MUTU WA PA CIKOPI: KASI TIKUSAMBIRAKO VICI KWA MOZESI
Kasi Mozesi Wakaŵa Njani?
Kasi mu maghanoghano ghinu mukwiza vici para mwapulika zina lakuti Mozesi? Kasi mukughanaghana vya . . .
bonda uyo a mama ŵake ŵakamubisa mu citete ku Mlonga wa Nile?
msepuka uyo wakalelekera mu nyumba ya usambazi na mwana msungwana wa Faro kweni wakaluwa yayi kuti ni Muisrayeli?
munthu uyo wakakhala ku Midiyani kwa vyaka 40 nga ni muliska wa viŵeto?
munthu uyo wakayowoyeskana na Yehovaa pafupi na civwati ico cikagoleranga moto?
munthu uyo wakapempha themba la ku Eguputo mwacikanga kuti lifwature Ŵaisrayeli ku wuzga?
munthu uyo mwakulongozgeka na Ciuta wakalangura vilengo khumi kuti vitimbe caru ca Eguputo cifukwa cakuti themba lawo likayuyura Ciuta waunenesko?
munthu uyo wakadangilira Ŵaisrayeli pakufuma ku Eguputo?
munthu uyo Ciuta wakamugwiliskira nchito kugaŵa maji pa Nyanja Yiswesi?
munthu uyo wakapeleka ku Ŵaisrayeli malango khumi ghakufuma kwa Ciuta?
MOZESI wakacita vyose ivi na vinyake. Lekani mwanalume wakugomezgeka uyu wakucindikika comene na Ŵakhristu, Ŵayuda kweniso Ŵasilamu.
Mozesi wakaŵa nchimi iyo yikalongora ‘nkhongono zakofya.’ (Duteronome 34:10-12) Wakazomerezga kuti Ciuta walongore nkhongono zake kwizira mwa iyo. Ndipouli Mozesi wakaŵa munthu waka. Nga ni nchimi Eliya, Mozesi nayo wakaŵa “munthu nga ndise.” (Yakobe 5:17; Mateyu 17:1-9) Nga ndise, Mozesi nayo wakasangana na masuzgo ghanandi ndipo wakamarana nagho.
Kasi mungatemwa kumanya ico cikamovwira? Wonani mikhaliro yiwemi yitatu iyo Mozesi wakalongora kweniso ivyo tingasambirako kwa iyo.
a Yehova ni zina la Ciuta nga umo Baibolo likuyowoyera.