Kasi Baibolo Likuti Wuli pa Nkhani ya Kufumiska Nthumbo?

Ivyo Baibolo likuyowoya

Baibolo likugwiliskira ntchito yayi lizgu lakuti “kufumiska nthumbo” para likuyowoya vya kukoma mwana uyo wandababike. Kweni pali malemba ghanandi agho ghangatovwira kumanya umo Chiuta wakuwonera umoyo wa munthu, kusazgapo mwana uyo wandababike.

Umoyo ntchawanangwa chakufuma kwa Chiuta. (Genizesi 9:6; Salimo 36:9) Iyo wakuwona kuti umoyo wa chinthu chilichose ngwakuzirwa chomene kusazgapo umoyo wa mwana uyo wandababike. Ntheura uyo wakukomera dala mwana uyo wandababike, wali na mulandu wa kukoma munthu.

Dango ilo Chiuta wakapeleka ku Ŵaisrayeli likatenge, “usange ŵanalume ŵakutimbana ndipo ŵapweteka mwanakazi wanthumbo ndipo wababa mwana wambura kukwana myezi, kweni pandachitike nyifwa, munthu uyo wamupweteka walipire ivyo mfumu wa mwanakazi wayowoyenge. Walipire kwizira mu ŵeruzgi. Kweni usange pachitika nyifwa, wapeleke umoyo pa umoyo.”—Ekisodo 21:22, 23.a

• Kasi umoyo wa munthu ukwamba pawuli?

• Kasi Chiuta wangamugowokera munthu uyo wakafumiskapo nthumbo?

• Kasi nkhwananga kufumiska nthumbo para umoyo wa mama panji mwana uli pangozi?

Kasi umoyo wa munthu ukwamba pawuli?

Chiuta wakuwona kuti umoyo wa munthu ukwamba para mama watora waka nthumbo. Baibolo likuti Chiuta wakuwona kuti mwana uyo wandababike ni munthu. Wonani viyelezgero ivi ivyo vikulongora kuti Chiuta wakuwona kuti umoyo wa mwana uyo wandababike ukuyana waka na wa uyo wababika kale.

• Davide wakalemba kuti: “Maso ghinu ghakaniwona nkhati namba waka kupangika mu nthumbo.” (Salimo 139:16) Chiuta wakamanyanga kuti Davide wakaŵa munthu nanga ni apo wakaŵa mu nthumbo ya anyina.

• Kweniso Chiuta wakamanyirathu kuti Yeremiya wazamuŵa na udindo wapadera pambere iyo wandababike. Chiuta wakati kwa Yeremiya: “Pambere nindakupange iwe mu nthumbo nkhakumanya, uchali undababike nkhakutuŵiska. Nkhakwimika kuŵa ntchimi ku ŵamitundu.”—Yeremiya 1:5.

• Luka uyo wakalembako Baibolo kweniso uyo wakaŵa dokotala, wakagwiliskira ntchito lizgu la Chigiriki ilo lili kung’anamulika kuti “bonda” pakuyowoya vya mwana uyo wandababike na uyo wababika kale.—Luka 1:41; 2:12, 16.

Kasi Chiuta wangamugowokera munthu uyo wakafumiskapo nthumbo?

Enya, chikuru wasintha na kwamba kuwona umoyo umo Chiuta wakuwonera, ndipo wakweneraso yayi kujiyimba mulandu. Baibolo likuti: “Yehova ngwalusungu na wachiwuravi. . . . Umo uliri utali kufuma kumafumiro gha dazi kuya kumanjiliro gha dazi, ndimo waŵikira maubudi ghithu kutali na ise.”b (Salimo 103:8-12) Yehova wakugowokera zakwananga za ŵanthu wose, kusazgapo awo ŵakafumiskapo nthumbo, chikuru ŵapera zanadi.—Salimo 86:5.

Kasi nkhwananga kufumiska nthumbo para umoyo wa mama panji mwana uli pangozi?

Kuyana na ivyo Baibolo likuyowoya vyakukhwaskana na umoyo wa mwana uyo wandababike, kungaŵa kwananga kukuru chomene para mama wangafumiska nthumbo chifukwa chakuti umoyo wake panji wa mwana uyo wandababike uli pangozi.

Wuli usange panyengo yakubaba vyamanyikwa kuti mukwenera kusankha chimoza, umoyo wa mwana uyo wandababike panji wa mama? Para vyaŵa nthena, waliyose wakwenera kusankha yekha chakuchita.