenera kucezga na ŵabali mu mpingo. (Zinth. 18:1) Ŵabali mu mpingo ŵakukhozga comene ŵanji. Nyengo zinyake mungakakika kuphalira ŵabali na ŵadumbu ivyo mukukhumba. Kweni manyani kuti Ŵakhristu ŵanyinu ŵangakondwa para mukuŵafwatukira. Ici ciŵapenge mwaŵi wa kulongora citemwa cawo pa “ŵabali kwambura upusikizgi.” (1 Pet. 1:22) Mwalekeraci kuŵamanyiska kuti mukukhumba wovwiri pakuluta ku maungano, mukukhumba kwenda nawo mu uteŵeti, panji kuŵaphalira ivyo vili ku singo kwinu? Ndipouli, tileke kuŵanyekezga na mphingo, m’malo mwake tikwenera kuŵawonga cifukwa ca wovwiri uwo ŵakutipa.
Wonani vinthu mwakwenelera: Kuti mulutilire kuŵa na cimwemwe, vinandi vikuthemba pa imwe. Nchipusu kugongowa para vinthu vikwenda yayi. Baibolo likuti: “Mzimu wa munthu ungakunthirapo ulwari, kweni mzimu wakupwetekeka wangauyegha ndinjani?”—Zinth. 18:14.
Magdalena wakati: “Nkhuyezgayezga kuti nileke kudodoliska pa masuzgo ghane. Para tumphepo twaniputako, nkhuyezgayezga kuti niwonekenge wacimwemwe. Nkhukhozgeka comene para nkhuŵazga nkhani za ŵabali na ŵadumbu awo ŵakalutilira kugomezgeka nangauli ŵakaŵa ŵalwari comene.” Izabela wakukhozgeka na fundo yakuti Yehova wakumutemwa na kumuzirwiska. Iyo wakati: “Nkhujiwona kuti ndine wakukhumbikwa, ndipo pali yunji uyo wakunighanaghanira. Kweniso nili na cigomezgo ciwemi ca munthazi.”
Zbigniew wakati: “Ulwari wanisambizga kujicefya na kupulikira. Nasambira kusankha vinthu mwamahara kweniso kugowokera ŵanji kufumira pasi pa mtima. M’malo mwakuŵa na citima, nasambira kuteŵetera Yehova mwakukondwa. Nakuti vyanovwira kulutilira kukura mwauzimu.”
Kumbukani kuti Yehova wakumanya makora masuzgo agho mukuzizipizga. Wakumufipirani mtima ndipo wakumupwelelerani. Wazamuluwapo yayi “mulimo winu na citemwa ico mukalongora ku zina lake.” (Heb. 6:10) Nyengo zose kumbukani ivyo wali kulayizga wose awo ŵakumuwopa. Iyo wakati: “Nikulekenge cara napacoko nesi kukutaya mu nthowa yiliyose.”—Heb. 13:5.
Para mwathika lusoko cifukwa ca masuzgo, yezgani kudodoliska pa cigomezgo cakukondweska ca kuzakakhala kwamuyirayira mu caru ciphya. Nyengo yili pafupi comene kuti muwone vitumbiko ivyo vizenge na Ufumu wa Ciuta.
[Bokosi/Vithuzithuzi pa peji 28, 29]
Ŵakulutilira Kupharazga Nangauli Mbalwari
Jerzy uyo wali na suzgo la maso wakati: “Ningendaso yayi nekha, ntheura mu uteŵeti nkhuŵa na muwoli wane panji ŵabali na ŵadumbu. Nkhusungilira pa mtima malemba gha mu Baibolo na nthowa za umo ningambiskira cidumbirano.”
Magdalena uyoso ni mulwari wakati: “Padera pa kupharazga pa foni, nyengo zose nkhulemba makalata kudumbiskana na ŵakunweka. Para nili mu cipatala, nyengo zose nkhuŵika Baibolo pamoza na mabuku ghithu pafupi na bedi lane. Ici cikunovwira comene kwamba cidumbirano na ŵanthu.”
Izabela, uyo wali na suzgo la maghanoghano wakati: “Nkhutemwa upharazgiwa ku nyumba na nyumba, kweni para nili makora yayi nkhupharazga kwizira pa telefoni.”
Barbara uyo wali na cakutupa mu wongo wakati: “Nkhutemwa maulendo ghakuwelerako na kwambiska masambiro gha Baibolo. Para niliko makora, nkhupharazga ku nyumba na nyumba.”
Zbigniew, uyo wakulwara malundi wakati: “Nkhunyamura cikwama cipepu ca magazini. Para nanjira mu upharazgi, nkhukhalamo cikuru nyamakazi yindawuke.”Ŵana na ŵalara ŵangakhozga ŵanji
[Cithuzithuzi pa peji 30]
Ŵana na ŵalara ŵangakhozga ŵanji