“Lutilirani Kulomba, Ndipo Kupikenge kwa Imwe”

“Fumu, mutisambizge kulomba.” (Luka 11:1) Yumoza wa ŵasambiri ŵa Yesu ndiyo wakapempha pempho ili. Pakuzgora Yesu wakayowoya viyelezgero viŵiri ivyo vikutisambizga umo tikwenera kulombera kuti Ciuta wapulike. Para namwe muli kukayikirapo usange Ciuta wakupulika malurombo ghinu, mukondwenge comene na ivyo Yesu wakazgora.—Ŵazgani Luka 11:5-13.

Ciyelezgero cakwamba cikuyowoya za uyo wakulomba. (Luka 11:5-8) Ciyelezgero ici cikulongosora za munthu uyo wapokera mulendo usiku ndipo walije cakurya cakuti wamupe. Kwa munthu uyu, nkhani iyi njakuzirwa. Nangauli ni usiku, wakuluta ku nyumba ya mubwezi wake kuti wakabwereke vingwa. Pakwamba mubwezi wake wakuzerezga kuwuka cifukwa iyo pamoza na mbumba yake ŵakugona. Kweni cifukwa cakuti iyo wakosera kupempha, paumaliro mubwezi wake wakuwuka na kumupa ivyo wakukhumba.a

Kasi ciyelezgero ici cikutisambizgaci pa nkhani ya lurombo? Yesu wakutiphalira kuti tikwenera kukosera kulomba, kupenja, na kukhung’uska. (Luka 11:9, 10) Cifukwa wuli? Kasi fundo ya Yesu yikung’anamura kuti Ciuta wakucedwa kupulika malurombo? Yayi. Fundo ya Yesu njakuti mwakupambana na mubwezi uyo wakuzerezga, Ciuta ngwakukhumbisiska kuŵapa wovwiri wakwenelera awo ŵakulomba na cipulikano. Para tikukosera pakulomba tikulongora kuti tili na cipulikano. Para tikulutilira kulomba, tikulongora kuti tikucikhumba nadi cinthu ico tikulomba ndiposo kuti tikugomezga kuti Ciuta wangatipa usange cikukolerana na khumbo lake.—Mariko 11:24; 1 Yohane 5:14.

Ciyelezgero caciŵiri cikuyowoya za Yehova uyo ‘wakupulika malurombo’. (Salmo 65:2) Yesu wakafumba kuti: “Ni dada nju pakati pinu, uyo usange mwana wake wakumulomba somba, wamupenge njoka m’malo mwa somba? Panji usange wakumulombaso sumbi, wamupenge kalizga?” Zgoro ndakumanyikwirathu, palije dada wacitemwa uyo wangapa ŵana ŵake vinthu ivyo vingaŵapweteka. Pamasinda, Yesu wakalongosora ng’anamuro la ciyelezgero ici wakati: Usange ŵapapi ŵambura kufikapo ŵakupeleka “vyawanangwa viwemi” ku ŵana ŵawo, “ipo comene kwakuluska Ŵadada ŵakucanya ŵapelekenge mzimu utuŵa” ico nchawanangwa capacanya comene ku ŵana ŵake ŵa pa caru capasi awo ŵakumulomba.b—Luka 11:11-13; Mateyu 7:11.

Kasi ciyelezgero ici cikutisambizgaci za Yehova uyo ‘wakupulika malurombo’? Yesu wakuticiska kuti tiwonenge Yehova kuŵa Dada withu uyo ngwakunozgeka kupa ŵana ŵake ivyo ŵakukhumba. Nakuti awo ŵakusopa Yehova ŵakuŵa ŵanangwa kumupempha vya kumtima kwawo. Pakumanya kuti wakuŵakhumbira viwemi, ŵangapokelera na mtima wose mazgoro agho waŵapa nanga ghangapambana na ivyo ŵakhazganga.c