Fumbo Laciŵiri: Kasi Cizamucitika Nchivici Para Nafwa?

APO ROMAN wakaŵa wacali mucoko, mubwezi wake wakafwa galimoto yati yamuganda. Iyo wakati: “Nyifwa ya mubwezi wane yikanikhwaska comene. Nangauli pajumpha vyaka vinandi kufuma apo ngozi iyi yikacitikira, kweni nkhujifumba kuti kasi nchivici cikucitika para tafwa?”

Cifukwa wuli ŵanthu ŵakufumba fumbo ili?

Mwakawiro, munthu wakukhumba yayi kufwa, nanga wangacekura wuli. Ŵanandi ŵakopa ico cikucitika para munthu wafwa.

Kasi ŵanji ŵakuti cikucitika nchivici?

Ŵanandi ŵakugomezga kuti para munthu wafwa cinthu cinyake mu thupi lake cikulutilira kuŵa camoyo. Ŵakuti ŵanthu ŵawemi ŵakuluta kucanya kukapokera njombe, apo ŵaheni ŵakupika cilango camuyirayira pa viheni ivyo ŵakacita. Kweni ŵanyake ŵakughanaghana kuti para munthu wafwa wakuŵakoso yayi ndipo wakuluwikirathu.

Kasi mazgoro agha ghakulongoraci?

Zgoro lakwamba likulongora kuti munthu wakufwa nadi yayi. Laciŵiri likulongora kuti umoyo ulije candulo. Awo ŵali na ghanoghano laciŵiri ili ŵakwendera waka fundo yakuti: “Tiyeni tirye na kumwa, cifukwa macero tifwenge.”—1 Ŵakorinte 15:32.

Kasi Baibolo likusambizgaci?

Baibolo likusambizgapo yayi vyakuti para munthu wafwa cinthu cinyake mu thupi lake cikulutilira kuŵa camoyo. Ciuta wakaphalira Themba Solomoni kulemba kuti: “Ŵamoyo ŵakumanya kuti ŵafwenge, kweni ŵakufwa kuti ŵakumanya kanthu cara.” (Mupharazgi 9:5.) Para munthu ‘wakumanya kanthu cara’ wangamanya yayi ivyo vikucitika. Wakupulika yayi panji kucita kalikose. Ntheura, ŵanthu ŵakufwa ŵangawovwira ŵamoyo panji kuŵapweteka yayi.

Mwakupambana na ivyo ŵanthu ŵakugomezga, ni khumbo la Ciuta yayi kuti taŵanthu tifwenge. Iyo wakalenga munthu wakwamba, Adamu kuti wakhalenge na umoyo kwamuyirayira pa caru capasi. Nyengo yakwamba iyo Ciuta wakazunura vya nyifwa, ni apo wakaphaliranga Adamu za cilango ico wazamupika para watondeka kupulikira. Ciuta wakakanizga Adamu kurya cipambi ca khuni linyake ndipo wakamucenjezga kuti para warya, ‘wafwenge nadi.’ (Genesis 2:17) Adamu na Eva ŵapulikirenge, mphanyi iwo pamoza na ŵana ŵawo ŵakugomezgeka ŵakakhala pa caru capasi kwamuyirayira.

Adamu ŵakasankha kuleka kupulikira cenjezgo la Ciuta. Ntheura wati watondeka kupulikira, wakananga ndipo wakafwa. (Ŵaroma 6:23) Palije cinthu mu thupi la Adamu ico cikalutilira kuŵa camoyo wati wafwa. M’malo mwake wati wafwa, Adamu kukaŵavya. Ciuta wakaphalira Adamu kuti: “Tiuryenge kurya thukuta pa cisko cako usuke uwelere ku fuvu, cifukwa ukatoleka mwenemumo; ndiwe fuvu, ndipo ku fuvu tiuwelereko.” (Genesis 3:19) Pakuti tose tili kufuma mwa Adamu, ntheura tili kuhara kwananga na nyifwa kufuma kwa iyo.—Ŵaroma 5:12.

Nangauli Adamu wakasankha mwambura mahara, kweni Ciuta wazamufiska khumbo lake lakuti caru cizure na ŵanthu ŵakufikapo. (Genesis 1:28; Yesaya 55:11) Sonosono apa, Ciuta wazamuwuska ŵanthu ŵanandi awo ŵali kufwa. Pakuyowoya za ivyo vizamucitika pa nyengo iyo, mpositole Paulosi wakati: “Kuzamuŵa ciwuka ca ŵarunji na ŵambura urunji wuwo.”—Milimo 24:15

Roman uyo wazunulika mu nkhani iyi, wakamba kusambira Baibolo ndipo wakamanya ivyo likusambizga pa nkhani ya nyifwa kweniso Yehova Ciuta. Ivyo wakasambira vikamovwira comene. Ŵazgani nkhani yake pa peji 11 mu magazini iyi.

Kuti mumanye vinandi pa ico cikucitika para munthu wafwa, wonani cipaturo 6 ca buku lakuti, Kasi Baibolo Likusambizgaci Comenecomene? Mungalisangaso pa www.jw.org

Kasi Yesu Wakayowoyaci pa Nkhani ya Nyifwa?

Yesu wakakolerana nawo yayi ŵalongozgi ŵa visopa ŵa mu nyengo yake awo ŵakatenge kulije ciwuka. (Luka 20:27) Ndipo wakasambizgapo yayi kuti cigaŵa cinyake ca thupi la munthu cikulutilira kuŵa camoyo para wafwa. Kweni Yesu wakasambizga fundo zakulondezgapo izi.

Nyifwa yikuyana na kugona tulo. Apo Lazaro uyo wakaŵa mubwezi wake wakafwa, Yesu wakati: “Lazaro mubwezi withu waya kukapumura, kweni ine nkhuya kwenekura kukamuwuska mu tulo.” Ŵasambiri ŵakapulikiska yayi ico Yesu wakang’anamuranga. Iwo ŵakati: “Fumu, usange waluta kukapumura, waŵenge makora.” Baibolo likuti: “Yesu wakayowoya vya nyifwa yake. Kweni ŵakatenge wakuyowoya vya kupumura mu tulo. Ntheura, pa nyengo yira, Yesu wakaŵaphalira pakweru kuti: ‘Lazaro wali kufwa.’”—Yohane 11:11-14.

Ŵakufwa ŵazamuwuskika. Yesu wakati wafika kwawo kwa Lazaro, wakapembuzga Marita mudumbu wa Lazaro, wakati: “Mudumbu wako wawukenge.” Ndipo Yesu wakamusimikizgira kuti: “Ndine ciwuka na umoyo. Uyo wakupulikana mwa ine, nanga wafwe, waŵenge wamoyo.” Yesu wakayowoyangapo waka yayi. Wakamuwuska nadi Lazaro pamaso pa ŵanthu ŵanandi, nangauli pakajumpha mazuŵa ghanayi wati wafwa.—Yohane 11:23, 25, 38-45.

Mu mboniwoni iyo Yesu wakalongora mpositole Yohane, wakalayizgaso kuti ŵakufwa ŵazamuwuka. Wakalongosora kuti nyengo yikwiza apo nyifwa yizamupeleka wose awo ŵakaŵa ŵazga ŵake.—Uvumbuzi 20:13.