MAFUMBO GHAKUFUMIRA KU ŴAŴAZGI

Cifukwa wuli Yesu wakathiska masozi pambere wandawuske Lazaro, nga umo lemba la Yohane 11:35 likulongosolera?

Para munthu uyo tikumutemwa wafwa, mwakawiro tikulira cifukwa tiŵengeso nayo yayi. Nangauli Yesu wakamutemwanga comene Lazaro, kweni iyo wakathiska masozi cifukwa ca nyifwa ya Lazaro yayi. Nga umo nkhani yose yikulongosolera, wakathiska masozi cifukwa wakalengera lusungu ŵabali na ŵabwezi ŵa Lazaro awo ŵakaŵa na citima.—Yoh. 11:36.

Yesu wakati wapulika kuti Lazaro ni mulwari, wakaluta luŵiro yayi ku nyumba ya Lazaro kuti wakamucizge. Nkhani iyi yikuti: Yesu “wakati wapulika kuti [Lazaro] wakaŵa mulwari, wakakhala mazuŵa ghaŵiri mu malo agho wakaŵa.” (Yoh. 11:6) Cifukwa wuli Yesu wakacedwa? Wakaŵa na cilato ico wakacitira nthena. Iyo wakati: “Ulwari uwu umaliro wake ni nyifwa cara, kweni kuti Ciuta wapike ucindami, mwakuti Mwana wa Ciuta wapike ucindami kwizira mu uwu.” (Yoh. 11:4) Ulwari wa Lazaro “umaliro wake” ukaŵa nyifwa cara. Yesu wakakhumbanga “kuti Ciuta wapike ucindami” kwizira mu nyifwa ya Lazaro. Mwawuli? Yesu wakaŵa pafupi kucita munthondwe ukuru wa kuwuska mubwezi wake mu dindi.

Apo wakadumbiskananga na ŵasambiri ŵake nkhani iyi, Yesu wakayaniska nyifwa na tulo. Lekani wakaŵaphalira kuti, “nkhuya kwenekura kukamuwuska [Lazaro] mu tulo.” (Yoh. 11:11) Kwa Yesu, kuwuska Lazaro kukaŵa nga ni para mupapi wakuwuska mwana wake mu tulo. Ntheura pakaŵavya cifukwa cakuti nyifwa ya Lazaro pa iyo yekha yimucitiske citima.

Ipo cifukwa wuli Yesu wakathiska masozi? Nga umo tayowoyera kale, zgoro tikulisanga para tasanda nkhani yose. Yesu wati wakumana na Mariya, mudumbu wa Lazaro, pamoza na ŵanyake awo ŵakaliranga, “wakatampha mu mzimu ndipo wakakweŵeka.” Pakuwona kuti ŵakasuzgika mu mtima cifukwa ca citima, Yesu wakakweŵeka comene mwakuti “wakatampha mu mzimu.” Ndico cifukwa “Yesu wakathiska masozi.” Citima cikamukora comene Yesu wakati wawona kuti ŵabwezi ŵake ŵasuzgika na citima.—Yoh. 11:33, 35.

Nkhani iyi yikulongora kuti Yesu wali na nkhongono zakuwuskira ŵakutemweka ŵithu, ndipo wazamucita ivi mu caru ciphya ico cikwiza. Kweniso yikutovwira kumanya kuti Yesu wakucitira ciwuravi ŵanthu awo ŵabali ŵawo ŵafwa cifukwa ca kwananga kwa Adamu. Nkhani iyi yikutisambizgaso kuti tikwenera kucitira ciwuravi ŵanthu awo ŵakulira nyifwa ya ŵabali ŵawo.

Yesu wakamanya kuti wawuskenge Lazaro. Ndipouli, wakathiska masozi, cifukwa ca citemwa na ciwuravi ico wakaŵa naco ku ŵabwezi ŵake. Mwakuyana waka, ciwuravi cingaticiska kuti ‘tilire na ŵanthu awo ŵakulira.’ (Rom. 12:15) Para munthu wakulira cikulongora kuti walije cipulikano mu cigomezgo ca ciwuka yayi. Ipo nchakwenelera kuti Yesu wakalongora ciyelezgero ciwemi apo wakalongora ciwuravi ku ŵanthu awo mubali wawo wakatayika. Wakacita ici mwa kuthiska masozi nangauli wakaŵa pafupi kuwuska Lazaro.