Kasi Mukukumbuka?
Kasi mwaŵazgapo magazini gha Gongwe la Mulinda gha sonosono apa? Yezgani kuzgora mafumbo agha:
• Kasi Olivétan wakaŵa njani, ndipo cifukwa wuli tikwenera kunweka na mulimo wake?
Pakwamba, munthu uyu wakamanyikwanga na zina lakuti Pierre Robert. Pa nyengo iyo ŵanji ŵakasuskanga visambizgo vya chalichi la Katolika mu vilimika vya m’ma 1500, Olivétan wakang’anamura Baibolo mu Cifurenci. Mu Baibolo lake wali kulembamo mazgu ghakuti “ŵalaŵiliri” m’malo mwa “bishopu” na “mpingo” m’malo mwa “chalichi.” M’malo ghanyake, wali kuwezgeramo zina la Ciuta lakuti “Yehova.”—9/1, peji 18-20.
• Kasi Ciuta wakang’anamurangaci apo wakaphaliranga fuko la Levi kuti: “Ine ndine phande lako”?
Mafuko ghanyake ghose gha Israyeli ghakapika malo kuŵa ciharo cawo, kweni Ŵalevi Yehova ndiyo wakaŵa “phande” lawo . (Maŵa. 18:20) Ŵalevi ŵakapokako yayi ciharo ca malo, cifukwa ŵakaŵa na mulimo wapadera. Kweni Yehova wakaŵapanga vyakukhumbikwa. Mazuŵa ghano napo, awo ŵakulutiska panthazi vinthu vya Ufumu ŵangaŵa na cigomezgo cakuti Yehova waŵapenge vyakukhumbikwa pa umoyo.—9/15, peji 7-8, 13.
• Kasi tikumanya wuli nyengo iyo Ŵababuloni ŵakathereskera Yerusalemu?
Ŵakusanda mdauko ŵakuyowoya vyakupambanapambana vyakukhwaskana na mathemba gha Babuloni. Ndipouli, nkhwantha zikuzomerezga kuti Sayirasi II wakathereska Babuloni mu 539 B.C.E., ilo ni deti lakuzirwa. Ŵayuda ŵakawombokwa na kuwelera ku caru cawo ca m’ma 537 B.C.E. Baibolo likuti ŵakakhala ku wuzga vilimika 70. Ntheura, Yerusalemu wakwenera kuti wakabwangandulika mu 607 B.C.E. (2 Mid. 36:21, 22; Yer. 29:10; Dan. 9:1, 2)—10/1, peji 26-31.
• Nchivici cingawovwira Mkhristu kumanya mtundu wa vyakusanguluska vyakwenelera?
Kuti timanye usange vyakusanguluska ivyo tikukhumba ni vyacandulo ndiposo ni vyakwenelera mu maso gha Ciuta, tikwenera kujifumba kuti: Kasi vikusazgapo vici? Namucita pawuli? Namuŵa na anjani?—10/15, peji 9-12.
• Cifukwa wuli kufumiska nthumbo nkhwananga?
Umoyo ngwakupatulika kwa Ciuta ndipo wakuwona mwana uyo wali mu nthumbo kuti ni munthu. (Sal. 139:16) Kufumiska nthumbo kukuyana waka na kukoma, nga umo tikuwonera mu Dango kuti munthu wakaŵanga na mulandu usange wapweteka mwana uyo wali mu nthumbo. (Ex. 21:22, 23)—11/1, peji 6.
• Kasi lemba la Zintharika 7:6-23 likutovwira wuli kuti tileke kuwonelera vinthu vyamuziro?
Lemba ili likuyowoya za muwukirano uyo wakendanga uko kukakhalanga mwanakazi muzaghali. Muwukirano uyu wakakopeka. Mazuŵa ghano napo, tingacita makora kuleka kujura mawebusayiti agho ghali na vinthu vyamuziro, ndipo nchakuzirwa comene kulomba wovwiri kwa Ciuta pambere tindajure Intaneti.—11/15, peji 9-10.
• Kasi caru capasi ciponenge mu 2012?
Cifukwa ca kalendara ya Maya, ŵanthu ŵakugomezga kuti caru capasi cimalenge ca kuumaliro wa cilimika ca 2012. Kweni ivi vingacitika yayi, cifukwa Yehova wakalenga caru capasi kuti ciŵenge cakukhalamo. Baibolo likuti caru cikhalilirenge muyirayira. (Muph. 1:4; Yes. 45:18)—12/1, peji 10.
• Kasi mbalembi mba ŵa Baibolo awo ŵakaŵapo pa Pentekoste wa mu 33 C.E.?
Vikuwoneka kuti ŵalembi 6 ŵa Malemba Ghacigiriki ŵakaŵapo. Ŵatatu ŵa iwo ni Mateyu, Yohane, na Petrosi. Kweniso ŵanung’una ŵaŵiri ŵa Yesu, Yakobe na Yuda. Ndipo nchakuwonekerathu kuti Mariko nayo wakaŵapo.—12/1, peji 22.