Kasi Baibolo Lingamovwira Uyo Wali na Nthenda Yambura Kukonda Munkhwala?

Ivyo Baibolo likuyowoya

Enya. Chiuta wakupwelelera awo ŵakumusopa para ŵakulwara. Baibolo likuti uyo wakumusopa, ‘Yehova wamufukatirenge pa bedi ilo wakulwalira.’ (Salmo 41:3) Usange mukulwara matenda ghambura kukonda munkhwala pali vinthu vitatu ivyo mungachita:

1. Lombani kuti muzizipizge. Para mwalomba, “mtende wa Chiuta uwo ukuluska maghanoghano ghose,” umovwiraninge kuti muleke kufipa mtima chomene, na kuzizipizga.—Ŵafilipi 4:6, 7.

2. Kukhalira kudandawura yayi. Baibolo likuti: “Mtima wakusangwa ni munkhwala uwemi, kweni mtima wambura kusangwa ukomizga viwangwa.” (Zintharika 17:22) Musekengeko nyengo zinyake. Ivi vimovwiraninge kuti muleke kuŵa na chitima chomene, kweniso kuti mujipulikengeko makora.

3. Gomezgani ivyo Chiuta wayowoya. Usange muli na chigomezgo, mukondwenge nangauli mukulwara. (Ŵaroma 12:12) Baibolo likuti: “Pazamuŵavya munthu wakukhala mu charu uyo wazamuti: ‘Nalwara.’” (Yesaya 33:24) Chiuta wazamuchizga matenda ghose agho ŵanthu ŵakutondeka kuchizga. Pa nkhani ya uchekuru Baibolo likuti: ‘Thupi lake liŵe lakunyilirika kuluska la uwukirano wake, wawelere ku mazuŵa gha uwukirano wake apo wakaŵa wankhongono.’—Job 33:25.

Manyani kuti: Ŵakaboni ŵa Yehova ŵakumanya kuti Chiuta wakovwira para munthu wakulwara matenda ghambura kukonda munkhwala. Kweni usange ŵalwara matenda agha ŵakuluta ku chipatala kuti ŵakawovwirike. (Mariko 2:17) Iwo ŵakuphalira munthu chakuchita yayi pa nkhani ya munkhwala; munthu wakusankha yekha.