Sendelerani Kwa Ciuta
Kasi Zina linu lilimo mu Buku la Ciuta “la Cikumbusko”?
KASI Yehova wakuŵawona ŵateŵeti ŵake awo ŵakufwilirapo kumukondweska? Enya. Kweni wakuwona vinandi padera pa milimo iyo ŵakucita pakumusopa na kumulumba. Yehova wakuwona nanga nipara ŵateŵeti ŵake ŵakumulumba mu maghanoghano. Cakuzirwa comene nchakuti Yehova wazamuluwapo yayi ŵanthu ŵake na ivyo ŵacita. Kasi tingasimikizga wuli fundo iyi? Zgoro likusangika mu mazgu agho nchimi Malaki yikalemba.—Ŵazgani Malaki 3:16.
Mu vilimika vya m’ma 400 B.C.E., apo nchimi Malaki yikacimanga, nkharo za ŵanthu kweniso mu visopa vinthu vikafika paheni comene mu Israyeli. Ŵasofi ŵakaleka nchito yawo ndipo ŵanthu ŵakamba kucita vinthu vyakuyuyura Ciuta nga nkhuwukwa, mauleŵi, na upusikizgi. (Malaki 2:8; 3:5) Nangauli vikaŵa nthena, kweni pakaŵa Ŵaisrayeli ŵanji awo ŵakalutilira kugomezgeka. Kasi ŵakacitanga vici?
Malaki wakati: “Awo ŵakumopa Ciuta ŵakayowoyanga, munthu uyu ku munyake.” Kopa Yehova nchinthu cakuzirwa comene. Apa Malaki wakuyowoya za Ŵaisrayeli awo ŵakacindikanga comene Ciuta, awo ŵakakhumbanga yayi kumukwiyiska. Wonani kuti awo ŵakamopanga Ciuta “ŵakayowoyanga munthu uyu ku munyake.” Ici cikung’anamura kuti ŵakadumbiskananga kumulumba Yehova kweniso kukhwimiskana kuti ŵaleke kugongoweskeka na nkharo ziheni izo zikazara pa nyengo iyo.
Ŵaisrayeli ŵakugomezgeka ŵakalongora kuti ŵakucindika comene Yehova mu nthowa yinyake yakuzirwa: ‘Ŵakalangurukanga pa zina lake.’ Baibolo linyake pa mazgu agha likuti “kucindika zina Lake.” Ŵanthu ŵakopa Ciuta aŵa, ŵakamucindikanga Yehova nanga ni mu ivyo ŵakaghanaghananga. Ŵakaghanaghaniranga vya kulumba Yehova kweniso ŵakalangurukanga pa zina lake likuru. Kasi Yehova wakamanyanga ivyo ŵakacitanga?
Malaki wakati: ‘Yehova wakategherezganga, na kupulika.’ Nangauli Yehova wali kucanya, kweni wakutegherezga na kupulika lizgu lililose la kumulumba ilo ŵateŵeti ŵake ŵangayowoya ku yumoza na munyake. Wakumanyaso na ivyo ŵakulanguruka para ŵali kwa ŵekha. (Salmo 94:11) Kweni wakucitaso vinandi padera pa kumanya viwemi ivyo ŵateŵeti ŵake ŵakuyowoya na kughanaghana.
Malaki wakati: “Buku la cikumbusko likasimbika pamaso pake.” Buku ili lili na mazina gha wose awo ŵateŵetera Yehova mwakugomezgeka. Wonani kuti likucemeka “buku la cikumbusko.”a Ici cikulongora kuti Yehova wazamuluwa yayi ŵateŵeti ŵake ŵakugomezgeka pamoza na vyose ivyo ŵacita pa kumulumba. Mwaciyelezgero, wazamuluwa yayi milimo yawo yose yiwemi, mazgu, kweniso maghanoghano ghawo ghawemi. Kweni pali cifukwa ico Ciuta wakuŵakumbukira ŵateŵeti ŵake. Iyo walayizga kuti wazamuŵapa umoyo wamuyirayira wose awo mazina ghawo ghali kulembeka mu buku la cikumbusko.b—Salmo 37:29.
Nchakukhozga comene kumanya kuti Yehova wakuzirwiska vyose ivyo tikucita kuti timusopenge munthowa iyo wakuzomerezga. Mazgu gha pa Malaki 3:16 ghakuticiska kuti tikwenera kughanaghanirapo comene umo ubwezi withu na Yehova uliri. Tingacita makora kujifumba kuti, ‘Kasi zina lane lilimo mu buku la Ciuta “la cikumbusko”?’ Lingaŵamo pekha para tikufwilirapo kucita, kuyowoya na kughanaghana munthowa yakuti Yehova wangatikumbuka.
Vipaturo Ivyo Mungaŵazga mu Disembala:
[Mazgu ghamusi]
a Mu Cihebere lizgu lakuti “cikumbusko,” likung’anamura vinandi kuluska kukumbukira waka cinthu cinyake. Likung’anamuraso kucitapo kanthu pa cinthu ico munthu wakukumbukira.
b Kuti mumanye vinandi pa layizgo la Yehova la umoyo wamuyirayira, wonani cipaturo 3 ca buku lakuti Kasi Baibolo Likusambizgaci Comenecomene? lakupharazgika na Ŵakaboni ŵa Yehova.