Chifukwa Wuli Ŵakaboni ŵa Yehova Ŵakuchitako yayi Khisimasi?
Ivyo ŵanthu ŵakuyowoya
Utesi: Ŵakaboni ŵa Yehova ŵakumugomezga yayi Yesu, lekani ŵakukana kuchitako Khisimasi.
Unenesko: Ŵakaboni ŵa Yehova Mbakhristu. Ŵakugomezga kuti munthu wazamupona kwizira mwa Yesu Khristu pera.—Milimo 4:12.
Utesi: Ŵakaboni ŵa Yehova ŵakutimbanizga mabanja chifukwa ŵakusambizgana kuti kuchitako Khisimasi nkhwananga.
Unenesko: Ŵakaboni ŵa Yehova ŵakuwona kuti mabanja ngakuzirwa. Ndipo Baibolo likuŵawovwira kukhozga mabanja.
Utesi: Ŵakaboni ŵa Yehova ŵakunoreka vinandi ivyo vikuchitika pa Khisimasi. Pakuŵa mtende, kupana vinthu, kurya, na kukhumbirana viwemi.
Unenesko: Ŵakaboni ŵa Yehova ŵakupeleka vyawanangwa nyengo yiliyose, ndipo mbanthu ŵamtende. (Zintharika 11:25; Ŵaroma 12:18) Pakusopa na pakupharazga, ŵakulondezga ivyo Yesu wakayowoya. Wakati: “Mukapokera kwawanangwa, pelekani kwawanangwa.” (Mateyu 10:8) Ŵakugomezga kuti Ufumu wa Chiuta ndiwo uzamwiza na mtende weneko.—Mateyu 10:7.
Chifukwa icho ŵakulekera kuchitako Khisimasi.
Yesu wakayowoyapo yayi vyakuti tikumbukirenge kubabika kwake, kweni wakati tikumbukirenge nyifwa yake.—Luka 22:19, 20.
Ŵasambiri ŵa Yesu ŵakachitangako yayi Khisimasi. Buku linyake likuti: Ŵanthu ŵakamba kuchita Khisimasi kwambira 243 C.E. kuya munthazi. Pa nyengo iyi, ŵapositole wose ŵakaŵa kuti ŵafwa.—New Catholic Encyclopedia.
Palije ukaboni wakuti Yesu wakababika pa 25 December. Deti ilo Yesu wakababikira mu Baibolo mulije.
Khisimasi yikamba na visopa vyautesi, ntheura Chiuta wangayizomerezga yayi.—2 Ŵakorinte 6:17.
Chifukwa wuli kuleka kuchitako Khisimasi ni nkhani yikuru?
Ŵanthu ŵanandi ŵakumanya kuti Khisimasi yikamba na visopa vyautesi, kweniso kuti mu Baibolo mulije. Kweni ŵakuchita. Iwo ŵakuwona kuti palije suzgo kuti Mkhristu wachiteko Khisimasi. Kweni chifukwa wuli iyi ni nkhani yikuru?
Baibolo likuti tigwiliskirenge ntchito ‘nkhongono yithu ya kughanaghana.’ (Ŵaroma 12:1, 2) Kweniso likuti tisopenge Chiuta mu unenesko. (Yohane 4:23, 24) Ntheura Ŵakaboni ŵa Yehova ŵakulondezga ivyo Baibolo likuyowoya. Ŵakwendera fundo za ŵanthu yayi.
Nangauli Ŵakaboni ŵa Yehova ŵakuchitako yayi Khisimasi, kweni ŵakumanya kuti waliyose wakwenera kusankha yekha chakuchita pa nkhani iyi. Ŵakunjilirapo yayi para ŵanthu ŵakuchita Khisimasi chifukwa ŵakumanya kuti ni wanangwa wawo.