Kasi Cilato ca Khisimasi Nchakuti Wuli?
Munthu munyake wakati: ‘Ŵanthu ŵakutangwanika comene pa nyengo ya maholide. Maholide agha ŵanthu ŵakughatora nga ni dango lakuti waliyose wacitenge. Ndipo cifukwa cakuti ŵakutangwanika, ŵakuŵa na nyengo yicoko yakucezga na mbumba kweniso ŵabwezi ŵawo. Ntheura, m’malo mwa kukondwa, nyengo zinyake tikwenjerwa comene na ivyo vikucitika.’—FORMER OKLAHOMA [U.S.A.] GOVERNOR BRAD HENRY, DISEMBALA 23, 2008.
PARA nyengo ya Khisimasi yikusendelera, ŵanthu ŵakukondwa na zisumu, mafilimu, na mapulogiramu gha pa TV. Ivi ndivyo vikupangiska kuti nyengo iyi yiŵe yakukondweska. Kasi mukughanaghana kuti nchifukwa wuli ŵanthu ŵakukondwelera Khisimasi? Kasi nchifukwa ca kukhumba
● Kukumbukira Yesu Khristu?
● Kukondwa cifukwa ca kugaŵana vinthu na ŵanji?
● Kovwira ŵakusuzgika?
● Kucezga na mbumba?
● Kovwira kuti paŵe mtende?
Mwakukolerana na ivyo Henry uyo wazunulika kumazere uku wakayowoya, ŵanandi awo ŵakukondwelera Khisimasi, ŵakufiska yayi nanga nchimoza ca ivyo vyazunulika pacanya apa pa nyengo ya Khisimasi. Kanandi pa nyengo ya Khisimasi ŵanthu ŵakutangwanika comene, ŵakwenjerwa kweniso ŵakutangwanika comene na malonda. Kwambura Khisimasi, kasi ŵanthu ŵangakondwa na kutemwana yayi?
Baibolo likuticiska nadi kuti tikumbukirenge Yesu Khristu, tipenge kwawanangwa, tiwovwirenge ŵakusuzgika, kweniso tiŵenge na nyengo yakucezga na mbumba zithu. Likutisambizgaso umo tingacitira kuti tiŵe pa mtende na ŵanji. Ntheura, nkhani za kulondezgapo izi zikulongosora vifukwa ivyo ŵanji ŵakulekera kukondwelera Khisimasi yayi,a kweni zizgorenge mafumbo agha:
● Cifukwa wuli ŵanthu ŵakukondwelera Khisimasi?
● Cifukwa wuli ŵanthu ŵakutondeka kufiska cilato ca Khisimasi?
● Kasi ni fundo wuli za mu Baibolo izo zawovwira ŵanthu ŵanandi kusanga cinthu ciwemi cakuluska Khisimasi?
[Mazgu ghamusi]
a Kuti mumanye vifukwa vya mu Baibolo ivyo ŵanji ŵakulekera kukondwelera Khisimasi, wonani nkhani yakuti “Ŵaŵazgi Ŵithu Ŵakufumba Kuti—Cifukwa wuli Ŵanji ŵakukondwelerako yayi Khisimasi?” pa peji 10.
[Cithuzithuzi pa peji 3]